Yeremi-aq 51
51
1Haû Yhûmsîng Garai shî su ga taî ri;
“Wú keq; Ngò gi, Babelon wà mó eq
Ngo lé gumlau myìt bo é Babelon byu pé lé htuqhtîng pyám râ matú,
lhoqhten lhoqhpyoq sû nghu é laì lé
myìt nhaû toq râ nghut lhê.
2Ngò gi, gùq pyang sû su Babelon wà mó lé pyang mù,
Babelon mau lé lhoqhtên pyám râ matú,
gó-mîng byu pé lé nhang kat râ nghut lhê;
yhángmòq gi, Babelon byò dàn byò sho huî é buìnyì má,
yhâng é lhînghkyùq mai chôm htuqhtíng kôrâ nghut lhê.
3Lai chûng sû lé lai a lâng htûng nhang é htoq agó,
yhâng é gyèhking lé le hkâwut nhâng kó.
Yhâng é zorâm wuì lé hkâha bun kó;
yhâng é gyè hpúng bànshoq lé lhoqhtûm pyám keq.
4Yhángmòq gi, Babelon mau má sat lheq pyâm é hui mù,
wà hkyô pé má sham èq htaû ròt pyâm é hui kôrâ nghut lhê.
5Hkâsu mù gâ le, Isira-elaq eq Yudaq mau má gi,
haû Isira-elaq é Chyoiyúng Su hí má kut shut é mara byíng zan to kôlhang,
haû Wum-o a-tsam dìk shoq bò Sû Yhûmsîng Garai, yhángmòq é Garai Gasang gi, Isira-elaq eq Yudaq lé
a tô pyâm é nghut lhê.
6Babelon wà mó mai hpang htoq ló keq!
Yhûmsing chyungxe lùt râ matú dìn keq!
Yhâng é mara pê é yánmai lhoqhtûm pyâm é hkâhui zo kó.
Hkâsu mù gâ le, haû gi, Yhûmsîng Garai lató hpuq é ahkyíng nghut ri;
Yhang gi, wà haû hui zo gíng é eq rajung za lató hpuq râ nghut lhê.
7Babelon wà mó gi, myìdàm gón lé shuq wùt nhang é,
haû Yhûmsîng Garaî é lòq má chung tô é hîng gòm nghut ri.
Byù myû wuì gi, gòm haú mâ é tsibyiq wing lé shuq wùt bùm kômù,
nâ bùm bekô nghut ri.
8Babelon wà mó gi, byò dàn tung gyòp lèq byùq râ nghut lhê;
hau é matú ngaùhkyûng ngaùyang kut keq!
Yhâng é dàm wó lhoqgê byi âbe,
bùt râ matú chi gâm agyi ê yù keq.
9‘Ngá-mòq gi, Babelon wà mó lé lhoqgê byi naû kôlhang,
yhang gi, a gè nhô nghut ri;
yhang lé tô pyâm to mù, ó le ô é mau shut taû ló sháng;
hkâsu mù gâ le, yhang hui zô é târâ jéyáng hkyô gi, mauhkûng má jé luî,
mhut pé lháng jé hkyâng bê nghut ri.
10Haû Yhûmsîng Garai gi, ngá-mòq díngmán é hkyô lé sàksé shit bê nghut ri;
lé keq; ngá-mòq é Garai Gasang nghut é, haû Yhûmsîng Garai kut é hkyô lé,
Zi-un wà mó má taî kyo sháng.’ ga taî akô.
11Myoshi lé suî chûn keq;
gòlong lé yu chûng keq!
Haû Yhûmsîng Garai gi, Babelon wà mó lé lhoqhtên pyám râ hen é yánmai,
Medi hkóhkam pé lé myìt nhaû toq byi bê nghut ri.
Haû Yhûmsîng Garai gi, Yhâng é noqkuq yhum é matú,
lató hpuq râ nghut lhê.
12Babelon wàhkûm yàm má donghkón tu shap keq!
Zúng bang lé gyèwum lhoqmyo keq;
zúng wú bang lé jowò hkyô to mù,
haq lhom to râ matú hen to keq!
Haû Yhûmsîng Garai gi, Babelon byu pé lé htuqhtíng râ matú
Yhang hkunmó hkyô tô é eq rajung za,
Yhang htung tô é hkyô lé lhoqdìk râ nghut lhê.
