Maakɨ 8

Jizaazai a'mwe kwala naangeraavɨ (4000) wapaaya wɨjaava'.

(Matɨyui 15:32-39)

1Yɨrɨka sangɨ gamɨnyawɨnna kwala naange' yɨ'bwa'nyɨna yeva tɨka wapemaayara mwaaidapi Jizaazai gamɨreraavɨna jaka jɨvwaramaaraka wɨdɨna 2“Kwala bwa'naanya dasɨ nɨmɨjɨ yɨrɨka daryaai darɨ' mwaaidori ya'na dahaa' wapaaya maayaraavɨna kale nyɨwa'. 3Kumɨ mɨjɨka wiadaasɨ ‘Sarɨnnya angebanna dɨwila!’ wɨdɨwɨja' a'mwe pwara maave keiba mwaalyarajɨ a'mwe pwarajɨ tusavɨ mɨjɨka nabalapɨka!” 4Wɨdɨna yakevɨ gamɨrera yagaala ma'maa'na “Dava a'mwera mamwaalyadɨvɨsaba aane pwai kwai a'mweraavɨne wapaaya gawɨ maarajɨwa'!” 5Sai yɨdaangana' “Gɨrɨkula gara gara warɨka?” Sara kyɨdaangana' “Ati ata purɨdaa'nyɨ pwaraaina.” 6Sara wɨdɨna kye' kwala bwa'naanyavɨ wɨdɨna “Yuyangihi, kwaakevɨ dalamwaalyɨla!” Wɨdɨna yaka gɨrɨkula ata purɨdaa'nyɨ pwaraalyangɨ maaraka Gotɨyarɨ “Su! Su!” wɨdaka gunyɨna gunyɨna yaka a'mwengɨne wapaaya wɨjaaya'nera gamɨreraavɨ wɨjaavɨna kya' sara kwala bwa'naanyavɨna wɨjaavɨna. 7Mi'na wɨjaavɨna yesara jawɨnya pɨrɨ'na pɨrɨ'na wa'dɨsɨya wɨmaarina kye' Gotɨyarɨ “Su! Gɨmɨre yaya' makimwa,” wɨdaka gamɨreraavɨ wɨdɨna “Jawɨnya dajɨ a'mweyuraavɨna yanga dumaarila!” 8A'mwe yuya maranyɨna kye' munya yɨnyɨna kya' wapaa pɨnɨ nɨganakɨna yeta bwakuna wapaaya pɨnɨ gɨlya ati ata purɨdaa'nyɨ pukaalyangɨ maramihe' gamɨrera. 9Tɨka wapaaya neta kwala naanga naanga (4000) mwaalesare. Mwaalesaraavɨ sai wɨdɨna “A'mweihi, wapaa mi'na nɨvanɨgasaihi, sarɨnnya angebanna dɨwila!” 10Sara wɨdɨna yaka yɨme'nya'bɨ' wɨdaasɨna, gamɨrerari sɨpɨyavɨ wɨlamwaaina kya' Kwaaka Dalɨmaanutaneraavɨ makuna ya'.

Perɨzɨyara Jizaazarɨ wɨde' “A'mwera mwanganyadɨvɨsa' ja!”

(Matɨyui 16:1-4; Lukɨ 12:54-56)

11Saba Perɨzɨya pwara gamɨnyawɨnna wɨlaabɨna yeva “Gamɨ sarɨ kayaa'nanya'na yaamɨjɨ wɨdaana!” yawɨreva “Yɨdakwasanganaana!” deva wɨdɨna “Gotɨyare dɨragɨnya' maara'gɨzɨ wɨjɨwaainya dɨragɨnya' ja! Wanganaade'na Gotɨyareigɨ dɨngaka?” 12Sara wɨdɨna kye' gamɨre sɨmunyavɨ kale wiadaa'nyɨ sɨmudɨngwaimale yaka wɨdɨna “Dahaa' mwaaihasara ‘Wɨjɨwaainya dɨragɨnya' ja!’ baa'na nyɨdɨwaava! Nebwi yɨhɨthɨvanɨge. Wɨjɨwaainya dɨragɨnya' mwanganyɨ jideihɨlyɨra dahaasaihi. Arɨkawɨnyɨra.” 13Sara wɨdɨna yakei kumɨ saraavɨ yarai yagalya'mavaka sɨpɨyavɨ wɨlamwaaina kya' aalɨbunyavɨ pimagɨnna makuna ya'.

Perɨzɨyarajɨ Erotɨyalyɨ saraavɨre yagaala kayaa'nanya'nesɨra.

