Matyu 24

Jisas na'i ipat lu'unai Godi anona nemaf aona

(Mk 13:1-2; Lu 21:5-6)

1Jisas nakwaha ipat lu'unai Godi nafe' etin, amam alupumi ananimi mafi'mai Anan. Amam ma'i mihi'ambana ifagw lu'wami lotumi. 2Ea' Jisas nagwamama basef na'ipam na'i, “Ipe' pati ifagw amama hiami? Ae' a'ipipa endilisi, anona nemaf ina anom otamba motoma anom otamba mope, owa'etin. Sagwasi'am sowalom hi'ilam mofe' mo'oh atona etin.”

Jisas na'i basef na'i anona nemaf nimanimi awami motaga

(Mk 13:3-13; Lu 21:7-19)

3Jisas tol nape halaf anama lawah oliv motawama ea' alupumi ananimi atom mafi'mai anan ma'ipana ma'i, “Ine' ni'ipafa amamaga amama nambai' motaga. Maina ikwaf nili' notaga ma afa' ogawa ine' na'i netanima neafi'i ma etap anae' higililana?”

4Ea' Jisas nagwamama basef na'i, “Ipe' pindumafuma andeande'. Na'ama enin epen nembaso'mepa. 5Dei' main, amam hiami anona nemaf mifi'i mombaso'mepa mi'i agel ae'anai mi'i, ‘Ae' ma'uwi ae' Krais, God nandandepe nasapa'e afi'i.’ Ea' anona nemaf mombaso'ma amam nematawa hiesi some' basef amamumi si'i endilisimi silam. 6Anona nemaf peme' enis sopa' lupulupu' sonda' wandaf ea' enis seme'asa wandaf si'ipipa, ipe' ina umbamehepa, owa'. Amamaga amama anona nemaf meatagai, ea' nemaf akutainai ata' owa'. 7Enis epes sape anama etap hiagoma kantri sofela wandaf sopa' soloma anona kantri. Anona dembinai king nehafel no'wa enis wambel hiagoma ananisi sopa' soloma anona dembinai king no'wa ananisi wambel hiagoma. Enis epes wambel hiagoma nolomohas sope, ea' enis wambel hiagoma atona etin etap suwambon nokoto'. 8Amamaga amama hiami ata' muli' motaga si'i nimanimi mali' matagama nemata'w kwa'i kola awani.

9Amama motaga ma ea', esis sofa'epa ma sese'epa nimanimi, ea' sehepa pega'. Epes hiesi wambel hiagoma opalef aoma ipe' kwapete' endilisi. Esis sati ipe' paila basef Ae'ami na'ama dei' sahepa. 10Nemaf anama amam nematawa hiesi sokwaha sombale'efa Dembinai ea' sondawawalapa etin sose'asas sefe'ma naumbih sohas, ea' epes isima ukup aoma enis. 11Ea' amam profet hiami mambaso'ami motaga mohafel mufi'i mombaso'ma amam nematawa hiesi. 12Waf aonai anona nemaf netaga lu'una, na'ama amam nematawa hiesi sokwaha waf anama ukup maimaila enis epes mi'i uwahipis. 13Ea' emi egafis sembale'efa ae' la'ifis situ seatagama nemaf akutainai, isima anona nemaf God nefa'as setanimani. 14Ea' anona nemaf esis si'ipasa basef amama bu'wami Godi ma epes hiesi siowis kingdom heveni. Esis si'ipas ganima etap hiagoma hi'ilagon ama amam nematawa hiesi ganima wambel hiagoma ata' sili' seme'am ea' nemaf akutainai notaga.

