Lukɨ 11

Gotɨyarɨ wɨjavwina Jizaazai wɨjɨwaakake'nesɨ.

(Matɨyui 6:9-15; 7:7-11)

1Pɨgaa' Jizaazai gave pimagɨnna bulamwalaawaka Gotɨyarɨ wɨdɨna. Dɨvi sai mena wɨdakegaa' gamɨre mɨdɨde pwai gamɨnyɨ wɨdɨna “Naangeigɨ, Jonɨ gamɨre mɨdɨdɨvɨsaraavɨ wɨjɨwaakakabaaibɨ' Gotɨyarɨ wɨdaathevwina dɨnejɨwaakya!” 2Sara wɨdɨna kya' sai saraavɨ wɨdɨna “Sarɨmɨ Gotɨyarɨna ‘Wɨdaana!’ yawɨrapɨjɨyagaa' yɨ dara duzideihɨlyɨ,

‘Nɨmwai, gɨmɨnne yaya' gɨrɨ'maaya' yɨma'nana!

Gɨmɨre maremwaaidɨnya' yuneba nayaa yɨma'nana!

3Gazagaasagaa' nemɨnne mwanyagaa'ne nyɨnya'ne dɨnejaama!

4Nemɨre kayaa'nanya dɨnemarasɨka!

Sare' darevɨnyɨra.

Kayaa'na neyade gazaizare

Wɨrɨvɨkɨta marasɨ'daanyabaaibɨsasɨ.

Yaamɨjɨ yɨjɨwaala ya'ne saburɨ

Maneyɨbwarɨdaakunnera nemɨnyɨ!’

Gotɨyarɨ sara duzideihɨlyɨ.”

5Nabaai sai wɨdɨna “Sarɨmɨjɨya pwai gya'mwe pwai kɨnɨnnakei mwaalajai sawɨta naanga kalawawegaa' kaanna wɨna yojɨ gya'mwe dazarɨ wɨdaawɨna ‘Nya'mweigɨ, bɨretɨya dawaai data pɨnɨ dɨnyɨjaama! 6Nɨmɨnyɨ nya'mwe pwai kaanya yamarivanɨkei nɨmɨnyawɨnna kabi'ma'mwa' sahwarɨ wɨjaaya'ne wapaaya kuneinyɨ yenanyɨra.’ 7Nabaai a'mwe anga dazavɨ kusawɨdaa'nyai ja'nawɨdɨna ‘Taanga manyakɨnnera! Kaanya' mena tihɨ'nɨwakesɨra. Sarevɨ nabaai nɨmɨre kaimɨraayamɨlɨka kuvɨnɨmaangeinyɨjɨ yɨ'bɨnyavɨ mena ye'mwanna'mwaasainyɨ. Nɨmɨ madɨkaayɨ ya'mujɨ magɨmaari yɨwɨneinyɨra,’ wɨda'. Sarevɨ gatha'darevaka! 8Sarɨmɨnyɨ yɨhɨthɨvanɨge. Angevɨ gyakwai a'mwe sarɨna gya'mwe kwai mwaalajai kɨrɨ' mujaayɨ. Sare' kɨrɨ' a'mwe sai jake'na jake'na kudozɨ sahwai yuna maa'na wida sarevɨdaa'nyɨ sai gamɨnyɨ wɨmudaasa yuya sa wɨmaarina yannelyɨ. 9Nabaai sarɨmɨnyɨ yɨhɨthɨvanɨge. Sarɨmɨ Gotɨyarɨ kuna nayaa kidaanganapɨri yɨhɨzaavadelyɨra. Yɨdaanganya' kuna nayaa bɨrapɨri yɨ dɨvɨramaaryideihɨlyɨ. Kaanyavɨ mala kuna karamapɨri Gotɨyai kaanya' yɨhɨvasamaraabathelyɨ. 10Sare' dare'nesɨ. A'mwe gazaizai Gotɨyarɨ maarya'nei sahwarɨ yɨdaangada maa'delyɨra. Bɨrɨbɨrya yadei bɨramaa'delyɨ. Nabaai kaanyavɨ mala tamaabaderɨ Gotɨyai kaanya' wɨbasamaraabathelyɨ. 11Sarɨmɨjɨya ganɨmaanga pwarɨ gawaalɨvaangei kidaanganojɨ ‘Nɨmwai, jawɨnya pɨrɨ' nyɨmaryaama!’ naawɨnaanyarɨ wɨmaaryadei daaka! 12‘Yukwaraka pɨrɨ' nyɨmaryaama!’ kidaanganojɨ marayɨnɨgaawalya' wɨmaaryadei daaka! Arɨkewɨnyɨ. 13Sarevɨdaa'nyɨ a'mwe kayaa'nanyaihi mwaaidɨvɨ' sarɨmɨre kaimɨraayamɨlɨkaavɨ tɨka nya'ne nawɨ'nyanna wɨjaavɨpɨjaihi sasare sahɨbwi Gotɨyai wavɨla'dei daaka! Sahwai Nɨmwai Sɨgunyavɨdaa'nyɨ a'mwe gamɨnyɨ yɨdangadaapiyaraavɨna Kurya Tewaanyarɨ wɨjaavadere.” Sara wɨdɨna.

