Nhông Jaú 7
7
Mara Hpyî Hkungga
1Mara hpyî hkungga gi, chyoiyúng htâng é nghut mù, hau é matú cháng râ târâ pé gi, 2mara hpyî hkungga lé gi, myi nyhé hkungga sat é jowò má sat ra râ nghut lhê; hau é sui lé gi, hkungga gyàp ayàm pé má hpyûn gyun ra râ nghut lhê. 3Hau é xû bànshoq lé nhông byi ra râ nghut lhê; haú pé gi, sho-myi mâ é xû hkyí sho-myi eq sing û lé nghop tô é xû myhên pé, 4hpyidum nàm mâ é jínlhum í cham eq haú má dàp é xû myhên, haû jínlhum í cham eq rahá hî yù râ nghut é sing long nghut râ nghut lhê. 5Hkyangjong hpó gi, haú pé lé, Yhûmsîng Garaî é matú hkungga gyàp htoq má nyhê nhông râ nghut lhê. Haû gi, mara hpyî hkungga nghut lhê. 6Hkyangjông pê chyáng mâ é yùqzo hkangmó gi, haú lé ge zo râ nghut lhê; nghut kôle, haú lé, sân-yúng jowò má zo ra râ nghut lhê; haû gi, chyoiyúng htâng é nghut ri.
7Mara hkyut hkungga eq mara hpyî hkunggâ é târâ gi, rajung za nghut lhê mù, haú pé lé mara hkô htaí hkungga nhông hkyangjong hpó gi, hkungga sho haú pé lé ge yù râ nghut lhê. 8Ô matú nghut kôle, myi nyhé hkungga nhông byî é hkyangjong hpó gi, yhâng é matú hkungga hau é sho-kuq lé ge yù râ nghut lhê. 9Haû gùqzò hkungga hkangmó lé gi, myi bunghkyûng má nyhîn nyhoq yu é nghut nghut, au hpyén má chyoq yu é nghut nghut, jòqtoq au hpyén má chyoq yu é nghut nghut, haú lé lhom yu nhong é hkyangjong hpó ge yu lhê. 10Haû gùqzò hkungga hkangmó lé gi, tsanlun xû eq nyhô é nghut nghut, a nyhô é nghut nghut, Arun é yùqzô pé bànshoq bang rawuí wuí za gam yù kôrâ nghut lhê.
Zùmhkaû Hkungga
11Haû Yhûmsîng Garai lé zùmhkaû hkungga nhông byi su é cháng ra târâ pé gi, 12jeju bun hkyô shit râ matú nhông byî é nghut jáng, jeju bun hkungga haû eq rahá, múnchi a bo é za tsanlun xû eq myhik nyhô tô é mùk htû long pé, múnchi a bo é za xû but tô é mùk yhám long pé eq, je nú é mún má xû kat luî, rago myhik nyhó mù saî tô é mùk htû long pé nhông byi ra râ nghut lhê. 13Hau htoq agó, jeju bun luî nhong é zùmhkaû hkungga eq rahá, múnchi bo é mùk htû long pé le byi ra râ nghut lhê. 14Hkungga haú pé jung hkangmó mâ é mùk ralong long yù mù, Yhûmsîng Garaî é matú wàq toq hkungga dông yu lé byi ra râ nghut lhê; haú lé gi, zùmhkaû hkungga sui lé hkungga gyàp má hpyûn gyûn é hkyangjong hpó yù râ nghut lhê. 15Jeju bun luî nhong é zùmhkaû hkungga sho lé gi, nhông byî é nyí má yhang zô pyám râ dùt lhê; htang nàpkyó jé shoq haî lháng ge tô to râ a nghut.
16Nghut kôle, danghtum htûm to luî nhong é hkungga, a nghut jáng, byi naù hkungga nghut jáng gi, nhông byî é nyí má zo ra râ nghut luî, htang nyí jé shoq myìt tô é lé le ge zo râ nghut lhê. 17Sum nyí nyí jé shoq myìt tô é hkungga sho lé gi, nyhê hkyô pyám ra râ nghut lhê. 18Zùmhkaû hkungga sho lé, sum nyí nyí má zô é nghut jáng, haú lé nhông byi sû gi, hàp yù byî é hui râ a nghut; haû gi, achaq achyut dùt byùq bê nghut é yánmai, haú lé hkungga dông són byi râ a nghut; haú lé zo sû gi, yhûmsing é mara lé wò yù ra râ nghut lhê.