Amamaga awami endilisi anona nemaf motaga

(Mk 13:14-23; Lu 21:20-24)

15Anona nemaf ipe' piti amamaga awami mohambombaga amamaga bu'wami motaga si'i fowa' gani profet Daniel na'i basef mail Baibeli ma'i. Amamaga amama motaga mope anama bo'wagoma nomon ipat lu'unai Godi. (Emi egafis sitalifa basef amama esis sogawa basef ofagema andeande'.) 16Nemaf anama amam nematawa sape etap hiagoma Judia sofa' sefe' sondowasa' halafutagw. 17Emi egafis sape ipat ande' felefele' ina ata' setanima siwis sefa'ai amamaga asasimi ipat nomon, owa'. 18Emi egafis sapani aofi, ina ata' setanima sefe' wambel sefa' luwaguf maim asasimi, owa'. 19Nematawa opafuwai waloma awama awasi ata' sagwa' nomambeh atomi, ae' a'i awau uwahipiwa endilisi ma nogota anama ofa' nimanimi lu'wami endilisi meataganai. 20Ipe' penda' betena Goda ipe' ina pefa' pefe' nogota anama uf noloma asaf mifi'i o nemaf anama Sabat sapoma noma'wanai, owa'. 21Nogota anama nimanimi lu'wami endilisi. Fowa' dambadamba God nanda' etap nataga nafi'i nafi'i nataga dei', nimanimi awami amama fowa' gani ina anom na'amaimi mataga, owa'. Ea' anona nemaf wapoti' ina anom nimanimi amama motaga, owa'. 22I'i God owa' notopa' nimeguf mefe' bandam, anona nemaf amam nematawa hiesi higililas hi'ilas. Owa'etin. God okom napoma epes isima anan nasahe'as ea' dei' natopa' nogota anama bandana.

23Nemaf anama notaga ma i'i enis epes si'ipipa si'i, ‘Ipe' piti Krais, God nandandepana nasapa'ana nafi'i anan nape na'ae’, o ‘nani nape gani,’ ipe' ina pembale'efas, owa'. Hapaisi. 24Dei' main, nemaf anama anom amam mombaso'am mi'i amam Krais o mi'i amam profet motaga monda' ikwaf la'ifinai naninani hianai si'i God atona nanda'anai. Endilisi i'i amam la'ifim, mombaso'ma amam nematawa God nasahe'as ea' mohambombagas. Owa'. Hapaisi. 25Peme', ae' ali' a'ipipa ea' ma amamaga amama nimanimi dei' ata' owa' meatagai.

26Na'ama i'i emi egafis si'ipipa si'i, ‘Ipe' piti, anan nani nape gani epes a'agoma wafiguma fetauguma,’ ipe' ina peme'as pefe'agon, owa'. I'i emi egafis si'i, ‘Ipe' piti nani nape ipat nani nomon’, ipe' ina pembale'efas, owa'. 27Ipe' piti otaga holhol pelepele' holala nataga gani aon natefima ea' howalagon nafe' anama hiagoma aon nowalama naso'ma. Ae' ataga epen endilisiwei, nemaf anama ae' etanima iefi'i, enda'am na'ama etin hiesi sotolowe. 28Mamagoma alop saga'i na'oma, ea' anama atogon anona nemaf komemb mefe' munduwa'anima.

Jisas na'i, “Ae' ataga epen endilisiwei anona nemaf ifi'i.”

(Mk 13:24-27; Lu 21:25-28)

29Nimanimi amama hiami ma nogota anama hi'ilam ea', mehip etin

‘Aon alipunai netaga owamb, ea' aon owambunai wa na'ef ina molo, owa'. Ea' ondowa mowai otaga ilif, amamaga hiami mape otagai ea' bol etin mope.’

30Nemaf anama ondowa mowai, ikwaf ae'anai netaga gani otaga ilif, Ae' ataga epen endilisiwei ifi'i. Ea' amam nematawa hiesi sape etap hiagoma selef. Ea' siti ae' eloma elagw otaga ilif ifi'i eloma amamaga howalagon bu'wami Godi moloma pepel Ananinai. 31Ea' alof lu'unai nelef mehip, esapa' amam ensel ae'ami mofe' etap hiagoma aon natefima nowalama wa'owa'ol anama biafigin biafigin mefe'agon hi'ilagon ganima etap otaga mafe' motambela. Ensel amama mofe' mofa'ai esis amam nematawa God nasahe'as ea' Ananisi sondatama etifigin.

Elif nihi'ambapa mogawa nimeguf

(Mk 13:28-31; Lu 21:29-33)

32Ipe' ukup mi'i anom basef womun etina fig. Ipe' piti lawag anama fik noloma lawah hiami wapoti'. Ipe' piti ilaof nonafa ma basowa, pegawa nogota anama nelemb ea' felefele' ma meaof. 33Ea' na'ama etin nemaf anama ipe' piti amamaga amama ali' a'ipipami motaga hi'ilam, ipe' pegawa ae' afi'i aitu felefele'ma uta. Ina ata' nogota laona, owa'.