Jizaazalyɨ Biyelɨzɨvulɨjɨ saraarɨnesɨ.

(Matɨyui 12:22-30; Maakɨ 3:20-27)

14Yɨmaka pwai a'mwe pwarɨ wɨlamwaaina yada a'mwe sare maange' mena bɨpainɨkelyɨ. Jizaazai yɨmaka sahwarɨ wɨdaasɨna kya' sare sarɨ yɨmakei mena wɨna kya' a'mwe maanga bɨpainɨka dazai yagaala wɨdɨna kya' kwala bwa'naanya atɨka maru'na'na. 15Atɨka maru'na'na kye' kɨrɨ' a'mwe pwara dɨnyɨna “Sahwai yɨmakeraavɨ marasɨ'manɨke'na Biyelɨzɨvulɨmɨre dɨragɨnyasɨ marasɨ'manɨkelyɨ. Yɨmakeraavɨ maremwaaidere dɨragɨnyasɨnyɨra.” 16Nabaai a'mwe pwara “Yaamɨjɨ yɨjɨwalaana!” yawɨreva sarera wɨdɨna “ ‘Gotɨyai gamɨjɨ dahamwaalɨka?’ yawɨta'neina dara gɨthaana! Sɨgunyavɨdaa'nya dɨragɨnya pɨrɨ' kya'gɨzɨ tɨnna wanganaana!” 17Sara yawɨ'na yadaapi kɨrɨ' kumɨre sɨmunyangɨ yawɨranganna yaka wɨdɨna “Maremwaaide gave pɨbadaa'nya pwara pɨvakaai tangɨvalapɨjɨ mala bwa'nɨpɨja' maremwaaide daza' kayaaka yɨnyɨna yadesɨ. Nabaai gave kɨnɨdaka tangɨvainapɨri mala bwa'nɨpɨja' dazanɨdaka kayaaka yɨma'nyɨna yɨpɨ'denɨdakera. 18Nabaai Saataanɨmɨre yɨsavaa' pɨvakaai tangɨvainapɨri mala bwa'nɨpɨja' gamɨre maremwaaide' gara warannevaka! Sarɨmɨ kanyɨdɨwaakɨra ‘Biyelɨzɨvulɨmɨre dɨragɨnyasɨ wɨdaasɨvanɨkelyɨreva.’ 19Nabaai Biyelɨzɨvulɨmɨre dɨragɨnyasɨ yɨmakeraavɨ wɨdaasɨwɨjɨ kwajɨ yɨ sarɨmɨrera dɨragɨnya aaihwaresɨ wɨdaasadɨvɨtavaka? Sarevɨ kumɨ sara sarɨmɨre kwaasɨ yagaala dazangɨ yɨhyawɨbwapɨ'dere. 20Kɨrɨ' Gotɨyare a'jawɨnyai nɨmɨnyɨ nyɨgaimwadaa'nyɨ nɨmɨ yɨmakeraavɨ wɨdaasɨwɨja' yɨ sarɨmɨnyawɨnna Gotɨyai maremwaaide' mena bɨvanɨ'. 21A'mwe dɨragɨnaanga kwai mwaryagɨnyɨsɨ mwasaagalyajɨ yune lɨmwadei damei gannya angwaasaba nayaa dɨragɨnna maredaa'na yadɨ'nyɨ gamɨre gɨlyɨvɨta yuya sa nayaa dathɨvaina waradengɨ. 22Kɨrɨ' dɨragɨnaanga pwai sɨnnawɨnyare dɨragɨnya' wavɨla'dei bɨna yaka dathɨvaina yaka gamɨre mwaryagɨnya mwasaagala kɨlɨka gamɨnyɨ yɨvaimwade sa yuya tamipalamaa'na. Sara tamipalamaa'na yaka gamɨre gɨlyɨvɨta yuya sa yanga mudɨna. 23Pwai yaasɨwa'na ‘Yɨmakeraavɨ maremwaaidere dɨragɨnyasɨnyɨra,’ yawɨ'de sai nɨmɨnyɨnei mwaaidei mɨ'. Yɨ sahwai nɨmɨnyɨna yɨkamaangelyɨ. Pwai nɨmɨjɨ sipɨzipɨyaraavɨ mye'mwannamwaaihyɨ yada sahwai yaasɨwa'na tamayɨwɨnasamaryadelyɨ.

