Akha - 2001 Edition (NT) Drama

Akha Bible Revision (Latin Script) © Thailand Bible Society, 2011.

Smˬ nah byah laˇ ngeh, Gaˬliˬlehˇ miˇ kʼahˬ Gaˬnaˬ meuˬ-ahˇ oeˇ mˇ baˇ-eu bawˬ-iˬ jaˆ-eu meh. Yeˬsuˇ-euˬ aˬ ma kʼawꞈ kʼoeˇ gaˇ jawˇ-eu meh. Yeˬsuˇ hawˇ-eu aˬ yawꞈ-euˬ zaˬ lahˇ deuˬ-ahˇ kʼawꞈ, oeˇ mˇ baˇ gaˇ kuˇ taˬ-euˬ meh. Aˬ gaꞈ dzaˇ uiˇ kʼaˇ jaˆ-eu dawˇ jiˇ shaw-euˬ miˇ neh, Yeˬsuˇ-euˬ aˬ ma Yeˬsuˇ-ahˇ ehˇ nehˬ-eu, “Aˬ ha maꞈ aˬ gaꞈ dzaˇ uiˇ maˬ paˇ jaˆ ngaˇ.”
Yeˬsuˇ ehˇ-eu, “Aˬ ma nawˇ ngaˬ-ahˇ heu loˇ nga, kʼoeˇ loˇ nga lehˇ maˬ ehˇ ni jawˇ sheˇ. Ngaˬ-euˬ aˇ yamˬ maˬ keuˆ laˇ-aˬ siˬ.”
Kʼoeˇ ngeh, “Ngaˬ li kʼaˇ ehˇ-eu loꞈ-ehˇ mˇ-awˬ” lehˇ, zaˬ kʼaˆ deuˬ-ahˇ Yeˬsuˇ-euˬ aˬ ma ehˇ nehˬ-euˬ meh.
Yuˇdaˆ tsawˇ haˬ deuˬ-aˬ, zahˇ sahˇ kʼoꞈ-ahˇ taꞈ leˇ-awˇ iˇ cuꞈ ya dzuiꞈ shawˇ-eu zahˇ jaˆ-eu meh. Kʼoeˇ-euˬ gʼaˇ duˬ iˇ cuꞈ kʼawꞈ ahˇ-eu kʼaˬ lo ciˬ cuˇ koꞈ siˬ kʼoeˇ gaˇ bi jaˆ-euˬ meh. Kʼaˬ lo ciˬ cuˇ kʼoeˇ tiˬ siˬ-euˬ iˇ cuꞈ ngaˬ keuˆ koꞈ keuˆ ehˇ gʼaˬ ni deˇ leˇ-eu meh. “Ciˬ cuˇ teu deuˬ-ahˇ iˇ cuꞈ kʼawꞈ ahˇ-awˬ” lehˇ, zaˬ kʼaˆ kʼoeˇ deuˬ-ahˇ Yeˬsuˇ ehˇ nehˬ ngeh, bi lehˬ lehˬ ni kʼawꞈ byah jiˇ-euˬ meh. Kʼoeˇ naˇ, “Nymˬ-mˇ poˆ jawˇ-aˬ, ciˬ cuˇ teu deuˬ-ahˇ kʼawꞈ dahˬ taˬ-euˬ iˇ cuꞈ paˇ kuˬ doˆ-awˇ, aˬ jaˇ mˇ gaˇ haw-eu aˬ yuiꞈ gʼaˬ-ahˇ ciˬ ha nehˬ-iˇ-awˬ” lehˇ, aˬ yawꞈ maꞈ-ahˇ Yeˬsuˇ ehˇ nehˬ ngeh, aˬ yawꞈ maꞈ ciˬ ha nehˬ-iˇ-euˬ meh. Yeˬsuˇ neh aˬ gaꞈ dzaˇ uiˇ bi pyeuꞈ-iˇ-euˬ iˇ cuꞈ kʼoeˇ-ahˇ, aˬ jaˇ mˇ-eu aˬ yuiꞈ gʼaˬ kuiˇ haw-euˬ meh. Aˬ gaꞈ dzaˇ uiˇ kʼoeˇ aˬ gaˇ neh oe-euˬ aˬ yawꞈ maˬ siˬ nya-a. (Iˇ cuꞈ kuˬ doˆ leꞈ-euˬ zaˬ kʼaˆ kʼoeˇ deuˬ tehꞈ-ehˇ siˬ nya-eu meh. Kʼoeˇ miˇ neh, miˬ zaˬ sheuˬ-eu gʼaˬ-ahˇ aˬ yawꞈ kuˇ-awˇ, heu loꞈ-ehˇ ehˇ nehˬ-euˬ meh. “Aˬ cawˬ-aˬ, kuiˇ dzehˬ-eu aˬ gaꞈ dzaˇ uiˇ jeˬ huˬ kʼaˇ nehˬ-awˇ, daˬ yah deuˬ dawˇ dehˆ laꞈ jawˬ-ehˇ byawˬ dzehˬ-eu aˬ gaꞈ dzaˇ uiˇ paˇ kʼaˇ nehˬ nmˇ. Nawˇ beu kuiˇ dzehˬ-eu aˬ gaꞈ dzaˇ uiˇ nymˬ-mˇ keuˆ ni maˬ kʼaˇ nehˬ-ehˇ bi jaˆ-euˬ law hawˇ ngaˬ tawˇ.”
Yeˬsuˇ-aˬ, Gaˬliˬlehˇ miˇ kʼahˬ Gaˬnaˬ meuˬ-ahˇ kʼaˆ jeˬ-ehˇ gʼeh-eu yaw beh hmˬ kʼoeˇ loꞈ-ehˇ mˇ mehˬ nehˬ-eu laꞈ kʼoeˇ, aˬ yawꞈ-euˬ yaw shehꞈ kʼahˬ sehˇ pah mehˬ nehˬ-awˇ, aˬ yawꞈ-euˬ zaˬ lahˇ deuˬ aˬ yawꞈ-ahˇ jah laˇ-euˬ meh.
Kʼoeˇ naˇ, Yeˬsuˇ hawˇ-eu aˬ yawꞈ-euˬ aˬ ma, aˬ yawꞈ-euˬ mehˇ nmˇ deuˬ, aˬ yawꞈ-euˬ zaˬ lahˇ deuˬ, Gaˬbeˬneˬoˬ meuˬ-ahˇ iˇ-awˇ, nah kaˬ nah jawˇ byah ni gʼaˬ naˬ naˬ-euˬ meh.