13Wuì myo myo jòq é nàm má nyì mù,
sùtzè myo myo wó to sû ê,
nàng htûm byùq râ ahkyíng jé mù,
nàng lhoqhtên pyâm é hui zo râ ahkyíng jé bê nghut ri.
14Haû Wum-o a-tsam dìk shoq bò Sû Yhûmsîng Garai gi,
‘Gè gè yhang, Ngò gi, dinggám jûm su, náng chyáng gyè hpúng lhoqpyíng râ nghut mù,
yhángmòq gi, wó ûngmyuq é hkyô lé gabú garu kôrâ nghut lhê.’ ga,
yhûmsing myìng lang luî dakâm bê nghut ri.
15Yhang gi, Yhâng é hpungwup a-tsam èq myìdàm htoq lé hpân mù,
Yhâng é hpàqchyî byéng-yá èq mingkan lé lhoqgîng to luî,
Yhâng é sê gyô é u-nuq èq mauhkûng lé hpyi hkâng to bê nghut ri.
16Yhang, maugum lhoqgûm kat jáng, mauhkûng mâ é wuì pé mying hûm lo ri;
Yhang gi, myìdàm htoq ló htâng é mai mhut lhoqtoq kat ri.
Yhang gi, mau wô lhap hpyat nhâng mù,
Yhâng é sùtdò mai laì lhoqhtoq kat ri.
17Yùq hkangmó gi, na bang chyat nghut mù, hpàqchyî a bò kó nghut ri;
hîng bàt zô é yùq hkangmó gi, yhángmòq saî é hparà hpôlhô pê é yánmai,
hoq hpû bum akô nghut ri.
Yhang saî é alhô pé gi, mhaû é chyat nghut mù,
soq a bò bum nghut ri.
18Haú pé gi, a-kyû a bo é chyat nghut mù,
taî hpoî pyám râ zè chyat a nghut lhí?
haú pé lé târâ jéyáng râ ahkyíng jé jáng,
haú pé gi, htûm byùq râ nghut lhê.
19Yakup é gàmbùm nghut Sû kúm gi, haú pé eq a dù nghut ri;
Yhang gi, lhúnglháng lé hpan é Sû nghut ri;
Isira-elaq byu pé gi, Yhâng é silî wunlî byu pé nghut ri;
Yhâng é myìng gi, Wum-o a-tsam dìk shoq bò Sû Yhûmsîng Garai gâ é nghut ri.
Yhûmsîng Garaî É Bàtdù
20Babelon ê, nàng gi, Ngá é majan zan bàtdù nghut mù,
majân é matú Ngá é gyèhking nghut ri.
Ngò gi, nàng lé chûng mù, byù myû wuì lé bàt hkyop pyám luî,
nang lé chûng mù, mîngdán pé lé lhoqhten lhoqhpyoq pyâm é nghut lhê;
21Ngò gi, nang lé chûng mù, myang eq myang ji ji sû lé bàt hkyop pyám luî,
nang lé chûng mù, gyèlhêng eq kon sû lé bàt hkyop pyâm é nghut lhê;
22Ngò gi, nang lé chûng mù, yùqgè eq myiwe lé bàt hkyop pyám luî,
nang lé chûng mù, mangzo eq zorâm lé bàt hkyop pyám luî,
nang lé chûng mù, yùqgè zo eq myiwe zo lé bàt hkyop pyâm é nghut lhê.
23Ngò gi, nang lé chûng mù, sau zúng sû eq sau bainám pé lé bàt hkyop pyám luî,
nang lé chûng mù, yò mú zui sû eq nohtó zúm lé bàt hkyop pyám luî,
nang lé chûng mù, gyèzaû pé eq zaugun wuì lé bàt hkyop pyâm é nghut lhê.
24Ngò gi, Babelon wà mó eq Babeloni-a mau má nyi é bànshoq lé, Zi-un wà mó má yhángmòq kut shut é hkyô bànshoq é matú, núngmòq é myòq hí má yhángmòq lé lató hpuq râ nghut lhê.” gâ ri; haû gi, Yhûmsîng Garai taî pyo ri.
25“Myìdàm gón lé lhoqhten lhoqhpyoq é sû,
lhoqhten lhoqhpyoq é bùm nàng ê, Ngò gi, nang lé htuqhtíng râ nghut lhê.
Ngò gi, Ngá é lòq lé lham mù, nang lé lùqpyoq mai dûn hpyit hkyó luî,
nang lé nyé kyuq hkang byùq é bùm dùt nhâng râ nghut lhê.” ga,
haû Yhûmsîng Garai taî pyo ri.
