Ezekela 22
22
Yerusalem Wà Mó Mâ É Yubàk Mara
1Haû Yhûmsîng Garaî é mungdang ngá chyáng jé é gi,
2“Byù zo ê, nàng gi, Yerusalem wà mó lé târâ jéyáng râ lhú? Suí shun é wà shî lé nàng târâ jéyáng râ lhú? Haû jáng, yhang kut é achaq achyut é múzó bànshoq lé lhoqhtoq shit mù, 3‘Haû Ahko Ahkáng lhúnglháng wó Sû Yhûmsîng Garai shî su ga taî ri; nàng gi, yhûmsing é agùng má sui lhoqshun pyâm é èq, yhûmsing gùng yhûmsîng ihkyùp mó she hâng yù mù, hparà hpôlhô pé saî é dông mai yhûmsing gùng yhûmsîng agòt a-û kut yu é wà nghut ri; 4nàng gi, sui lhoqshûn bê nghut mù, mara bò bê nghut luî, hparà hpôlhô pé saí bê nghut mù, agòt a-û dùt bê nghut ri. Nàng gi, nang lé mara dam byi râ buìnyì lhoqchyâng yù mù, náng é zànwut pé htum râ hkyíng jé bê nghut ri. Haû mù, Ngò gi, nang lé, byù myû wui chyáng lùmù gànsâng hkyô dùt nhâng mù, mîngdán bànshoq má wú jóng pyám jang dùt nhâng râ nghut lhê. 5Myìng htên byùq mù, shuk nhúngnhâng byùq é wà nàng ê, nàng eq chyâng é wê é bang gi, nang lé rhoî dang taí kôrâ nghut lhê.
6Náng chyáng nyi é Isira-elaq zau zô pé mai, sui lhoqshun pyám râ matú, yhûmsîng wó é ahko ahkáng hkâsu kut chûng kô é lé wú aq. 7Yhángmòq gi, náng chyáng, înu îwâ pé lé rhoî jihkyoî kut kômù, byù bíng pé lé zìk zo zìk shuq kôluî, chuimó chuízô pé lé rhoî zô bum akô nghut ri. 8Nàng gi, Ngá é chyoiyúng zê pé lé wú tiq pyám luî, Ngá é Bánno Buìnyì pé lé agòt a-û kut pyám bê nghut ri. 9Náng chyáng gi, sui lhoqshun pyám râ matú lùmù gànsang é bang nyi ri; náng chyáng gi, bùm htoq mâ é hparà noq jowò pé má ting é zoshuq zô é eq mehpye hpye múzó kut shut é bang nyi ri. 10Náng chyáng gi, îwâ hpyang lé hpau a tap é bang nyi ri; náng chyáng gi, htûngli dông a sansêng é, lhôhking lé nyi é myiwe lé zum é bang nyi ri. 11Náng chyáng gi, yhûmsing é yhûmkyochâng é myiwe lú é, achaq achyut é mara kut é byù, yhûmsing dùmó lé ahoq ahî rhoi pyâm é byù, yhâng wâ é byìzo nghut é yhûmsing nhammó lé rhoi pyâm é byù nyi ri. 12Náng chyáng gi, sui lhoqshun pyám râ matú lòqhkaû lang zè yu é byu pé nyi ri; nàng gi, a-myàt yù mù, wó lô râ matú, ngùnhpún kat ri. Nàng gi, náng é yhûmkyochâng pé lé a târa é dông zìk zo zìk shuq yu ri. Hau htoq agó, nàng gi, Ngo lé tô-myhî pyám bê nghut ri; haû gi, Ahko Ahkáng lhúnglháng wó Sû Yhûmsîng Garai taî pyo ri.
13Haû mù, Ngò gi, nàng hkong tô é a târa é sùtzè eq náng é agùng má nàng lhoqshun pyâm é suî é yánmai, Ngá é lòq í lòq èq teng za tsup htûng é dông yuichyîn bùt râ nghut lhê. 14Ngò, nang lé jéyáng é buìnyì má, nàng gi, náng é myìt wó lhoqhtan to mù, náng é lòq wum wó bo to râ nghut lhê lhú? Haú hkyô lé Ngò Yhûmsîng Garai taî é nghut mù, Ngò kut râ nghut lhê. 15Ngò gi, nang lé, byù myû wui chyáng lhoqpyo hâng kat mù, mîngdán pé má lhoqbyo myín nhâng râ nghut lhê; Ngò gi, náng é a sansêng é hkyô lé lhoqhtûm pyám byi râ nghut lhê. 16Byù myû wui é myòq hí má, yhûmsîng kut é hkyo èq nàng gùng-yuì huî é hkûn, Ngò gi, haû Yhûmsîng Garai nghut é lé nàng sé râ nghut lhê.’ nghû taí aq.” gâ ri.
