Yohan 16

1Núngmòq gi, myìt lingbàt jowò a jòq kó sháng gàq nghû, haú pé bànshoq lé, Ngò, núngmòq lé taî kyo bê nghut lhê. 2Yhángmòq gi, núngmòq lé, târâjong mai hkat htoq pyám kôrâ nghut lhê; ó yùq nghut kôle, yhang mai núngmòq lé sat pyâm é hkûn, yhang gi, haú dông mai Garai Gasang lé dójaú nyi lhê ga myìt yu é ahkyíng, gè gè yhang, jé râ nghut lhê. 3Yhángmòq gi, haû Îwa lé le, Ngo lé le, a sé kô é yánmai, haû su kut kôrâ nghut lhê. 4Nghut kôlhang, núngmòq lé, Ngò sidìq byî é hkyô lé, ahkyíng jé jáng núngmòq bûn nyì kó sháng gàq nghû, Ngò haú hkyô taî kyô é nghut lhê. Ngò gi, núngmòq eq rahá nghut nyi é yánmai, haú hkyô lé, hí hkûn núngmòq lé a taî kyô é nghut lhê.

Chyoiyúng So É Múzó

5Nghut kôlhang, ahkuî, Ngò gi, Ngo lé nhang kat Su chyáng ló râ nghut lhê. Nghut kôlhang, núngmòq ó yùq le, ‘Nàng, hká shut ló râ lhú?’ ga, Ngo lé a myi kó nghut ri. 6Ngò, núngmòq lé, haú hkyô pé taî kyô é yánmai, núngmòq é i‑myìt ûnghkaû má iyon hkyô byíng to bekô nghut ri. 7Nghut kôlhang, Ngò, núngmòq lé teng za taí kôlé, Ngò ló byùq é gi, núngmòq é matú je gè râ hkyô ru nghut lhê. Ngò ló byùq é za a nghut jáng, haû hpàqchyî byi Sû gi, núngmòq chyáng lé râ a nghut; Ngò ló jáng shèq, Yhang lé, Ngò, núngmòq chyáng nhang kat byi râ nghut lhê. 8Yhang jé lé é hkûn, Yhang gi, haû mara wó é eq séng luî le, díngmán hkyô eq séng luî le, târâ jéyáng hkyô eq séng luî le, haû mingkan lé tûn shit râ nghut lhê. 9Haû yubàk mara wó é eq séng luî ga jáng, byu pé gi, Ngo lé a lùmjíng kô é yánmai nghut ri. 10Haû díngmán hkyô eq séng luî ga jáng, Ngò gi, haû Îwâ chyáng ló râ nghut luî, núngmòq, Ngo lé a myàng lo kôrâ nghut é yánmai nghut ri. 11Haû târâ jéyáng hkyô eq séng luî ga jáng, mingkan shi é zau gi, mara byî é huî bê yánmai nghut ri.

12Ngò gi, núngmòq lé taí râ hkyô myo myo wó ashî; nghut kôlhang, ahkuî, núngmòq wó hkâm kôrâ a nghut. 13Nghut kôlhang, haû tengmán é Sô jé lé é hkûn, Yhang gi, tengmán hkyô lhúnglháng lé shuî sé râ nghut lhê. Yhang gi, Yhâng myìt dông taí râ a nghut; Yhang, wó gyô yu é hkyô lé za taí luî, dùt lò râ hkyô pé lé le, núngmòq chyáng taî pyô râ nghut lhê. 14Yhang gi, Ngò wó é lé, yù mù, núngmòq lé taî kyô é eq sé nhang é dông, Ngá é hpungwup shingkang lé hû ló nhâng râ nghut lhê. 15Haû Îwa wó é lhúnglháng gi, Ngá é chyat nghut lhê. Hau é yánmai, haû Sô gi, Ngò wó é lé yù mù, núngmòq lé sé nhâng râ nghut lhê nghû, Ngò taî é nghut lhê.

16Adê myáng má, núngmòq gi, Ngo lé a myàng lo kôrâ nghut lhê; hau htâng, dum adê myáng má, núngmòq gi, Ngo lé myàng kôrâ nghut lhê.” gâ ri.

Chángzô Pê É Iyon Hkyô Gi, Gabú Hkyô Taû Dùt Râ

17Yhâng é chángzô pé ra-am gi, “‘Adê myáng má, núngmòq gi, Ngo lé a myàng lo kôrâ nghut lhê; hau htâng, dum adê myáng má, núngmòq gi, Ngo lé myàng kôrâ nghut lhê.’ gâ é eq ‘Ngò gi, Îwâ chyáng ló râ nghut é yánmai nghut lhê.’ ga, Yhang taî é gi, haí jung gá nau é nghut lhê lhú?” ga, rayùq eq rayùq myî lhûm bum akô. 18Hau htoq agó, yhángmòq gi, “‘Adê myáng má,’ gâ é gi, Yhang haí jung gá nau lhê lhú? Ngá-nhúng gi, Yhang haî taí nau é lé a sê gyo.” ga, taî lhûm bum akô nghut ri.

