Ezekela 26
26
Turuq Wà Lé Htuqhtîng É Myìqhtoi Dang
1Raxe razan zàn, sânghî lhôhkyap lhôxân nyí má, haû Yhûmsîng Garaî é mungdang ngá chyáng jé é gi, 2“Byù zo ê, Turuq wà gi, Yerusalem wà mó lé, ‘Ha hâ, nghut bê! Byù myû wuì wàng râ hkum jòq é wà gi, htên byùq bê nghut ri; haú mâ é hkum pé gi, ngá é matú hpông to byi bê nghut ri; wà haû gi, chamchyuîyuì dùt to bê nghut mù, ngò gi, sùtzè wó berâ nghut lhê.’ ga taí bê nghut é yánmai, 3haû Ahko Ahkáng lhúnglháng wó Su Yhûmsîng Garai shî su ga taî ri; Turuq wà ê, Ngò gi, nang lé htuqhtíng râ nghut lhê; Ngò gi, wuìshuq lung-aû mâ é wuìlhêng pé toq lo é su, byù myû myo myo lé, náng chyáng lé htuqhtíng nhâng râ nghut lhê. 4Yhángmòq gi, Turuq wàhkûm pé lé lhoqhtên pyám mù, haú mâ é mâchya mó pé lé hpyoq hpyi pyám kôrâ nghut lhê; Ngò gi, haú mâ é myi-tse lé hkyek pyám râ nghut mù, haú lé chyut chyut é lùqgòk dùt to nhâng râ nghut lhê. 5Ngò gi, haú lé, wuìshuq lung-aû mâ é gùn pé lhap jang dùt nhâng râ nghut lhê; hkâsu mù gâ le, haú hkyô lé Ngò taî é nghut lhê; haû gi, Ahko Ahkáng lhúnglháng wó Sû Yhûmsîng Garai taî pyo ri. Wà haû gi, gótû byù myû wui é matú wó lú yu é zè dùt byùq râ nghut lhê. 6Haú mau má jòq é, wà hau é wàkyo wà-myam pé gi, sham èq sat pyâm é hui râ nghut lhê; haú hkûn, Ngò gi, haû Yhûmsîng Garai nghut é lé, yhángmòq sé kôrâ nghut lhê.
7Haû Ahko Ahkáng lhúnglháng wó Sû Yhûmsîng Garai shî su ga taî ri; Ngò gi, hkóhkam pê htoq hkóhkâm nghut é, Babelon hkóhkâm Nebuhkatneza lé, gyè myang pé eq gyèlhêng pé, myang ji ji bang eq gyè hpúng mó le mù, Turuq wà lé lé htim râ matú, mautsûng mai shuî lé râ nghut lhê. 8Yhang gi, haú mau mâ é, náng é wàkyo wà-myam pé lé sham èq sat pyám râ nghut lhê; yhang gi, náng shut gyèwap pé xuq mù, gadùk pé du luî, htim râ matú gòlong pé lé tu toq râ nghut lhê. 9Yhang gi, náng é wàhkûm pé lé htûng hput râ sik lhêngdum tô to mù, yhâng é shâm lham èq náng é mâchya pé lé lhoqhpyoq hpyi pyám râ nghut lhê. 10Yhâng é myang pé gi, nang lé hpuílhup èq nghop pyám shoq myo râ nghut lhê. Hput htông to bê wàhkûm mai, wà má byù yán wang lo é su, yhang gi, náng é wahkum pé mai wang lo é hkûn, myang ji jî é bang, gyèzè htô é lhêng pé eq gyèlhêng pé mying hum mù, náng é wàhkûm pé lháng nún byùq râ nghut lhê. 11Yhâng é myang pê é hkôdòq gi, náng é wà hkyô pé bànshoq má nang râ nghut lhê; yhang gi, náng é byu pé lé sham èq sat pyám râ nghut mù, náng é gingtîng é zìng mó pé gi, myigùng má lhêng gyòp to râ nghut lhê. 12Yhángmòq gi, náng é sùtzè lé lú yu pyám byi mù, náng é wuìloq zè pé lé htîm lú yû kôrâ nghut lhê; yhángmòq gi, náng é wàhkûm pé lé hpyoq hpyi pyám mù, náng é yúng hkìk é yhûm pé lé lhoqhkyop myha pyám luî, náng é lùqgòk pé, yhûm chûng sik pé eq tsohtung jàp pé lé wuì má dú kat pyám râ nghut lhê. 13Ngò gi, náng chyáng mâ é mahkôn htê pé lé lhoqzîm pyám byi râ nghut mù, náng é tíng bàt htê pé wó gyo râ a nghut lo. 14Ngò gi, nang lé, chyut chyut é lùqgòk dùt nhâng râ nghut mù, nàng gi, ngogûn pé lhap jang dùt byùq râ nghut lhê. Nàng gi, hkâ-nhám le dum saî xuq é hui râ a nghut; hkâsu mù gâ le, haú hkyô lé Ngò Yhûmsîng Garai taî é nghut lhê; haû gi, Ahko Ahkáng lhúnglháng wó Sû Yhûmsîng Garai taî pyo ri.