17Hau htâng, haû Yhûmsîng Garaî é mungdang ngá chyáng jé é gi, 18“Byù zo ê, Isira-elaq byu pé gi, Ngá é matú ngùnhkyi dùt byùq bekô nghut ri; yhángmòq bànshoq bang gi, myibung hkyûng hkaû má myìt gyó tô é, gyi, shûmhpyû, jòqtoq, chuî pé su dùt byùq mù, ngùn jên yu é ngùnhkyi pé dùt pyám bekô nghut ri. 19Haû mù, haû Ahko Ahkáng lhúnglháng wó Sû Yhûmsîng Garai shî su ga taî ri; ‘Núngmòq bànshoq bang gi, ngùnhkyi dùt byùq bekô nghut mù, Ngò gi, núngmòq lé Yerusalem wà hkaû má shuî tsîng yù râ nghut lhê. 20Myîsham èq nyhê yui pyám râ matú, myibung hkyûng má yu tsîng kat é ngùn, gyi, jòqtoq, chuî eq shûmhpyû pé lé su, Ngò gi, núngmòq lé, Ngò nhikjum yô é eq nhikmó-yô é mai shuî tsîng yù mù, wàhkaû má kat to luî, nyhê yui pyám râ nghut lhê. 21Ngò gi, núngmòq lé shuî tsîng to mù, Ngá é nhikmó-yô é myî èq núngmòq lé mùt râ nghut mù, núngmòq gi, wàhkaû má nyé yui byùq kôrâ nghut lhê. 22Ngùn gi, myibung hkyûng má nyé yui pyâm é su, núngmòq gi, wàhkaû má nyé yui byùq kôrâ nghut lhê; haú hkûn, Ngò, Yhûmsîng Garai gi, núngmòq é ahtoq má Ngá é nhikmó-yo hkyô hut hkyô kat bê nghut é lé, núngmòq sé kôrâ nghut lhê.’ gâ ri.” gâ ri.
23Haú htâng, haû Yhûmsîng Garaî é mungdang ngá chyáng jé é gi, 24“Byù zo ê, mîngdán shí lé, ‘Nàng gi, Ngò nhikmó-yô é buìnyì má, lhoq sansêng byî é a huî é htoq agó, mau wô byî é le a hui râ nghut lhê.’ nghû taí aq. 25Yhâng chyáng mâ é zau wuî gi, wó yu é sho lé lâng myha nyi é hkanghkyi mying garû nyi é su, gumlau toq râ hkyô hpàqchyî htoq bum akô; yhángmòq gi, byu pé lé myui pyám mù, sùtzè pé eq hpaudap jung zè pé lé lú yu pyám byi luî, mîngdán hkaû má chuimó myo myo lhoqmyô to bekô nghut ri. 26Yhâng chyáng mâ é hkyangjông pé gi, Ngá é târâ lé lhoqhpyoq pyám mù, Ngá é chyoiyúng zè pé lé agòt a-û kut pyám bekô nghut ri; yhángmòq gi, chyoiyúng é eq a chyoiyúng é lé, a gam hkoq kó nghut ri; yhángmòq gi, byu pé lé, a sansêng é eq sansêng é hkyô, a mhoq byî é za, Ngá é Bánno Buìnyì pé lé koi pyâm bum akô; haû mù, Ngò gi, yhángmòq chyáng hpautap é a hui nghut ri. 27Yhâng chyáng mâ é zaugun wuì gi, wó yu é sho lé lâng myha nyi é wàmhkuî pé su dùt mù, a târa é sùtzè wó râ matú, sui lhoqshûn kô é eq byù sat bum akô nghut ri. 28Yhâng chyáng mâ é myìqhtoî pé gi, haû Yhûmsîng Garai dang a taí kôlhang, ‘Haû Ahko Ahkáng lhúnglháng wó Sû Yhûmsîng Garai shî su ga taî ri.’ ga taí kômù, shing-rán a-pyoq pé eq bùt mhaû hpyit kôluî, zaugun wuì haú bâng é matú, yhángmòq kut é hkyô pé lé, chuhuí hpyû bùt é su châng nghop byî akô nghut ri. 29Haú mâ é mingbyû wuì gi, mhaú zo mhaú shuq é eq lú zo lú shuq é hkyô kut kômù, myùng bang eq asho awuî é bang lé zìk zo zìk shuq kôluî, byù bíng pé lé târâ ràp-rá hkyô a shit kô é za, rhoî zô bum akô nghut ri.
30Ngò gi, wà haú lé a lhoqhtên pyám râ matú, dông tô é wàhkûm gyoro má wà hau é gùnglik dông Ngá é hí má yàp byi mù, saî hpô râ byù lé, yhángmòq chyáng ho wú le, rayùq lháng a nyì nghut ri. 31Haû mù, Ngò gi, Ngá é nhikmó-yo hkyô lé yhángmòq chyáng hut hkyô kat mù, Ngá é nhikjum yo hkyô nghut é myî èq yhángmòq lé lhoqhtûm pyám râ nghut luî, yhángmòq kut é hkyô bànshoq lé, yhángmòq é ulhum htoq má lató hpuq râ nghut lhê; haû gi, Ahko Ahkáng lhúnglháng wó Sû Yhûmsîng Garai taî pyo ri.” gâ ri.
Currently Selected:
Ezekela 22: znot
Highlight
Share
Compare
Copy
Want to have your highlights saved across all your devices? Sign up or sign in
© 2025, Wycliffe Bible Translators, Inc.
