Maakɨ 6
6
Naazaretɨ mwaalyara “Jizaazai a'mwe naangei mɨka,” de'.
(Matɨyui 13:53-58; Lukɨ 4:16-30)
1Sabadaasɨ sai gannya angebanna wɨya'nei wɨna. Gamɨrera mɨdɨnna. 2Gamɨre angebanna kyɨ'mava' Juyaraavɨre Kwazaakegaa' yɨma'nakegaa' Lotuangevɨ buladaa'na yakegaa' wɨjɨwaakɨna. Sara wɨjɨwaakɨna yadaa'nyɨ a'mwe kwalaalyara wɨ'neva atɨka maru'nareva dɨnyɨna “Yagaala daza' a'mwe dai gawɨ maa'mwaka! Bewai yɨwɨrivanɨka! Dɨragɨnya yɨya wɨ'nɨwa'do gamɨre asɨraalyɨ gara yɨwaka! 3Kaa'madaayai midaaka! Maarɨyaa' gawaalɨ' midaaka! Jemɨzalyɨ Jozɨzalyɨ Juthaazalyɨ Saaimonɨjɨ saraavɨre kwɨya'mwei midaaka! Dava nemɨjɨya ganyaabulaanga damwaaihava! Nemɨjɨ avaalyalyɨ. A'mwe naangei mɨka,” dɨnyɨna ye'. Sara dɨnyɨna yeva Jizaazare sɨmunya myawɨri kye' sagaa' gamɨnyɨna sɨnna tɨka davɨna. 4Sɨnna tɨka wɨda'daa'nyɨ Jizaazai wɨdɨna “Pwara Gotɨyare wɨ'nawɨjɨwaakyarɨne yaya' yɨlaaya makimanɨga'. Kɨrɨ' gamɨre kwaakeba mwaalyarajɨ kwɨya'mwerajɨ gannya angevɨ mwaaihasajɨ sa gamɨre yaya' mamakɨlyɨvanɨga'.” 5Sara wɨdɨna yaka angeba saba dɨragɨnya ya'ne aane pɨnɨ kɨnɨ mya'. Kɨrɨ' nalaavɨnaka pwaina pwaina, pɨrɨ'na pɨrɨ'na ata kudathɨwaga' tewaanya mwaalɨna ye'. 6Sara yesa'na dɨna “A'mwe kwalaalyara nɨmɨnyɨna manyɨlɨmwagyɨwaava!” Sara yesa'na maru'na'na ya'.
Jizaazarera wɨjɨwakamarye'.
(Matɨyui 10:5-15; Lukɨ 9:1-6)
Sabanne angebanna wɨjɨwakamarina ya'. 7Sara yakegaa' atɨraai sɨvɨlyɨrɨdaasɨ pwaraalyara bɨna kye' “Nɨmɨre yagaalya'na a'mwe pwaraaihi pimagɨnna dɨwila! A'mwe pwaraaihi pimagɨnna dɨwila! A'mwe yuyaihi sana sana jɨla! Nɨmɨre dɨragɨnyabwi kyɨhɨzaava'mujɨ a'mwe yɨmaka widɨvɨsaraavɨ wanganapɨjɨ yɨmakeraavɨ gɨrɨ'nakeraavɨ duthaasideihɨlyɨ. 8Tusavɨne gɨlyɨvɨta maayaihi yadisarɨkananyaihi dɨwila! Tɨka wapaaya, gɨlya', nɨgwɨgɨlyɨ' mamaapɨnera! 9Aawa. Kwaari'masɨvɨla dɨvaazɨ'ma'nyɨla! Baazɨ'ma'nya pɨrɨwaai mabaazɨ'ma'nɨpɨnera! Sare'na yarai dɨwideihɨlyɨra.” 10Nabaai gamɨreraavɨ wɨdɨna “Angebanna yɨ'mavaawapɨjɨ anga gave pɨrɨvɨ dɨmwaalyɨla! Wapaaya'na myɨrɨ'maranamaripɨnera! Anga gave saba se wapɨjavadaasɨ kaanna dɨwideihɨlyɨ. 11Anga pɨbanyara ‘A'mweraaihi kaajɨla!’ mihɨza pwara ‘Kɨrɨmɨre yagaalya' wɨ'naana!’ mihɨza kwara kamwaalapɨjɨ kaanna wɨyagaa' ‘Anga gɨrɨkita'nanyababɨsaba midaaka!’ dɨna yakɨlyɨ tɨrya saraaihɨre sɨvɨla warojɨya purakɨrasɨ'na yakɨlyɨ kaanna dɨwide'na angebanyara kunnyabwi yawɨpɨ'derera. Sare' jalɨkurakya'nesɨ.” 12Gamɨrera mi'na wɨ'neva pina pina yɨwɨnadaa'na yeva a'mweraavɨ wɨdɨna “Sarɨmɨre sɨmunyabwi mudɨkebwi jawɨramaarila!” 13Sara wɨdɨna yesagaa' yɨmaka kwalaalyaraavɨ wɨdaasɨna yeva a'mwe nabalɨnakeraavɨ yɨsiwelivananya' mɨnyagɨnyangɨ dɨngɨna yeva tewaanya wɨmwaaihɨna ye' gamɨrera.