19Yesuq gi, yhángmòq myí nau é hkyô lé sê ri; haû mù, Yhang, yhángmòq lé taî é gi, “‘Adê myáng má, núngmòq gi, Ngo lé a myàng lo kôrâ nghut lhê; hau htâng, dum adê myáng má, núngmòq gi, Ngo lé myàng kôrâ nghut lhê.’ nghû, Ngò taî é lé, haí jung gá nau lhê làq nghû, rayùq eq rayùq myî lhûm nyi akô lhú? 20Ngò, núngmòq lé teng za taí kôlé, haû mingkan gi, gabú nyi é u lé, núngmòq gi, ngau é eq iyon yôn é hui kôrâ nghut lhê. Núngmòq gi, iyon yôn é hui kôrâ nghut lhê; nghut kôlhang, núngmòq é iyon hkyô gi, gabú hkyô taû dùt râ nghut lhê. 21Myiwe gi, zoshâng hkû râ nghut jáng, zohkû nò nò râ ahkyíng jé bê nghut é yánmai, myìt chiq nyi ri; nghut kôlhang, zoshâng lé wó hku htoq kat é hkûn gi, mingkan htoq má zoshâng rayùq wó hku to bê nghut luî, yhang gabú é yánmai, haû no hpû é hkyô lé a bûn byùq lo nghut ri. 22Haû eq rajung za, ahkuî gi, núngmòq iyon yôn é ahkyíng nghut ri; nghut kôlhang, Ngò, núngmòq lé dum huî é hkûn, núngmòq gi, gabú kôrâ nghut lhê; núngmòq é gabú hkyô haú lé, núngmòq chyáng mai ó yùq èq le wó yu pyám byi râ a nghut. 23Haú buìnyì má, núngmòq gi, Ngo lé, haî le a dung lo kôrâ nghut lhê. Ngò, núngmòq lé teng za taí kôlé, núngmòq gi, Ngá myîng lang luî, Ngá wâ chyáng haî dung kôle, Yhang byi râ nghut lhê. 24Ahkuî jé shoq, núngmòq gi, Ngá myîng lé lang luî, haî le a dûng wú shi kó nghut ri. Dung keq, haú hkûn, núngmòq myang hàp yù kôrâ nghut luî, núngmòq é gabú hkyô gi, byíng jùp lò râ nghut lhê.

25Ngò gi, núngmòq lé, dangtú dông haú pé taî kyo bê nghut lhê; nghut kôlhang, Ngò gi, dangtú a chûng lô é za, haû Îwa eq sêng é hkyô, núngmòq lé san za taî kyô é ahkyíng jé râ nghut lhê. 26Haú buìnyì má, núngmòq gi, Ngá é myìng lé lang luî dung kôrâ nghut lhê. Ngò gi, núngmòq é matú, haû Îwâ chyáng dung byi râ nghû taî nyi é a nghut. 27Hkâsu mù gâ le, núngmòq gi, Ngo lé chyitdàp kô é eq, Ngò gi, Îwa Garai Gasâng chyáng mai jé lé é Sû nghut é lé, núngmòq lùmjíng kô é yánmai, haû Îwa yhang, núngmòq lé chyitdàp é nghut lhê. 28Ngò gi, haû Îwâ chyáng mai htoq lé mù, mingkan má lé jé wang é nghut lhê; ahkuî, Ngò gi, mingkan mai htoq mù, haû Îwâ chyáng dum taû ló râ nghut lhê.” gâ ri.

29Haú hkûn, Yesuq é chángzô pé gi, “Ahkuî, Nàng gi, dangtú a chung é dông, san za taî kyô nyi é nghut bê! 30Nàng gi, lhúnglháng lé sê é sû nghut é lé le, Nang lé, ó yùq èq le dangmyi myi nó a râ é hkyô lé le, ahkuî, ngá-mòq wó sé bê. Hau é yánmai, Nàng gi, Garai Gasâng chyáng mai lé é sû nghut é lé, ngá-mòq lùmjíng lhê.” ga taî bum akô.

31Haú hkûn, Yesuq tû taî é gi, “Núngmòq, ahkuî lùmjíng bekô lhú? 32Nghut kôlhang, núngmòq gi, lhoqpyo pyâm é hui luî, Ngo lé baú za tô pyâm to kômù, ó le ô yhûm shut ló byùq râ ahkyíng jé lo nyì bê nghut ri; ahkuî lháng jé to bê. Nghut kôlhang, Ngò gi, Ngò baú za a nghut; hkâsu mù gâ le, Ngá wa gi, Ngò eq rahá nghut nyi lhê.

33Núngmòq gi, Ngò má nguì ngón hkyô wó kó sháng gàq nghû, Ngò gi, haú hkyô pé lé taî kyô é nghut lhê. Núngmòq gi, mingkan shí má, wuîhke hkyô hui kôrâ nghut lhê; nghut kôlhang, myìt wum lhoqkíng keq. Ngò gi, mingkan lé ung pyám bê nghut lhê.” gâ ri.

Currently Selected:

Yohan 16: znot

Highlight

Compare

Copy