Vengo: Yigisǝ nwi mǝkee mǝfimǝ maŋ Ghaŋ Veŋoo New Testament

Yigisǝ nwi mǝkee mǝfimǝ maŋ Ghaŋ Veŋoo

Yiŋkii kɨ shɔɔ, Yeso ndɔ tɔŋ gə̀ njɨɨ maghia Galilii faŋ lùu maghia Tiberiɔs. Nwaa vɨɨ vəyaŋ beꞌsə ŋwə, buꞌ laa vəŋ nə yè vənu və shuu yɔŋvə faŋ ŋwə nə yɨ̀ maa vɨɨ vəza. Yeso koꞌ gə dùꞌ fuu kweꞌ ghɔ vɨ vɨɨ məzwetə nu ki. Maa yighee yɔ́, yighee mətia yiŋwaa faŋ vɨ tii nə Pasa nə luu nshənə. Yeso ndeynə vədɨꞌ, ye laa vɨɨ vəyaŋ jɨjwi yɨ ŋwə, ŋwə bitə tɨ́ Filip laa, «Nsiŋ taa ywaŋ bee fɨ fə, tɨ́ kaꞌ ŋkə kùꞌ tɨ́ vɨɨ və̀?» Ŋwə nə gì nɨniŋ maa məmɔŋ Filip. Nshɨ-tɔ Yeso nəə kɔꞌ kɨɨ nə nu ŋkɨə faŋ ŋwə taa yɨ̀. Filip bəŋsə tɨ́ ŋwə laa, «Vɨ kɔlə ywaŋ bee maa mba ka ŋkwəŋ, ŋkə kee bee kùꞌ tɨ́ vɨɨ vɔ́ me, faŋ wə muꞌ kɔlə zɨ sheꞌ kətɨtiꞌ.» Wuu məzwetə nu Yeso mɔ́ꞌ, faŋ yizii yi luu Andru, weenshu Pita, gi tɨ́ Yeso laa, «Weembwa mɔ́ꞌ lùu shɔ, faŋ ŋwə kìi yighɨsə bee tee, nə vaŋ-susə vəbɔɔ. Luu nə, vaŋ-vətɔ vɔ́ sii taa gaŋtə vɨɨ vɔ́ vəyaŋ kɨkə?» Yeso gi tɨ́ vɨɨ məzwetə nu ki laa, vəŋ yɨ vɨɨ vɔ́ duꞌ nsi. Shəŋ kɔ́ nə luu sheꞌ gay gay. Vɨɨ vɔ́ vənshə duꞌ nsi. Vɨɨ nə luu shɔ yaa ŋkaŋsə tee. Yeso fi yighɨsə bee yɔ́, shɔ̀ꞌtə Nwi, kɨ nii bɨ̀ꞌtə bee kɔ́, gàasə tɨ́ vɨɨ vɔ́, faŋ vəŋ nə dùꞌ nsi nə, baa ndì susə sɔ́, gàatə tɨ́ vɨɨ vɔ́. Wə tɨ̀ me wə zɨ zwə. Faŋ vəŋ nə zɨ zwə̀kə, Yeso gi tɨ́ vɨɨ məzwetə nu ki laa vəŋ baytə vəbɨꞌ vəbee mbɨə faŋ mbə bə̀, buꞌ mbə ndi day. Vɨɨ məzwetə nu ki baytə vəbɨꞌ vəbee vɔ́ faŋ mbə bə fɨ maa yighɨsə bee yɔ́ tee nə, ŋkɔɔsə lwaŋkə njɔsə-bɔɔ. Vɨɨ vɔ́ vənshə ye nu shuu yɔŋ ŋkɨə faŋ Yeso nə yɨ̀ yifi, vəŋ gi laa, «Yinsəŋ, luu ŋkee nshiiŋii-sɔghɔ nə, faŋ Nwi nə gì fɨshi laa ŋwə ndɔ jwì taa mbi shɨ nsi.» Yeso ye laa vɨɨ vɔ́ kəə jwi jia ŋwə nə wutə, nùŋ ŋwə maa fwàŋ, ŋwə suꞌtə fɨ ghɔ vəŋ, koꞌ gə̀ fuu kweꞌ.