Jonɨ Bavɨtaazɨya Yadei bala'.
(Matɨyui 14:1-12; Lukɨ 3:19-20; 9:7-9)
14Yuyaba a'mwera gamɨ yakengɨ dɨnyɨdɨnya yadɨvɨsa'na pɨba maremwaaidei Erotɨyai dara wɨ'nake' “Sahwai nawɨ'nya jɨvanɨka!” Wɨ'nake' daresɨ. Pwara Jizaazarɨna dɨnyɨna “Gamɨ sai Jonɨnyɨra. Jonɨ Bavɨtaazɨya Yadei balaka Gotɨyai yɨdɨkaavaka savɨna kwaihwaainakei dɨragɨnya dɨvanɨgɨnya' maaraka tewaanya saza yɨvanɨkelyɨra.” 15Sara dɨnyɨna kye' pwara dɨne' “Gamɨ sai Yɨlaajai kɨgaakuna balyaakelyɨra.” Dɨnesavɨ pwara dɨnyɨna “A'mwe sai wɨ'nawɨjɨwaakadei sɨnnawɨ Gotɨyarɨ wɨ'neva a'mweraavɨ wɨjɨwakyaasarabɨsalyɨ.” 16A'mwe pwara sana sana kadɨne' Erotɨyai wɨdɨna “Jonɨ sahwalyɨra. A'mwerɨ wɨde ‘A'mwe Jonɨmɨ tɨlɨnnya' doripuka!’ Kude balakei dahaa' tewaanya mwaalɨ',” wɨda'. 17Sare' dare'nesɨ. Sahwai Erotɨyaaza' gya'mwe Pilipɨmɨre balaanga' kwala maara'. 18Sare' dare'nesɨ. Jonɨ wɨdɨna “Ja'mwere a'mwe' baa'na ma'mwaana! Sabwina Gotɨyare Kɨwɨnyabwi galazekɨvaimwaa,” wɨdɨna. 19Sara wɨdɨna kya' Erotɨyaazavɨ sɨnna tɨka wɨda'daa'nyɨ Erotɨyai Erotɨyaazavɨ yɨlaaya maryaka yake'na Erotɨyai a'mweraavɨ kudaasa' Jonɨmɨ wɨla marirakɨna yeva kalavuzangevɨ wɨmwaaihɨna ye'. Jonɨ kalavuzangevɨ kamwaala' Erotɨyaazavɨ sɨnna tɨka kuna wɨda'daa'nyɨ “Jonɨmɨ tamakɨma!” dada Erotɨyarɨ kuda' “Aawa,” wɨdɨna. 20Sare' dare'nanyɨ. Sai dɨna “Jonɨ a'mwe naangelyɨra. Sahwai yɨda'maraangei. Tewaanyaburɨ mwaaidei,” daka “Erotɨyaaza' naramakadɨka!” daka Jonɨmɨ kalavuzangevɨ nayaa maremwaaina. Maremwaaina yakei Jonɨmɨre yagaalya' wɨ'nada sɨmunya kwalaalya yawɨ'na yada yɨlaaya ya'.
21Pɨgaa' Erotɨyaazavɨnegaa' yɨma'nakegaa' Erotɨyai daka “Nɨwaa' nɨmɨnyɨ nyɨmaarakegaa' jɨma'nɨwaka!” daka gamɨre wɨdaayadɨvɨsaraavɨ wɨdɨna “Yarala, dahaa' Kwaaka maremwaaidɨvɨsarajɨ aawɨlasaraavɨ maremwaaidɨvɨta naangerajɨ Galɨli mwaalya naangerajɨ saraavɨna tɨka munne jovɨrayɨla dahaa' sagaaka!” Wɨdɨna kya' Erotɨyaaza' dara wanganake' “Dahaa' Jonɨmɨre balyagaa' daaka!” 22Sara kada' tɨka munne nadaapi Erotɨyaazavɨre garaavaanga' bulaawɨna yaka kwarame yɨna. Taaya' kwarame sara kya' Erotɨyalyɨ a'mwerari yɨlaaya yɨna. Yɨlaaya yɨna kye' Erotɨyai taayavɨ wɨdɨna “ ‘Sare nyɨjaama!’ kanyɨda'gɨzɨ gɨzaavɨdeinyɨra. 23Nebulya' gɨthɨwa ‘Nɨmɨre gɨlyɨvɨta naange warɨ'. Gɨlyɨvɨta sa Kingɨyainyɨreba yune tɨnnyabanna gɨzaapalyɨdeinyɨ,’ ” wɨdɨna. 24Sara wɨdake' walyuna yaka ganaangevɨ wɨdɨna “Nɨmɨ berɨ'na wɨdɨjɨwana?”
