Luk 24

Iesu boe inakae yon wanden

1Diu pura muga bawarewa wamewa uon tani, wam namupewa, mumaget iragen, ian waen ame, kaum tutu denawa waran dagup amon. 2Ame tauane, dagup tonanewa no aroga wanden iwa gwat baware tonan borane ame baim wa tau aen yawane. 3Menan, mu dagup gwanewa unuk amone go Ayop Iesu etua ya yawan.

4Anu bambamatan wanumone boge apan dere wanup muga ganase den enan mainamup yoniwanumune yawamone. 5Waen tap kaime doran menan pia nikapu enun. Apan anega wayawamon, “E dimen mapa kaima arewa gapan inakaeni apanewa yowa taiwanin? 6Me mapa uon, me gaset inakae yon wanden! Iesu wataget at Galili gapan wandeni nop wadiaeni anu awayan go uon? 7Iesu manega wan, ‘Ne Kimani Vitana Apanewa ian ugupe nagirewa nanimu gwanap bat nimanegain amba oma korosi gapan toguranegep bonigatain amba wam yampoa gapan ne inak nigat sia yon wanigain.’” 8Boge waen ameme nop ap anune gapan, Iesu nop mega anen wani ame ase anu awane.

9Menan, mu menawaet amone Iesu watu enamot mega aonagaet pusinawan daiton amba waenapan upi den inamup tauan oit wadidiamon. 10Waen ap wadidiamone nagire yaumua Meri Makdalin, waen Dioana, ge Meri (otua apan Diemis) amba waen upine den. 11Wadidiamone go mu nop muga ebo mini anune menan ya anu tumasen.

12Go Pita yon wande, dagup yawapen menan serarat aen. Dagup taue kaut enu, wa panam taune wanupewa megenat gwanap wanden yaven. Boge Pita pa mega ae, inak mame venaseni menan anu yao seyao ta aiwandini.

Pa Emeas negine guturewa

13Wam ame daiton, Iesu wadiamot mega dere pa Ierusalem ae vean pa Emeas amon. At ame wandap uon, (ame 10 kilomita mini). 14Mu inak wan dim dim aruga ame venaseni, no oisewa gare gare wan amuiwanumun. 15Ap waiwanumune gapan Iesu inamup tauen den amon. 16Mu Iesu yawane go irewa ya yawan anune iwa God yamamu toboboren.

17Iesu singui anega wayawamon, “E ap aisiwaniana gapan dim noa da gare gare wawa isiwanin?” Ap wani gapan, mu bagu sisi anune amba gine namu ae bigat mutane ae yonan. 18Apan dere, dawa yaua Kiliopas gare anega wan, “Ge Ierusalem daio ageanawa wam ap gapan dim da ta waiwanumune ge da ya anuana menan waingi go?” 19Iesu gare anega wan, “Dim dim da venasiwandin?” Apan ame gare anega wan, “A, nu Iesu pa Nasaret apane oisewa waivin. Me God nop mega waini apane amba waenapan namumup nop wat ge tat mega aroe amunu den. 20Go Pirisi bawarewa amba ayop nuga nagire upi den Iesu waran ian ugupe nagire nanimu gwanap baraen oma korosi gapan tone boen. 21Me nu Isurero nagire anavi nuga aro muga gapan vetanep tau anepen men anuton. Inak baware mame venaseni, wame yampoa endi mame. 22-23Go endi waen nuga upi mumaget iragenawa dagup yawapen amone, go mondi pokaet yawan tauan amba wabambam nimanene. Amba den anega wane, ‘Nu anea dere yawamoton. Anea ame anega wane, Iesu me inakae yon wanden.’ Waen oit ap anega wan. 24Waenapan nuga tanam waninetoni, upi dagup amone waen oit wane ap uap sia Iesu ya yawane.”

25Apan dere nop ap waiwanumune menan Iesu gare anega diamon, “E bumbam anenen da tayan waiwanin. God nop mega wataget waiwanumune nagire nop muga menawaet ya anu tumat wanin. 26Mu ok anega seane, God mega wa watu eneni Keriso ugu vegaek bagu sisi anu tanep amba oya oya mega kimaniwa gapan wagup wareta.” 27Ap gapan, Iesu watageta nagirewa Mosis namu amba God nop mega waiwanumune nagire den Iesu oit mega, ok gapan seane, gueguewa wadidiamon.