34Ae' a'ipipa endilisi, amam nematawa dei' ata' papani ina nambimb poga' ulal, ata' owa', ipe' piti amamaga amama hiami motaga hi'ilam. 35Otaga noloma etap hiagoma anona nemaf hegililam hi'ilam, ea' basef ae'ami ina anona nemaf hi'ilam, owa'etin. Mope la'ela'ef hihif.

Ina enin epen negawa nemaf neloma nogota Dembinai nataga epen endilisinai neafi'i, owa'

(Mk 13:32-37; Lu 17:26-30,34-36)

36-37Ae' ataga epen endilisiwei a'ipipa. Owa' enin epen negawa nemaf anama o nogota anama ae' iefi'ianai. Amam ensel mape heven ilifi wapoti' ina mogawana. Ae' nogalomana Godi wapoti' ina egawana, owa'. Ahalome atona nape ilif anan atona negawa nemaf anama. Waf fowa' sanda'ana nogota anama Noa napenai, ea' na'ama etin si'i esis sonda'ana nemaf anama felefele'ma iefi'i etaga etap anae'. 38Fowa' gani embel lu'wami ata' owa' motagai, nogota anama esis sape sa' gwa'aimi sa' embel amam nematawa sindikikila'ma sandase'ama etin safe' safe' sataga nemaf anama Noa nafe' nawis sip. 39Amam nematawa isima ina sagawa nemaf anama, owa'. Esis ukup mase'as sape na'ama etin safe' satagama nemaf anama embel lu'wami mataga mahas muwambu'was saga' hi'alas. Ea' na'ama etina nemaf anama ae' etanima iefi'ianai. 40Anama amam biam mondao'oma monda' maol mapani aof, God nofa' anona, anona nokwahona nope. 41Ea' anowa nematawa biawa onda' maola plaua onda' bret, nemaf anama God nofa' ano'w kofe' nokwaha ano'w kope.

42Ea' ipe' pindumafuma andeande'. Dei' main, ipe' ina pegawa nambai' Dembinai ipe'inai nifi'i, owa'. 43Ipe' ukup mopoma anom basef wamun etin pegawam. I'i ofagena ma ipati nili' nogawa owamb maina nogota nanda' wali neafi'ianai, ama naep motawa notologon nope, nanda' wali ina nafi'i nupisila ipat ananinai nuwis nomon, owa'. 44Ea' ipe' wapoti' naep motawai pepe. Dei' main? Ae' ataga epen endililsiwei iefi'i anona nemaf ipe' ina pegawa pi'i ifi'i ulal nemaf anama, owa'.

45Ipe' hipai penda' waf bu'unai pehafa Ae' si'i aman anama gawainai numafi amam manda' maoli nanda' maol andeande'. Aman anama dembinai ananinai nandandepana ma numafi ananimi manda' maoli ma nease'ama gwa'aimi amam nogota anan na'ianai. 46Nemaf anama dembinai ananinai notanima niefi'ianai, ma niti aman anama nanda' maol andeande', aman anama nondanifel. 47Ae' a'ipipa endilisi. Dembinai ananinai anona nemaf nonda'ana nope dembinai ma numafi amamaga hiami ananimi. 48Ea' i'i aman anama nonda' waf aonai okom napoma opaf ananinai atona ni'i, ‘Dembinai ae'anai ina nambimb nifi'i ulal, owa'.’ 49Ama anan noha amam manda' maol etini nea' gwa'aimi embel la'ifimi noloma amam amama mahaga magaoli. 50Ea' Dembinai ananinai notanima nifi'i anona nemaf aman anama ina ni'i Dembinai nifi'i ulal, ata' owa'. 51Ea' nohana negalo'mana nope noloma epes isima sambaso'ami malogof biefimisi. Wambel anama awagoma selef sonda' nalelef tilili talala' kwapete'as sope.

Currently Selected:

Matyu 24: aojF

Highlight

Copy