Yeremi-aq 17
17
1Haû Yhûmsîng Garai taî le,
“Yudaq a-myû wui é yubàk mara lé gi, jòqtoq èq le,
paihpoi lùqgòk chyun èq le,
yhángmòq é i-myìt nhiklhum long eq
yhángmòq é hkungga gyàp mâ é hkyuî pé má, kyûng kâ tô é nghut ri.
2Yhángmòq é zodù wuì lháng,
myhang é kong pé eq hkyâm lam é sikgâm nàm pé mâ é,
yhángmòq é hkungga gyàp pé eq Ashera hparà zìng pé lé,
myìtbûn akô nghut ri.
3Ngò gi, ra-mau gón mâ é yubàk marâ é yánmai,
pá mâ é Ngá é bùm eq náng é sùtzè pé eq hkong tô é zè pé bànshoq lé le,
náng é myhang é kong pé mâ é noqkuq jowò pé lé le,
lú yu ló é zè pé dông àp byî pyám râ nghut lhê.
4Nàng gi, nàng kut shut é marâ é yánmai,
Ngò, nang lé byî tô é silî wunlî lé lhoqhpyuq pyám râ nghut lhê.
Ngò gi, nang lé, nàng a sê é mau má,
náng é gye pê é jùn dùt nhâng râ nghut lhê;
hkâsu mù gâ le, nàng gi, Ngá é nhikjum yo hkyô lé myi tuq kat bê nghut mù,
haû gi, ahtum abyùq dùq nyì râ nghut lhê.” gâ ri.
5Haû Yhûmsîng Garai taî é gi,
“Xângzo byù lé za lùmhkaû luî,
gùngsho lé za wum lang mù,
yhûmsing é i-myìt lé haû Yhûmsîng Garaî chyáng mai lhing pyâm é sû gi,
dingnyé wó ri.
6Haú yùq gi, a-kyû a bò lô é maumyî mâ é kyuq shi byùq bê é sikhpup eq dù luî,
jé lô râ gè hkyô pé lé myàng râ a nghut.
Yhang gi, yòso mâ é kyuq huî é jowò pé eq,
ó le a nyi é xo maumyî má nyì râ nghut lhê.
7Nghut kôlhang, haû Yhûmsîng Garai lé lùmhkaû mù,
Yhang lé hkyak lhumzuî nyi é sû gi, hkungsô wó nyi ri.
8Haú yùq gi, wuì yàm má hô tô é sikgâm eq dù mù,
wuì yàm má a-myìt chîn é nghut luî,
nyé nám jé lô râ lé a gyùq nghut ri;
hau é ahaq le ayang nyui yúng nyi ri.
Haû gi, razàn kô mau a wò dùt kôlhang, haî a myìt chiq nghut ri;
haû gi, ashi a zuî é hkâ-nhám a bò nghut ri.” gâ ri.
9I-myìt nhiklhum gi, a wó yâ ge yù loshoq,
lhúnglhâng htoq má mhaú zo sê é nghut mù,
haú lé ó yùq ung sê gyo râ lhú?
10“Ngò, Yhûmsîng Garai gi, yùq hkangmó lé,
i-myìt nhiklhum gôn wú luî,
myìt é hkyô lé chyam lìk wú mù,
yhûmsîng kut é má cháng luî,
yhûmsîng hkâm zo gíng é eq rajung za ahpau byi râ nghut lhê.” le gâ ri.
11A târa é dông sùtzè lé hkong é sû gi,
yhûmsîng a hkyô é nghoq-ú lé up é nghoqjô eq du ri.
Yhâng é i-pyàt rawuí ru laî ashî le,
sùtzè haú pé gi, yhang lé tô pyâm to râ nghut mù,
ló htáng má, yhang gi, byù ngok nghut é hkyô lé lhoqhtoq shit râ nghut lhê.
12Ngá-mòq é sân-yúng yhûm jòq é jowò gi,
a-nham sânghi mai wàq toq tô é, hpungwup bo é tángmyhâng nghut ri.
13Yhûmsîng Garaî ê, Nàng gi, Isira-elaq é myòqbyù jowò nghut ri;
Nang lé tô pyâm tô é bànshoq gi, hoq hpû é hui zo kôrâ nghut lhê.
Yhángmòq gi, chyungxe wuìbúm nghut é, haû Yhûmsîng Garai lé tô pyám bekô nghut é yánmai,
Náng chyáng mai htoq ló é bang gi, hpuílhup yô má kâ xûm tô é hui kôrâ nghut lhê.
14Yhûmsîng Garai ê, ngo lé ya byi laq; haû jáng ngò ge byùq râ nghut lhê;
ngo lé hkyi yù laq; haû jáng ngò hkyi yu é hui râ nghut lhê;
hkâsu mù gâ le, Nàng gi, ngò hkya-on kúngton é Sû nghut lhê.
15Yhángmòq gi, ngo lé, “Haû Yhûmsîng Garaî é dang gi, hká má lhú?