15Haû Ahko Ahkáng lhúnglháng wó Sû Yhûmsîng Garai gi, Turuq wà lé shî su ga taî ri; náng chyáng byù sat é hui mù, dàm dap bang nò-kying kying kô é hkûn, nàng htên byòq byùq é htê yánmai, wuimau yàm pé gyùq nán byùq râ, a nghut lhí? 16Haú hkûn, wuìshuq lung-aû mâ é zaugun wuì gi, yhûmsing é tángmyhâng mai gyó luî, yhángmòq é buhîng pé lé hkyut pyám mù, zá htaû tô é mèbu pé lé hkyut tâng pyám kôrâ nghut lhê. Yhángmòq gi, gyùq chiq é myìt mai myigùng htoq má zùng mù, náng chyáng dùt é múzó é yánmai, gyùq nán gyùq ngha nân bûm kôrâ nghut lhê. 17Haú hkûn, yhángmòq gi, nàng eq séng luî ngaùhkyang sâng kômù, nang lé,
‘Wuìshuq lung-aû mâ é byu pé nyì jang,
myìng hû é wà mó gi, gè gè yhang, lhoqhtên pyâm é hui bu-nhung lhî!
Nàng eq náng chyáng mâ é bang gi,
wuìshuq lung-aû má a-tsam mó bo é nghut lhê mhaî;
nàng gi, náng chyáng nyi é bang bànshoq lé,
gyùq chiq nhang é nghut lhê mhaî.
18Nàng lêng gyòp é buìnyì má,
wuimau yàm pé gi, gyùq nán bum akô nghut ri;
nàng byòq yeq byùq é yánmai, wuìshuq lung-aû mâ é zinlóng pé gi,
gyùq ngha bum akô nghut ri.’ ga taí kôrâ nghut lhê.
19Haû Ahko Ahkáng lhúnglháng wó Sû Yhûmsîng Garai shî su ga taî ri; byù a nyi byùq lô é wà pé su, nang lé Ngò chamchyuîyuì kut pyám mù, nang lé ûm nghop pyám râ matú, nìk é wuimau mâ é wuì lé, Ngò, náng é ahtoq má ûm lai nhang é hkûn, 20Ngò gi, nang lé, góhkun é byu pê é jowò nghut é mosumhkung má gyó ló é bang eq rahá, lhoqhkyô kat râ nghut lhê. Ngò gi, nang lé, góhkûn byòq yèq tô é jang má, mosumhkung má gyó ló bang eq rahá myigùng hkaû má nyì nhâng râ nghut lhê. Haú hkûn, nàng gi, dui nyì bâng é mau má wó dum tau râ le a nghut, jowò dum wó yû râ le a nghut. 21Ngò gi, nang lé, gyùq chiq hpo mó mai lhoqhtûm pyám nhâng râ nghut mù, nàng gi, a nyi byùq lo râ nghut lhê. Nang lé hô kôlhang, hkâ-nhám le myang hô râ a nghut; haû gi, Ahko Ahkáng lhúnglháng wó Sû Yhûmsîng Garai taî pyo ri.” gâ ri.
Currently Selected:
Ezekela 26: znot
Highlight
Share
Compare
Copy
Want to have your highlights saved across all your devices? Sign up or sign in
© 2025, Wycliffe Bible Translators, Inc.
