Yeremi-aq 39
39
1Yudaq hkóhkâm Zedeki-a ùp é gaú zan èq lha-mó raxê hkyap hkyap má, Babelon hkóhkâm Nebuhkatneza gi, yhâng é gyè hpúng gón eq rahá, Yerusalem wà mó lé htim râ matú yán lé kômù, haú lé lé lóm tô akô nghut ri. 2Yhángmòq gi, Zedeki-a ùp é raxe razan èq lha-mó myi hkyap, gau nyí nyí má, wà mó hau é wàhkûm lé hput htông pyám bekô nghut ri. 3Haû mù, Babelon hkóhkam é zaugun wuì bànshoq gi, wà mâ é Agùng Hkum má lé zung tô akô nghut ri; haú bang gi, Nerigala-Sharezera, Samgara-Nebo, zau Sarisehkim, zau mó Nerigala-Sharezera eq Babelon hkóhkam é gótû zaugun wuì bànshoq nghut ri. 4Yudaq hkóhkâm Zedeki-a eq gyèzô pé bànshoq gi, haú bang lé myàng kôjáng, hkóhkam é hkyâm mâ é, wàhkûm í lhûm é gyoro mâ é hkum mai, myín lé wà haû mai hpang htoq ló mù, Araba pá shut hpang e ló bekô nghut ri.
5Nghut kôlhang, Babelon gyèzô pé gi, yhángmòq lé châng hkat luî, Yerihko pá má Zedeki-a lé ê châng hkyit bekô nghut ri. Yhángmòq gi, yhang lé chyup yû mù, Hamat mau mâ é Ribala wà má nyi é Babelon hkóhkâm Nebuhkatneza chyáng shuî ló byî akô nghut ri; haú má, yhang gi, Zedeki-a lé târâ jéyáng bê nghut ri. 6Babelon hkóhkâm gi, Ribala wà má, Zedeki-a é myòq hí má yhang, yhang zô pé lé sat pyám mù, Yudaq mau mâ é xânghpoq nge wó bang bànshoq lé le sat pyâm ri. 7Hau htâng, yhang gi, Zedeki-a é myòqjí lé htaû choq pyám byi mù, yhang lé Babelon wà mó shut shuî ló râ matú, gyi kyum hut byî ri.
8Babelon byu pé gi, hkóhkâm wâng eq mingbyû wui é yhûm pé lé nyhê hkyô pyám mù, Yerusalem wàhkûm pé lé hpyoq hpyi pyâm akô nghut ri. 9Haú hkûn, chyungxe zúng gyèzau hpó Nebuzaradan gi, wà haú má nyi myìt gyó tô é bang, yhâng htâng má lé dàp é bang eq nyi myìt tô é mâyû byu pé lé, Babelon wà mó shut shúm byû dông chyup shuî ló bê nghut ri. 10Nghut kôlhang, chyungxe zúng gyèzau hpó Nebuzaradan gi, haî le a sing é asho awuî é bang lé Yudaq mau má nyhi hkyô to mù, yhángmòq lé tsibyiq hkyâm pé eq yò pé tsing byî tô ri.
11Babelon hkóhkâm Nebuhkatneza gi, Yeremi-aq eq séng luî, chyungxe zúng gyèzau hpó Nebuzaradan lé shî su ga hkunmó hkyô ri; 12“Yhang lé shuî yù mù, rago wú gon aq; yhang lé hai dàm le a tap é za, yhang taî é bànshoq lé châng kut byi aq.” gâ ri. 13Haû mù, zúng bâng é zau Nebuzaradan, zaugun hpó Nebushaziban, zau mó Nerigala-Sharezera eq Babelon hkóhkam é gótû zaugun wuì bànshoq bang gi, 14byù nhâng mù, chyungxe zúng bâng é wânghkaû má nyi é Yeremi-aq lé ê shuî htoq lô nhang akô nghut ri. Yhángmòq gi, yhang lé, Shahpan é yhang shu, Ahikam é yhang zo Gedali-a é lòq má, yhâng é yhûm shut shuî ló râ matú àp byî akô nghut ri. Haû mù, Yeremi-aq gi, yhâng é byu pê chyáng bo nyi gyó to bê nghut ri.
15Sak zúng bâng é wânghkaû má Yeremi-aq shúm zung nyi é u, yhâng chyáng haû Yhûmsîng Garaî é mungdang jé é gi, 16“Hkusha byù Ebet Melek chyáng ê mù, yhang lé, ‘Isira-elaq é Garai Gasang, haû Wum-o a-tsam dìk shoq bò Sû Yhûmsîng Garai shî su ga taî ri; Ngò gi, wà shî eq séng luî Ngò taî htuqhtîng tô é, nyì ngón yùqyò hkyô a nghut é za, byò dàn byò sho hkyô nghut é dang lé lhoqdìk râ za nghut bê. Haú ahkyíng jé jáng, dang haû náng é myòq hí má dik htoq râ nghut lhê. 17Nghut kôlhang, Ngò gi, haú buìnyì má nang lé hkyi xe yù râ nghut lhê; haû gi, Yhûmsîng Garai taî pyo ri; nàng gi, nàng gyùq bâng é lòq má àp byî pyâm é hui râ a nghut. 18Ngò gi, nang lé teng za hkyi yù râ nghut lhê; nàng gi, Ngo lé lùmhkaû sû nghut é yánmai, sham èq shî râ a nghut é za, náng é chyungxe wó hpang lùt râ nghut lhê; haû gi, Yhûmsîng Garai taî pyo ri.’ nghû taî kyo aq.” gâ ri.
Currently Selected:
Yeremi-aq 39: znot
Highlight
Share
Compare
Copy
Want to have your highlights saved across all your devices? Sign up or sign in
© 2025, Wycliffe Bible Translators, Inc.