Jenɨzɨzɨ 9
9
Gotɨyai Nowaarɨ kɨwɨnya' wɨjaa'.
(9:1-17)
1-4Gotɨyai Nowaalyɨ gawaalɨvaanga kwarajɨ kɨnɨdakaavɨ yagaaihɨwɨnya wɨda' “Sarɨmɨ kwala naanga jɨma'nyideihɨlyɨra. Nabaai sarɨmɨ kwaakevakɨ gazabazaba mwalamarina jideihɨlyɨra. Kwaakevakɨ mwaaidɨvɨsajɨ aalyavɨ mwaaidɨvɨsajɨ yuya dɨmaremwaalyidengɨra. Sarɨmɨ maremwaaidɨvɨsa dɨnyideihɨlyɨra. ‘Yɨkurɨyaawia naana!’ dapɨjɨ karamapɨri gamɨre tawe kabwalaawojɨ tɨka nyɨna jideihɨlyɨra.” Gotɨyai sara wɨda'.
5-11“A'mwe pwai a'mwe pwarɨ karamakori gamɨnyɨ tamakɨna jidelyɨra. Malakayaawaryai a'mwe pwarɨ tɨka kadavori gamɨnyɨ tamakɨna jidelyɨra. Nɨmɨ a'mwera nɨmɨbɨsaraavɨ yavɨkarye'na sara dɨramakyideihɨlyɨra,” wɨda' Gotɨyai.
12-17“Yɨraayavɨ nɨmɨre akume yɨlakɨdeinyɨra. Akume wage'bɨsavɨ wanganapɨjɨ da' jawɨryidesɨra. ‘Gotɨyai nemɨnyɨjɨ mwaaidɨvɨta yuyangɨjɨ gannya kɨwɨnya' neda',’ sara jawɨryidesɨra. Aalɨbunya kwaakevakɨ dɨ'narake'bɨsa' nɨmɨ wake' dɨvi mulaabyɨ yadesɨra. Kwaakevakɨ mwaaibɨzangɨ mamaramɨlyɨ yadesɨra,” wɨda'.
Nowaai aalya waainɨya' nyaa'.
(9:18-29)
18-27Nowaai wɨla gɨraipɨwawɨnya burɨda'. Burɨnna yaka gɨraipɨzɨla maarɨna, gɨraipɨzɨla aalya' gulyavɨ ma'mwagikɨna aalya yɨrɨke' waainɨya' maranyɨna ya'. Aalya yɨrɨke' maranaka sɨmunya myawɨrya'. Sara yaka angevɨ kannya maayai se warɨna ya'. Se kwara' Aamɨ, Kainanɨmɨre ganɨmaangei, Nowaai kannya maayai warakerɨ wangana'. Wanganaka gannya kɨdaraarɨ mwasawɨ mwaalagɨlyaraarɨ sa' wɨda', Aamɨ. Kuda' Samɨjɨ Jaivetalyɨ saraai yɨvɨta maarɨna, kɨrɨnɨmaangerɨ bwakakɨna tɨnna mwanganyɨ yagi. Dɨvi sagaa' Nowaai dɨkaa'na yaka Aamɨ gawaalɨvaangei yake'na yawɨra'. Sɨmunya yawɨ'na “Aamɨ kayaa'nanya maalɨka yɨvanɨka kɨrɨ' gawaalɨvaangei kayaa'nanya naanga yadengɨra,” yawɨraka wɨda' “Kainanɨmɨre avaalyara Kainanɨmɨ wɨmwaaihakera wɨmaremwaaibɨ'delyɨra. Samɨmɨna dɨvi nɨmɨre Gotɨyai tewaanya wiadelyɨra. Yɨ Gotɨyai Jaivetare kaimɨraaya kwala naanga yɨma'nyɨna, yɨ a'mwe naangera yɨma'nyɨna yɨpɨ'derera. Kainanɨmɨre kaimɨraayara Samɨmɨre kaimɨraayaraavɨne Jaivetare kaimɨraayaraavɨne wawɨnya wɨdaayɨpɨ'derera,” wɨda' Nowaai.
28-29Nowaare mudangegaa' kwarame naanga (950) kwavɨlava' Nowaai bala'.
Currently Selected:
Jenɨzɨzɨ 9: byr
Highlight
Share
Copy
Want to have your highlights saved across all your devices? Sign up or sign in
© 2013, Wycliffe Bible Translators, Inc. All rights reserved.