Kɨ lùu laynəfu, vɨɨ məzwetə nu Yeso siꞌ gə̀ taa maghia, gə̀ ŋìi taa bay, tɔŋ gə̀ njɨɨ yi, ntɨꞌ Kapernaum, tɨ́ fu fəŋ, Yeso kee ta jwì yɨ vəŋ me. Muu tatə dɨdɨꞌ buꞌ laa fɨɨ nəə shɨshɔɔ nəŋay. Faŋ vəŋ tòꞌ fɨ taa muu yaa vəkilomita tee, yè Yeso faŋ ŋwə toꞌ fɨ fuu muu, toꞌ jwi yɨ vəŋ, vəŋ fee ŋkee dɨdɨꞌ. Yeso gi tɨ́ vəŋ laa, «Kɨ viŋ baa fee me, lùu mə, faŋ mə jwi yɨ viŋ.» Nɨniŋ, vəŋ nəə kəə ŋiisə Yeso taa bay, sheꞌ yighee yɔ́ bay kɔ́ ziꞌ mbɔꞌ bia maa shəŋ ŋkɨə faŋ vəŋ nəə kəə gə fùu yifi.
Fu kɨ lee, vɨɨ mbɨə faŋ vəŋ gòꞌ njɨɨ muu njyə faŋ Yeso sɨ lùu shɔ ghɔ vɨ vɨɨ məzwetə nu ki nə, ye laa bay kəmɔ́ꞌ kee baa lùu shɔ me, laa ŋkə nə luu sheꞌ kəmuꞌ. Vəŋ nə kɨɨ laa Yeso sɨ kee ŋìi taa bay kɔ́ ghɔ vɨ vɨɨ məzwetə nu ki me, laa sɨ gə̀ sheꞌ vɨɨ məzwetə nu ki nə. Vəbay vəmɔ́ꞌ tɔŋ jwì fɨ ntɨꞌ Tiberias, jwi lùu nshənə maa shəŋ ŋkɨə faŋ tɨta Yeso nə ndwàŋ Nwi shɔ, vɨ zɨ bee yifi nə. Nɨniŋ, vɨɨ vɔ́ ye laa Yeso kee baa lùu shɔ me, vɨɨ məzwetə nu ki kee lùu shɔ me, vəŋ ŋii taa vəbay vɔ́, tɔ̀ŋ muu, gə̀ njɨɨ Kapernaum, kɨ kəə Yeso fɨ fuŋ.

Faŋ vəŋ zìꞌ njɨɨ maghia yɔ́, yè Yeso njɨɨ yɔ́, bìtə tɨ́ ŋwə laa, «Tɨta, a sii jwì feenə yighee kə?» Yeso bəŋsə tɨ́ vəŋ laa, «Yinsəŋ, mə naysə tɨ́ viŋ laa, nu ŋkɨə faŋ viŋ kəə mə shɔ, luu buꞌ laa viŋ sɨ zɨ̀ bee kì zwə̀kə, kee bee luu buꞌ nu shuu yɔŋ ŋkɨə faŋ viŋ sɨ ye fɨ ghɔ mə nə me. Kɨ viŋ baa kɨ faꞌ maa fazɨ ŋkɨə faŋ ŋkə taa ndi me. Bàw viŋ faꞌ maa məfi fazɨ ŋkɨə faŋ kaꞌ ŋkə goꞌsə yighee muꞌ, yɨ̀ viŋ kìi məbwey vəlwaŋ. Lùu ŋkɨə faŋ Wuu yinsəŋ Nwi ndɔ kɔ tɨ́ viŋ. Kaꞌ ŋwə kɔ tɨ́ viŋ buꞌ laa tɨta Nwi nə kɔ̀ wutə ki tɨ́ ŋwə yaa shwenə tɨ́ viŋ.» Vəŋ bitə tɨ́ Yeso laa, «Sii kaꞌ yia yɨ kə, buu kɨ faꞌ vəfaꞌ və Nwi?» Yeso bəŋsə tɨ́ vəŋ laa, «Faꞌ ŋgwə faŋ kaꞌ viŋ fàꞌ, ŋwə bàw tɨ́ Nwi, lùu laa viŋ nuŋ fwi siŋ maa mə, faŋ nə tɔ̀ŋ Nwi tɔ̀ŋ mə taa mbi.» Vəŋ gi tɨ́ ŋwə laa, «Faŋ ŋkə lùu nɨniŋ, baw a yɨ ŋkee nu yaa shwenə tɨ́ yia, tɨ́ kaꞌ yia ye wutə kə, bìŋ ghɔ? A taa yɨ kə? Maa vətɨɨ vaŋ-nsiŋ nə zɨ̀ fazɨ ŋkɨə faŋ vɨ tii nə mana nə taa tɔɔ waꞌsə, yuu ŋkə lùu taa ŋwaꞌlə Nwi laa, Ŋwə nə kɔ̀ fazɨ faŋ ŋkə nə ndɔ̀ fɨ yizɔ tɨ́ vəŋ, vəŋ zɨ.» Yeso bəŋsə tɨ́ vəŋ laa, «Viŋ zɔ! Mə gì tɨ́ viŋ yinsəŋ laa, Nə kee kɔ̀ Mose kɔ̀ fazɨ ŋkɨə faŋ ŋkə ndɔ̀ fɨ yizɔ tɨ́ viŋ me. Ndɔ kɨ kɔ Tii ŋwaa kɔ ŋkee fazɨ yinsəŋ tɨ́ viŋ faŋ ŋkə ndɔ̀ fɨ yizɔ. Fazɨ yiŋkii kɔ́, faŋ Nwi kɔ tɨ́ vɨɨ nə, lùu ŋkɨə faŋ ŋkə ndɔ̀ fɨ yizɔ, jwi kɔ məbwey tɨ́ vɨɨ taa mbi.»
Vəŋ gi tɨ́ Yeso laa, «Tɨta, kɔ kəŋ fazɨ kɔ́ tɨ́ yia ghee nshə!» Ŋwə gi tɨ́ vəŋ laa, «Lùu mə lùu fazɨ kɔ́ faŋ ŋkə kɔ məbwey tɨ́ vɨɨ. Wə tɨ̀ me wə faŋ ŋwə jwi yɨ mə, kaꞌ jɨŋ kee baa zà ŋwə me; twey-muu kee baa ywey ŋwə me. Luu nə, mə duꞌtə mə naysə tɨ́ viŋ laa, viŋ ye mə nə sɨ ghiŋ, luu nə, kee biŋ mə me. Vɨɨ mbɨə faŋ Tii ŋwaa kɔ laa lùu vɨɨ vaŋ, vɨɨ vɔ́ vənshə taa kɨ jwi yɨ mə. Wə tɨ̀ me wə faŋ ŋwə jwi yɨ mə, mə kee taa jɔŋ ŋwə me. Lùu nɨniŋ, buꞌ laa mə sìꞌ fɨ yizɔ maa məyɨ nu ŋkɨə faŋ ŋkə bàw too Nwi faŋ ŋwə nə tɔ̀ŋ mə nə. Mə yaa kee jwì maa məyɨ nu ŋkɨə faŋ ŋkə bàw too mə me. Nu ŋkɨə faŋ ŋkə bàw too Nwi faŋ ŋwə nə tɔ̀ŋ mə nə, lùu laa kɨ mə meꞌ tuu wə muꞌ fɨ taa ŋwaa vɨɨ mbɨə faŋ ŋwə kɔ̀ shee nə me, tɨ́ kaꞌ mə ndɔ yweysə vəŋ vənshə fɨ ghɔ yiku maa vəshi vəshə. Nu ŋkɨə faŋ Tii ŋwaa kəə, lùu laa, wə tɨ̀ me wə faŋ ŋwə yè ŋwiŋ wi, nùŋ fwi yi maa ŋwə, zɨ məbwey vəlwaŋ. Nɨniŋ, mə ndɔ yweysə ŋwə maa vəshi vəshə.»