“ ‘Jonɨ Bavɨtaazɨya Yadere mɨnyagɨnya' dɨnyɨmaryaama!’ sara duthana!” 25Sara wɨdɨna kya' yɨme'nya'bɨ' taaya sa' yarai bulaawɨna yaka Erotɨyarɨ wɨdɨna “Dara yawɨ'manɨge. Jonɨ Bavɨtaazɨya Yadere mɨnyagɨnya' maara'gɨzɨ paletɨyavɨ waka'gɨzɨ yarai nyɨjaama!” 26Wɨdakevɨ Erotɨyai kale naanga wiadaa'nyɨ “Nebulya' gɨthɨwa,” wɨdake'na nabaai tɨka munne nesara sara wɨ'nesa'na “ ‘Aala,’ nudɨwɨdɨka!” daka 27yɨme'nya'bɨ' damerɨ wɨdaasa' “Jonɨ Bavɨtaazɨya Yadere mɨnyagɨnya' dalamaralɨngipuramaraawa!” Wɨdaasakei walyuna yaka kalavuzangevɨ Jonɨmɨre tɨlɨnnya' woripu'na yaka 28mɨnyagɨnya' paletɨyavɨ wakɨna yaka makulaabaka taayavɨna bulawɨjaava'. Kabulawɨjaava' taaya' ganaangevɨna wɨjaavɨna. 29Sagaa' Jonɨmɨrera dara wɨ'nesa' “We', Jonɨ mena davaimwaka!” Deva kaanna wɨna yeva kɨlaakejɨ' maarɨna yeva kaanna makwaweva simaangevɨ wakɨna ye'.
Jizaazai a'mwe kwala naanga naangeraavɨ wapaaya wɨjaava'.
(Matɨyui 14:13-21; Lukɨ 9:10-17; Jonɨ 6:1-13)
30Jizaazai wɨdasaawakera yagalaaweva ayɨna beva gamɨnyɨ kumɨ yuya sara yesa'na nabaai wɨjɨwaakesa'na wɨdɨna. 31Wɨdɨna yesara mwaaidapi kwalaalyara bulawɨ'nyaagaidɨvɨ' wodaapi pwara bulawɨ'nyɨna yadaapi Jizaazalyɨ gamɨrerajɨ wapaaya nya'negaa' mwarina. 32Wapaaya nya'negaa' mwari yake'na gannyaraavɨ wɨdɨna “Gaveina a'mwera maayawɨnna kwawaajɨ pɨgaa' kwazaaka dɨmwaalyɨla!” Sara wɨdɨna kya' sahwara gavera sɨpɨyavɨ wɨlamwaaidapi pɨwɨ a'mwera maayawɨnna makuna ya'. 33Makuna yadaa'nyɨ a'mwe kwalaalyara tɨnna wanganeva “Jizaazai gamɨrerari damakuvanɨka!” deva anga yuyabanyara aalɨbumaangevɨ kaanyave'na kaanyave'na sahwaraavɨ wavɨlaveva a'mwera maayabanna yɨ'ma'na ye'. 34Yɨ'ma'na yevera aalɨbumaangevɨ mwaaidapi gamɨ kwaakevakɨ bwalamwaaina yaka dara wanganake' “Kwala bwa'naanya naange' daaka!” Daka “O, a'mwe dara a'mwe da jɨlɨkyaawarya sipɨzipɨya yɨ'dɨvaidei maaya yaasɨwa'na mwaaihava.” Sara dɨna yake'na gamɨre kale wiadaa'nyɨ yagaala kwalaalya gaai wɨjɨwaakɨna yɨna ya'. 35Wɨjɨwaakɨna yɨna kya' sawɨtɨrɨnyaburɨ gamɨrera bɨna yeva wɨdɨna “Sawɨsaburɨ menanyɨra. 36Dava anga mamannyɨka dava a'mweraavɨ duthana! ‘Davadaasaihi, angeburajɨ wawɨnyaba anga mannɨkebajɨ wawopɨjɨ sarɨmɨnne wapaaya nya'neihi dɨnyide dɨmubyɨla!’” 37Sara wɨdɨna kye' sai wɨdɨna “Sarɨmɨ saihi wapaaya dumaarila!” Wɨdɨna kya' “Nemɨ gara yaajɨwo? Nɨgwia kwalaalya (200 kinaaya) maraajɨ kwajɨ gɨrɨkula mubaawɨna yawaajɨ a'mwe yuyara wapaaya maalɨka kanɨpɨdɨka!” wɨdɨna gamɨrera. 38“Wapaaya gara gara warɨ'? Danganamarila!” wɨdɨna. Sai wɨdɨna yakera tɨnna wanganamaryaaweva ayawɨnna beva wɨdɨna “Gɨrɨkula dawaai dawaai da' jawɨnya pwaraalyɨ wa'dɨ'nyɨ wangamwona,” buthe' gamɨnyɨ. 39Buthɨna kye' a'mwe sahwaraavɨ wɨdɨna “Kurɨvaarɨyangɨ yuyaraavɨ nayaa geva geva jawɨbwaramwaaihila!” 40Sara wɨdɨna kya' pɨba kumɨ kwala naanga (100) mwaalɨna, pɨba kwala naanga (50) mwaalɨna, sana sana ye'. 41Sana sana mwaalɨna kye' Jizaazai gɨrɨkula atɨlya dazajɨ jawɨnya pwaraalyɨ maaraka sɨgunyavina maranganaka Gotɨyarɨna “Su! Wapaaya danna gɨmɨre yaya' makimwa,” wɨdaka gɨrɨkula gunyɨna gunyɨna yaka gamɨreraavɨna wɨmaarina a'mwe kwala naanga mwaaidapɨjɨyaraavɨna yanga wɨmuja'ne. Nabaai jawɨnya pwaraai mɨlɨkɨna mɨlɨkɨna yaka yuyaraavɨna yanga jaapalawɨmuda'. 42Kajaapalawɨmuda' tɨka nyɨna kye' munya yunebanna kwina' 43pɨnɨ warɨna nɨganakesa warɨna kya' gamɨrera maarɨna yeva jawɨnya sara nɨganaketa maarɨna yeva gɨlya atɨraai sɨvɨlyɨrɨdaa'nyɨ pukaalyangɨ maramihyeku'na ye'. 44Wapaaya nesamɨlɨkaavɨdaasara a'mwe gavera (5000) paaivɨ taawɨzanɨyara mwaaleva nyɨna ye' wapaaya.
