Gyung So 6
6
Naziri Byù Kut É Târâ Pé
1Haû Yhûmsîng Garai gi, Mosheq lé, 2“Isira-elaq byu pé lé dang nyô mù, yhángmòq lé, ‘Myiwe nghut nghut, yùqgè nghut nghut, yhûmsing gùng lé, haû Yhûmsîng Garaî é matú san kut gam hkoq to râ matú, Naziri byù#6:2 Naziri byù nghu é gi, Garai Gasâng é matú rajung jung kut râ dông góbang eq san kut gam hkoq yu é dakâm danghtum htûm tô é sû lé gâ lhê. nghu é dakâm danghtum htûm tô é nghut jáng, 3yhang gi, tsibyiq wing eq gótû nyhûn tô é î lé koi pyám râ é htoq agó, tsibyiq wing mai, a nghut jang, gótû nyhûn tô é î mai saî htoq é chyînwing le ge shuq râ a nghut; tsibyiq shiwing lé le, tsibyiq shi pé eq tsibyiq shi kyuq pé lé le ge zo râ a nghut. 4Yhûmsing gùng lé gótû san kut yu tô é ahkyíng ayòq má, yhang gi, tsibyiq gâm mai wó é haî lé le ge zo râ a nghut; ají eq akuq lháng ge zo râ a nghut.
5Yhâng é Naziri byù kut yu é dakâm danghtum htûm tô é ayòq abun bànshoq má, uxâm ge wùq pyám râ a nghut. Yhang gi, haû Yhûmsîng Garaî é matú àp nhong tô é ayòq abun byíng shoq chyoiyúng nyî ra râ nghut lhê; yhûmsing é xâm lé le yùq hing to nhâng ra râ nghut lhê.
6Haú yùq gi, haû Yhûmsîng Garaî é matú àp nhong tô é ayòq abun bànshoq má, shî màng shut ge chyâng htèp ê râ a nghut. 7Yhâng nu yhâng wa, a nghut jáng, yhang gu yhang mang, yhang gu yhâng nhá shi byùq le lháng, yhang gi, haú bâng é yánmai, yhûmsing gùng lé htûngli dông a sanséng ge kut yû râ a nghut; hkâsu mù gâ le, Garai Gasâng é matú yhang àp nhong tô é alhô gi, yhâng é ulhum htoq má jòq nyi ri. 8Yhang gi, yhang àp nhong tô é ayòq abun bànshoq má, haû Yhûmsîng Garaî é matú chyoiyúng nyî ra râ nghut lhê.
9Naziri byù kut su é myòq hí má, byò dàn tung rayùq yùq shi byùq é nghut mù, yhâng é àp nhong tô é alhô nghut é xâm lé agòt a-û dùt pyám nhang é nghut jáng, lhoq sansêng é buìnyì nghu é nyhit nyí jé jáng, yhâng é uxâm wùq ra râ nghut lhê. 10Hau htâng shit nyí nyí má, yhang gi, hpûngkyui í du, a nghut jáng, nghoqmyhû zo í du lé, haû zùphpong zúm é hkum má hkyangjông chyáng yu lé ra râ nghut lhê. 11Hkyangjong hpó gi, haú yùq shî màng hí má nyi záng é dông mara shut bê nghut é yánmai, radu lé, mara hkyut hkungga dông nhông byi mù, gódu lé, Naziri byu é matú mara hkô htaí hkungga kut râ myi nyhé hkungga dông nhông byi ra râ nghut lhê. Yhang gi, haú nyí má yhang, yhâng é ulhum lé dum lhoqchyoi lhoqyúng ra râ nghut lhê. 12Yhang gi, hí lé gótû san kut to bê é ayòq abun eq rajung za, Yhûmsîng Garaî é matú gótû san dum kut to luî, mara hpyî hkungga dông razàn bò bê é saulo zo lé yu lé ra râ nghut lhê. Yhang gi, àp nhong tô é ayòq abun má agòt a-û dùt pyám bê nghut é yánmai, hí lhê é buìnyì pé lé a ge nghap lhóm lo râ nghut lhê.
