Yeremi-aq 37
37
Yeremi-aq Htóng Lúng É Hkyô
1Yosi-a é yhang zo Zedeki-a gi, Babelon hkóhkâm Nebuhkatneza èq Yudaq hkóhkâm kut nhang é nghut mù, Yehoi-akim é yhang zo Yehoi-ahkin é hkô má ùp nyi ri. 2Nghut kôlhang, yhang le, yhâng é duìnhâng zoshâng wuì le, haú mau mâ é byu pé le, myìqhtoi Yeremi-aq dông haû Yhûmsîng Garai taî é dang pé lé, haî su a ngàm kut bum akô nghut ri.
3Nghut kôle, hkóhkâm Zedeki-a gi, Shelemi-a é yhang zo Yehuhkala eq Mase-a é yhang zo hkyangjong Zehpani-a lé, myìqhtoi Yeremi-aq chyáng nhang kat mù, “Ngá-nhûng é Garai Gasang nghut é, haû Yhûmsîng Garai lé ngá-mòq é matú kyu bo dung byi aq.” ga ê taí nhang kat ri.
4Haú u, Yeremi-aq gi, htóng a gyó shi nghut é yánmai, mingbyû wuì eq htoq htoq wàng wàng wó zùm yàp nyi ashî nghut ri. 5Hpara-uq é gyè hpúng gi, Egutuq ming mai yán htoq lô bekô nghut ri; Yerusalem wà mó má lóm tô é Babelon byu pé gi, haú hkyô lé wó gyo kôjáng, Yerusalem wà mó lé lóm tô é mai taû ló bekô nghut ri.
6Haú hkûn, myìqhtoi Yeremi-aq chyáng haû Yhûmsîng Garaî é mungdang jé é gi, 7“Isira-elaq é Garai Gasang, haû Yhûmsîng Garai shî su ga taî ri; Ngo lé myî wú râ matú, náng chyáng byù nhang kat é Yudaq hkóhkâm lé, ‘Núngmòq lé htuqbáng râ matú yán htoq lo é Hpara-uq é gyè hpúng gi, yhángmòq é mau, Egutuq ming shut taû ló kôrâ nghut lhê. 8Haú hkûn, Babelon byu pé gi, dum taû lé mù, wà shî lé lé zân ung yù luî, nyhê hkyô pyám râ nghut lhê.’ nghû taî kyo aq.
9Haû Yhûmsîng Garai shî su ga taî ri; ‘Babelon byu pé gi, gè gè yhang, ngá-mòq chyáng mai ló byùq bekô râ nghut lhê.’ nghû myìt luî, yhûmsing gùng yhûmsîng hkâ-mhaú zô pyám kó; yhángmòq ló byùq râ a nghut! 10Hau htoq agó, núngmòq lé majan lé zân nyi é Babelon byu pé bànshoq lé wó zân ûng mù, dàm dap bang baú zúm pé má nyi myìt to kôlhang, yhángmòq gi, htoq lô luî, wà shî lé nyhê hkyô pyám kôrâ nghut lhê.” gâ ri.
11Hpara-uq é gyè hpûng é yánmai, Babelon gyèzô pé Yerusalem wà mó mai taû ló byùq kô é htâng, 12Yeremi-aq gi, yhâng é byu pê chyáng mai yhûmsing é gàmbùm lé ló hàp yù râ matú, Ben-yamin mau shut ló râ ga, Yerusalem wà mó mai htoq ló bê nghut ri. 13Nghut kôlhang, yhang gi, Ben-yamin Hkum má jé ló jáng, Hanani-a é yhang shu, Shelemi-a é yhang zo Iriya ga sû hkum zúng zau gi, yhang lé lhom chyup yû mù, “Nàng gi, Babelon byu pê é hkyam shut dàp byùq bê sû nghut ri!” ga taî ri.
14Haû jáng, Yeremi-aq gi, “Haû a teng ô! Ngò gi, Babelon byu pê é hkyam shut a dap.” ga taî ri. Nghut kôlhang, Iriya gi, Yeremi-aq é dang lé a gyo byî é za, yhang lé chyup yû mù, zaugun wui chyáng shuî ló byi bê nghut ri. 15Yhángmòq gi, Yeremi-aq lé nhikjum yo kômù, yhang lé bàt nhâng luî, yhángmòq mai htóng kut pyâm é, kâ xûm hpó Yonahtan é yhûm má, yhang lé lhûng pyâm akô nghut ri.
16Yeremi-aq gi, ahkaû mâ é dong wàp zo má myáng myáng lhûng tô é huî ri; 17Hau htâng, hkóhkâm Zedeki-a gi, byù nhâng mù, Yeremi-aq lé hkóhkâm wâng má ê shuî lò nhâng luî, “Haû Yhûmsîng Garaî chyáng mâ é mungdang wó lhê lhú?” ga yhang lé baú haq myî ri.
Yeremi-aq gi, “Wó lhê; nàng gi, Babelon hkóhkam é lòq má àp byî pyâm é hui zo râ nghut lhê.” ga tû taî ri.
18Hau htâng, Yeremi-aq gi, Hkóhkâm Zedeki-a lé, “Nàng, ngo lé htóng lhûng pyám shoq, ngò gi, nang lé le, náng é zaugun wuì lé le, byù shí bang lé le, hai mara wá kut shut bê lhú? 19‘Babelon hkóhkâm gi, nang lé le, shí mau lé le majan a zan râ nghut lhê.’ ga myìqhtoi htoî é, náng é myìqhtoî pé gi, hká má nghut akô lhú? 20Nghut kôlhang, ngá é yhûmsîng hkóhkâm ê, jeju mai gyo aq; ngò, náng é hí má dûng tôngbán é dang lé gyo byi laq; ngò gi, kâ xûm hpó Yonahtan é yhûm má a shi byùq sháng gàq, ngo lé haú má hkâdum taû ló nhâng ô!” ga taî ri.
21Haû mù, Hkóhkâm Zedeki-a gi, Yeremi-aq lé, chyungxe zúng bâng é wânghkaû má nyhi to râ matú hkunmó hkyô ri; hau htoq agó, wà mâ é mùk ban byùq é hkûn jé shoq, nyí wuî mùk bûng é séng mâ é mùk ralong long yhang lé byî nyì râ matú le sang tô ri. Haû mù, Yeremi-aq gi, chyungxe zúng bâng é wânghkaû má xoq nyi nyi ri.
Currently Selected:
Yeremi-aq 37: znot
Highlight
Share
Compare
Copy
Want to have your highlights saved across all your devices? Sign up or sign in
© 2025, Wycliffe Bible Translators, Inc.