Mataio' 11

Zohane' Evene' Sita' Ma nGimiselavo Izesuda Vasine' Gamazi

(Luka' 7:18-35)

1Izesu' aza izipahala zuho tuvelu (12) nene gono gamazi lo-ngedo osu' lo aza nene hulo-ngedo a'mine gahevela numuno ebe' mukiku' vene' vemoho' nene mono' apize ngeme ngeme' ogo ido' lo soto soto' ogo lo-ngeme'mo monine'.

2Ne'mine ogavo mono' noso holo-ngedaa' ive Zohane' aza nala' numungu' huli-mikavo miningu' nene O'moso'mo do lu' izelive lo imiselelesa live'mo ogo molo monine' gamazi've nene gelo Izipahala zuho ma ngimiselavo ingine Izesu' neida vi ti' li longo' i-dasine': 3Gaza nene aloseive li-limi lave ma ne nabe ido' ve gohi mamu' gizebo olone' o neihe. 4Ne'mine li longo' i-dikesivo Izesu' ti' lo lo-ngimine': Lingine tine' mili vi Zohane'ni nene neni' gono noduvo nigilasine' ido' ningasine' inite' nemu' nene vi ti' li li-imilizo: 5Ve'ine likive ingine ve'ine gohi niningave. Ido' gize'ine goloso ive nene gohi aka nimonavo ganadise gizi dave nene gohi kululu' niizave. Ido' ga'ine molave nene gohi nigilavo hilave nene gohi do noote-ngidive. Ido' goho' aleve nene mono' gamazi lamine' nigilave. 6Lingine ne'mine li li-imi ti' li li-imilizo: Gaza neni' monovomu' gaka sita' sata' nogelaine' nene hulo nenikumu' gele ele'vole' iline' nene mine lamine' ogo mcneline' akalo' e'meto volosane. Ido' evene' muki' inginesi ga'ine sita' sata' gilami nenikumu' gili ele'vole' ilizave nete mine lamine' igi miniliza akalo' e'meti vilisave. 7Ne'mine lo lavo Zohane' ngimiselive ingine tine' mili nivasivo Izesu' aza evene' vai' li minani' nene Zohane'nimu' api' ogo ti' lo lo-ngimine': Lingine evene' muki' Zohane'ni ningilisa ebe' hadivela vani' ma nene nanite' ningilisa vani' neve. A'mida nene hepeli'mo do gabe kabe' oga' neine' inite' gepe' ne'mino gamazi do ti'ne vati'ne ogo laa' ive ma ningilisa vani' nehe. 8Ido' lingine vani' ma nene ve mali'mo genegana lamine' goloso ngolo minine' ningilisa vani' neve. E'e, a'mine ne'mine genegana nene guve'inesi vevo' minangu' minavetevo' nene ngili minaa' nave. 9Nemu' nene nanite' ningilisa ebe' hadivela vani' neve. Polohete ningilisa vani' noloseive. Olo. Ee, a'mine vi ningave nene polohete ma ve. A'mine ve nene polohete gomu' minani' ne'mine minamo ngivile' ogosa neive. 10Ido' a'mine vemu' nene mono' godolou' O'moso'mo do lu' izelive lo imiselelesa live lo-emo line' gamazi ma ti' li gizi nizani' ma neive: Gelezo. Naza neze gamazi lo-ngeme ngeme' ilive ma imiselekuvo aza do gomu' molo akaka vele-gedeleseive. A'mine gamazi nene a'mine ve Zohane'nimu' nene gizani' ve. 11Ne'mine ani' nene naza lamine' ma lo-lengemelove. Evene' misubouko soto' igi mini di aveuti' nene mono' noso holo-ngedaa' ive Zohane'ni nene ivile' igi minave ma minamani' ve. Ne neiha O'moso'mo evene'velo' gizebo iline' gamene've soto' ogavo a'mine gizebo o-ngedelingu' vi hilalizave engikuti' ma lemo minelive'mosi nene Zohane' minine' monovo nene ivile' ivo minilizado' o neive. 12Zohane' mono' noso holo-ngedo minidoti' mine do dizo O'moso'mo evene'velo' gizebo iline' ne'mo amuzo molo soto' olosa minine' ve. Ido' evene' ma amuzo'inesi minani' nete a'mingu' vi hilalisa amuzo mili'mi mili'mi vi minani'. 13Ido' O'moso'mi veleti' gamazi li soto' iga' avete lani' gamazisi ido' O'moso'mo lo huko-lidine' gamazisi gizikani' neu' nene inite' soto' o'mo vo mine do dizeline' initekumukisi li Zohane' soto' ogo mineline' gameneu' soto' iline' initekumukisi nene li osu' lani' ve. 14Ido' a'mine gamazi gizani' mau' nene ti' li gizani': O'moso'mo do lu' izelive lo imiselelesa live soto' olosa neivo nene gozopo' minive polohete Elia' emeni damenisi minelive ma soto' oloseive. Ne'mine li lave ma nene Zohane' nene neiha lingine nemu' gilii lamine' mo Elia' ve li gililizahe. 15Ve ma lingine gili nge li gilaa' ave nii ma nene gamazi mene gili vevesi gililo.

16Idise mene nizani' alevemu' nene naniteto' lo molo lokuvo vo dalive. Lingine izipe gosele' ngebelaa' ine' izipe ne'minisa nene nizave. Izipe ingine di gese' iga' ebeto' zohi' igi mini gono'ninginemu' 17ne'mine li laa' nave:

Laza lengikumu' huhunale' mulunido' nene

longolize izi gizedine adine izisa'mave.

Ido' nama muhele' ahele' ogo lunido' nene

nanimu' muhele' ahele' isa'mave.

