Yohan 20

Lùp Akôm

Mht 28:1-10; Mrk 16:1-8; Luk 24:1-12

1Bánno Buìnyì htâng, nàpsûn noq le mau a bó shi-má, Magadalaq wà mâ é Mariq gi, haû lùp má ê jé le, lùp hkum mâ é lùqlong huî hpyuq to láng é lé myang ri. 2Haû mù, yhang gi, Simun Petiruq eq Yesuq chyitdàp é chángzo góyùq chyáng din jé ló mù, “Haû Yhûmsîng lé, lùp mai yu htoq ló byùq bekô; hká má ê kat to kô é lé, ngá-mòq a sé.” ga taî ri.

3Haû mù, Petiruq eq chángzo haû gi, lùp shut e ló akô. 4Yhángnhik í yùq é din akô; nghut kôlhang, chángzo haû gi, Petiruq htoq má wó dîn luî, lùp má hí din jé e ri. 5Haû mù, yhang gi, ahkaû shut ngóm wú kat é hkûn, haû pán yúng htui lèq tô é lé myang ri; nghut kôlhang, yhang gi, a wang ê nghut ri. 6Hau htâng, Simun Petiruq gi, châng jé luî, lùp hkaû shut wang e ri; haú hkûn, yhang gi, haú má pán yúng htui jòq tô é lé le, 7haû Yesuq é ulhum má htup é pánchoq lé le, myang ri. Pánchoq haû gi, pán yúng htui eq rahá a nghut é za htuî jùp lèq tô ri. 8Haû lùp má hí jé é chángzo le, ahkaû má wang ê luî, myàng jáng, lùmjíng bê nghut ri. 9(Yesuq gi, shi é mai dum dui toq lô râ nghut lhê ga bo tô é Chyúmdang lé, yhángnhik gi, a sê gyo shi kó nghut ri.) 10Hau htâng, haû chángzô nhik gi, yhûm taû ló bekô nghut ri.

Magadalaq Wà Mâ É Mariq Lé, Yesuq Htoq Shit É Hkyô

Mrk 16:9-11

11Nghut kôlhang, Mariq gi, lùp shinggan má ngau yàp tô ri. Yhang gi, ngaù uchyang lùp hkaû má ngóm wú kat ri. 12Haú hkûn, yhang gi, Yesuq é gùngsôm lheq tô é jang má, hpyu é mèbu wùt é maumang lagyo í yùq hkyî htâng shut rayùq, umhtúng shut rayùq, zung to kô é lé, myang ri.

13Yhángnhik gi, “Myiwe myhí ê, nàng, haî mù ngau nyi lhê lhú?” ga myi kôjáng, yhang gi, “Ngá é Yhûmsîng lé yù ló hpyuq kôluî, Yhang lé hká má ló lheq to kô é lé, ngò a sê é yánmai nghut lhê.” ga tû taî ri. 14Haû su ga luî, yhang, lhing wú kat é hkûn, Yesuq yàp tô é lé myàng kôlhang, Yesuq nghut é lé yhang a wú sé nghut ri.

15Yesuq gi, “Myiwe myhí ê, nàng, haî mù ngau nyi lhê lhú? Nàng gi, ó yùq lé ho wún lhê lhú?” ga myi jáng, yhang gi, hkyâm saí zo sû su ngam pyám mù, “Sará ê, nàng, Yhang lé wàq htòt pyâm é nghut le gi, hká má ê lheq tô é, ngo lé taî kyo laq, ngò, Yhang lé yu ló râ.” ga taî ri.

16Haú hkûn, Yesuq gi, yhang lé, “Mariq ê” ga wùt kat ri.

Mariq gi, Yhâng shut lhîng mù, Hebre myíng dông, “Raboni!” ga wùt kat ri. (Haû gi, “Sará ê” gâ é lichyúm nghut ri.)

17Yesuq gi, “Ngo lé hkâzáng shi; hkâsu mù gâ le, Ngò gi, haû Îwâ chyáng a taû dòq ló shî é nghut lhê. Nàng gi, Ngá é gu-mang wui chyáng ló mù, yhángmòq lé, ‘Ngò gi, Ngá wa eq núngmòq é Yhâng wa, Ngá é Garai Gasang eq núngmòq é Garai Gasang nghut su chyáng dòq ló zó nghut lhê.’ gâ ri nghû, ló taî kyo aq.” ga, yhang lé taî kat ri.

