Luk 13
13
Ipe' pemboma opalef pekwaha waf aonai. I'i owa', a pega'.
1Nemaf anama atona enis epes sape sa'ipa Jisasa enis epes Galilisi. Nemaf anama fowa' esis sape sondolalima God sanda' ofa etin, gavman dembinai Pailat nahas saga'. 2Ea' Jisas nagwamasa basef na'i, “Ipe' ukup mandanda'mas ma'i epes isima sa'i sikila' enis epes Galilisi sanda' waf aonai, ama ofagema amama atom dei' sofa' nimanimi amama saga'? 3Ae' a'ipipa owa'etin endilisi! I'i ipe' owa' pemboma opalefa waf aonai ipe'inai, anona nemaf ipe' hipei pega' na'ama etin si'i esis. 4Dei' si'i main enis epes isima 18-peleis wambel anama Siloam ipat launai nato nahas saga' hi'alas? Amama ipe' pa'i waf aonai asasinai nikila' waf aonai enis epes sape Jerusalemi? 5Owa'etin. I'i ipe' owa' pemboma opalefa waf aonai ipe' panda'anai, anona nemaf ipe' hipei pega' na'ama etin si'i esis.”
Basef womun etina lawag owa' nola su'utipi
6Ea' Jisas nawalapa anom basef wamon etin na'i, “Anona aman nawa anona lawag fik aof ananinai nawa wain. Anom nimeguf mafe' ea', su'utipa lawag anama owa' nili. 7Ea' na'ipa anan nanda' maol aof anamai na'i, ‘Neme'. Afagof wanom ae' afi'i agolopa su'utip lawag anama fik, owa' nili. Na'ama dei' ine' lena. Dei' main netawa nefa' ifat atona etap etin?’
8Ea' anan nanda' maol aofi nagwamana basef na'ipana na'i, ‘Dembinai, ine' ata' kwahona notawa afagel anae' atona. Ama ata' ela' etap noloma umba bulmakaum esembe'ana. 9Ama iti nambimb niema su'utip afagel anae' o owa'. I'i owa', wila ine' nelena.’ ”
Jisas nanda' ano'w nemata'w kwataga bo'okw nemaf sapoma noma'wanai
10Nemaf anama esis Juda sapoma noma'wanai Jisas na'ipasa basef esis amam nematawa anona ipat esis Juda sa'i basef sapeinai nomon. 11Ea' ano'w nemata'w ambal aonai napei'wi kwape, ambal anama aonai nanda'akw awasi'w kwape afagof 18-peleim ea' alafuga akwa'unai nondala'akw, ina kohafel kwaitu andeande', owa'etin. 12Ea' Jisas natolo'w nofala'w kwafi'i na'ipakw na'i, “Nemata'w, ae' atofa awes ine'inai dei' nataga bo'wena.”
13Anan nasa lagel ananinai nemata'w akwama ea' mehip kwaitu usi'ikw. Ea' kwafela agel Godi lu'una. 14Ea' aman anama numafi ipat esis Juda sa'i basef sapeinai okom wandafuna ma Jisas nanda'akw kwataga bo'okw nemaf anama sapoma noma'wanai. Ea' anan na'ipa esis amam nematawa na'i, “Nimeguf amama wanom wanom sanda' maolanami. Ea' dei' ipe' pi'i aman anama notofamepa awes ipe'inai, andeande'ma pifi'i nemaf anama sanda' maolananai. Ea' ipe' ina pifi'mai maol anama ma nemaf anama mapoma noma'wanai.”
15Ea' Dembinai nagwamana basef na'i “Ipe' amam pa'i malogof biamipei! Peme! Nemaf mapoma noma'wanai ipe' hipei pafe' ifagw bulmakauwi ma patagaha bulmakau maloma donki ipe'imi pao'wam mafe' ma' embel. 16Ea' nemata'w akwama kwataga wambota Abrahami, Satan nowa'akw la'ifikw kwape afagof 18-peleim. Ea' dei' nemaf anama mapoma noma'wanai ae' a'i etagaha mandof nowa'akwi ma kweape wafifi'w.”
17Jisas na'iam na'ama, nanda' esis naumbih ananisi ambagof aom kwapete'. Ea' amam nematawa hiesi sandanifel endilisi ma amamaga bu'wami la'ifimi hiami anan nanda'ami.
Basef womun etina su'utip mastetim so'uso'um maloma yis sanda' bret natifi
(Mt 13:31-33; Mk 4:30-32)
18Ea' Jisas na'iam wapoti na'i, “Epes siowis wambota Godi numafias si'i main? Ae' indila'wifam i'imama? 19Amama si'i anom nalelef so'uso'umi ape' mofalam ma'i mastet. Anona aman nofa' nalelef amama nawam aof ananinai. Anom nimeguf mafe' ea' mataga malo si'i lawah lu'wami ea' amiguf mafi'i mala' alegah mailam.”
