Jon 10
10
Basef womun etina endalelemb sipsipi
1Ea' Jisas na'i, “Endilisi ae' a'ipipa, emi egafis owa' suwisi uta endalelemb sipsipi ma esis situ siwisi anagon, epes isima sanda' wali. 2Epen anama bu'unai nawisi utai, anan numafi sipsipi. 3Aman numafi utai nawisi'amana uta ma numafi sipsip. Amam sipsip mame' malogel ananinai. Anan nofala agofa sipsip ananimi, ea' nao'wam mawisi ande'. 4Nao'wa sipsip ananimi hiami mawisi ande' hi'alam ea' nali' nafe', amam magi'mana mafe'. Dei' main? Amam mogawa maf ananinai. 5Ea' sipsip ina magi'ma anona epen, owa'. Na'ama mondafa'mana mofa' mefe' atona etin. Dei' main? Amam ina mogawa maf ananinai, owa'.”
6Ea' Jisas na'ipasa basef womun etin na'ama, ea' esis ina sogawa basef ofagema, owa'.
Jisas aman bu'unai numafi sipsipi
7Ea' Jisas na'ipas wapoti' na'i, “Endilisi ae' a'ipipa, ae' si'i uta sipsip miawisanai. 8Amam fowa' mumafi sipsipi, amam hiami manda' wali ea' sipsip ina mame' maguf amamumi, owa'. 9Ae' si'i uta. Emi egafis siwisi ae' nomon, God nefa'as seatanimani. Esis suwis suwisi sea' gwa'aimi bu'wami. 10Amam makualifi ina mafi'i ma meanda' anona maol, owa'. Amam mafi'i ma makualef mohas saga' mohambombagas. Ae' afi'i ma ipe' peape andeande' ambal namunai nopeipa si'ipa endilisi. 11Ae' aman bu'uwei imafi sipsipi, a'i a'e ma eaga' ma iegiambama sipsip imafiam. 12I'i anona aman nenda' maola neafa' otamba atomi ma numafi sipsip amamai, anan okom ni'i nofa' otamba atom. Anan ina nambimb numafi sipsip andeande', owa'. Anan ina aman endilisi numafi sipsipi, owa'. Maina nemaf niti nombagw maitu aolupi mufi'i, anan umbamohana nokwaha sipsip atom mitu nofa' nefe'. Ea' nombagw amama muwis moha sipsip mofa' mefe' atona etin. 13Aman anama nanda' maola otamba atomi, nambimb niti nombagw amama mufi'i, ea' umbamohana nofa' nefe'. Dei' main, anan nanda' maola otamba atom, ea' nandaiwa' ma numafi sipsip andeande'.
14Ae' aman bu'uwei imafi sipsip andeande'i. Ae' egawa sipsip ae'ami ea' sipsip mogawa ae'. 15Ea' na'ama etin si'i Ahalome ae'anai negawa ae', ae' egawa anan. Ae' a'i a'e ma ega' iegiambama sipsip ae'ami. 16#Ais 56:8; Jo 11:52; 1 Pi 2:25; Esi 34:23; Esi 37:24Ae' anom sipsip maitu anagon. Amam ina maitu nomon endalelemb amama, owa'. Amam maitu endalelemb anagon. Ae' okom na'iam endilisi anona nemaf efa'am mifi'i mome' maf ae'anai ekolasom mitu endalelemb etifigin ea' ae' atowe imafiam. 17#Fl 2:8,9Ae' a'i ega' ma ieigiambama sipsip ae'ami ma nambimb ehafel eape namowe wapoti'. Amama atom Ahalome ae'anai okom nainaila ae' endilisi. 18#Jo 5:26; 14:31; Jo 19:11Ina anona aman noha ambal ae'anai ega', owa'etin. Okom ae'anai atona a'i nambimb eaga'. Ae' efa' agel lu'unai ma ega' eahafel wapoti'. Ahalome ae'anai na'ipi basef la'ifimi ea' a'i enda'am na'ama.”
19-20 # Jo 7:43 # Jo 7:20; 8:48 Esis Juda same' basef amama ea' sandawaloga biefis. Hiesi sa'i, “Ambagof awami mapaina ea' nahaga nagaol endilisi. Dei' maina ipe' pame' basef ananimi?”
21Ea' enis sa'i, “Anona aman ambagof awami mapainai ina na'i anom basef si'i anan na'iami, owa'. Anan ambagof awami mapainai, ina la'ifinama nenda' aman anama naep mase'anai niti wapoti', owa'etin.”
