A-pûn Awang 2
2
1Haú dông, haû mauhkûng, myigùng eq haú pé má jòq é lhúnglháng lé, ban hpan to bê nghut ri. 2Nyhit nyí nghu é nyí a jé shi-má, Garai Gasang gi, Yhang hpan é múzó ban kut bê nghut ri; haû mù, Yhang gi, nyhit nyí nyí má, Yhang hpan é múzó bànshoq mai bánno bê nghut ri. 3Garai Gasang gi, haû nyhit nyí nghu é nyí lé shimân byi mù, lhoqchyoi lhoqyúng ri; haî mù gâ lé, Yhang kut laî lo é, hpan é múzó bànshoq mai bánnô yu é yánmai nghut ri.
Adam Eq Ewaq
4A‑ô mâ é pé gi, mauhkûng eq myigùng hpan é hkûn dùt é azó pé nghut lhê. Haû Yhûmsîng Garai Gasang, myigùng eq mauhkûng lé hpan é hkûn, 5myigùng má gi, sik byàp mhan byap pé a yùq htoq shi; yò pé má gi, mhanzo hpoqzo a nyún htoq shi nghut ri; hkâsu mù gâ le, haû Yhûmsîng Garai Gasang gi, myigùng htoq má mau a wò nhâng shî é nghut mù, myì htoq má mú zuî é byù a nyì shî é yánmai nghut ri. 6Nghut kôlhang, myigùng mai nghânsoq toq lô mù, myi-tse bànshoq má wuì hpyun byî ri. 7Haû Yhûmsîng Garai Gasang gi, myigùng mâ é tseyûn lé, xângzo byù zòng saî yù mù, yhâng é nhô má chyungxe soq mùt kat byî ri; haû mù, xângzo byù haû gi, dui é chyungxe bò xângzo yùqzo dùt bê nghut ri.
8Hau htâng, haû Yhûmsîng Garai Gasang gi, buìhtoq hkyam mâ é Edin gâ é jowò má hkyâm rahkyâm saî to mù, Yhang azòng saî tô é xângzo yùqzo lé, hkyâm haú má nyhi tô ri. 9Haû Yhûmsîng Garai Gasang gi, myòqjí èq wú yúng luî, zoshuq é matú ge é sikgâm pé ajung jung lé, myigùng mai yùq htoq lô nhang ri. Haû hkyâm gùng má gi, chyungxe sikgâm le, ge é eq a ge é lé sê gam hkoq é sikgâm le, yùq tô ri.
10Hkyâm haú lé lhoqpam byi râ matú, Edin mai wuì ralàng yui htoq lo ri; wuìlàng haû gi, hkyâm mai yui htoq ló mù, wuì myi koq gam hkoq to bê nghut ri. 11Sânghî wuì koq é myìng gi, Pishon làng gâ ri; wuìlàng haû gi, hîng bo é Hawila maumyî gón má yui ròt ló ri. 12Maumyî haú má gi, hîng gyíng le, namngón é badelim sikgyi eq gù bo é nyhaú myòqjí su dùt jung lungsêng pé le, lúng ri. 13Í koq nghû râ wuì koq é myìng gi, Gihon làng gâ ri; wuìlàng haû gi, Hkusha maumyî gón má yui ròt ló ri. 14Sum koq nghû râ wuì koq é myìng gi, Taigri làng gâ ri; wuìlàng haû gi, Ashuri mau mâ é buìhtoq hkyam cháng mù yui gyó ló ri. Myi koq nghû râ wuì koq é myìng gi, Uhprat lâng gâ ri.
15Haû Yhûmsîng Garai Gasang gi, Edin hkyâm má gôn lajang râ eq wú zúng râ matú, xângzo yùqzo haú lé shuî yù mù, haú má nyhi tô ri. 16Hau htâng, haû Yhûmsîng Garai Gasang gi, xângzo yùqzo haú lé, “Hkyâm mâ é gótû shigâm hká gâm mâ é le, nàng, kâm é su ge hpyoq zô lhê. 17Nghut kôlhang, haû ge é eq a ge é lé sê gam hkoq é sikgâm mâ é gi, nàng, ge hpyoq zo râ a nghut; hkâsu mù gâ le, nàng, haû mâ é hpyoq zô é hkûn, teng za yhang shî râ nghut lhê.” ga hkunmó hkyô tô ri.
18Haû Yhûmsîng Garai Gasang gi, “Yùqgè haû gi, yhang baú nyi le a gè. Yhâng é matú, yhang eq gé é, yhang lé htuqbáng râ sû hpân byi râ nghut lhê.” ga taî ri.
19Haû Yhûmsîng Garai Gasang gi, yòsô zè pé bànshoq eq maulat nghoqzô pé bànshoq lé myi-tse mai saî yù bê nghut ri. Yhang gi, myìng myhíng byi sháng gàq ga, haú pé lé, byù haú yùq chyáng shuî lé byî ri; kângsoq bo é dui jung hkangmó lé, byù haú yùq èq haî myhíng byî le haî, haú bâng é myìng dùt bê nghut ri. 20Haû mù, byù haû gi, shigu gaunyhaú bànshoq lé le, maulat nghoqzô pé eq yòsô zè pé bànshoq lé le, myìng myhíng byi bê nghut ri.
Nghut kôlhang, Adam gi, yhang eq gé é, yhang lé htuqbáng râ sû a myàng shi nghut ri. 21Haû mù, haû Yhûmsîng Garai Gasang gi, byù haú lé yhup mó myí nhang tô ri; Yhang gi, haú yùq yhup mó myí tô é hkûn, yhâng é nàmcham showui rahkat she yù mù, hkô haú má gùngshô èq chî pyám byî ri. 22Hau htâng, haû Yhûmsîng Garai Gasang gi, byù haú yùq chyáng mai she yu é nàmcham lé myiwe saî yù mù, yhâng chyáng shuî ló byî ri.
23Byù haú yùq taî é gi,
“Shí yùq gi, ngá é showui pé mâ é showui,
ngá é gùngsho mâ é gùngsho nghut lhê;
haû mù, yhang lé gi, ‘myiwe’ nghû wùt râ nghut lhê;
haî mù gâ le, yhang lé gi, yùqgè mai she htoq yu é nghut lhê.” gâ ri.
24Hau é yánmai, yùqgè gi, yhûmsing é înu îwâ chyáng mai htoq luî, yhang myi eq rahá rading ralhum za kut nyî mù, yhángnhik gi, gùngsho ralhum za dùt byùq kôrâ nghut lhê.
25Haû yùqgè eq yhang myi gi, gùngchîn nyì kôlhang, a hoq kó nghut ri.
Currently Selected:
A-pûn Awang 2: znot
Highlight
Share
Copy
Want to have your highlights saved across all your devices? Sign up or sign in
© 2025, Wycliffe Bible Translators, Inc.