Baˬ saˬ kaˬ bawˬ-iˬ gʼeh-eu aˇ yamˬ dawˬ peh peh laˇ-euˬ miˇ neh, Yeˬluˇsaˬlehˬ meuˬ-ahˇ Yeˬsuˇ le-euˬ meh. Uˬ duˬ tahˬ nymˇ nymˇ ma-euˬ lahˇ laꞈ kʼoeˇ, mawˇ neˇ, yawˇ hawˇ-eu yaˇ miˇ kʼaˬ kʼoeˬ ahˬ-eu deuˬ hawˇ-eu pyuˇ dawˬ paˇ-eu deuˬ kaꞈ gʼa luꞈ gaˇ aˬ yawꞈ ya mawˇ-euˬ meh. Yeˬsuˇ aˇ caˆ caˆ zaˬ deuˬ nyehꞈ bawˆ-awˇ tmˬ tehˬ-awˇ, jeˬ zaˬ-ahˇ juiꞈ-eu aˇ caˆ jahˇ-euˬ meh. Yawˇ deuˬ maˬ ehˇ, mawˇ neˇ deuˬ maˬ ehˇ, Uˬ duˬ tahˬ nymˇ nymˇ ma laꞈ kʼoeˇ kʼaˇ jawˇ-eu jeˬ zaˬ deuˬ-ahˇ aˬ yawꞈ teh doˆ jiˇ-euˬ meh. Pyuˇ dawˬ paˇ nehˬ-eu tsawˇ haˬ deuˬ-euˬ hawˬ jeh ngawˬ coˬ nehˬ-awˇ, pyuˇ bi yoeˇ kʼaˇ jiˇ-euˬ meh. Yaˇ miˇ kʼaˬ kʼoeˬ ahˬ luꞈ-eu tsawˇ haˬ deuˬ-ahˇ kʼawꞈ, “Yaˇ miˇ kʼaˬ kʼoeˬ teu deuˬ yuˇ doˆ gʼeh-awˬ. Ngaˬ Da-euˬ nymˇ-ahˇ lehˆ juꞈ-eu nymˇ taˬ paˇ bi pyeuꞈ” lehˇ ehˇ nehˬ-euˬ meh. Kʼoeˇ ngeh, “Miˬyehˇ-oˇ, nawˬ-euˬ nymˇ-ahˇ ngaˇ gaˬ-eu ngaˬ-euˬ nui ma laꞈ kʼoeˇ miˬ dzaˬ doꞈ gaˇ duˇ miˇ-a” lehˇ Jaˇ liꞈ laꞈ kʼoeˇ boꞈ taˬ-euˬ kʼoeˇ tsahˇ, aˬ yawꞈ-euˬ zaˬ lahˇ deuˬ-ahˇ noeˬ doˆ leˇ-euˬ meh.
Yuˇdaˆ tsawˇ haˬ aˬ yuiꞈ aˬ tsu deuˬ Yeˬsuˇ-ahˇ ehˇ-eu, “Nawˇ teu loꞈ-ehˇ jahˇ nya-eu a kawˬ-aˬ jaˆ-eu nga maꞈ ya siˬ duˬ ni, kʼaˆ jeˬ-ehˇ gʼeh-eu bi siˬ bi mawˇ-eu aˬ geu jeˬ nga maꞈ-ahˇ jahˇ mehˬ-eu gʼeh te.”
Yeˬsuˇ eh-eu, “Uˬ duˬ tahˬ nymˇ nymˇ ma heu pyaˆ dzeh jiˇ-awˬ. Smˬ nah laꞈ kʼoeˇ ngaˇ paˇ tsoˆ gʼaˬ nya ma.”
Aˬ yawꞈ maꞈ ehˇ-eu, “Smˬ nah tehꞈ-ehˇ nawˇ tsoˆ gʼaˬ nya ma lehˇ la. Uˬ duˬ tahˬ nymˇ nymˇ ma heu tsoˆ gʼaˬ-eu gʼaˇ duˬ smˬ tseˇ koꞈ kʼoꞈ ga-euˬ nawˇ siˬ nya ma loˇ.”
Ehˇ kʼawꞈ, Yeˬsuˇ ehˇ mawꞈ-eu Uˬ duˬ tahˬ nymˇ nymˇ ma kʼoeˇ-aˬ, aˬ yawꞈ maꞈ-euˬ gʼawˇ mawˇ-ahˇ ehˇ mawꞈ-eu meh. etl Kʼoeˇ miˇ neh, aˬ yawꞈ shiˇ-awˇ paˇ gʼoꞈ dehꞈ laˇ ngeh jawˇ, aˬ yawꞈ neh ehˇ-euˬ dawˬ heu dawˬ aˬ yawꞈ-euˬ zaˬ lahˇ deuˬ-ahˇ paˇ noeˬ doˆ leˇ-euˬ meh. Kʼoeˇ ngeh jawˇ, Jaˇ liꞈ laꞈ kʼoeˇ boꞈ taˬ-euˬ gaˇ kawˆ deuˬ hawˇ-eu, Yeˬsuˇ neh ehˇ-euˬ dawˬ-ahˇ aˬ yawꞈ maꞈ jah-euˬ meh.