Esis Juda sanda' naumbih saloma Jisas
22-23Nogota anama nomanamb lu'wami mataga si'i asaf atona nalai, esis Juda sanda' anom gwa'aimi lu'wami ma seanda' lotu lu'unai gani Jerusalem.#Sanda' lotu anama, esis ukup mapoma fowa' gani sanda' ipat anama Godi hi'alana ea' sawis sanda' lotu. Ea' Jisas nafe' nawis ipat lu'unai Godi ilafunama fowa' gani Solomon nala'anai. 24#Ap 3:11; 5:12; Lu 22:67Ea' amam Juda mafi'i maitu malipana ma'i, “Ine' nanda' opalef afa'imi mataga nomonas biefim. Maina nemaf ni'ipafa alihim? I'i ine' Krais,#10:24 Diga Hibrui Krais na'i Mesaia.
dei' ni'ipafa basef alihim.”
25 # Jo 4:26; 5:36; Jo 10:38 Ea' Jisas nagwamama basef na'i, “Ae' a'ipipa ea', ipe' ina pembale'efa ae', owa'. Ae' anda' ikwaf hianai la'ifinai ma agel Ahalomei, ikwaf anama nihi'ambepa ae' emi egaliwi. 26#Jo 6:64; 8:45Ea' ipe' ina sipsip ae'ipai, owa'. Ipe' enipa sipsip. Na'ama dei' ipe' ina pembale'efa ae', owa'. 27#Jo 8:47; 10:3Sipsip ae'ami mame' maf ae'anai ea' egawa amam ea' amam maila ae'. 28#Jo 3:16, 6:39; Jo 18:9Ae' ase'am ambal namunai ma meape andeande' la'ela'ef hihif. Amam ina moga', owa'etin. Ina enin epen la'ifina neatagahom lagof ae'ami nefa'am, owa'etin. Amam mope lagof ae'ami la'ela'ef hihif.
29Ahalome ae'anai nase'e sipsip amama ae'ami. Ina enin epen anona nemaf la'ifina neatagahom lagel Ahalomei nefa'am, owa'etin. Dei' main, Ahalome ae'anai la'ifinai endilisi nikila' epes hiesi. 30Ae' aloma Ahalome, afa' biafa wape atotofa.”
31 # Jo 8:59 Ea' amam Juda mafe' mafela otamba wapoti' ma'i mokwahom mohana afuna.
32Ea' Jisas na'ipam na'i, “Ae' ihi'ambepa ikwaf hianai la'ifinai nataga Ahalomei ea' patolona. Ea' ukup ipe'imi mapoma maina ikwaf ae' ali' anda'anai dei' pa'i pekwaha otamba pehe?”
33 # Lev 24:16; Mt 26:65; Jo 5:18 Ea' amam Juda magwamana basef ma'i, “Afa' ina wakwaha otamba wa'i ohena nanda' ikwaf anama hianai, owa'. Ine' aman falafunai nanda' findiwa, na'i ine' etina God. Ea' afa' wa'i ohena otamba.”
34 # Sam 82:6 Ea' Jisas nagwamama basef na'i, “Anom basef Godi mail mi'uli ipe'inai ma'iam ma'i, God na'i,
‘Ae' a'ipipa ea' a'i, ipe' si'i anom god.’#Basef amama ma'i esis Juda fowa' gani sofa' mi'uli Godi ea' sataga epes Ananisi sanda' opeh Ananimi.
35-36 # Mt 5:18 Fowa' basef Godi mafe'ma epes isima ma'i, ‘God na'i, ipe' atona etin si'i god.’ Basef amama ina malo, owa'. Mape la'ela'ef mandawalap endilisi. Ahalome ae'anai atona nesahe'e nanda'e ape bo'wawe ananiwei atowe nasapa'e afi'i etap anae'. Ea' a'i ae' Nogalomana ananiwei. Dei' maina ipe' pa'i ae' anda' God findiwana? 37I'i ae' ina anda' maol Ahalome ae'anai, andeande'ma ipe' pindaiwa' ma pembale'efa ae'. 38#Jo 14:10,11I'i ae' enda' maol ananinai ma i'i ipe' owa' peambale'efa ae', hapaimi. Ipe' piti ikwaf la'ifinai anda'anai, ea' pegawa Ahalome nape nalome, ape alomana.”
39 # Lu 4:30; Jo 8:59 Ea' amam Juda ma'i mombalo'ana ma mowa'ana. Owa'etin. Anan nakwahom ea' nafe'.
40Ea' Jisas notanima nambo walemb Jordan fisana nafe' nataga anama fowa' dambadamba Jon napisi'as embel ea' nape anama. 41Ea' amam nematawa hiesi safi'mai anan. Esis sa'i, “Jon owa' nonda' anona ikwaf la'ifinai, ea' basef ananimi hiami na'iama Jisas, amama endilisimi atom.”
42Ea' amam nematawa hiesi sombale'efa Jisas anama.
Currently Selected:
Jon 10: aojF
Highlight
Share
Copy
Want to have your highlights saved across all your devices? Sign up or sign in
© 2013, Wycliffe Bible Translators, Inc. All rights reserved.