26“Byu pé gi, htúngchyûn lùqgòk kut râ eq a-pûn awang hkyó râ matú,
náng chyáng mai lùqgòk yù kôrâ a nghut;
nàng gi, ahtum abyùq chamchyuîyuì dùt byùq râ nghut lhê.” ga,
haû Yhûmsîng Garai taî pyo ri.
27Hau htoq agó, “Haú mau má donghkón tu toq keq!
Byù myû wui chyáng tut mùt keq!
Yhang lé htuqhtíng râ majân é matú byù myû wuì lé hen to keq;
yhang lé htuqhtíng râ matú,
Ararat, Minni eq Ashikena mîngdán pé lé ji tsing keq.
Yhang lé htuqhtíng râ gyèzau hkyin to keq;
dinggám nê jùm su myô é myang lé nhang toq kat keq.
28Yhang lé htuqhtíng râ majân é matú,
byù myû wuì, Medi hkóhkam pé,
yhángmòq é gyèzaû pé eq yhángmòq é zaugun wuì bànshoq,
yhángmòq ùp é mau pé bànshoq lé hen to keq.
29Babelon mau má byù a nyì lo mù,
chamchyuîyuì tô sâ to râ matú,
haû Yhûmsîng Garai htung tô é hkyô gîng nyi é yánmai,
Babelon mau gi, gyùq nán luî, no hpuzô nyì bê nghut ri.
30Babelon wà mó mâ é sârhe pé gi, majan a zan naù lo kó;
yhángmòq é gingtíng jowò má jâng nyi to bekô nghut ri.
Yhángmòq gi, wum nyhôm byùq mù,
myiwe myhí su dùt bekô nghut ri.
Wà hkaû mâ é nyì jowò pé myi nyé byùq mù,
hkum pé mâ é hkumkyáng pé gyuî byùq bùm bê nghut ri.
31-32Rawà gón é wó zân ung yù mù,
guhkan pé xaû pyám luî,
jàm yò hkung pé myi nyé pyám bê nghut mù,
gyèzô pé gyùq nán byùq bum é hkyô lé,
Babelon hkóhkam chyáng ló wó shit kyo shoq, wó dîn bang rayùq htâng rayùq dìn mù,
lùdang dé bang rayùq htâng rayùq châng wàng keq.” ga le taî pyo ri.
33Isira-elaq é Garai Gasang, haû Wum-o a-tsam dìk shoq bò Sû Yhûmsîng Garai shî su ga taî ri;
“Babelon byìzo gi, gùq chyârâng eq du ri;
a myáng má, gùq lé su yhang lé nang râ nghut lhê.
Yhang lé shû yù râ ahkyíng chyáng bê nghut ri.” gâ ri.
34“Babelon hkóhkâm Nebuhkatneza gi, ngá-mòq lé myhui pyám mù,
ngá-mòq lé nhúngnháng nhâng bê nghut ri;
yhang gi, ngá-mòq lé akôm nghut é yambú kut pyám bê nghut ri.
Yhang gi, lhângmuì mó su ngá-mòq lé myhui pyám luî,
ngá-mòq é xû xû za ga nghâm é zoshuq èq yhâng é wam lhoqpyîng ri;
hau htâng, yhang gi, ngá-mòq lé hkat htoq pyâm ri.
35Ngá-mòq é gùngsho má hui zô é zing-ri hkyô gi, Babelon htoq má jé sháng gàq.” ga,
Zi-un wà mó má nyi é bang taî akô.
“Ngá é sui yuichyîn gi, Babeloni-a mau má nyì bâng chyáng jòq nyì sháng gàq.” ga,
Yerusalem wà mó taî ri.
36Haû mù, haû Yhûmsîng Garai shî su ga taî ri;
“Wú keq; Ngò gi, núngmòq é mú lé bo hûng byi mù,
núngmòq lé lató hpuq byi râ nghut lhê;
Ngò gi, Babelon é nhông lé kyuq huí nhâng mù,
yhâng é wuìbúm pé lé kân byùq nhâng râ nghut lhê.
37Babelon gi, a-pyâng bùm dùt byùq râ nghut mù,
dànghkuî pê é hkyûng, gyùq chiq hpo eq lùmù gànsâng jowò dùt luî,
byù le a nyì chamchyuîyui é jowò dùt pyám râ nghut lhê.
38Yhâng é byù bànshoq gi, hkanghkyî pé su garû ngaù mù,
hkanghkyi râm zô pé su htê mó èq nying bùm kôrâ nghut ri.