Ahkuî haú pé dik lò sháng gàq!” ga ru taî nyi akô nghut ri.
16Ngò gi, Náng é sau zúng sû nghut nyi é mai a hpang htoq ló é nghut lhê;
ihkyùp wang é buìnyì lé ngò a ô naù nghut é hkyô lé, Nàng sê lhê.
Ngá é nhutwuî mai htoq é dang gi, Náng é hí má chyat nghut nyi lhê.
17Ngo lé hkâgyùq dan byùq nhâng;
byò dàn byò sho jé é buìnyì má, Nàng gi, ngá é nghêhkaû jang nghut lhê.
18Ngo lé zing-rî é bang gi, hoq hpû é hui zo kó sháng gàq;
ngò kúm gi, hoq hpû é a hui zo sháng gàq;
yhángmòq gi, gyùq nán é hui zo kó sháng gàq;
ngò kúm gi, gyùq ngha é a hui zo sháng gàq ô.
Yhángmòq chyáng byò dàn byò sho dùt é buìnyì jé nhâng mù,
chyuí dùt shoq yhángmòq lé lhoqhten lhoqhpyoq pyám aq.
Bánno Buìnyì Lé Lhoq Chyoiyúng Râ Hkyô
19Haû Yhûmsîng Garai mai ngo lé taî é gi, “Yudaq hkóhkam pé htoq ló wang lò kut é, shiwa byu pê é Hkum má le, Yerusalem wà hkum pé bànshoq má le, ê yàp to aq; 20haû mù, yhángmòq lé, ‘Hkum shí pé mai laî é Yudaq hkóhkam pé, Yudaq byù bànshoq eq Yerusalem wà mó má nyi é yùq hkangmó gi, haû Yhûmsîng Garaî é dang lé gyo keq. 21Haû Yhûmsîng Garai taî le, “Bánno Buìnyì má wò a wùn wàq râ matú le, Yerusalem wà mó hkum pé mai wò a wùn wàq lai râ matú le, sidìq keq. 22Hau htoq agó, Bánno Buìnyì má, núngmòq é yhûm pé mai wò hkâwàq htoq kó, mú le hkâzui kó; núngmòq é îchyí îwâ pé lé Ngò hkunmó hkyô tô é eq rajung za, Bánno Buìnyì lé kúm lhoqchyoi lhoqyúng keq.” gâ ri. 23Nghut kôlhang, yhángmòq gi, a gyo kô é htoq agó, haî su a ngàm kut pyâm akô; yhángmòq gi, myìt htân kômù, a gyo kut kó luî, mhoq shit é hkyô pé le a hkam yù kó nghut ri. 24Haû Yhûmsîng Garai shî su ga taî pyo ri. Nghut kôlhang, núngmòq gi, Ngá é jì-no rago gyo mù, Bánno Buìnyì má wà mó shî mâ é hkum pé mai wò a wùn wàq lai kut mù, Bánno Buìnyì haú má mú a zuî é za, haú lé lhoqchyoi lhoqyúng é nghut jáng, 25Dawiq é hkóhkâm tángmyhâng má zung é hkóhkam pé le, yhángmòq é zaugun wuì le, wà mó shi é hkum pé mai wó wâng kôrâ nghut lhê. Yhángmòq eq yhángmòq é zaugun wuì gi, Yudaq byu pé eq Yerusalem wà byù wuì eq rahá, gyèlhêng pé eq myang pé ji mù, wó laî wâng kôrâ nghut luî, wà mó shî gi, ahtum abyùq jòq gîng nyì râ nghut lhê. 26Byu pé gi, Yudaq mâ é wà pé mai le, Yerusalem wà mó awui ayàm mâ é wà htum pé mai le, Ben-yamin maumyî mai le, buìwàng hkyam bùmhkyî pá pé mai le, bum mau pé mai le, Maupyî Mau mai le, haû Yhûmsîng Garaî é yhûm má, myi nyhé hkungga pé, mâyu hkungga pé, gùqzò hkungga pé, namngón jung hkungga pé eq jeju bun hkungga pé chûng mù, lé bûm kôrâ nghut lhê. 27Nghut kôlhang, núngmòq gi, Ngá é jì-no a gyo mù, Bánno Buìnyì lé a lhoq chyoiyúng é htoq agó, Bánno Buìnyì má Yerusalem wà hkum pé mai wò wùn wàq lai kô é nghut jáng, Ngò gi, a dàt jôm byùq é myi lé, Yerusalem wà hkum pé má tuq kat râ nghut lhê. Myi haû gi, wà hau é gingtíng jowò pé lé nyhê hkyô pyám râ nghut lhê.’ nghû taí aq.” gâ ri.
Currently Selected:
Yeremi-aq 17: znot
Highlight
Copy
Compare
Share
Want to have your highlights saved across all your devices? Sign up or sign in
© 2025, Wycliffe Bible Translators, Inc.