(Matɨyui 12:43-45)

24Yɨmakei a'mwe pwarɨ mena yagalya'mavaka nawɨ'nya pɨba bɨramaarya'nei a'gaaye mwaalya'nei yaalɨkɨryabanna lo'mavamarina. Nabaai sasare pɨba mabɨramaari yaka yɨ dara dɨna ‘Anga sɨnnawnnaɨ nɨmɨ mwaale dazavɨdaa'nyainyɨ ayɨna kaanya wɨde'nanyɨra.’ 25Sare sai kaanna wɨna yaka anga dazavɨ tɨnna wanganaawɨna, dara yake' ‘Mena pada'galabwakɨraka mena nayaa warɨke' daaka! Kune' daaka!’ 26Sara dozɨ kaanna wɨna yojɨ yɨmaka gamɨre kayaa'nanya' wavɨlaveta ata purɨdaa'nyɨ pwaraainanyaraavɨ kayaaka yɨgalakya'neraavɨ wɨjɨma'naawɨna. Sara yaka yuyara bɨna yeva sare sara kusawɨ wɨlɨna yeva wɨlamwaaina. Sɨnnawɨ a'mwe dazai kayaa'na mwaalakelyɨ. Kɨrɨ' aayagaa' yuna kayaa'nanaangei mwaalɨna. (Sasarebaaibɨ' a'mwere sɨmunya' kune' wa'dɨ'nyɨ Gotɨyai mulamwaalyadɨ'nyɨ sahwai kayaa'nanaangei mwaalɨna yadelyɨ.)”

27Yagaala daza kuna wɨdɨna yadaa'nyɨ kwala bwa'naanyavɨ a'mwe pɨrɨ' jaka wɨdanganna “A'mwe sɨnnawɨ gɨmɨnyɨ mudanga gyaka aamunya gɨzaavaka sa' yɨ sahɨrɨ' yɨlaaya yada tewaanaanga yɨnɨkesɨra.” 28Jaka wɨdanganna kya' kɨrɨ' sai wɨdɨna “Aawa, a'mwera Gotɨyare yagaalya' kadɨka wɨ'nadɨvɨ' mɨdɨbɨzara sahwara yɨlaaya yadɨvɨ' tewaanaanga yɨnɨkerera.”

Jonaamɨne dɨragɨnya' wɨjɨwaainya'nevɨnesɨ.

(Matɨyui 12:38-42; Maakɨ 8:12)

