Luk 2

Maria uqa Jisas basen

(Matju 1.8-25)

1Saen euna Sisa Ogastas, uqa Rom hatu cofdoc dana, uqa dana age maha cunugna bilein age ijanaga jaqoqagannu loo je oso men. 2Loo je eu hahawan calen saen euna Kwirinias uqa Siria agena hatu ilo bilen.#2.2 Saen euna Rom age Isrel agena hatu cofdoin. Isrel hatu eu Siria hatu ben dunuh nijen. Rom age agena king eu Sisa ein. 3Eunu dana cunug age agena jobon gugna beli age ijanaga jaqein.

4Odocob Josef uqa Dewid sihulnadec. Dewidna sihul agena jobon gug eu Betlehem. Anag uqa Dewid ono basen. Eunu Josef uqa Nasaret jobon Galili hatudec culdimei Betlehem jobon ono Judia hatuna nuen. 5Uqa Mariaca osoben ijanala jaqecnu belesin. Maria uqa Josef ugiannu col codoin qa uqa waugca cobon. 6Odocob ale Betlehem jobon bibilesin mel basecnu saen calen. 7Odimei Maria mel matu basimei lotocna jeludimei ono nijec jo cudunca qeenu uqa bulmakau agena bohna mudeceb nijen.

Ensel age sipsip cofadec dana maadein

8Odocob hatu euna sipsip cofadec dana age witic sipsip cofaadi bileig cabina bilein. 9Odi bibilegin Tibudna ensel dana age gemo caleceb age Tibudna kobolkobol iletadeceb ben bahic cucuiein. 10Euqa ensel maaden, “Cain cucuiuwain! Ge feiga, ija age me je ahuadiga eu dana cajaca mahamaha cunug dumeig celebooqagan. 11Qila deel ina Dewidna taun ono caja oso mel baseia. Uqa agena Cahahaadec. Uqa Krais#2.11 Krais eu dana Anut uqana dana caja cahahaadecnu wele nesili ehuden. Tibud. 12Age fecnu gadac oso eu odi nijigian. Age mel momo oso lotocna jelec uqa bulmakau agena bohna ninijeb foqagan,” aden.

13Odocob mahuc bahic sao ohisna ensel age Anutna han dana gagadic mati bahic ensel euca cali humeig age Anut binan susuli madein:

14“Sao ohis bahic Anut uqa kobolkobolca biliale.

Mahana dana age Anut uqa nalunuga mena eu malol bileigale,” ein.#2.14 Grik jaqec je hilah leihna age je oso tubdu jaqein eu odi: “Anutna malol eeldocca dana cunug gemo bilesiale!” ein.

Sipsip cofadec dana age nui Jisas fein

15Odocob ensel age culadi sao jobon haun tecebil sipsip cofadec dana age togodudu madein, “Ge, ceteh caleia Tibud mageia eu fecnu Betlehem jobon ono beleqale,” ein.

16Odimeig age mahuc belimeig Maria Josefca gulucalimeig mel momodo eu bulmakau agena bohna ninijen fein. 17Fecidodoig ensel mel inu maaden je eu Maria Josefca saalein. 18Odocob dana cajaca cunug age sipsip cofadec dana agena je doin eunu age tumatumaiein. 19Euqa Maria uqa ceteh inu dahig bilen. Uqa ceteh i waugna mimei cisdoloi. 20Odocob ceteh eu age ensel uqa sipsip cofadec dana maaden odi gulucdoin. Eunu age Anutnu celeboeeig Anut binan susuli bileig ceseli belein.

Jisas ijan qoin

21Odocob deel 8-pela hedocob age Jisas deweg cagu qumeig ijan Jisas qoin. Eu Maria waugca qee mec ijan eu ensel uqa madon.

Josef Mariaca Jisas tempelna ehudi belesin

22Odocob Maria Jisasca soialecnu saen caleceb Josef Mariaca ale Mosesna loo je toodumesi ale Jisas ehudi tempelna Tibud amegna mudecnu Jerusalem ono belesin. 23Tibudna loo je jaqec eu odi nijia:

“Mel manahal matu cunug basegina eu age Tibudnu gun egina,” en. (Kisim Bek 13.2, 12)

24Tibudna loo je jaqec oso ha nijia:

“Age cuhudid lecisfo, man fululec fil oso lecisfo Tibudnu ihaneiga,” en. (Wok Pris 12.8)

Euha ale toodu odosin.

