Luka' Luka' Gizine' Luhuvo Nitekumu' Gomu' Gataa' Gamazi
Luka' Gizine' Luhuvo Nitekumu' Gomu' Gataa' Gamazi
Mene buku ne'mo nene Izesu' Kilisito' monovo danava'vemu' lo soto' neive. Mono' noso holo-ngedaa' ive Zohane' soto' idoti' api' ogo losa ei' asi've Izesu' soto' ine' monovomukisi line'. Izesu' ogo molo ine' initekumukisi ido' line' inite' vaikumukisi lo soto' neive. Ido' Zuda ve nabalite Izesu' mono' apize ngimine' mehe'ine imani' monovomukisi ido' bililizave li engi' ebe'ninguti' Loma veti ngamanilo' gizebo ve ve nabalite a'ningu' nadi milahe nemukisi lo neive. Ido' helosa neloti' gamene setohamo ogo vavo gohi otine' monovomukisi lo soto' ogo ido' gamene ma izipahala zuhola soto' o ngimingumukisi lo neive. Lumola nene O'moso'mo Okulumokuko gohi nado ele'mizo dizihe nemu' losa osu' lo neive.
Mataio' ve Maleko' ve Zohane' ve gizani' bukuu' nomine' gamazi muki' nene mene bukuu' neive. Ma nene ne'mino neive. Mono' noso holo-ngedaa' ive Zohane' soto' ine' gamazi ido' Izesu' soto' ine' monovo muki' ido' sipisipi izelo' gizebo velite Izesu' izipelo' neivo vi ningi-dani' ido' Samalia ve lamineli'mi aneza gamazi ido' ve mali'mi gipele vo tolovo ingumu' ido' heneni vesi Lasalongumukisi ido' heneni ve'mo gala gele lamine' amingumukisi nene lo neive.
Mene buku giziveli'mo nene Aposolo buku nesi gize neive. A'mine buku seta' gizingu' nene gulive ma sainimi amine' neine'za gamene gala'mudati' vomine a'mine buku seta' nene Luka' gizine' ve lani' ve. Mono' Godolo Gosohoku' Luka' gulive nene gamene setohamovo' lo neive. (Kolosa 4:14, Hilemoni' 24: ido' 2 Timoteo' 4:11). Ido' a'mine Paulo' gize'mo moninguti' ningo nogilune' nene Luka' aza tota gono daa' ive minaani' neive lo noningune. Luka' aza Paulo' mono' gamazi lo-ngimidaa maka' vii ido' Paulo'ni luvono giti hulilisa nala' numungu' lasi goni've nigili-davo Luka' aza minidaa ote minine'. Aposolo' buku linge mala nene Luka' aza ti' lo gize neive: Inite' ne'mine une ido' ne ebe' mala vune lo gize neine' nenako laza a'mine gamenela nene Paulokisi maka' monikesine' neive lo ningo nogilune. Luka' aza Zuda ve minamine' ve. Evene' muki' nete gilani' nene nGiliki ve minine' ve li gilani'.
Evene' linge malite gilani' nene Adiokia ebekuti' ave ve li gilani'. Ido' evene' linge ma nete gilani' nene Hilipi ebekuti' ave ve li gilani'. Aza nene Izesu'ni ma ningamine'za Izesu'ni ningave mukikisi gamazi lani' ve. Luka' aza buku've nene evene' gulive Teohilo' ve lo minine' nene gizo hulo-dine'. Luka' luhuvo nite' gizinguti' nene laza Teohilo' nene guvelesi ve minani' neive lo noningune. Ne'mine lo noningune'za aza nene nani'mine ve minihe nemu' nene ma gele osu' lo gelamune. Laza nene mo ti' lo ningo gele none. Luka' aza luhuvo nite' Teohilo'ni gizo hulo-dine' nene evene' malitesi gatilizave lo gele mino gizo huline' ve.
Luka' luhuvo nite' gizine' nene nGiliki aleve Izesu'nimu' ningi gililizangumu' hize ele' o-ngedelive lo gizine' ve li evene' mukilite gilani'. Luka' gizine' gamazi ne'mo Izesu' monovolo ma lelebizaa' neive. Ado' Izesu' aza O'moso neine'za evene' gihile nesi lolo' ogo neine' nene lelebizaa' neive. Ido' evene' ma evene' linge muki' nete engikumu' gilavo haza nite' nizanikisi ido' evene' goloso nizanikisi nene Izesu' lulo atoli'mine ogo ngeme neine' nene lelebizaa' neive. Ado' evene' goho' gahali' nizahe vene' nizahe ido' izipe ngomo nizahe lihimelo' ve nizahe a'ne'mine evenekisi nene lulo atoli'mine ogo ngeme neine' nene lelebizaa' neive. Luka' aza evene' nete Izesu' nene ne'mine ve do ngu' izelesa ani' ve li gililizave lo gelo luhuvo nite' mene gizine' ve.
Currently Selected:
Luka' Luka' Gizine' Luhuvo Nitekumu' Gomu' Gataa' Gamazi: aso
Highlight
Share
Copy
Want to have your highlights saved across all your devices? Sign up or sign in
© 2013, Wycliffe Bible Translators, Inc. All rights reserved.