Ezekela 34
34
Yhûmsîng Garai Isira-elaq A-myû Lé Wú Zúng Sû Dùt Râ Hkyô
1Haû Yhûmsîng Garaî é mungdang ngá chyáng jé é gi, 2“Byù zo ê, Isira-elaq a-myû lé wú zúng bang lé htuqhtîng é myìqhtoi htoi aq; myìqhtoi htoi mù, wú zúng bang lé, ‘Haû Ahko Ahkáng lhúnglháng wó Sû Yhûmsîng Garai shî su ga taî ri; yhûmsing gùng lé za wú gôn é, Isira-elaq a-myû lé wú zúng bang gi, dingnyé wó ri! Sau zúng bang gi, sau hpúng lé wú gon râ lhê, a nghut lhí? 3Núngmòq gi, no-naú chyîn zo mù, saumaú bu wùt luî, xu yúng é sau pé lé sat zo kôlhang, sau hpúng lé rago a wú gon kó nghut ri. 4Núngmòq gi, wum nyhôm é sau pé lé, wum-o lhoqkíng byi kô é a nghut; no é sau pé lé, yâ gè byi kô é a nghut; dàm dap é sau pé lé, dàm htup byi kô é a nghut; hkyô sô nghoq ló é sau pé lé, shuî taû yù kô é a nghut; byùq byùq é sau pé lé, châng ho yù kô é a nghut kó. Núngmòq gi, yhángmòq lé htân htân kut é eq zìk rhoî zô akô nghut ri. 5Haû mù, yhángmòq gi, sau zúng sû a nyi é yánmai, lhoqpyo pyâm é hui bekô nghut ri; yhángmòq gi, lhoqpyo pyâm é hui kôjáng, tân jung yòsô zè bànshoq é zoshuq dùt byùq bekô nghut ri. 6Ngá é sau pé gi, bùm pé bànshoq eq myhang é kong hkangmó má sô yông wún bum akô; yhángmòq gi, myìdàm gón má lhoqpyo hâng kat é hui zo bekô nghut mù, yhángmòq lé châng hkat ho é byù a nyì nghut ri.
7Haû mù, wú zúng bang ê, haû Yhûmsîng Garaî é dang lé gyo keq; 8haû Ahko Ahkáng lhúnglháng wó Sû Yhûmsîng Garai shî su ga taî pyo ri; Ngò rû dui nyi é eq rajung za, Ngá é sau hpúng gi, sau zúng sû a nyì mù, lú she ló byùq é eq tân jung yòsô zè bànshoq é zoshuq dùt byùq é yánmai le, Ngá é sau zúng bang gi, Ngá é sau hpúng lé a châng ho é za, Ngá é sau hpúng lé wú gon râ malaî yhángmòq yhûmsing gùng lé shèq wú gon kô é yánmai le, 9sau zúng bang núngmòq ê, haû Yhûmsîng Garai taî é dang lé gyo keq. 10Haû Ahko Ahkáng lhúnglháng wó Sû Yhûmsîng Garai shî su ga taî ri; Ngò gi, sau zúng bang lé htuqhtíng mù, yhángmòq chyáng mai Ngá é sau hpúng lé dung râ nghut lhê. Sau zúng bang gi, yhûmsing gùng yhûmsîng a wó dum tso lo kôrâ matú, Ngò gi, yhángmòq chyáng mai sau zúng wò yu pyám byi râ nghut lhê. Ngò gi, Ngá é sau hpúng lé, yhángmòq é zoshuq a dum dùt lo râ matú, yhángmòq é nhut mai hkyi htoq yù râ nghut lhê.
11Hkâsu mù gâ le, haû Ahko Ahkáng lhúnglháng wó Sû Yhûmsîng Garai shî su ga taî ri; Ngò yhang, Ngá é sau pé lé châng hô mù, myang ho yù shoq kut râ nghut lhê. 12Sau zúng sû gi, yhâng é byo myín byùq é sau hpúng lé châng ho shi-kùt é su, Ngò le, Ngá é sau pé lé châng hô râ nghut lhê. Ngò gi, mau zaú luî, mauchut tuq dùt byùq é buìnyì má, yhángmòq lhoqpyo hâng kat huî é jowò bànshoq mai yhángmòq lé châng shuî yù râ nghut lhê. 13Ngò gi, yhángmòq lé, byù myû wui chyáng mai shuî htoq yû mù, mîngdán pé mai shuî tsîng yù luî, yhángmòq é mau má shuî wang ló râ nghut lhê. Ngò gi, Isira-elaq é bùm pé má le, wuì yàm pé má le, haú mau mâ é byù nyi é jowò hkangmó má le, yhángmòq lé zúng râ nghut lhê. 14Ngò gi, yhángmòq lé mhan nú yô má zúng râ nghut lhê; myhang é Isira-elaq bùm pé gi, yhángmòq zo râ mhan nú yô dùt râ nghut lhê. Yhángmòq gi, yhángmòq zo râ mhan nú yô haú má up kôrâ nghut lhê; yhángmòq gi, Isira-elaq é bùm pé má, nyui yúng é mhan nú yô má myàng zo kôrâ nghut lhê. 15Ngò yhang, Ngá é sau pé lé zúng râ nghut mù, yhángmòq lé up nhâng râ nghut lhê; haû gi, Ahko Ahkáng lhúnglháng wó Sû Yhûmsîng Garai taî pyo ri. 16Ngò gi, byùq byùq é sau pé lé châng hô mù, sô nghoq ló byùq é sau pé lé kôn taû yù râ nghut lhê; Ngò gi, dàm dap é sau lé dàm htup byi mù, wum nyhôm é sau lé wum-o lhoqkíng byi râ nghut lhê; nghut kôlhang, xu myum é eq wúm bo é sau pé lé gi, lhoqhtên pyám râ nghut lhê. Ngò gi, târâ ràp-rá é dông sau hpúng lé wú zúng râ nghut lhê.