25Aria, dana oso Jerusalem ono biloloi. Uqa ijan Simion. Uqa dana ititom. Uqa Anut binan sulec dana. Uqa Anut uqa Isrel hulunuga cehigian saen susumudi bilei bilen. Odocob Kis Gun uqaca bilen. 26Odi bibilen Kis Gun madon, “Hina qee cal mec bibili li Tibudna Krais eu fegan,” docob don. 27Odocob Kis Gun dado mudeceb tempel dunuh len. Odocob saen mel anag memegca ale loo je jaqein eu odi toodu odocnu mel eu tempelna ehudi lelesin 28Simion uqa mel eu umei ebenna hehewi Anut hetaga don. Uqa maden:

29-32“O Ben, ija amigulna hinana cahahagec figa.

Cahahagec eu dana cunug age amagana saciadom.

Hinana jic coboc Juda dana qee eundec ihacadigiannu eu fulacdoc.

Eu hinana dana cajaca, Isrel, age binanaga benca madigian.

Hinana je matem eu aig cali hoia.

Eunu ija, hinana cabi dana, cultecem wawi malolca cal migale,” en.

33Odocob mel anag memegca ale Jisasnu je eu Simion maden eunu tumatumaesin. 34-35Odocob Simion uqa eeladimei Maria, Jisas anag, madon, “Faga, Anut uqa Isrel dana cajaca mati bahic fadaladigiannuca, dana cajaca mati bahic cahahaadigiannuca mel eunu Anut nesili ehuden. Odocob mati agena cisdoc jahunec eu camas moqagannu mel i Anutna gadac caligian. Dana mati bahic uqanu je me qee madoqagan. Odocob hinanuha, sigin aigca oso hina culin qu wogoldugianwe waloc higian,” don.

36Odocob saen euna je hahun madec caja oso bilen. Uqa ijan Ana. Uqa Fanjuel ateg. Fanjuel uqa Asa sihulnadec. Ana uqa caja toia bahic. Weleca uqa cabi gel 7-pela danaca bilen. 37Odimei uqa cabi gel 84 odi danaca qee bilen. Uqa tempel qee culdoloi. Uqa witic cahinegca Anutnu inondudu cud biloloi. Eu odina uqa Anut cewel utoloi. 38Saen euna dih uqaha ono tempelna calen. Uqa ono calimei Anut hetaga ec je madon. Odimei uqa dana cunug age Anut cahahaadigiannu susumudi Jerusalem ono bilein mel eunu maaden.

Josef Mariaca ale Nasaret ceseli belesin

39Odocob Josef Mariaca ale Tibudna loo je toodoc cabi hedocobil ale Jisasca alena jobon Nasaret ceseli Galili hatu ono belein. 40Odocob hibna mel eu ben mi gagadic men. Uqa Anutna doc am bec biloloi. Uqa Anut amegna me bahic biloloi.

Jisas uqa mel lulu tempelna nuen

41Odocob cabi gel cunugna Jisas anag memegca ale Juda agena ja qoc fecnu, ijan eu Pasowa, Jerusalem ono gaid belolosi.#2.41 Age je Mak 14.1na nijia eu feiga. 42Saen Jisas uqana ben mec gadac cabi gel 12-pela caleceb memeg anagca alena kobol toodumesi Jisas ehudi ja qoc ben fecnu belesin. 43Odocob ja qoc ben saen hedocob ale haun jobon ceceselesin qa Jisas uqa Jerusalem ono bilen. Odimesi memeg anagca uqa ono bilen eu ale qee dolosin. 44Ale Jisas uqa cotugul danahca leih gami belegina ec cisdosin. Eunu ale odi cocobi bebelesi deel eu leceb uqanu mecii bilesi cotugul danahca sisiladi belesin qa qee felesin. 45Odocob ale uqa qee gulucdolosin. Eunu ale haun Jerusalem ceseli uqa wawali cocobi belesin. 46Odocob deel cijedna uqa tempel dunuh bibilen gulucdosin. Uqa Juda agena iwaladec dana je mamadegin dah madi sisilaadi bibilen fesin. 47Cunug age uqana je wadacdoc dumeig eu docca bahic ein. Eunu filicitein. 48Memeg anagca ale odi fimesi filicitesin. Odocob anag uqa sisildon, “Melami, hina ele eetanu odi odiliga? Faga, ija memenca ele hinanu wawile culumen leceb hina megihi cobowa,” don.

49Odocob uqa jejenela hewi maalen, “Ale eetanu ija megiti cobosia? Ale ija Meina jona bilecnu nijia eu qee dolfo?” alen. 50Euqa memeg anagca ale uqana jenu wawala qee fogo dol.

51Odocob haun ale gami Nasaret jobon ceseli belein. Ono uqa gaid ale conola toodoloi. Odocob anag uqa ceteh i waugna mimei cisdoloi. 52Oodon Jisas uqa ben men. Uqana docha ben men. Uqa Anut amegnaca dana amaganaca me bahic biloloi.

Currently Selected:

Luk 2: aey

Highlight

Copy