(Matɨyui 16:5-12)

14Gamɨrera wapaayanna navɨka yɨna kye' kumɨjɨ sɨpɨyavɨ gɨrɨkula gave pɨrɨ'na wara'. 15Gɨrɨkula gave pɨrɨ'na wa'dɨ'nyɨyagaa' gamɨ “Dɨnyu'nyɨla! Mala nayaa jɨwannyɨla! Perɨzɨyaraavɨre lɨwɨnya pamidakya'nesɨ Erotɨyare lɨwɨnya pamidakya'nesɨ nayaa jawɨrila!” 16Wɨdɨna kya' gamɨrera dɨnyɨna “Wapaaya mamaariwo'na nedɨwaka.” 17Dɨnyɨna yesa'na Jizaazai yawɨraka wɨdɨna “ ‘Nemɨ wapemaayainere',’ baa'na dɨmanɨga'! Kunya' myawɨrijɨvanɨga'! Sɨdu'maayaihi daa! 18Tɨnnakeihi, tɨnna mwanganyɨjɨvanɨga'! Kadɨ'nakeihi, kadɨka mu'nyɨjɨvanɨga'! Nɨmɨ sɨnnawɨ ye'na nayaa myawɨrijɨvanɨga'! 19Sagaa' gɨrɨkula atina gunyɨna kye paaivɨ taawɨzanɨyara mi'na kane' wapaa bwakuna yake sarɨmɨ gɨlya gara garengɨ maramihe'?” Sara wɨdɨna kya' wɨdɨna ye' “Atɨraai sɨvɨlyɨrɨdaa'nyɨ pukaalyangɨ maramiho.” 20Wɨdɨna kye' wɨdɨna “Gɨrɨkula ati ata purɨdaa'nyɨ pwaraalyangɨ po taawɨzanɨyara kanɨwa'daa' wapaaya pɨnɨnna yunebanne gɨlya gara gara maramihɨwa'daa'?” Sara wɨdɨna kya' wɨdɨna “Ati ata purɨdaa'nyɨ pukaalyangɨnyɨ.” 21Wɨdɨna yesaraavɨ wɨdɨna ya' “Sa'na dahaa' kunya kuna myawɨrijɨvanɨga'?”

Anga Betɨzaaitha tɨnnyaraai yuyaraai tɨbɨnyai wangana'.

22Kumɨ Anga Betɨzaaithana kyɨ'mave' gamɨnyawɨnna a'mwe pwara a'mwe tɨbɨnyarɨ jɨvwaramakuna yeva naanga wɨdɨna “A'mwe darɨ ata dɨthathɨwade'nanyɨ!” 23Sara wɨdɨna kye' Jizaazai tɨbɨnyare asavɨ maaraka angebadaasɨ jɨvwaramakuna yaka gamɨre tɨnnyaraarɨ maagwala wopɨna yaka gamɨre tɨnnyaraarɨ ata dathɨwagaka yɨdaanganna “Pɨrɨ' kɨrɨ' dangamwaana?” 24Yɨdaanganna kya' maranganamaryaka wɨdɨna “A'mweraavɨ dahawangamanɨge? Yɨsara kaanya yamaryɨvanɨkabaaibɨ' sahwaraavɨ wanganaasɨwana.” 25Sagaa' wɨdakere tɨnnyaraarɨ ata ayɨna dathɨwanna kya' a'mwei dɨragɨnna kwangana' gamɨre tɨnna tewaanya kyɨma'na' yuyangɨ tɨnna nayaa wangana'. 26Nayaa wangadaa'nyɨ sai wɨdaasɨna ya' “Gɨnnya angevɨna dɨwona! Anga dava ayɨna mulaawɨnnera!”

Pitai Jizaazarɨna nayaa wɨda'.

(Matɨyui 16:13-20; Lukɨ 9:18-21)

27Jizaazalyɨ gamɨrerari sara Sizaarɨya Pilipaai angeburaavɨna gɨ'mavamarina yadaapi gamɨreraavɨ wɨdɨna “Nɨmɨnyɨna a'mwera aaihwala nyɨdɨvanɨgava?” 28Gamɨrera wɨdɨna “Gɨmɨnyɨna ‘Jonɨ aalyavɨ bavɨtaazɨya yakei dɨkaavakela,’ pwara dɨmanɨga'. ‘Ne Yɨlaajai dɨkaavakela,’ pwara dɨmanɨga'. ‘Gotɨyarɨ wɨ'nawɨjɨwakyaaka pwai dɨkaavakela,’ pwara dɨmanɨga'.” 29Sara wɨdɨna kye' yɨwaara'na “Sahwaihi, nɨmɨnyɨna baarɨva dɨmanɨgataihɨlaka?”

“Kɨraazɨtɨyaigɨnyɨra. Gotɨyai gɨthasaabakeigɨnyɨra.” 30Pitai sara wɨdɨna kya' sai “Naange' yɨhɨthɨwa. Sa'na nɨmɨnyɨna aane pwarɨ kɨrɨvɨ mudɨpɨnera!” wɨdɨna ya'.