Jizaazai aalyavɨ a'ba wawoke'nesɨ.
(Matɨyui 14:22-23; Jonɨ 6:15-21)
45Yɨme'nya'bɨ' gannyaraavɨ wɨdɨna “Yarala, sɨpɨyavɨ wɨlamwaalapɨjɨ angeba Betɨzaaitha aalɨbunyavɨ pimagɨ mannɨkebanna dɨwideihɨlyɨra. Wodaapɨjɨ kwala bwa'naanya davɨ wɨdɨdehaa'nanyɨ ‘Sarɨnnya angengɨ dɨwila!’ Dɨvi nɨmɨ wɨlaabɨdera.” 46Sara wɨdakera wɨna kye' kwala bwa'naanyavɨ “Tewaanya dɨwila!” wɨdaka “Gotɨyarɨ wɨdɨma!” daka mugunyangɨ yɨlaawɨna ya'. 47Yɨlaawɨna kya' sawɨsa' kajɨnna' gamɨrera sɨpɨyavɨ mwaaidapi aalɨbunyavɨ tɨnnyaba sɨpɨya' wɨla'dɨ'nyɨ gavei kwaakevakɨ mwaalɨna. 48Mwaalɨna yakei wanganake' “O, yɨhuta naange' tɨvaata'mwake'na nɨmɨrera aalyavɨ yɨsɨkari yarai yarai makwɨya yadaapi sɨpɨya' kavena damakuvanɨka!” Daka yɨrɨkunyagaa' aalɨbunyavɨ a'ba ga'nɨguna yaka sɨpɨya' wa'dɨsɨyaba “Nɨmɨreraavɨ wavɨlavɨma!” yawɨ'na. 49Yawɨ'na yakei aalyavɨ a'ba ga'nɨguna yakerɨ gamɨrera wanganeva “Ai, gɨlaayai daaka!” deva “Ewɨ,” jaka wɨdɨna. 50Sare' dare'nanyɨ. Yuyara gamɨnyɨna tɨnna wanganna yadɨvɨ' lɨka naanga yɨna. “Ewɨ,” jaka wɨdɨna kye' yɨme'nya'bɨ' wɨdɨna “Dɨragɨnna dɨmwaalyɨla! Nɨmɨnyɨra. Lɨka mipɨnera!” 51Sara wɨdɨna yakei sɨpɨyavɨ yɨlamwaaina kya' yɨhusa' mi. Yɨhusa' mi kya' gamɨrera kumɨ sara tɨnna banganakulɨna ye'. Atɨka naanga maru'na'na ye'. 52Sare' dare'nesɨ. Gamɨre dɨragɨnya'na myawɨri ye'. Sahwai wapaaya gunyadaa'nyɨ wapaaya kwalaalya yɨma'nyɨna yakevɨ wanganyawalyaadaasara myawɨri ye'. Aawa.
Kwaakeba Ganezaaretɨ Jizaazai nalaavɨnakeraavɨ tewaanya yavada'gala'.
(Matɨyui 14:34-36)
53Aalɨbunyavɨ ga'makuna yeva Kwaaka Ganezaaretɨna yɨ'mavaaweva sɨpɨya' wɨla marirakɨna ye'. 54Marirakɨna yeva sɨpɨyavɨdaasara waidavadaapi yɨme'nya'bɨ' a'mwe a'mwera gamɨnyɨ tɨnna wanganeva 55kaanyave'na waweva anga yuya dangɨ a'mwe nabalɨnakeraavɨ maramarina. Sai mwaaidɨsɨyabanna yɨ'bɨnnakeraavɨ makabɨna “O sahɨbanna damwaalɨka!” deva sahɨbanna makabɨna. 56Sahwai anga naanga kɨba anga maalɨka pɨba gazabazaba wɨlyɨrɨ'maa'na kya' kumɨ wapemubya yadɨvɨsabanna nabalɨnakeraavɨ makabɨna ye'. Makabɨna yeva yagaala naanga wɨdɨna “Nabalɨnakera gɨmɨre kwaabɨhannyavɨ maangebaarɨ yɨme'nyɨna yɨpɨka!” deva wɨdɨna kye' nabalɨnakera gamɨre kwaabɨhannyavɨ yɨme'nyɨna yeva yuya sahwara tewaanya mwaalɨna ye' nabalɨnakera.
Currently Selected:
Maakɨ 6: byr
Highlight
Copy
Compare
Share
Want to have your highlights saved across all your devices? Sign up or sign in
© 2013, Wycliffe Bible Translators, Inc. All rights reserved.
Maakɨ 6
6
Naazaretɨ mwaalyara “Jizaazai a'mwe naangei mɨka,” de'.
(Matɨyui 13:53-58; Lukɨ 4:16-30)
1Sabadaasɨ sai gannya angebanna wɨya'nei wɨna. Gamɨrera mɨdɨnna. 2Gamɨre angebanna kyɨ'mava' Juyaraavɨre Kwazaakegaa' yɨma'nakegaa' Lotuangevɨ buladaa'na yakegaa' wɨjɨwaakɨna. Sara wɨjɨwaakɨna yadaa'nyɨ a'mwe kwalaalyara wɨ'neva atɨka maru'nareva dɨnyɨna “Yagaala daza' a'mwe dai gawɨ maa'mwaka! Bewai yɨwɨrivanɨka! Dɨragɨnya yɨya wɨ'nɨwa'do gamɨre asɨraalyɨ gara yɨwaka! 3Kaa'madaayai midaaka! Maarɨyaa' gawaalɨ' midaaka! Jemɨzalyɨ Jozɨzalyɨ Juthaazalyɨ Saaimonɨjɨ saraavɨre kwɨya'mwei midaaka! Dava nemɨjɨya ganyaabulaanga damwaaihava! Nemɨjɨ avaalyalyɨ. A'mwe naangei mɨka,” dɨnyɨna ye'. Sara dɨnyɨna yeva Jizaazare sɨmunya myawɨri kye' sagaa' gamɨnyɨna sɨnna tɨka davɨna. 4Sɨnna tɨka wɨda'daa'nyɨ Jizaazai wɨdɨna “Pwara Gotɨyare wɨ'nawɨjɨwaakyarɨne yaya' yɨlaaya makimanɨga'. Kɨrɨ' gamɨre kwaakeba mwaalyarajɨ kwɨya'mwerajɨ gannya angevɨ mwaaihasajɨ sa gamɨre yaya' mamakɨlyɨvanɨga'.” 5Sara wɨdɨna yaka angeba saba dɨragɨnya ya'ne aane pɨnɨ kɨnɨ mya'. Kɨrɨ' nalaavɨnaka pwaina pwaina, pɨrɨ'na pɨrɨ'na ata kudathɨwaga' tewaanya mwaalɨna ye'. 6Sara yesa'na dɨna “A'mwe kwalaalyara nɨmɨnyɨna manyɨlɨmwagyɨwaava!” Sara yesa'na maru'na'na ya'.
Jizaazarera wɨjɨwakamarye'.
(Matɨyui 10:5-15; Lukɨ 9:1-6)
Sabanne angebanna wɨjɨwakamarina ya'. 7Sara yakegaa' atɨraai sɨvɨlyɨrɨdaasɨ pwaraalyara bɨna kye' “Nɨmɨre yagaalya'na a'mwe pwaraaihi pimagɨnna dɨwila! A'mwe pwaraaihi pimagɨnna dɨwila! A'mwe yuyaihi sana sana jɨla! Nɨmɨre dɨragɨnyabwi kyɨhɨzaava'mujɨ a'mwe yɨmaka widɨvɨsaraavɨ wanganapɨjɨ yɨmakeraavɨ gɨrɨ'nakeraavɨ duthaasideihɨlyɨ. 8Tusavɨne gɨlyɨvɨta maayaihi yadisarɨkananyaihi dɨwila! Tɨka wapaaya, gɨlya', nɨgwɨgɨlyɨ' mamaapɨnera! 9Aawa. Kwaari'masɨvɨla dɨvaazɨ'ma'nyɨla! Baazɨ'ma'nya pɨrɨwaai mabaazɨ'ma'nɨpɨnera! Sare'na yarai dɨwideihɨlyɨra.” 10Nabaai gamɨreraavɨ wɨdɨna “Angebanna yɨ'mavaawapɨjɨ anga gave pɨrɨvɨ dɨmwaalyɨla! Wapaaya'na myɨrɨ'maranamaripɨnera! Anga gave saba se wapɨjavadaasɨ kaanna dɨwideihɨlyɨ. 11Anga pɨbanyara ‘A'mweraaihi kaajɨla!’ mihɨza pwara ‘Kɨrɨmɨre yagaalya' wɨ'naana!’ mihɨza kwara kamwaalapɨjɨ kaanna wɨyagaa' ‘Anga gɨrɨkita'nanyababɨsaba midaaka!’ dɨna yakɨlyɨ tɨrya saraaihɨre sɨvɨla warojɨya purakɨrasɨ'na yakɨlyɨ kaanna dɨwide'na angebanyara kunnyabwi yawɨpɨ'derera. Sare' jalɨkurakya'nesɨ.” 12Gamɨrera mi'na wɨ'neva pina pina yɨwɨnadaa'na yeva a'mweraavɨ wɨdɨna “Sarɨmɨre sɨmunyabwi mudɨkebwi jawɨramaarila!” 13Sara wɨdɨna yesagaa' yɨmaka kwalaalyaraavɨ wɨdaasɨna yeva a'mwe nabalɨnakeraavɨ yɨsiwelivananya' mɨnyagɨnyangɨ dɨngɨna yeva tewaanya wɨmwaaihɨna ye' gamɨrera.