18Magadalaq wà mâ é Mariq gi, chángzô pê chyáng ló mù, “Yhûmsîng lé, ngò myàng bê!” ga taí luî, yhang lé shit kat é pé lé, taî kyô ri.

Yesuq, Yhâng É Chángzô Pé Lé Htoq Shit É Hkyô

Mht 28:16-20; Mrk 16:14-18; Luk 24:36-49

19Haú nyí, Bánno Buìnyì htang myìn lé, haû chángzô pé gi, Yudaq byu pé lé gyùq kô é yánmai, hkum tsing myhî pyám mù, zîng tô bùm kô é u lé, Yesuq gi, lé jé mù, yhángmòq é agùng má yàp to luî, “Núngmòq nguì ngón yùqyo nyì sháng gàq!” ga taî ri. 20Yhang gi, haû su ga taî é htâng má, yhángmòq lé, Yhâng é lòq pé eq nàmcham lé tûn shit ri. Chángzô pé gi, haû Yhûmsîng lé myàng kôjáng, gyai gabú bùm bekô nghut ri.

21Yesuq gi, “Núngmòq nguì ngón yùqyo nyì sháng gàq! Haû Îwa gi, Ngo lé nhang kat é su, Ngò gi, ahkuî, núngmòq lé nhang kat é nghut lhê.” ga dum taî ri. 22Haû su ga taí mù, Yhang gi, yhángmòq é ahtoq má soq mùt luî, “Haû Chyoiyúng Sô lé hàp yù keq. 23Ó yùq é mara pé lé nghut kôle, núngmòq hkyut byî é nghut jáng, mara haú pé gi, hkyut pyám byî é hui râ nghut lhê; núngmòq a hkyut byî é nghut jáng, mara haú pé gi, hkyut pyâm é hui râ a nghut.” ga taî ri.

Htomaq Lé, Yesuq Htoq Shit É Hkyô

24Haû chángzo raxe í yùq má bo é, Zozûm le gâ é Htomaq gi, Yesuq lé jé é hkûn, haû chángzô pé eq rahá a nyi to nghut ri. 25Haû mù luî, gótû chángzô pé gi, yhang lé, “Haû Yhûmsîng lé, ngá-mòq myàng bê.” ga taî kyô akô.

Nghut kôlhang, yhang gi, yhángmòq lé, “Ngò gi, Yhâng é lòq pé mâ é shâmtoq zuhkô lé myàng mù, ngá é lòqnyhuî èq chyoi wú é eq, Yhâng é nàmcham má, ngá é lòq èq myang làp wú é za a nghut jáng, haû lé ngò lùmjíng râ a nghut.” ga taî ri.

26Rabàt myáng jáng, chángzô pé gi, haû yhúmhkaû má dum nyi tô akô; Htomaq le, yhángmòq eq rahá nghut nyi ri. Haû hkum pé myhî to kôlhang, Yesuq gi, lé jé mù, yhángmòq é agùng má yàp to luî, “Núngmòq nguì ngón yùqyo nyì sháng gàq!” ga taî ri. 27Hau htâng, Yhang gi, Htomaq lé, “Náng é lòqnyhui, shî má lé chyoî mù, Ngá é lòq pé lé wú aq. Náng é lòq lhâm kat mù, Ngá é nàmcham má lé làp wú aq. A lùm hkâkut, lùmjíng nyì àq.” ga taî ri.

28Haú hkûn, Htomaq gi, “Ngá é Yhûmsîng, ngá é Garai Gasang ê!” ga Yhang lé taî ri.

29Yesuq gi, yhang lé, “Nàng gi, Ngo lé myang é yánmai, lùmjíng é a nghut lhú? A myàng kôlhang, lùmjíng é bang gi, hkungsô wó nyi ri.” ga taî ri.

30Laiká bùk shî má a kâ tô é maúhpo alhô agàn pé gótû myo myo lé le, Yesuq gi, Yhâng é chángzô pê hí má kut shit bê nghut ri. 31Nghut kôlhang, Yesuq gi, Garai Gasâng é Yhangzo Hkrisidùq nghut é lé, núngmòq wó lùmjíng râ matú eq, lùmjíng é yánmai, núngmòq Yhâng é myìng má chyungxe wó kôrâ matú, shí hkyô pé lé kâ tô é nghut lhê.

Currently Selected:

Yohan 20: znot

Highlight

Compare

Copy