Ezekela 10
10
Noqkuq Yhûm Mai Garai Gasâng É Hpungwup Shingkang Htoq Ló Byùq É Hkyô
1Ngò gi, wú kat le, hkerubim ahtoq, maulat kyodum htoq mâ é mauhkûng nyuì lungsêng tángmyhâng su dùt é azòng lé myang kat ri. 2Haú hkûn, haû Yhûmsîng Garai gi, nú nhâm é jimê wùt sû lé, “Hkerubim a-ô mâ é lhêngchap gyoro pé má wang ê mù, hkerubim gyoro pé mâ é myi gyúng nyi é myigye lé, náng é lòq í lòq èq ê kyaq yû luî, wà htoq má sân hkyô kat àq.” ga taî ri. Haû mù, yhang gi, ngò wú tô é u, wang ê bê nghut ri.
3Byù haú yùq wang e é hkûn, hkerubim pé gi, noqkuq yhum é maupyî hkyam shut yàp tô é nghut mù, ahkaû shut mâ é wânghkaû má mhut byíng zan tô ri. 4Haú hkûn, haû Yhûmsîng Garaî é hpungwup shingkang gi, hkerubim htoq mai toq lô luî, noqkuq yhûm mâ é hkumtáng má ê jé ri; noqkuq yhûm haú má gi, mhut byíng zan to mù, wânghkaû má gi, haû Yhûmsîng Garaî é dùq bang é hpungwup shingkang byíng mui tô ri. 5Hkerubim é dùng htê gi, haû Wum-o a-tsam dìk shoq bò Sû Garai Gasang dáng nyo é htê su ga, sânghî pyâm wânghkaû mai lháng wó gyô ri.
6“Lhêngchap gyoro eq hkerubim gyoro mâ é gyúng nyi é myi yu lé aq.” ga, haû Yhûmsîng Garaî èq nú nhâm é jimê wùt sû lé hkunmó hkyó jáng, yhang gi, wang ê mù, lhêngchap yâm má yàp tô ri. 7Haú hkûn, hkerubim radu gi, yhâng é lòq lhâm kat mù, yhángmòq é gyoro mâ é gyúng nyi é myi lé yù luî, nú nhâm é jimê wùt su é lòq má kat byî ri; yhang gi, haú lé hàp yù mù, htoq ló bê nghut ri. 8(Hkerubim é dùng pê é a-ô má byu lòq sû é htoq ze tô é lé byu myang ri.)
9Ngò wú kat le, hkerubim pê é nàm má lhêngchap myi chap jòq to mù, hkerubim radû é nàm má lhêngchap rachap jòq tô é lé le, lhêngchap haú pé gi, bó huî hui é jung lungsêng nghut é utohpaya su dùq wìk é lé le, myang ri. 10Lhêngchap haû myi chap gi, azòng rajung za nghut mù, chap hkangmó má lhêngchap zo kat tô é su dùt ri. 11Haú pé gi, e ló kô é hkûn, hkerubim pé myòqdong hu é shut chyat e ló akô; lhêngchap haú pé gi, e ló é hkûn, hká shut le a lhing jaù kó nghut ri. Hkerubim pé gi, yhángmòq é myòqdong hu é shut e ló bum ri; yhángmòq e ló kô é hkûn, hká shut le a lhing jau ló kó nghut ri. 12Yhángmòq é ragùngdu gón má le, nùnghkûng pé má le, lòq pé má le, dùng pé má le, yhángmòq é lhêngchap myi chap má le, myòqjí byíng zan tô ri. 13Lhêngchap haú pé lé gi, “Ling jung lhêng pé.” ga myhîng é lé ngò wó gyô ri. 14Hkerubim du hkangmó má myòqdong myî lhum lhum dàp ri; myòqdong ralhum gi, hkerubim myòqdong, ralhum gi, waxâng zô é myòqdong, ralhum gi, hkanghkyî é myòqdong, ralhum gi, zun é myòqdong nghut ri.
15Hkerubim pé myhang dòq ló ri. Haú pé gi, Hkebara Wuìlàng yàm má ngò myang é kângsoq bo é dui jung pé nghut ri. 16Hkerubim sô ló jáng, haú pê é ayàm mâ é lhêngchap pé le châng sô ló ri; myigùng mai toq ló râ matú dùng pyô jáng, lhêngchap pé le tsuq tsuq bo châng tô ri. 17Hkerubim pé yàp to jáng, lhêngchap pé le bo yàp tô ri; hkerubim pé toq ló jáng, lhêngchap pé le rahá bo toq ló bum ri; hkâsu mù gâ le, kângsoq bo é dui jung haú pê é sô gi, lhêngchap pé má nghut nyi ri.
18Haû Yhûmsîng Garaî é hpungwup shingkang gi, noqkuq yhûm mâ é hkumtáng htoq mai htoq ló luî, hkerubim pé htoq má nô tô ri. 19Ngò wú nyi é u, hkerubim pé gi, yhángmòq é dùng pé pyô luî, myigùng mai toq mù, sô e ló é hkûn, lhêngchap pé le yhángmòq eq rahá bo e ló ri. Yhángmòq gi, haû Yhûmsîng Garaî é yhûm mâ é buìhtoq hkyam hkum má nô tô é nghut mù, Isira-elaq é Garai Gasâng é hpungwup shingkang gi, yhángmòq é ahtoq má jòq tô ri.
20Haú pé gi, Hkebara Wuìlàng yàm má ngò myang é, Isira-elaq é Garai Gasâng é a-ô mâ é kângsoq bo é dui jung pé nghut ri; haú pé gi, hkerubim pé nghut é lé ngò wú sê ri. 21Du hkangmó gi, myòqdong myî lhum lhum le, dùng myi dûng dûng le, yhángmòq é dùng ô má byu lòq su dùt é le dàp bum ri. 22Yhángmòq é myòqdong pé gi, Hkebara Wuìlàng yàm má ngò myang é azòng pé roq nghut ri. Du hkangmó gi, hí shut nyâng nyâng za e ló akô nghut ri.
Currently Selected:
Ezekela 10: znot
Highlight
Share
Compare
Copy
Want to have your highlights saved across all your devices? Sign up or sign in
© 2025, Wycliffe Bible Translators, Inc.