13A-ô mâ é gi, Naziri byù kut su é târâ nghut lhê. Àp nhong tô é ayòq abun byíng é hkûn, Yhang lé gi, zùphpong zúm má shuî lé ra râ nghut lhê. 14Haú má, yhang gi, Yhûmsîng Garaî é matú yhâng é hkungga pé lé nhông byi ra râ nghut lhê. Hkungga haú pé gi, myi nyhé hkunggâ é matú haî le a râ é razàn bò bê é saulo zo radu, mara hkyut hkunggâ é matú haî le a râ é razàn bò bê é sauzîng radu, zùmhkaû hkunggâ é matú haî le a râ é saulo radu, 15múnchi a bo é za, je nú é mún eq xû nyhó mù saî é mùk long ra-kyáng, múnchi a bo é za, tsanlun xû but é mùk yhám long pé, gùqzò hkungga eq shuq jung hkungga pé nghut ri.
16Hkyangjong hpó gi, haú pé bànshoq lé Yhûmsîng Garaî hí má yu ê mù, mara hkyut hkungga eq myi nyhé hkungga lé nhông byi ra râ nghut lhê. 17Yhang gi, Yhûmsîng Garaî é matú, múnchi a bo é mùk kyáng haû lé nhông byi luî, zùmhkaû hkungga dông saulo lé sat nhông byi mù, gùqzò hkungga eq shuq jung hkungga lé le rahá nhông byi ra râ nghut lhê.
18Hau htâng, Naziri byù kut sû gi, zùphpong zúm hkum má, yhang àp nhong tô é alhô nghut é uxâm lé wùq pyám ra râ nghut lhê. Xâm haú lé, zùmhkaû hkúnggâ é a-ô mâ é myi má nyhê hkyô pyám ra râ nghut lhê.
19Naziri byù kut sû mai, yhang àp nhong tô é alhô nghut é uxâm lé wùq pyâm é htâng má, hkyangjong hpó gi, chyoq bê é saulo hkyîsân rasân, múnchi a bo é, mùk htû ralong eq mùk yhám ralong lé, yhâng é lòq má kat byi ra râ nghut lhê. 20Hau htâng, hkyangjong hpó gi, haú pé lé, wàq hê hkungga dông Yhûmsîng Garaî é hí má wàq hê râ nghut lhê; haú pé gi, wàq hê wànggàng eq wàq toq tangsân le mù, hkyangjong hpô é matú chyoiyúng ri. Hau htâng má, Naziri byù kut sû gi, tsibyiq wing ge shuq berâ nghut lhê.
21Shí pé gi, yhang àp nhong tô é má cháng luî, Yhûmsîng Garaî é matú hkungga pé byi râ ga dakâm danghtum htûm tô é htoq agó, yhang wó dùt é myhó nhông byi râ nghut é, Naziri byù kut su é târâ pé nghut lhê. Yhang gi, Naziri byù kut su é târâ eq rajung za, yhang dakâm danghtum htûm tô é lé lhoqdìk ra râ nghut lhê.’ nghû àq.” ga taî ri.
Hkyangjông Pé Shimân Byî É Dang
22Haû Yhûmsîng Garai gi, Mosheq lé, 23“Arun eq yhâng é yùqzô pé lé îsu nghû taí aq; ‘Núngmòq, haû Isira-elaq byù lé îsu nghû shimân byi ra râ nghut lhê; yhángmòq lé,
24“Haû Yhûmsîng Garai gi, nang lé shimân byi mù,
ùpzúng nyî sháng gàq;
25haû Yhûmsîng Garai gi, nang lé Yhâng é myòqdong dùq bó byî nyì mù,
shogyo nhikmyîn yu nyì sháng gàq;
26haû Yhûmsîng Garai gi, nang lé wú magûm mù,
nguì ngón yùqyò hkyô byî nyì sháng gàq ô!” nghû taí keq.’ nghû àq.
27Haû mù, yhángmòq gi, Isira-elaq byu pê é ahtoq má Ngá é myìng ke byi kôrâ nghut mù, Ngò gi, yhángmòq lé shimân byi râ nghut lhê.” ga taî ri.
Currently Selected:
Gyung So 6: znot
Highlight
Copy
Compare
Share
Want to have your highlights saved across all your devices? Sign up or sign in
© 2025, Wycliffe Bible Translators, Inc.