29Kwala bwa'naanya kuna bi'bwa'nemwaaidapi sai dara wɨdɨna “Dathahaasara a'mwe kayaa'nanyarera. Sahwara ‘Dɨragɨnya wɨjɨwaainya pɨrɨvɨ tɨnna wanganaana!’ yawɨreva jaka wɨdɨna. Sara kanyɨdɨwaa' kɨrɨ' sahwaraavɨ dɨragɨnya wɨjɨwaainya pɨrɨ' wɨjɨwaainɨdeinyɨ mɨka. Aawa. Ne Jonaamɨre dɨragɨnya wɨjɨwaainya yune dazahɨrɨ'nanyawɨku' wɨjɨwaainɨdeinyɨra. 30Sare' dare'nesɨ. Sɨnnawɨ kɨgaa' Jonaa Ninɨva mwaalyaraavɨna Gotɨyare wɨjɨwaainya'ne' yɨma'nyaakabaaibɨ' yɨ A'mweraavɨne Kaimɨraayai dathahaasaraavɨnei Gotɨyare wɨjɨwaainya'ne' yɨma'nadelyɨ. (Sare'na sarɨmɨ yawɨ'na ‘O, Gotɨyai Jizaazarɨ maryasaabakelyɨ.’) 31Dɨvi Gotɨyai a'mweraavɨ yawɨbwaradehaa' saawɨtɨyɨmagɨdaa'nyɨ kwinɨya' maremwalyaakevɨ a'mwe dathahaasa daraavɨjɨ yɨdɨkaa'na kyojɨ kwinɨya sahɨrɨ' kumɨre kayaa'na yadɨvɨsabwine yagaainakeraavɨna jalɨkurakaabathesɨ. Kwinɨya daza' Kwaakevakɨ tɨyawɨnnanyawɨ Solomonɨmɨre sɨdusabwi kadɨka wɨ'nya'ne' bɨna. Yɨ sahɨrɨ' bɨna kyaa', yɨthaanyi, dahaa' Solomonɨmɨ wavɨla'dei dava mwaalɨka dalaaka! Mwaalɨka kɨrɨ' sarɨmɨ manyu'nyɨvanɨgasa'ne'na kwinɨya sa' nayaa wɨ'nyaake' sarɨmɨre kayaa'nanyabwi jalɨkurakaabathesɨ. 32Nabaai maryawɨbwaradehaa' a'mwe Ninɨva mwaalyaraavɨ dathahaasaraavɨjɨ yɨdɨkaa'na kyojɨ dathahaasaraavɨre kayaa'nanyabwina jalɨkurakaabɨpɨ'derera. Ninɨva mwaalyara Ne Jonaa wɨjɨwakadaa'nyangɨ kadɨka wɨ'nadɨvɨ' sɨmunya mudɨke' yawɨramaa'na. Sahwara sara yɨna kyaa', yɨthaanyi, dahaa' Jonaamɨ wavɨla'dei sai dava mwaalɨka dalaaka! Mwaalɨka kɨrɨ' mu'nyɨvanɨgasa'ne'na Ninɨva mwaalyara nayaa wɨ'nyaasara kumɨre kayaa'nanyabwi jalɨkurakaabɨpɨ'derera.

Kɨlaakejɨkɨne baake'na dɨnɨkesɨ.

(Matɨyui 5:15; 6:22,23)

33A'mwe aane pwai kwai laamɨvananya' yewɨta'da lɨka yulyarya'neba wɨlakada mɨ'. Nabaai maa'gula pɨrɨvɨ amwihidaa'nyɨ wɨlakada mɨ'. Aawa. Yɨ'bɨnyavɨ munyaba yɨlakadesɨ. Sarevɨ a'mwera kusawɨnna bwidɨvɨ' ‘Dɨ'baaka wanyɨwanya dazavɨ tɨnna wangabɨka!’ dada saba yɨlakadesɨ. 34Gɨmɨre tɨnnyai kɨlaakejɨkɨna laamɨvananyalyɨ. Tɨnnyai baake' maa'delyɨ. Tewaanyabwi baake'bɨsabwi sɨmunya nayaa yawɨ'dɨ yɨ gɨmɨre yuya kɨlaakejɨ' baaka padezɨkɨ. Kɨrɨ' kayaa'nanyabwi jɨhɨnya'bɨsabwi sɨmunya yawɨ'dɨ yɨ gɨmɨre kɨlaaka yuyajɨ' yuna jɨhɨnya yɨma'nadezɨkɨ. 35Sarevɨdaa'nyɨ nayaa dɨmaremwaainyɨla! Baaka gɨmɨnyɨ wɨlagwarɨka daza' jɨhɨnya nyɨma'nadɨka! Nɨmɨnyɨna nayaa jawɨka! 36Sarevɨdaa'nyɨ gɨmɨre kɨlaaka yuyajɨ' baaka kɨnɨnnakejɨ' yajazɨ' pimagɨnya pɨjɨ' jɨhɨnya pɨjɨ' myajazɨ' yɨ sarevɨ laamɨvananyavɨre baake' gɨlɨvamwadadevaaibɨ' gɨmɨre kɨlaakejɨ' yunebanna baaka padezɨkɨ.”

Perɨzɨyarajɨ Kɨwɨjarajɨ kayaa'nanyabwi yɨgasa'nesɨ.