Jonɨ Bavɨtaazɨya Yadei bala'.
(Matɨyui 14:1-12; Lukɨ 3:19-20; 9:7-9)
14Yuyaba a'mwera gamɨ yakengɨ dɨnyɨdɨnya yadɨvɨsa'na pɨba maremwaaidei Erotɨyai dara wɨ'nake' “Sahwai nawɨ'nya jɨvanɨka!” Wɨ'nake' daresɨ. Pwara Jizaazarɨna dɨnyɨna “Gamɨ sai Jonɨnyɨra. Jonɨ Bavɨtaazɨya Yadei balaka Gotɨyai yɨdɨkaavaka savɨna kwaihwaainakei dɨragɨnya dɨvanɨgɨnya' maaraka tewaanya saza yɨvanɨkelyɨra.” 15Sara dɨnyɨna kye' pwara dɨne' “Gamɨ sai Yɨlaajai kɨgaakuna balyaakelyɨra.” Dɨnesavɨ pwara dɨnyɨna “A'mwe sai wɨ'nawɨjɨwaakadei sɨnnawɨ Gotɨyarɨ wɨ'neva a'mweraavɨ wɨjɨwakyaasarabɨsalyɨ.” 16A'mwe pwara sana sana kadɨne' Erotɨyai wɨdɨna “Jonɨ sahwalyɨra. A'mwerɨ wɨde ‘A'mwe Jonɨmɨ tɨlɨnnya' doripuka!’ Kude balakei dahaa' tewaanya mwaalɨ',” wɨda'. 17Sare' dare'nesɨ. Sahwai Erotɨyaaza' gya'mwe Pilipɨmɨre balaanga' kwala maara'. 18Sare' dare'nesɨ. Jonɨ wɨdɨna “Ja'mwere a'mwe' baa'na ma'mwaana! Sabwina Gotɨyare Kɨwɨnyabwi galazekɨvaimwaa,” wɨdɨna. 19Sara wɨdɨna kya' Erotɨyaazavɨ sɨnna tɨka wɨda'daa'nyɨ Erotɨyai Erotɨyaazavɨ yɨlaaya maryaka yake'na Erotɨyai a'mweraavɨ kudaasa' Jonɨmɨ wɨla marirakɨna yeva kalavuzangevɨ wɨmwaaihɨna ye'. Jonɨ kalavuzangevɨ kamwaala' Erotɨyaazavɨ sɨnna tɨka kuna wɨda'daa'nyɨ “Jonɨmɨ tamakɨma!” dada Erotɨyarɨ kuda' “Aawa,” wɨdɨna. 20Sare' dare'nanyɨ. Sai dɨna “Jonɨ a'mwe naangelyɨra. Sahwai yɨda'maraangei. Tewaanyaburɨ mwaaidei,” daka “Erotɨyaaza' naramakadɨka!” daka Jonɨmɨ kalavuzangevɨ nayaa maremwaaina. Maremwaaina yakei Jonɨmɨre yagaalya' wɨ'nada sɨmunya kwalaalya yawɨ'na yada yɨlaaya ya'.
21Pɨgaa' Erotɨyaazavɨnegaa' yɨma'nakegaa' Erotɨyai daka “Nɨwaa' nɨmɨnyɨ nyɨmaarakegaa' jɨma'nɨwaka!” daka gamɨre wɨdaayadɨvɨsaraavɨ wɨdɨna “Yarala, dahaa' Kwaaka maremwaaidɨvɨsarajɨ aawɨlasaraavɨ maremwaaidɨvɨta naangerajɨ Galɨli mwaalya naangerajɨ saraavɨna tɨka munne jovɨrayɨla dahaa' sagaaka!” Wɨdɨna kya' Erotɨyaaza' dara wanganake' “Dahaa' Jonɨmɨre balyagaa' daaka!” 22Sara kada' tɨka munne nadaapi Erotɨyaazavɨre garaavaanga' bulaawɨna yaka kwarame yɨna. Taaya' kwarame sara kya' Erotɨyalyɨ a'mwerari yɨlaaya yɨna. Yɨlaaya yɨna kye' Erotɨyai taayavɨ wɨdɨna “ ‘Sare nyɨjaama!’ kanyɨda'gɨzɨ gɨzaavɨdeinyɨra. 23Nebulya' gɨthɨwa ‘Nɨmɨre gɨlyɨvɨta naange warɨ'. Gɨlyɨvɨta sa Kingɨyainyɨreba yune tɨnnyabanna gɨzaapalyɨdeinyɨ,’ ” wɨdɨna. 24Sara wɨdake' walyuna yaka ganaangevɨ wɨdɨna “Nɨmɨ berɨ'na wɨdɨjɨwana?”