Jizaazai gannya daanga wɨvɨnya'na gannya balya'na wɨda'.

(Matɨyui 16:21-28; Lukɨ 9:22-27)

31Sai gamɨreraavɨ gaai wɨjɨwaakɨna “A'mweraavɨne Kaimɨraayainyɨ daanga naanga nyɨvɨnadeinyɨra. Juyaraavɨre a'mwe naangerajɨ sipɨzipɨya Gotɨyarɨna mubɨthɨka yɨra'dɨvɨta naangerajɨ Kɨwɨjarajɨ sara nɨmɨnyɨna ‘A'mwe kayaa'nanaangelyɨra,’ dɨnapɨri nyɨramakɨpɨ'deinyɨra. Kanyɨramakapi yɨrɨka daryaai darɨ' kanyavɨlavojɨ baryainyɨ ayɨna dɨkaavɨdeinyɨra.” 32Yagaala sa' ku'maayaba aangyagaala wɨdɨna kya' Pitai sahwarɨ sangyɨnebanna jɨvwaramakwoka maanga wɨdɨna “Naangeigɨ, sabwi myawɨ'dɨnna!” 33Sara maanga wɨdɨna kya' gɨnyɨma'naka gamɨreraavɨ tɨnna wanganaka Pitarɨ maanga wɨdɨna “Saataanɨgɨ, nɨmɨnyɨ dusɨmagɨnna dɨwona! Gotɨyai sara yawɨ'manɨkebura myawɨrivanɨgɨ. Aawa. A'mwera sara yawɨ'manɨgasabura yawɨ'manɨgɨnya'nanyɨ.” 34A'mwe kwala bwa'naanyavɨjɨ gamɨreraavɨjɨ jaka wɨjɨvwaramaa'na kya' gamɨnyawɨnna bɨna kye' wɨdɨna “A'mwe kɨrɨ' a'mwe kwai ‘Jizaazareinyɨ. Mɨdɨnɨma!’ yawɨraja' ‘Nɨmɨnyɨne'na myawɨ'munera!’ dathe'na pwara ‘A'mwerɨ yɨta yovihɨrarannɨkevɨri tamakaana!’ kadapɨri sai ‘Jizaazarɨna balɨdeinyɨra,’ dozɨ nɨmɨrebwi yawɨ'dei nyɨmɨdɨnadelyɨra. 35Sare' dare'nesɨ. Yɨ a'mwe pwai lɨka yojɨ ‘Nanyɨramakɨpɨka! Nɨmɨre gaalya' padaihasamaa'nɨma! Jizaazarɨ wasɨ'nɨdeinyɨra,’ dozɨ navɨka mwaalajai gamɨre kuryai kayaaka yadelyɨra. Kɨrɨ' pwai ‘Jizaazarɨna nyɨramakɨpɨ'deinyɨra. Nɨmɨre gaalya' kayaaka yana!’ yawɨ'da nɨmɨre yagaala tewaanya'na yawɨraja' yuyagaa' gamɨre kuryai nayaa padaihasamaa'delyɨra. 36Sare' dare'nesɨ. A'mwe pwai Kwaaka davakɨ gɨlyɨvɨsajɨ yuyajɨ sangɨ maarojɨ manyɨlɨmwagari kyojɨ gamɨre kuryai yɨwɨna yadelyɨ. Sa' tewaanya' daaka! Arɨkewɨnyɨra! 37Sare' dare'nesɨ. A'mwere kuryai kayaaka yɨma'nyɨna kyojɨ gannya kuryarɨna a'mwe sai Gotɨyarɨ berɨsɨ mubathelaka! Aawa. 38Sare' dare'nesɨ. Kwaaka davakɨ mwaaidɨvɨsara Gotɨyarɨna navɨka yadɨvɨ' a'mwe' a'mwe pwarɨ ata lɨmwanna yade'bɨsarera. Kayaa'nanaangera nɨmɨnyɨnajɨ nɨmɨre yagaalya'najɨ sangɨna ‘Wagɨla nanevwa'nadɨka! Sahwarɨ wasɨ'nɨma!’ deva yɨvanɨgasara. Nabaai dɨvi A'mweraavɨne Kaimɨraayai Ganɨmaangere byaanna dɨragɨnya' kamaarojɨ Gotɨyare mamaayara ejelɨya tewaanyarajɨ kwalaabori wagɨla wɨvwa'nɨvanɨkeraavɨna gamɨ sarɨ wagɨla wɨvwa'nadelyɨra. Saraavɨ wasɨ'nadelyɨra.”

Currently Selected:

Maakɨ 8: byr

Highlight

Copy

Compare