(Matɨyui 23:1-36; Maakɨ 12:38-40; Lukɨ 20:45-47)

37Jizaazai yagaala mena jɨ'mwannaka yadɨ'nyɨ Perɨzɨya pwai gamɨre angevɨ wapaaya tɨka nya'na sahwarɨ jaka jɨvwarɨjɨmaa'nyɨna. Sarei sai angevɨna wɨlaawɨna yaka wapaaya nya'ne yɨ'bɨnyavɨ mwaalɨna. 38Sare yaka sɨnnawɨ ata aalya minyai wapaaya nadaa'nyɨ Perɨzɨya sai tɨnna wanganna yaka aalya minya'na nɨ'nɨka yɨna. 39Nɨ'nɨka yɨna kya' Naangei wɨdɨna “Sarɨmɨ Perɨzɨyaihi kaapɨvananya paletɨyangɨ mwasɨmagɨnna aalya yadɨvɨkɨ. Kɨrɨ' sarɨmɨnyɨ kusawɨ kukebulyɨ kayaa'nanya gɨrɨkita'nanyabulyɨ yuna wɨlayɨhwarɨkeihɨlyɨ. 40A'mwe sɨdu'maayaihi! Gotɨyai yune mwasawɨnya yavɨkaryaka nabaai kusawɨnya yavɨkaryaakei daaka! (Sarɨmɨre sɨmunyavɨjɨ pada'galamaremwaaina jɨla!) 41Sare kɨrɨ' sarɨmɨre sɨmunyavɨ a'mwe gɨlyɨvɨsanna wɨgainɨvanɨkeraavɨ yanga nayaa duzaayɨla! Kwaasɨya'na mujaavɨpɨna! Nabaai sasara tewaanya yɨpɨja' a'mwera dara yawɨpɨ'de' ‘O, a'mwe sasarei gamɨre sɨmunya' yune'na tewaanya warɨke' daaka! Yuya gɨrɨkita'nanya maaya daaka!’

42We'! Perɨzɨyaihi mala nayaa jɨwannyɨla! Sarɨmɨ yɨmaasajɨ jɨsajɨ sɨgya yuya dala nabinyajɨ mɨlɨkɨvaidɨvɨ' atɨraai yɨma'nadaa'nyɨ pimagɨnyavaa' Gotɨyarɨ wɨjaavadɨvɨsaihɨlyɨ. Sara nayaa yadɨvɨ' kɨrɨ' yɨda'maraangeburɨjɨ Gotɨyarɨna tewaanya wɨvu'nyaburɨjɨ wavɨla'dɨvɨsaihɨlyɨ. Sasare sabwi yadɨvɨ' pɨbwi sɨgyajɨyabulyɨ myagalya'mayɨ yɨpɨja' sa' tewaanyasɨ. (Sare'na Gotɨyai daanga wɨjaaya'neihi mala jɨwannyɨla!) 43Perɨzɨyaihi, we'! Sarɨmɨ lotuangengɨ a'mweraavɨ sɨnnyɨkaavɨ, tewaanyaba walamwaalya'na tewaanya yɨhɨvu'nadeihɨlyɨ. Sarevɨ nabaai a'mwera kwala yɨ'bwa'nadɨvɨsaba ‘A'mwe naangeigɨ!’ wɨja'na nawɨ'nya yɨhɨvu'nadeihɨlyɨ. Sare'na mala nayaa jɨwannyɨla! 44Sarɨmɨ we'! Gɨlekavi'nɨnnya kwaakevɨ kusawɨ lɨka yulyarɨkebɨsaihɨlyɨ. Sara yulya'dɨ'nyɨ a'mwera tɨnna mwanganyadɨvɨ' gɨrɨkita'nanya'na myawɨryadɨvɨ' sahɨnɨngɨ a'badaa'nyɨ yɨlayamaryadɨvɨsare. Sarɨmɨre gɨrɨkita'nanya lɨka yulya'dɨvɨsa'na mala nayaa jɨwannyɨla!”