Baˬ saˬ kaˬ bawˬ-iˬ gʼeh-eu aˇ yamˬ laꞈ kʼoeˇ, Yeˬluˇsaˬlehˬ meuˬ-ahˇ Yeˬsuˇ jawˇ luꞈ ngeh, aˬ yawꞈ neh mˇ-euˬ kʼaˆ jeˬ-ehˇ gʼeh-eu bi siˬ bi mawˇ-eu jeˬ-ahˇ aˬ cawˬ ya mawˇ-awˇ, tsawˇ haˬ gʼawˬ mya ni aˬ yawꞈ-ahˇ jah laˇ-euˬ meh. Ehˇ kʼawꞈ, Yeˬsuˇ-aˬ, aˬ yawꞈ maꞈ-ahˇ aˬ yawꞈ-euˬ gʼawˇ mawˇ maˬ a nehˬ peuˬ-a. Aˬ jeˬ miˇ neh ehˇ naˇ, aˬ yawꞈ maꞈ dawˬ tawˆ luꞈ-ahˇ aˬ yawꞈ siˬ nya-eu meh. Aˬ yawꞈ maꞈ-euˬ gaˇ kawˆ aˬ yawꞈ-ahˇ ja mehˬ-eu maˬ loˬ-a. Aˬ jeˬ miˇ meh ehˇ naˇ, tsawˇ haˬ-euˬ nui ma-ahˇ aˬ yawꞈ siˬ nya-eu meh.

Escolta Yoˇhaˬ 2