28Amba pa Emeas maniwanumunewa, Iesu wa garawat mume taue namu aepen tan. 29Go mu anega wan watanane, “Onge tanak inat, ma wan gine gaset tan, mum di tauapen taiwan,” ap anega wane menan tanamo pa gwanap aen.

30Amba taba napen menan Iesu ae wande, buredi ware God inap gaun wa, wa paise amba munen. 31Muneni gapan, God yamamu watapen, Iesu ire ase yawane boge oagaen, da sia ya yawan. 32Mu gare gare anega wan, “Iesu negina God nop mega gueguewa wadidian wandini nu potanu oma yame mini yagiriwandin.”

33Boge mu wam ameme di yonan ewagai sia entan pa Ierusalem amon. Tauane Iesu watu enamot mega aonagaet pusinawan daiton amba waenapan upine den tanam wanumone yawamon, 34go pa wanumuine nagire namu anega wan, “Ayop nuga di yon wanden apan Saimon inap venasen.” 35Amba apan dere ame neginaet amuiwanumune gapan anenen venasen yawane oisewa wadidiamon, amba Iesu den taba napen tane gapan buredi wa paiseni wamewa gapan ire yawane oisewa den wadiamon.

Iesu watu enamot megawa inamup venasen

36Mu inak mame yawane oise waiwanumune, Iesu me mek taueni boge nimakamup yone anega diamon, “Nonup inayap wande ep.” 37Mu boeni apane guewa da yawat anune menan guamu pua aen tap anu gurane. 38Menan Iesu anega diamon, “E di menan nene yangwan doraen taiwanin? Iwa dimen imuyap gego den anuiwanin? 39Nanina pusina yawan ma ne di! Onaen wat anu nimanegen amba yawanegen, ne etuna kaimana den go guewa etua kaimewa uon.” 40Iesu nop ame wani, boge naniwa ge pusiwa siran ewamon. 41Mu aton anuiwanumune go anu bambamat inamup di wandeni menan, me singui anega tamon, “E taba nana da den?” 42Menan mu meo bonigawa da wat onam wanan. 43Iesu boge ware, watu enamot megawa yamamup nan.

44Amba Iesu sia wadiamon, “Ne manap tanaen wanigena, inak map anega venasepi oisewa, namu wadiaen ame Apan Mosis ge God nop mega waiwanumune nagire amba den buka Sam seane nagirewa oitana iravi ok seane mame di venasia.” 45Ap gapan me God nop mega mu anu awapen menan imumu watapen. 46Amba Iesu anega wadiamon, “Wataget God nop mega ok anega seane,

God om enuni Keriso da tauepi ugu vegaek anu bop tata,

amba wam yampoa ewap me bop gapan,

sia inakae yon wandeta.

47Ap menan Keriso me yaua gapan inak koewa anu ae veat,

ge wat entan tapen no oisewa, namu pa Ierusalem gapan,

amba at at iragi wadidiamoin.

Ok ap anega sean. 48Inak ma yaviana no oise ase wasenamene nagirewa e me di. 49Amba ne nek Mamana kimani agi mega wani ne enan watu enain, go e mapa Ierusalem gapan amat taiwanian amba aro amun da aupa kimani aigayap visepi waran amba tau aisen.”

Iesu kiman dot aen

50Amba Iesu wadidiamot mega naumo taue at Betani mainep tauan. Ap mepe nani ao wadave wat aipakam mumen. 51Wat aipakam mumiwandiniwa gapan, me pusiwa ao bunen boge ae vemo, God aro mega gapan kiman dot aen. 52Ame boge waenapan mega Iesu wa taragasene atonu den sia entanen pa Ierusalem amon. 53Ap mepe God Paewa gwanap pot pot usenagaet God inap wa atonasiwanumun.

Currently Selected:

Luk 24: dgz

Highlight

Copy