“ ‘Jonɨ Bavɨtaazɨya Yadere mɨnyagɨnya' dɨnyɨmaryaama!’ sara duthana!” 25Sara wɨdɨna kya' yɨme'nya'bɨ' taaya sa' yarai bulaawɨna yaka Erotɨyarɨ wɨdɨna “Dara yawɨ'manɨge. Jonɨ Bavɨtaazɨya Yadere mɨnyagɨnya' maara'gɨzɨ paletɨyavɨ waka'gɨzɨ yarai nyɨjaama!” 26Wɨdakevɨ Erotɨyai kale naanga wiadaa'nyɨ “Nebulya' gɨthɨwa,” wɨdake'na nabaai tɨka munne nesara sara wɨ'nesa'na “ ‘Aala,’ nudɨwɨdɨka!” daka 27yɨme'nya'bɨ' damerɨ wɨdaasa' “Jonɨ Bavɨtaazɨya Yadere mɨnyagɨnya' dalamaralɨngipuramaraawa!” Wɨdaasakei walyuna yaka kalavuzangevɨ Jonɨmɨre tɨlɨnnya' woripu'na yaka 28mɨnyagɨnya' paletɨyavɨ wakɨna yaka makulaabaka taayavɨna bulawɨjaava'. Kabulawɨjaava' taaya' ganaangevɨna wɨjaavɨna. 29Sagaa' Jonɨmɨrera dara wɨ'nesa' “We', Jonɨ mena davaimwaka!” Deva kaanna wɨna yeva kɨlaakejɨ' maarɨna yeva kaanna makwaweva simaangevɨ wakɨna ye'.
Jizaazai a'mwe kwala naanga naangeraavɨ wapaaya wɨjaava'.
(Matɨyui 14:13-21; Lukɨ 9:10-17; Jonɨ 6:1-13)
30Jizaazai wɨdasaawakera yagalaaweva ayɨna beva gamɨnyɨ kumɨ yuya sara yesa'na nabaai wɨjɨwaakesa'na wɨdɨna. 31Wɨdɨna yesara mwaaidapi kwalaalyara bulawɨ'nyaagaidɨvɨ' wodaapi pwara bulawɨ'nyɨna yadaapi Jizaazalyɨ gamɨrerajɨ wapaaya nya'negaa' mwarina. 32Wapaaya nya'negaa' mwari yake'na gannyaraavɨ wɨdɨna “Gaveina a'mwera maayawɨnna kwawaajɨ pɨgaa' kwazaaka dɨmwaalyɨla!” Sara wɨdɨna kya' sahwara gavera sɨpɨyavɨ wɨlamwaaidapi pɨwɨ a'mwera maayawɨnna makuna ya'. 33Makuna yadaa'nyɨ a'mwe kwalaalyara tɨnna wanganeva “Jizaazai gamɨrerari damakuvanɨka!” deva anga yuyabanyara aalɨbumaangevɨ kaanyave'na kaanyave'na sahwaraavɨ wavɨlaveva a'mwera maayabanna yɨ'ma'na ye'. 34Yɨ'ma'na yevera aalɨbumaangevɨ mwaaidapi gamɨ kwaakevakɨ bwalamwaaina yaka dara wanganake' “Kwala bwa'naanya naange' daaka!” Daka “O, a'mwe dara a'mwe da jɨlɨkyaawarya sipɨzipɨya yɨ'dɨvaidei maaya yaasɨwa'na mwaaihava.” Sara dɨna yake'na gamɨre kale wiadaa'nyɨ yagaala kwalaalya gaai wɨjɨwaakɨna yɨna ya'. 35Wɨjɨwaakɨna yɨna kya' sawɨtɨrɨnyaburɨ gamɨrera bɨna yeva wɨdɨna “Sawɨsaburɨ menanyɨra. 36Dava anga mamannyɨka dava a'mweraavɨ duthana! ‘Davadaasaihi, angeburajɨ wawɨnyaba anga mannɨkebajɨ wawopɨjɨ sarɨmɨnne wapaaya nya'neihi dɨnyide dɨmubyɨla!’” 37Sara wɨdɨna kye' sai wɨdɨna “Sarɨmɨ saihi wapaaya dumaarila!” Wɨdɨna kya' “Nemɨ gara yaajɨwo? Nɨgwia kwalaalya (200 kinaaya) maraajɨ kwajɨ gɨrɨkula mubaawɨna yawaajɨ a'mwe yuyara wapaaya maalɨka kanɨpɨdɨka!” wɨdɨna gamɨrera. 38“Wapaaya gara gara warɨ'? Danganamarila!” wɨdɨna. Sai wɨdɨna yakera tɨnna wanganamaryaaweva ayawɨnna beva wɨdɨna “Gɨrɨkula dawaai dawaai da' jawɨnya pwaraalyɨ wa'dɨ'nyɨ wangamwona,” buthe' gamɨnyɨ. 39Buthɨna kye' a'mwe sahwaraavɨ wɨdɨna “Kurɨvaarɨyangɨ yuyaraavɨ nayaa geva geva jawɨbwaramwaaihila!” 40Sara wɨdɨna kya' pɨba kumɨ kwala naanga (100) mwaalɨna, pɨba kwala naanga (50) mwaalɨna, sana sana ye'. 41Sana sana mwaalɨna kye' Jizaazai gɨrɨkula atɨlya dazajɨ jawɨnya pwaraalyɨ maaraka sɨgunyavina maranganaka Gotɨyarɨna “Su! Wapaaya danna gɨmɨre yaya' makimwa,” wɨdaka gɨrɨkula gunyɨna gunyɨna yaka gamɨreraavɨna wɨmaarina a'mwe kwala naanga mwaaidapɨjɨyaraavɨna yanga wɨmuja'ne. Nabaai jawɨnya pwaraai mɨlɨkɨna mɨlɨkɨna yaka yuyaraavɨna yanga jaapalawɨmuda'. 42Kajaapalawɨmuda' tɨka nyɨna kye' munya yunebanna kwina' 43pɨnɨ warɨna nɨganakesa warɨna kya' gamɨrera maarɨna yeva jawɨnya sara nɨganaketa maarɨna yeva gɨlya atɨraai sɨvɨlyɨrɨdaa'nyɨ pukaalyangɨ maramihyeku'na ye'. 44Wapaaya nesamɨlɨkaavɨdaasara a'mwe gavera (5000) paaivɨ taawɨzanɨyara mwaaleva nyɨna ye' wapaaya.