17Ngá é sau hpúng ê, núngmòq eq séng luî, haû Ahko Ahkáng lhúnglháng wó Sû Yhûmsîng Garai shî su ga taî ri; Ngò gi, sau radu eq radu lé le, saulo pé eq bainám pé lé le, jéyáng gam hkoq râ nghut lhê. 18Núngmòq gi, ge é mhan nú yô má zô le, a gé lùq shi kó lhú? Gótû mhan nú yô pé má le, núngmòq é hkyi èq nâng pyeq ra râ dùt ashi kô lhú? Núngmòq gi, sân-yúng é wuì shuq le, a gé lùq shi kó lhú? Gótû wuì pé lé le, núngmòq é hkyi èq nâng mhuî ra râ dùt ashi kô lhú? 19Ngá é sau hpúng gi, núngmòq nâng pyeq é mhan lé zo luî, núngmòq nâng mhui é wuì lé shuq ra kôrâ lhú?
20Haû mù, haû Ahko Ahkáng lhúnglháng wó Sû Yhûmsîng Garai gi, yhángmòq lé shî su ga taî ri; wú keq, Ngò yhang, xu é sau eq gyí é sau lé jéyáng gam hkoq râ nghut lhê. 21Hkâsu mù gâ le, núngmòq gi, wum nyhôm é sau pé lé, shinggan shut wó hkat pyo pyám shoq, azún dông le, gòqsan èq le chyun luî, hkyui èq le htung bekô nghut mù, 22Ngò gi, Ngá é sau hpúng lé hkyi yù râ nghut luî, yhángmòq gi, lú kôn ló é a hui lo kôrâ nghut lhê. Ngò gi, sau radu eq radu lé jéyáng gam hkoq râ nghut lhê. 23Ngò gi, yhángmòq lé wú zúng râ sau zúng sû rayùq nyhi to râ nghut lhê; haú yùq gi, Ngá é duìnhâng zoshâng Dawiq nghut mù, yhang gi, yhángmòq lé zúng râ nghut lhê; yhang gi, yhángmòq lé zúng mù, yhángmòq é sau zúng sû dùt râ nghut lhê. 24Ngò, Yhûmsîng Garai gi, yhángmòq é Garai Gasang dùt râ nghut mù, Ngá é duìnhâng zoshâng Dawiq gi, yhángmòq é zau dùt râ nghut lhê. Haú hkyô lé Ngò Yhûmsîng Garai taî é nghut lhê.
25Ngò gi, yhángmòq eq nguì ngón é dangshikaq tô to mù, yhángmòq é mîngdán mai tân jung yòsô zè pé lé lhoqhtûm pyám byi râ nghut lhê; haú hkûn, yhángmòq gi, yòso má wó nyî mù, sik mó yô má ngón za wó yhup kôrâ nghut lhê. 26Ngò gi, yhángmòq lé le, Ngá é bùm lhînghkyùq mâ é jowò pé lé le, shimân jeju dùt nhâng râ nghut lhê. Ngò gi, ahkyíng yàm-yòq jé jáng mau wô nhâng râ nghut lhê; gè gè yhang, jeju mau wô râ nghut lhê. 27Pá pé mâ é shigâm pé gi, ashi zui mù, myigùng gi, kyôshi myuishi lhoqhtoq byi râ nghut lhê; byu pé gi, yhángmòq é mau má ngón za myang nyì kôrâ nghut lhê. Yhángmòq lé zìk zô é kyaú lé, Ngò lhoqhkyuî pyám byi mù, yhángmòq lé jùn zo bâng é lòq mai, yhángmòq lé Ngò hkyi xe yu é hkûn, Ngò gi, haû Yhûmsîng Garai nghut é lé, yhángmòq sé kôrâ nghut lhê. 28Yhángmòq gi, gótû byù myû wui èq lé hpyoq zo lé hpyoq shuq é hui bang dùt râ a nghut lo; tân jung yòsô ze èq le yhángmòq lé myui pyám râ a nghut lo. Yhángmòq gi, ngón za myang nyì bekô râ nghut mù, ó yùq èq le yhángmòq lé wó kyuq râ a nghut lo. 29Ngò gi, yhángmòq é matú, hôwa ngaí mù myìng hû é hkyâm rahkyâm lajang byi râ nghut mù, yhángmòq gi, mîngdán haú má mùtmó gyó é hui zo kôrâ a nghut lo; gótû byù myû wui é hí má le, lùmù gànsang é hui râ a nghut lo. 30Haú hkûn, yhángmòq é Garai Gasang nghut é, haû Yhûmsîng Garai Ngò gi, yhángmòq eq rahá nyì Sû nghut é lé le, Isira-elaq byù yhángmòq gi, Ngá é byù nghut kô é lé le, yhángmòq sé kôrâ nghut lhê; haû gi, Ahko Ahkáng lhúnglháng wó Sû Yhûmsîng Garai taî pyo ri. 31Núngmòq gi, Ngá é sau pé, Ngá é mhan nú yô mâ é sau pé nghut mù, Ngò gi, núngmòq é Garai Gasang nghut lhê; haû gi, Ahko Ahkáng lhúnglháng wó Sû Yhûmsîng Garai taî pyo ri.’ nghû taí aq.” gâ ri.
Currently Selected:
Ezekela 34: znot
Highlight
Share
Compare
Copy
Want to have your highlights saved across all your devices? Sign up or sign in
© 2025, Wycliffe Bible Translators, Inc.