19Htûngli dông a sansêng é zè lé záng bê é hkungga sho lé gi, ge zo râ a nghut, nyhê pyám ra râ nghut lhê. Gótû sho lé gi, htûngli dông sansêng é bang ge zo râ nghut lhê. 20Nghut kôlhang, a sanséng nghut to sû, haû Yhûmsîng Garai eq sêng é zùmhkaû hkungga sho lé zô é nghut jáng, haú yùq lé gi, yhâng é a-myû mai chyung hpyit pyám ra râ nghut lhê. 21Xângzo byu pê chyáng dàp é a sansêng é lé nghut kôle, a sansêng é gaunyhaú lé nghut kôle, myigùng htoq mâ é a sansêng é haî lé nghut kôle záng luî, haû Yhûmsîng Garai eq sêng é zùmhkaû hkungga sho zô é sû lé gi, yhâng é a-myû mai chyung hpyit pyám ra râ nghut lhê.’ nghû àq.” ga taî ri.
A Ge Zô É Xû Eq Sui
22Haû Yhûmsîng Garai gi, Mosheq lé, 23“Isira-elaq byu pé lé îsu nghû taí aq; ‘No eq sau bainám pê é xû myhên lé, núngmòq ge zo râ a nghut. 24Yhang baú shi tô é eq yòsô ze èq lâng myhâ ngàt sat tô é gaunyhaû é xû myhên lé, gótu é matú ge chûng kôlhang, haú lé núngmòq ge zo râ a nghut. 25Haû Yhûmsîng Garaî é matú myi nyhé hkungga nhông byî é gaunyhaú xû myhên lé zô é sû lé gi, yhâng é a-myû mai chyung hpyit pyám ra râ nghut lhê. 26Núngmòq hká má nyi é nghut kôlhang, nghoq sui eq gaunyhaú sui lé ge zo râ a nghut. 27Sui zô é sû lé gi, yhâng é a-myû mai chyung hpyit pyám ra râ nghut lhê.’ nghû àq.” ga taî ri.
Hkyangjông Pê É Gàmbùm
28Haû Yhûmsîng Garai gi, Mosheq lé, 29“Isira-elaq byu pé lé îsu nghû taí aq; ‘Yhûmsîng Garai lé zùmhkaû hkungga yu lé byî é sû gi, yhâng é hkungga mâ é, Yhûmsîng Garai lé nhông byi râ gû lé, yu lé ra râ nghut lhê. 30Yhûmsîng Garai lé nyhê nhông byî é hkungga lé yhûmsing lòq èq yhang yu lé ra râ nghut lhê; xû eq rahá wànggàng lé le yu lé mù, wànggàng lé wàq hê hkungga dông haû Yhûmsîng Garaî é hí má wàq hê ra râ nghut lhê. 31Hkyangjong hpó gi, haû xû lé hkungga gyàp má nyhé râ nghut lhê; nghut kôle, wànggàng lé gi, Arun eq yhâng é yùqzô pé yù râ nghut lhê. 32Haû zùmhkaû hkunggâ é lòqyo tangsân lé gi, wàq toq hkungga dông hkyangjong hpô chyáng yu lé byi ra râ nghut lhê. 33Haû zùmhkaû hkunggâ é xû myhên eq sui lé lhom yu nhong é Arun é yùqzo gi, haû lòqyo tangsân lé, yhâng é gàmbùm dông yù ra râ nghut lhê. 34Ngò gi, haû Isira-elaq byu pê é zùmhkaû hkungga mai, wàq hê wànggàng eq wàq toq tangsân lé yù mù, Isira-elaq byu pê chyáng mâ é ahtum abyùq gàmbùm dông, hkyangjong Arun eq yhâng é yùqzô pé lé byi bê nghut lhê.’ nghû àq.” ga taî ri.
35Haû gi, Arun eq yhâng é yùqzô pé lé, Yhûmsîng Garaî é hí má hkyangjông pé dông dójaú râ matú lé shit é buìnyì má, hkyô to byî é, Yhûmsîng Garai lé nyhê nhông byî é hkungga mâ é gàmbùm nghut lhê. 36Haû gi, yhángmòq lé namngón xû but ayá dáng byî é buìnyì má, jé lô râ pyàt bán pê é matú, yhángmòq é ahtum abyùq gàmbùm dông, Isira-elaq byu pé mai yhángmòq lé byi râ matú, Yhûmsîng Garai hkunmó hkyô tô é nghut ri.
37-38Haû mù, haú pé gi, Sinaq yòso má, Isira-elaq byu pé lé, Yhûmsîng Garaî chyáng yhángmòq é hkungga pé yu lé râ matú, Yhûmsîng Garai hkunmó hkyô é buìnyì má, Sinaq Bùm mai Mosheq lé Yhûmsîng Garai byî é, myi nyhé hkungga, gùqzò hkungga, mara hkyut hkungga, mara hpyî hkungga, ayá dáng hkungga eq zùmhkaû hkungga pé eq sêng é cháng ra târâ pé nghut ri.
Currently Selected:
Nhông Jaú 7: znot
Highlight
Copy
Compare
Share
Want to have your highlights saved across all your devices? Sign up or sign in
© 2025, Wycliffe Bible Translators, Inc.