Jizaazai aalyavɨ a'ba wawoke'nesɨ.
(Matɨyui 14:22-23; Jonɨ 6:15-21)
45Yɨme'nya'bɨ' gannyaraavɨ wɨdɨna “Yarala, sɨpɨyavɨ wɨlamwaalapɨjɨ angeba Betɨzaaitha aalɨbunyavɨ pimagɨ mannɨkebanna dɨwideihɨlyɨra. Wodaapɨjɨ kwala bwa'naanya davɨ wɨdɨdehaa'nanyɨ ‘Sarɨnnya angengɨ dɨwila!’ Dɨvi nɨmɨ wɨlaabɨdera.” 46Sara wɨdakera wɨna kye' kwala bwa'naanyavɨ “Tewaanya dɨwila!” wɨdaka “Gotɨyarɨ wɨdɨma!” daka mugunyangɨ yɨlaawɨna ya'. 47Yɨlaawɨna kya' sawɨsa' kajɨnna' gamɨrera sɨpɨyavɨ mwaaidapi aalɨbunyavɨ tɨnnyaba sɨpɨya' wɨla'dɨ'nyɨ gavei kwaakevakɨ mwaalɨna. 48Mwaalɨna yakei wanganake' “O, yɨhuta naange' tɨvaata'mwake'na nɨmɨrera aalyavɨ yɨsɨkari yarai yarai makwɨya yadaapi sɨpɨya' kavena damakuvanɨka!” Daka yɨrɨkunyagaa' aalɨbunyavɨ a'ba ga'nɨguna yaka sɨpɨya' wa'dɨsɨyaba “Nɨmɨreraavɨ wavɨlavɨma!” yawɨ'na. 49Yawɨ'na yakei aalyavɨ a'ba ga'nɨguna yakerɨ gamɨrera wanganeva “Ai, gɨlaayai daaka!” deva “Ewɨ,” jaka wɨdɨna. 50Sare' dare'nanyɨ. Yuyara gamɨnyɨna tɨnna wanganna yadɨvɨ' lɨka naanga yɨna. “Ewɨ,” jaka wɨdɨna kye' yɨme'nya'bɨ' wɨdɨna “Dɨragɨnna dɨmwaalyɨla! Nɨmɨnyɨra. Lɨka mipɨnera!” 51Sara wɨdɨna yakei sɨpɨyavɨ yɨlamwaaina kya' yɨhusa' mi. Yɨhusa' mi kya' gamɨrera kumɨ sara tɨnna banganakulɨna ye'. Atɨka naanga maru'na'na ye'. 52Sare' dare'nesɨ. Gamɨre dɨragɨnya'na myawɨri ye'. Sahwai wapaaya gunyadaa'nyɨ wapaaya kwalaalya yɨma'nyɨna yakevɨ wanganyawalyaadaasara myawɨri ye'. Aawa.
Kwaakeba Ganezaaretɨ Jizaazai nalaavɨnakeraavɨ tewaanya yavada'gala'.
(Matɨyui 14:34-36)
53Aalɨbunyavɨ ga'makuna yeva Kwaaka Ganezaaretɨna yɨ'mavaaweva sɨpɨya' wɨla marirakɨna ye'. 54Marirakɨna yeva sɨpɨyavɨdaasara waidavadaapi yɨme'nya'bɨ' a'mwe a'mwera gamɨnyɨ tɨnna wanganeva 55kaanyave'na waweva anga yuya dangɨ a'mwe nabalɨnakeraavɨ maramarina. Sai mwaaidɨsɨyabanna yɨ'bɨnnakeraavɨ makabɨna “O sahɨbanna damwaalɨka!” deva sahɨbanna makabɨna. 56Sahwai anga naanga kɨba anga maalɨka pɨba gazabazaba wɨlyɨrɨ'maa'na kya' kumɨ wapemubya yadɨvɨsabanna nabalɨnakeraavɨ makabɨna ye'. Makabɨna yeva yagaala naanga wɨdɨna “Nabalɨnakera gɨmɨre kwaabɨhannyavɨ maangebaarɨ yɨme'nyɨna yɨpɨka!” deva wɨdɨna kye' nabalɨnakera gamɨre kwaabɨhannyavɨ yɨme'nyɨna yeva yuya sahwara tewaanya mwaalɨna ye' nabalɨnakera.
Currently Selected:
:
Highlight
Copy
Compare
Share
Want to have your highlights saved across all your devices? Sign up or sign in
© 2013, Wycliffe Bible Translators, Inc. All rights reserved.