Faŋ ŋwə nə gì nɨniŋ nə, vɨɨ Jus tey kɨ lulə ŋwə, buꞌ faŋ ŋwə nə gì laa yi luu fazɨ kɔ́ faŋ ŋkə ndɔ̀ fɨ yizɔ. Vəŋ gi laa, «Maa wə ŋwə̀ lùu Yeso, wee Josef. Tii wi nə nshu wi lùu vɨɨ faŋ nsiŋ kɨ̀ɨ nə vəŋ. Sii kaꞌ ŋwə gì laa yi jwì fɨ yizɔ kɨkə?» Yeso gi tɨ́ vəŋ laa kɨ vəŋ baa lùlə me. «Tuu wə kee lùu shɔ, tɨ́ kaꞌ ŋwə jwi yɨ mə maa laa Tii ŋwaa faŋ ŋwə nə tɔ̀ŋ mə nə, suŋ wə ghɔ́, ŋwə jwi yɨ mə me. Wə tɨ̀ me wə faŋ ŋwə jwi yɨ mə, mə ndɔ yweysə ŋwə shi yiba. Nə luu fɨshi, nshiisə-ŋii sɔghɔ nə nyɔ̀ꞌ taa ŋwaꞌlə Nwi laa, «Nwi taa deesə vɨɨ vənshə.» Nɨniŋ, wə tɨ̀ me wə faŋ ŋwə zɔ mədeesə Tii ŋwaa, baa zwetə fɨ ghɔ ŋwə, taa jwi yɨ mə. Ŋkə kee də̀ laa wə nə yè Tii ŋwaa me. Ye sheꞌ wə ntiə faŋ ŋwə nə ndɔ̀ fɨ yɨ Nwi, yè Tii ŋwaa. Viŋ zɔ! Mə gì tɨ́ viŋ yinsəŋ laa, wə ntɨə faŋ ŋwə nùŋ fwi yi maa mə, kii məbwey faŋ ŋwə kee yaa kɨ mè me. Mə lùu fazɨ ŋkɨə faŋ ŋkə kɔ məbwey tɨ́ vɨɨ. Gə̀ fɨ maa fazɨ mana kì, faŋ vətɨɨ viŋ nə zɨ̀ taa tɔɔ waꞌsə fɨshi nə, vəŋ nə zɨ, ndɔ baa kukə maa yighee vəŋ. Gə̀ fɨ maa fazɨ yinsəŋ kɔ́ faŋ ŋkə ndɔ̀ fɨ yizɔ nə, wə tɨ̀ me wə faŋ ŋwə zɨ fazɨ kɔ́, kee ndɔ baa ku me. Lùu mə lùu fazɨ kɔ́ faŋ ŋkə ndɔ̀ fɨ yizɔ nə, faŋ ŋkə kɔ məbwey tɨ́ vɨɨ. Wə kɨ luu zɨ̀ fazɨ kɔ́, buu ŋwə bwèy yighee muꞌ. Fazɨ kɔ́ faŋ mə taa kɔ tɨ́ vɨɨ laa vəŋ bwey, lùu mbasə ŋwaa ŋwaa.»
Nə luu buꞌ yigisə Yeso yɔ́ laa vɨɨ Jus tey kɨ tay sheꞌ vəŋ vəŋ laa, «Sii kaꞌ wə ŋwə̀ kɔ̀ mbasə ŋwaa wi, laa nsiŋ kwə kɨkə?» Yeso gi tɨ́ vəŋ laa, «Viŋ zɔ! Mə gì tɨ́ viŋ yinsəŋ laa, viŋ kɨ luu kee kɨ kwə mbasə Wuu yinsəŋ Nwi, ndɔ nu mənshi mi me, buu kaꞌ viŋ kee kìi məbwey ghɔ́ me. Wə tɨ̀ me wə faŋ ŋwə kwə mbasə ŋwaa ŋwaa, nu mənshi maa, taa luu ŋwə faŋ ŋwə kii məbwey vəlwaŋ, buu mə ndɔ yweysə ŋwə maa vəshi vəshə. Mbasə ŋwaa ŋwaa luu ŋkee fazɨ yinsəŋ, mənshi maa luu ŋkee fa nu yinsəŋ. Wə tɨ̀ me wə faŋ ŋwə kwə mbasə ŋwaa ŋwaa, nù mənshi maa, buu ŋwə gòꞌsə yia ŋwə yighee muꞌ; mə gòꞌsə taa fwi ŋwə nɨzi. Tii ŋwaa faŋ ŋwə kìi məbwey yinsəŋ, nə tɔ̀ŋ mə. Nɨniŋ, mə bwey buꞌ ŋwə. Sheꞌ nee, wə ntɨə faŋ ŋwə kwə mbasə ŋwaa ŋwaa, ndɔ bwey buꞌ mə. Nɨniŋ, mbasə ŋwaa ŋwaa luu ŋkee fazɨ faŋ ŋkə ndɔ̀ fɨ yizɔ. Fazɨ ŋkɨə faŋ vətɨɨ viŋ nə zɨ̀ taa tɔɔ waꞌsə fɨshi nə, baa kii kukə, kee lùu fazɨ yinsəŋ faŋ ŋkə ndɔ̀ fɨ yizɔ me. Luu nə, wə ntɨə faŋ ŋwə zɨ̀ fazɨ ŋkɨə faŋ mə kɔ nə, ndɔ goꞌsə yighee muꞌ.»