45A'mwe kɨwɨnya dɨnɨkengɨ sɨdu'naka pwai gamɨre yagaalyangɨ ja'nawɨdɨna “Wɨjɨwaakadɨnyaigɨ, sara wɨdadɨ gɨmɨre yagaala taanga nemɨ kwainaavɨjɨ dɨragɨnna nedangamanɨgɨna!” 46Wɨdɨna kya' sai wɨdɨna “Kɨwɨnya dɨnɨkengɨ yawɨ'dɨvɨsaihi, we'! A'mweraavɨ taanginya yɨlakadɨvɨsaihɨlyɨ. Naanga dakadɨvɨsaihɨlyɨ. Sara wiadaapi yagɨyagɨ makidɨvɨsarera. Kɨrɨ' sarɨmɨ saihi taanginya maakata dazangɨ ya'neihi ata pwi wakya yadɨvɨtaihi mɨ'. Sare'na mala nayaa jɨwannyɨla! 47Sarɨmɨnyɨ we'! Sarɨmɨre Ne sɨnnawɨnyara pɨropetɨyaraavɨ tamakesarera. Sarevɨ sahwaraavɨre gɨleange madɨvɨsaihɨlyɨra. Sare'na mala nayaa jɨwannyɨla! 48Sasare dazabwi a'mweraavɨ dare'bɨ' yɨbwarɨdaakwadɨvɨsaihɨlyɨ ‘Ne sɨnnawɨnyara sasara yaata sabwina nawɨ'nyasɨ.’ Yɨ, pɨropetɨyaraavɨ tamakadaapɨjɨ sarɨmɨ gɨleange madɨvɨsa'na ‘Ya, tewaanyabulyɨ,’ jalɨkurakɨdɨvɨsaihɨlyɨ. 49Sarevɨ sarɨmɨnyɨna Gotɨyare sɨduta naangesɨyai sai mena dara dɨnɨ' ‘Pɨropetɨyaraavɨjɨ wɨdaasadɨnyaraavɨjɨ maryaasɨwɨjaraavɨ pwaraavɨ tamayɨwɨnasamaryadɨvɨ' pwaraavɨ tamakɨpɨ'derera.’ 50Sarevɨdaa'nyɨ a'mwe dathahaasaihi sɨnnawɨ kɨgaakuna pɨropetɨya yuyaraavɨ tamakyaasaihɨre mɨnya maarya'ne sangɨjɨ dahaa' kɨgaasɨ kuna yɨvanɨgasaihɨre mɨnya maarya'ne sangɨjɨ dazahɨrɨvɨne taanginya' dɨmaaryideihɨlyɨ. 51Yɨ sɨnnawɨ Aivelɨmɨre tawe' bwalaawɨna yaakelyɨ sareibɨsara dɨvidaa'nyɨ tɨnnyabanyaraavɨre tawe bwalaawɨna yaakerajɨ aayagaa' Sekaraayare tawe' bwalaawɨna yakelyɨ saraavɨne tawevɨnanyɨra. Aayai Sekaraayarɨ kwaraanyabajɨ (taangejɨ marewɨja'nebajɨ) anga nawɨ'nyavɨjɨ tɨnnyaba tamakesalyɨ. Yo, sarɨmɨnyɨ yɨhɨthɨvanɨge. Yuya dazavɨne'na dathahaasaihɨrɨ mɨnya maarade'nanyɨ tawe sa'. 52Kɨwɨnya dɨnɨkengɨ sɨdu'nakeihi, we'! Sarɨmɨ Gotɨyarɨne yagaalyavɨ sɨduta yawɨramaarya'ne sɨmunya' kiya'bɨ' kuka marasɨ'mwaasasɨ. Sarɨmɨ saihi sɨmunya dazavɨ kaanyavɨ mabaasadɨvɨ' kusawɨ mulyɨvanɨga'. A'mwe pwara ‘Kusawɨ wɨlaana!’ dadɨvɨ' yadaapi sahwaraavɨ kaanya' tihɨ'manɨgasaihɨlyɨ. Sare'na mala nayaa jɨwannyɨla!”

53Anga dazavɨdaa'nyɨ walyuna yadaa'nyɨ Kɨwɨjarajɨ Perɨzɨyarajɨ saraavɨ sɨnna tɨka naanga wɨda'daa'nyɨ gamɨnyɨ kwaasɨ yagaala jɨdaya'ne'na yagɨyagɨ bɨrɨna. “Gamɨnyɨ yaamɨjɨ walapapalakaana!” yawɨ'dɨvɨ' yaamɨjɨ yɨna yɨna. 54Sahwarɨ kotɨya yɨnɨga marya'ne sa'na “Gamɨre maangikɨdaa'nyɨ yagaala pɨrɨ' kinori bɨramaraana!” yawɨ'dɨvɨ' sahwarɨ nayaa baihanaramarina.

Currently Selected:

Lukɨ 11: byr

Highlight

Copy