39Nghut kôlhang, Ngò gi, yhángmòq hkye ngón nyî kô é u,
yhángmòq é matú zoshuq poî kut mù,
yhángmòq lé shuq wùt nhâng râ nghut lhê;
haú hkûn, yhángmòq gi, gabú wui hâ yu bùm mù,
a jâng bûn lò loshoq, ahtum abyùq yhup nân byùq kôrâ nghut lhê.” ga,
haû Yhûmsîng Garai taî pyo ri.
40“Ngò gi, yhángmòq lé sat pyám râ matú,
sau zo, saulo eq bainám lo pé lé su she gyó ló râ nghut lhê.
41Sheshak wà#51:41 Sheshak wà gi, Babelon wò mó lé gâ é nghut lhê. lé gi, zân ung yù bekô nhung!
Myìdàm gón mai nghutbûn é wà gi, hpyoq yu pyâm é hui bu-nhung!
Babelon wà mó gi, byù myû wuì chyáng,
chamchyuîyuì dùt byùq bu-nhung!
42Wuìshuq lung-aû gi, yui toq lô mù, Babelon htoq mai yui lai râ nghut luî,
hau é wuìlhêng mó pé gi, haú lé ûm nghop pyám râ nghut lhê.
43Hau é wà pé gi, chamchyuîyuì dùt é,
kyuq huî é eq yòsô mau dùt byùq râ nghut lhê;
haú mau má ó le a nyi é nghut mù,
haú mai ó yùq le lai râ a nghut.
44Ngò gi, Babelon wà mó mâ é Bela hparà lé mara dàm byi mù,
yhang myhui hâng kat tô é lé dum hpat htoq nhâng râ nghut lhê;
byù myû wuì gi, yhâng chyáng lé dum zing râ a nghut lo.
Babelon é wàhkûm gi, htên gyòp byùq râ nghut lhê.
45Ngá é byu pé ê, wà haû mai htoq lô keq!
Yhûmsing é chyungxe wó lùt râ matú hpâng keq!
Haû Yhûmsîng Garaî é nhikmó-yo hkyô mai hpâng keq.
46Haú mau má wó gyô é danglám é yánmai,
myìt wum hkâgyui kó; gyùq le hkâgyùq chiq kó;
shí zân má danglám rajung, htang zàn má danglám rajung htoq lhê;
haú mau má, lú lhum bàt zìk hkyô dùt nyi é danglám le,
zau rayùq eq rayùq htuqhtîng lhûm é danglám le htoq râ nghut lhê.
47Haû mù, Babelon mâ é hparà hpôlhô pé lé,
Ngò mara dàm byi râ ahkyíng hkyak jé râ nghut lhê;
ra-mau gón é hoq hpû bùm kôrâ nghut mù,
sat pyám huî é bang gi, jowò hkangmó byíng zan tô bùm râ nghut lhê.
48Haú hkûn, mauhkûng myigùng eq haú mâ é lhúnglháng gi,
Babelon má dùt htoq é hkyo é yánmai gabú garu kôrâ nghut lhê;
hkâsu mù gâ le, yhang lé lhoqhten lhoqhpyoq râ bang gi,
mautsûng mai htoq lô râ nghut lhê.” ga,
haû Yhûmsîng Garai taî pyo ri.
49Hau htoq agó, “Babelon é yánmai, myìdàm gón mâ é byu pé sat pyâm é huî bum é su,
Babelon le, sat pyám huî é Isira-elaq byu pê é yánmai,
sat lhêng pyâm é hui zo râ nghut lhê.
50Shâm mai wó hpang lùt é bang ê,
e ló keq, hkâ-nyhâm nyì kó!
Mau we mai haû Yhûmsîng Garai lé myìtbun keq;
Yerusalem wà mó lé myìt tuî nyì keq.” le gâ ri.
51“Ngá-mòq gi, rhoî jihkoî kut é hui zo mù, hoq hpû é huî nyì luî,
hoq hpu hkyô gi, ngá-mòq é myòqdong má nghop to bê nghut ri.
Hkâsu mù gâ le, gó-mîng byu pé gi, haû Yhûmsîng Garaî é yhûm mâ é chyoiyúng jowò má
wàng bekô nghut ri.” ga, haû byu pé taî bum akô nghut ri.
