Mataio' 4

Izesu'ni Satani'mo Emengu' Molani' Gamazi Gizine'

(Maleko' 1:12-13; Luka' 4:1-13)

1Ne'mine ogavo Satani'mo emengu' molalingumu' ve lo Sikalahu' ne'mo ele'mizo ebe' hadivela dizine'. 2Ele'mizo dizavo a'mida noso' nite' malise ogo ongo oto ine' nene gamene foti (40) nominivo alinge' ga'na goloso helo minine'. 3Ga'na helo neivo ngemengu' molaa' ive aza Izesuda ogo ti' lo lo-imine': Gaza O'moso'mi gipele noo ma geheni mevomu' lanivo naline' inite' beleti lili' ilo lovo. 4Ne'mine lavo Izesu' ti' lo lo-imine': O'ove, mono' godolou' gamazi ma ti' li gizi nizani' ma neive:

Evene' minevo' alevote nene noso' nitekukovo' nomive.

O'moso'mi veleti' gamazi mukito' nesi ha minevo' alevo' olosune.

Ne'mine li gizi nizani' nenako nemu' nene gei' laine' ne'mine nene mo amolosuve.

5Ne'mine lavo Satani aza Izesu'ni ele'mizo Zelusalemi ebeku' vo mono' numuno naba ha'na ha'na minine' ne'mi gololo' ele'mizo dize mino 6ti' lo lo-imine': Mono' godolou' ti' li gizi nizani' ma neive:

O'moso'mo geikumu' angelo've gono gamazi lo-ngedeleseive.

Ido' ma nene:

Gizenga gehedo' gebele gulutilinguti' angelo' nete alete mili

di hozi li-gidilisave li gizi nizani' ve.

Ido' a'mine gamazi lido' igi ne'mine i-gidilisaze. Gaza lamine' O'moso'mi gipele noo ma meloti' oluto aka'melo' izevo. 7Ne'mine lavo Izesu' ti' lo lo-imine': Ne neiha mono' godolou' gamazi gohi ma ti' li gizi nizani' ma neive:

Lingine Guvetinesi ve O'moso golo izamilo.

Ne'mine lo-leme neine' nenako geze nolaine' nene O'moso golo izaa' noloseinako ne'mine amolosuve. 8Ne'mine lavo Satani aza gohi ele'mizo golo ha'na ha'na malo' dize mino evene' zuho ato ato' misubo'ningu' misubo'ningu' amuzo'inesi minani' ido' gonolise'ine lamine' tamine' ato atokisi minani' nene elebizo 9ti' lo lo-imine': Gaza neni' gubu' ize nemo nopo'ni liline' nene inite' noningaine' aka'me nene gemelesuve line'. 10Ne'mine lavo Izesu' aza ti' lo lo-imine': Mono' godolou' ti' li gizi nizani' ma neive:

Laza Guvetesi ve O'moso ei' hamo' nene opo'ni lo gubi' ize emo minelesune.

Ee, ei' hamokovo' nene gelekele' o-do minelesune.

Ne'mine li gizi nizani' nenako nemu' nene gaza laine' ne'mine amolosuze. Satani gaza hulo-nedo vo haha ozo. 11Lavo neloti' Satani aza hulo-do vavo Izesu' neida angelo' soto' igi nasahili' igi hize ele' i-dani' ve.

nGalilaia Misubouko Izesu' Gono've Api' Ogo Do'mo Vine' Gamazi Gizine'

(Maleko' 1:1-14; Luka' 4:14-15)

12Ido' Zohane'ni nene nala' numungu' huli-dani' nemu' gelo Izesu' aza nGalilaia misubouko vine'. 13Vo Nasalete ebe' hulo Kahanaumi ebeta vo minine'. Kahanaumi ebe' nene nGalilaia noso ohuno gahevela Zakobo' gipele Zebuloniki Nahataliki nga'vopilemo' zuho engi' misubo'ningu' ongo minine'. 14Ne'mine ine' nene O'moso'mi veleti' gamazi lo soto' oga' ive polohete Isaia'ni O'moso'mo lo-imine' gamazi ma ne'mine lo line' ma nene ogo gihile izine':

15-16Liti'musou' gopo Zebuloni' misuboukisi Nahatali' misuboukisi

ido' noso ohuno naba'mi gahevela ido' Zodani noso liginela

Zuda ve minamani' aleveti misubo nGalilaia neu' minave ingine

labana' naba mo ningikeve.

Ee, a'mine aleve li'nimuso lu'ningu' ize minivo minave ingine

mudise hilaa' akalo' mini mili minave engita labana' nene

mo soto' o ngemave.

17A'mine gameneloti' Izesu' nene mono' ti' lo lo-ngemeka' ngemeka' o'mo monine': O'moso'mi gizebou' vo holoso' gamene mo alitaze. Lutine gatine di velepe' izilo.

Izesu' Aza Alaha' Daa' Ave Sita've Sita've Ezela Alizangumu' Asi Lo-ngimine' Gamazi Gizine'

(Maleko' 1:16-20; Luka' 5:1-11)

18Izesu' aza ti' o'mo nGalilaia noso ohuno naba'mi gahevela nomono uvolohoi akunoloi ma gulive'ine Simoni' ve gulive gohi ma Petolo' aza nakunolo Adeleakisi alaha' daa' asive minasinako alaha' daa' asine' golaleze'ine nene alaha' dalisa nosou' nihulasivo ningine'. 19Ningo ti' lo lo-ngimine': Lingine igi ne'metilizo. Alaha' daa' nasine' ne'mini evene' di nenita iga' ilisive lolo' o-lengedelesuze. 20Ne'mine lavo ingine lite' li alaha' daa' asine' golaleze'ine nene hitiki e'meti vasine'.

21Ve sita' nene do gi'mizo ngomo ma novo uvolohoi akunoloi gohi ma Zebedaio' gipele sita' gulive'ine Zakobokisi ido' akunolo Zohanekisi ingine me'nibo Zebedaio' nesi sipiu' mini alaha' daa' ani' golaleze'ine nene ongoti di lamine' igi nizavo ningo ne'metilisive lo asi lo-ngimine'. 22Ne'mine lavo lite' li oti me'nibinesi sipi nesi huli-ngidi e'meti vasine'.

Izesu' Evene' Muki' Nasahili' O-ngidine' Gamazi Gizine'

(Luka' 6:17-19)

23Ido' nGalilaia misubo mukiku' mone mone ogo mono' numuno'ine miningu' miningu' mono' apize ngemo O'moso'mo evene' do gi'mizo gizebo o-ledeline' gamazi lamine' nene lo-ngemeka' ngemeka' ogo evene' inite' gizi davesi gilizevo alevesi muki' nene do lamine' o-ngede'mo monine'. 24Ne'mine ogavo guvele nene Silia misubo mukiku' nene mono osu' lavo inite' ato ato' gizi di mulumo gilave muki' nesi ido' sikalahu' goloso lu'ningu' minive ido' lemo lise-ngedaa' ive ido' gize'ine a'nine gulupese ive muki' nene Izesuda ngele'mizi ikevo do lamine' o-ngidine'. 25Ido' evene' muki' vai' goloso nGalilaia misuboukotikisi ido' Dekapoli misuboukotikisi Zelusalemi ebekutikisi ido' Zudaia misubou' minani' ebe' linge malatikisi Zodani noso helala minine' misuboukotikisi igi di gese' igi e'metani'.

Currently Selected:

Mataio' 4: aso

Highlight

Copy