18Naza ne'mini nizave luvoni' nene ne'mini minangumu' luvoni' ve. Zohane' aza gono've do do vingu' nene noso' nite' lamine' namo ido' vaini noso namo mine ato' ogo minivo ningi gosele' lengebelavo ti' li lani' ve: Ve mene sikalahu' goloso mali'mo lulo do gopo ogavo ne'mine neihe li lani'. 19Ido' O'mosolati' ve gihile naza lemo noso' nite' di gese' igi ni nizangu' vo naa' ido' vaini noso naa' nouvo lingine ningi gosele' lengebelavo soza gamazisi li ti' li laa' nave: Ve mene ningilo. Aza nene vele gohi nave mino ido' noso geli gelo naa' ive mino takisi moni daa' avesi ido' mono' gilamave gohi masi nene zogo molo ngemaa' ive ne neive. Lingine ne'mine li gilaa' naha ve ma laza O'moso'mi monovolo do ti' ogo otohato o minunive leli' ogo molo olone' inite' ne'mo nene leli' monovote lamine' neine' nene do soto' oloseive.

Lu'ine Di Velepe' Izamaa' Alevete Mulumo Gono Dalizangumu' Lo-ngimine' Gamazi

(Luka' 10:13-15)

20Izesu' aza numuno ebe' mau' vo gono do do novo ato ato' suno muki' nene ei' gono dadi'mi amuzo nene do soto' ine'. Do soto' ogavo ningani'za ningahe ningamahe igi lu'ine di velepe' izamavo ngelemo ti' lo lo-ngimine': 21Agae, Kolazini aleve ido' Betesaida aleve lengikumu' nene mulumo nogele-lingiduve. Lengita mulumo inite' goloso alinge' soto' o-lengedeleseive. Lengita ato ato' suno do soto' uvoni' ma nene Tilo alevetingukisi Sidoni alevetingukisi do soto' uvodiniko ingine O'mosomu' gilamani' aleve minikeni'za a'mine ebeku' aleve ingine nene mo geti lu'ine do velepe' izekune li lani gisi hili inite' huko pako ine' nene di ngili minadine. 22Nemu' nene naza ma lo-lengemeloze. Gililo. Lingine Tilo alevemukisi ido' Sidoni alevemukisi nene O'moso'mo gamene nabala lihime ngemeline' nene naba' naba ngemeleseive li gilaa' nahe. O'moso'mo engi' lihime ngemeline' nene ivile' ogosa lengi' lihimetine nene naba' naba lengemeleseive. 23Ido' Kahanaumi alevekizo, lengi' gulivetine nene Okulumoku' dizelive li di hozi laa' nahe. Lingine nene O'moso'mo olo' galeseu' lengehuso' o huloloseive. Ido' Sodomi misubou' nene evene' ma mino idise ato' ato' suno do soto' nouvoni' ne'mino ma do soto' idiniko Sodomi numuno ebeku' aleve nene lu'ine di velepe' izikevo numuno ebe'ine nene O'moso'mo do goloso amivo idisesi ha neivo evenekisi nene ha minadine. 24Nemu' nene lamineto' ma lo-lengemeloze. Gililo. Gamene nabala O'moso'mo lihime ngemeline' gamenelo' nene Sodomi aleve mulumo inite' naba gehe-ngedeline' nene ivile' ogosa lengi' nene geni'vesi naba gehe-lengedeleseive lo line'.

Do Gehe Ize-lengedeloze. Nenita Alo Lo Izesu' Line' Gamazi Gizine'

(Luka' 10:21-22)

25A'mine gamenelo' nene Izesu' ti' lo O'mosola line': Me'neho ve, gaza Okulumo' misubolo' gizebo o mino Guve'inesi ve minanivelike, naza lo soto' ogo noluvoni' gamazi mene evenelite gilikevo evene' ma gili nge li gamazi monovo gilaa' ave minani' nete a'mine'mi monovo nene ningi gilikelizave lo gaza do halekosa a'mine monovo nene evene' ma izipe ngomo ne'mine mini inite' mukiliti monovomu' olihe gilamavemu' nene do soto' o-ngedaine' nemu' nene isaa' neve nolo-giduve. 26Ee, Me'neho ve, gaza ne'mine olosa lamine' gelo ne'mine aine' nemu' nene isaa' neve nolo-giduve. 27Ne'mine lo gohi ti' lo line': Me'neho aza inite' mata' muki' nene a'neu' molave. Ido' O'moso'mi gipele neni' nene O'moso'mi gipele ve li ningi ma gilamave. Me'neho ei' ne'movo' nene ningo gele neive. Ido' me'nehinemukisi nene ma zaho nehe ningi gilamavo gipele nenikovo' nene ningo gele nouvonako ezemu' nene evene' masi gililizave lo eze monovo lo soto' o ngemeloni' alevesi lelikovo' nene me'nehinemu' ningo gele minelesune.

28Lingine minevo' alevotine geni ogavo di lamine' ilisa ge'nebe igi agae li minaa' nave, lingine nenita alizani' nene neni' do lungu' izelesuze. Mukito' nenita alo. 29Lingine igi gihilizave lo lengemeloni' gono nene di mini nenito' gelekele' ikevo naza neni' monovo'ne nene apize lengemeka' lengemeka' nouvo di ti' igi di minilizave. Ido' naza nene lu'neu' hongu lo zou lo minive nouvonako lingine nene ne'mine igi neni' monovo'ne di ti' ilizani' nene lengi' lutingu' nesi hongu lo lamine' mineleseinako nemu' nene nenita igi gelekele' igi minilo. 30Naza lengemeloni' gono nene geni amivo lamine' gili ha gihilizado' lengemelosuvonako nemu' nene lutingu' nene hongu lo lamine' mineleseive.

Currently Selected:

Mataio' 11: aso

Highlight

Copy