52“Nghut kôlhang, yhâng é hparà hpôlhô pé lé,
Ngò mara dàm byi râ nghut mù,
yhâng é mau má dàm dap zu záng é bang gi,
nò-kying kyîng bum é buìnyì pé jé râ nghut lhê.” ga haû Yhûmsîng Garai taî pyo ri.
53Hau htoq agó, “Babelon gi, mauhkûng má dòq ló mù,
myhang htâng é jang má yhâng é gingtíng jowò kut kôlhang,
Ngò gi, yhang lé lhoqhtên pyám râ byù nhang kat râ nghut lhê.” ga le,
haû Yhûmsîng Garai taî pyo ri.
54“Babelon wà mó mai ngau garû é htê,
Babelon byu pê é mau mai htên byòq mó dùt é htê htoq nyi ri.
55Hkâsu mù gâ le, haû Yhûmsîng Garai gi, Babelon wà mó lé lhoqhtên pyám râ nghut mù,
haú mâ é htê mó lé lhoqzîm pyám râ nghut lhê.
Gye pé htîm wang é htê gi, wuìlhêng mó htê su ga râ nghut mù,
yhángmòq é garu garín htê pé dum htoq lô lô dùt râ nghut lhê.
56Lhoqhten lhoqhpyoq é sû gi, Babelon lé htim râ nghut mù,
yhâng é sârhe pé gi, chyup shuî ló é hui râ nghut luî,
yhángmòq é lai gi, gyuî gyòp byùq râ nghut lhê.
Hkâsu mù gâ le, haû Yhûmsîng Garai gi, lató hpuq é Garai Gasang nghut mù,
hkyak yhang lató hpuq râ nghut lhê.
57Ngò gi, yhâng é zaugun wuì eq hpàqchyî bò bang,
yhâng é zau wuì, sûwún wuî eq sârhe pé lé, shuq wùt nhâng râ nghut mù,
yhángmòq gi, a bûn lò loshoq, ahtum abyùq yhup nân to kôrâ nghut lhê.” ga,
haû Wum-o a-tsam dìk shoq bò Sû Yhûmsîng Garai gâ é myìng wun é Hkóhkâm hpó taî pyo ri.
58Haû Wum-o a-tsam dìk shoq bò Sû Yhûmsîng Garai shî su ga taî ri;
“Babelon wà mó mâ é htu é wàhkûm pé gi, hpyoq hpyi pyâm é hui mù,
haú mâ é myhang é hkum pé gi, myî èq nyhê hkyô é hui râ nghut lhê;
byu pé gi, hai a-kyû le a htoq é má ngú pyám kômù,
byù myû wuì gi, myî èq nyhê pyám râ matú za shi-kùt pyám kôrâ nghut lhê.” gâ ri.
59Shí pé gi, Yudaq hkóhkâm Zedeki-a ùp é myí zan zàn má, yhang eq rahá Babelon wà mó má dòq e é, Mase-a é yhang shu, Neri-a é yhang zo sùt zum sû Serai-a lé, myìqhtoi Yeremi-aq èq byî é danglù nghut lhê. 60Yeremi-aq gi, Babelon wà mó eq séng luî, wà hau é ahtoq má jé lo nyi é ihkyùp pé bànshoq lé laiká ding shí má kâ tô ri. 61Yeremi-aq gi, Serai-a lé, “Nàng gi, Babelon wà mó má jé e é hkûn, dang shí pé bànshoq lé htê mó èq nghap kyo râ dùt lhê. 62Hau htâng, nàng gi, ‘Yhûmsîng Garai ê, shí jowò má, byù le, shigu gaunyhaú le a nyì loshoq, ahtum abyùq chamchyuîyuì lhoqhtên pyâm to râ ga, Nàng taí bê nghut ri.’ nghû taí aq. 63Nàng gi, laiká ding shí lé ban nghap jáng, lùqgòk racham tuî tap mù, Uhprat Wuìlàng agùng má dú kat pyám aq. 64Hau htâng, ‘Babelon wà mó gi, a wó toq lô loshoq shî su myùp byùq râ nghut lhê; yhâng chyáng Ngò jé nhâng râ ihkyùp é yánmai, yhâng é byu pé gi, lêng gyòp byùq bùm râ nghut lhê.’ nghû taí aq.” ga taî ri.
Yeremi-aq é dang pé gi, shî má htáng bê nghut ri.
Currently Selected:
Yeremi-aq 51: znot
Highlight
Share
Compare
Copy
Want to have your highlights saved across all your devices? Sign up or sign in
© 2025, Wycliffe Bible Translators, Inc.