Yeso nə gì yigi nyə̀ yinshə faŋ ŋwə nəə deesə vɨɨ taa ŋii Nwi ntɨꞌ Kapernaum. Vɨɨ vəyaŋ fɨ taa ŋwaa vɨɨ məzwetə nu Yeso nə zɔ̀ yigi yɔ́, gì laa yigi yɔ́ luu ŋkee yiweꞌ, sii kaꞌ bìŋ ndə bìŋ kəŋ yigi yɔ́. Yeso kɨɨ fɨ taa fwi ŋwə laa vɨɨ məzwetə nu ki lɨlulə kɔ̀ŋ yigisə yi, ŋwə gi tɨ́ vəŋ laa, «Yigisə nyaa yɨ fwi siŋ za mu? Viŋ sii taa gì laa kə, faŋ viŋ ye Wuu yinsəŋ Nwi ndɔ bəŋ koꞌ gə̀ shəŋ ŋkɨə faŋ ŋwə nə ndɔ̀ fɨ fuŋ? Viŋ zɔ! Kɔ Zwitə Nwi kɔ məbwey tɨ́ wə. Kɨ ŋkə kee luu ŋkee nu mbasə ŋwaa me. Maa lùu ghaŋ tii mə gì tɨ́ viŋ nə. Yigi njyə faŋ mə gi tɨ́ viŋ nə, ndɔ yɨsə Zwitə Ley Nwi ŋii taa ŋwaa vɨɨ, vəŋ zɨ məbwey vəlwaŋ. Luu nə, vɨɨ vəmɔ́ꞌ fɨ taa ŋwaa viŋ kee bìŋ yigisə nyaa me.» Yeso nə gì nɨniŋ buꞌ laa, shù fɨ maa vənzi ŋwə nəə kɔꞌ kɨɨ nə vɨɨ mbɨə faŋ vəŋ kee biŋ yigi yi me, nə wə ntɨə faŋ ŋwə ndɔ fiŋ ŋwə nə. Yeso baa gi laa, «Lùu ŋiꞌ nu ŋkɨə faŋ mə nə nàysə laa, kaꞌ wə kee jwi yɨ mə me, tɨ̀ lɨꞌ laa Tii ŋwaa sùŋ ŋwə me.»


Shù fɨ maa yighee yɔ́, vɨɨ vəyaŋ faŋ vəŋ nəə beꞌsə Yeso, suꞌtə fɨ maa ŋwə, kee baa beꞌsə ŋwə me. Nɨniŋ, Yeso bitə tɨ́ vɨɨ məzwetə nu ki njɔsə-bɔɔ nə laa, «Ŋkiŋ sii lùu laa kə? Viŋ kee kəə nyɨŋ nɨzi yimu?» Saymon Pita bəŋsə tɨ́ ŋwə laa, «Tɨta, yia sii nyɨŋ ghɔ, yia baa bèꞌsə ndə? A kìi yigi faŋ nyə kɔ yia nə məbwey vəlwaŋ. Yia nùŋ fwi sia maa ghɔ, buꞌ laa yia kɔꞌ kɨɨ laa a luu ŋkee wuu ley ŋgwə faŋ Nwi nə shòꞌ.» Yeso gi tɨ́ vəŋ laa, «Maa nə luu nshɨ-tɔ ŋwaa, faŋ mə nə shòꞌ viŋ njɔsə-bɔɔ nə. Luu nə, wə muꞌ fɨ taa ŋwaa viŋ lùu wuu zwitə bwə.» Yeso nəə gisə nu kɔ́ kɔ̀ŋ Judas, wee Saymon Iskariot, faŋ ŋwə ndɔ fiŋ Yeso nə. Ŋwə nə luu fɨ maa vɨɨ məzwetə nu Yeso njɔsə-bɔɔ nə.

Escolta Jɔn 6