20Ea' Jisas na'iam wapoti' na'i, “Ae' a'i indila'wifa epes siowis wambota Godi numafias i'imama? 21Ae' indila'wifama anom yis ano'w nemata'w kofa'am kwambomam maloma plaua hiami. Ea' mafe' mawis plawa hiami manda'am matef lu'um.”
Uta sa'unai
(Mt 7:13-14,21-23)
22Jisas nafe' wambel hiagoma lu'wagoma sa'ogoma nape felefele'ma eaf nafe' Jerusalemi nawalipasa basef esis amam nematawa, ea' nafe' okom na'i nefe' Jerusalem ea' nafe'. 23Ea' anona aman na'ipana na'i, “Dembinai, ae' a'i ihali'ina ma epes isima anona nemaf God nofa'as seatanimani. Isima hiesi o kwaie'wis?”
Ea' Jisas na'ipas na'i, 24“Ipe' pepe la'ifipa penda' maol lu'unai endilisi, pefe' piwis uta sa'unai. Dei' main, epes hiesi anona nemaf si'i suwis nomon, ea' owa' la'ifisi. 25Anona nemaf ofagena ma ipati nohafel nowalowa uta ipat anama. Ea' ipe' pifi'i pitu peha uta ande' pefalana na'ama pi'i, ‘Dembinai, usi'amapa uta.’
Ea' nogwamepa basef ni'i, ‘Ipe' enimaipei? Ae' owa' egaopei, ipe' enimaipei?’
26Ea' pi'ipana pi'i, ‘Ape' mape ma' gwa'aimi embel malomena, nape nawalapa basef na'ipapa wambel ape'inai.’
27Ea' anan anona nemaf nogwa basef ni'i, ‘Ipe' enimaipei? Ae' owa' egaopei. Ipe' epes panda' waf aonai, ipe' si'amae!’
28Anona nemaf ipe' piti Abraham noloma Aisak noloma Jekop moloma profet amama hiami mope wambel Godi ea' ipe' owa'. Ipe' nogalo'mepa pepe ande'. Anama pelef mehip pena' nalelef tilili talala' kwapete' pepe. 29Ea' esis amam nematawa hiesi sifi'i gani aon natefima nowalama naso'ma noloma anama wa'owa'ol esis sope sea' gwa'aimi lu'wami wambel Godi. 30A'e endilisi, enis epes dei' sataga sagi'i agof a'asi, anona nemaf sefa' agof lu'wami sope sili'. Ea' enis dei' sataga sali'i sofa' agof lu'wami anona nemaf agof a'as setaga sigi'.”
Jisas nalopa wambel Jerusalem
(Mt 23:37-39)
31Nogota anama atona anom amam Farisi mafi'mai Jisas ma'ipana ma'i, “Ine' nekwaha wambel anae' fo'o anagon. Dei' main, Herot na'i nehena nega'.”
32Ea' Jisas nagwamama basef na'ipam na'i, “Ipe' fo'o pi'ipa aman anama nanda' do'ufi douf si'i nombat aolopunai pi'ipana pi'i, ‘Dei' naman wapoti' ae' etofa ambagof awami mape epesi, ea' enda' awes nanda'asi setaga bo'wes. Anom nimeguf mefe' ea', nemaf nefe'ma wenifi hi'ilana, embefa maol ae'anai hi'ilana.’ 33Ea' dei' naman bimb ae' efe' enda' maol anama. Ina andeande'ma esis soha anona profet noga' anona wambel, owa'. Sehana noga' Jerusalem atagon.
34Jerusalem, Jerusalem, ipe' paha amam profet afumi, pakwaha otamba paha amam God nasapa'am mafe'mai ipe'i, la'ela'ef ae' a'i ekolasa ipe' epes hipei si'i awata numa'inai nowa'ani nogami nakolasom mawis behenagof ananimi. Owa'etin, ipe' pandaiwa'. 35Ipe' peme'! Dei' ipat bu'unai naloma wambel ipe'inai atuwasi wafina notawa etin. Ae' a'ipipa, ipe' ina petolowe wapoti' ma nambimb pie'i,
‘Ape' ma'i God nofalo'ma aman anama nafi'i agel Dembinai.’ ”
Currently Selected:
Luk 13: aojF
Highlight
Share
Copy
Want to have your highlights saved across all your devices? Sign up or sign in
© 2013, Wycliffe Bible Translators, Inc. All rights reserved.
