Mazatec Ixcatlán - 2013 SBM (NT+Gen,Exd) Non Drama

Traducción Bíblica: Mazateco de San Pedro Ixcatlán, 2013© Sociedad Bíblica de México, A.C.,2013www.sbm.org.mx Grabación: Mazateco de San Pedro Ixcatlán ℗ Hosanna, 2021

Kó Kjisoo̱ kijí nínga tikón tji̱ngi̱ nínga tjín yáꞌoliboo̱. Kó nga kamángindyiojón nga ta̱jño̱ó kijí nginí na̱ngo̱xi̱i̱, kó xotaa̱ kijíkóntiñaa̱, sꞌe̱ Kjisoo̱ kisꞌijñando nga akóyaá. Kó já chji̱ni̱e̱kjo̱a̱kitii̱ ko̱jo já fariseoo̱, jachójo̱ ngo xota̱chjo̱on xí kamáyà má nga katsꞌéntꞌaa̱ kjo̱a̱ xi̱ꞌii̱n, sꞌe̱ íjñá ngamasiee̱n xotaa̱, sꞌe̱ bi̱ kiꞌmií Kjisoo̱:
–Mostro̱, kui xota̱chjo̱on kamáyà má nga katsꞌéntꞌaa̱ kjo̱a̱ xi̱ꞌii̱n. Kó ngi̱yaa̱ kjo̱a̱kitii̱ Moisee̱ atíxománá, nga chjiéngá ndi̱jo̱ kjoyá ngaskande nga si̱ꞌankꞌien ínchjín xi bo̱a̱ sa̱ꞌiín. Kó jí, kó sé ji.
Kui nii̱ katsó kui jaá nga ndyi̱kjitꞌayákón Kjisoo̱, tsi̱ꞌe̱ nga ko̱óngítaꞌin. Ta̱nga Kjisoo̱ kisꞌijñaxtien tꞌanangii̱, tji̱e̱nga tsja katsꞌénꞌindó ngo ni tꞌanangii̱. Kó kui jaá ngotjón ngotjón asíyaá, sꞌe̱ kasasienkixi̱ Kjisoo̱, kó bi̱ katsoó:
–Xi kji̱e̱ ngo ndi̱yà tsꞌénjé, kui tjón ngatꞌaya ndi̱jo̱ kui xota̱chjo̱on.
Sꞌe̱ ti̱ kisꞌijñaxtien nginí Kjisoo̱, kó ta̱kó katsꞌénꞌindó nginí ni ki̱a̱ tꞌanangii̱. Kó kui jaá, nga tsintꞌié ni xi katsó Kjisoo̱, kjo̱a̱kjíntakoón yíngítaꞌin, kó ńgó ńgó kijí, tjón má xota̱ xi xchaá kijí, sꞌe̱ kisꞌijña soboá Kjisoo̱, ko̱jo kui xota̱chjo̱on xí tikón ngamasiee̱n. Sꞌe̱ kasasienkixi̱ Kjisoo̱, kó bi̱ katsoó naa̱:
–Ji xota̱chjo̱on, ñá síndo xota̱ xi yíngítaꞌii̱n. A nde ngojín xi katsꞌénjeé.
Sꞌe̱ bi̱ katsó kui xota̱chjo̱on:
–Nde ngojín Ndi̱a̱.
Sꞌe̱ Kjisoo̱, bi̱ katsó:
–Nde an tsꞌenjéjaán, tꞌen ꞌne̱, kó ngiti̱ niꞌínjéjín ji.

Ti̱ ingo ndi̱yà tsíchji̱a̱jo nginí Kjisoo̱ xotaa̱, nga bi̱ katsoó:
–Án boá ndiꞌí xí tsꞌentsíjee̱n xotaa̱ kui nga̱sondiee̱, xi ko̱e̱je̱tji̱ngina jmíni̱xtjin nga nínga jñó kjótsoꞌbá, ngatꞌa̱ kꞌuiérií ndiꞌí xí tsjá kjo̱a̱mindyioo̱n.
Sꞌe̱ já fariseoo̱, bi̱ katsó:
–Tsi ti̱ ji xi niꞌín ji chistiko̱ yojòo̱ kjo̱a̱a̱ ji, jmí ni chjíjiín ni xi se.
Sꞌe̱ Kjisoo̱, bi̱ katsó:
–Ndatsi ti̱ an xi tsꞌen an chistiko̱ yojona kjo̱a̱a̱ an, chjírií ni xi xian an, ngatꞌa̱ be án ñá kjindibáni an, ko̱jo ñání tsꞌénfí an, ta̱nga jún yàjínjnú ñá kjindibá an, kó ñá tsꞌénfí an. Jún bo̱a̱ ndyi̱ꞌmìjnú, tsi nda ko̱jo tsi ndajín ndyi̱tsꞌèn xotaa̱, xikoó ngo xota̱ nga̱sondie, ta̱nga an nde ngojín xi xian an tsi nda ko̱jo tsi ndajín ndyi̱tsꞌèn. Kó tsi ngo xi xián án tsi nda ko̱jo tsi ndajín tjítsꞌén, kixi̱ ni xi tjítsꞌen an, ngatꞌa̱ jmí tsi tikón so̱bo̱a̱ an, jó májne̱, an ko̱jo Na̱ꞌmina xi katsangiyana. Kó xo̱jo̱n kjo̱a̱kitijnú kjitꞌa, nga ni xi ka̱tso̱ jó chistiko̱, ja̱koxi̱ boá. Án boá xi tsꞌen an chistiko̱ yojona kjo̱a̱a̱ an, ko̱jo Na̱ꞌmina xi katsangiyana ti̱ chji̱a̱ kjo̱a̱a̱ an nga.
Sꞌe̱ bi̱ katsó kui jaá:
–Ñá tikón Na̱ꞌmíi̱ ꞌne̱.
Kó Kjisoo̱, bi̱ katsó:
–Nde an yàjínjnúꞌun, ti̱nde Na̱ꞌmina yàjínjnú, tsi yarajnúꞌun katsaki, ti̱ xcha̱ra̱jnú Na̱ꞌmina nga.
Kui nii̱ xi katsó Kjisoo̱, ki̱a̱ ngi̱ndie nínga boeꞌé to̱nchji̱e̱e̱, nga akóyá ndi̱tsen na̱ngo̱xi̱i̱, kó nde ngojín xi katsoboá, ngatꞌa̱ kji̱e̱ fochójín chi̱bo̱a̱a̱.

Ingo ndi̱yà, bi̱ katsó nginí Kjisoo̱:
–An jè tsꞌénfí an, kó jún ku̱i̱ndyi̱séjnúꞌun, ta̱nga ta̱ngatꞌanii̱ jéjnú nga ko̱yàjnú, kó nínga tsꞌénfí an, ka̱májín kongínjnú jún.
Kósꞌe̱ bi̱ katsó já jundíoo̱:
–A sa̱ꞌínkꞌiénjínrá yojoo̱, ngatꞌa̱ nga bi̱ tsó: Nínga tsꞌénfí an, ka̱májín kongínjnú.
Kó Kjisoo̱, bi̱ katsó:
–Jún kꞌi̱e̱ ngindiee̱ ndokjo̱a̱nijnú, kó án ndiꞌakꞌajmi jàn chjiá an, jún kui nga̱sondiee̱ ndokjo̱a̱nijnú, kó án kuijín nga̱sondiee̱ chjiá an. Kó kuíni nga bi̱ kixian an nga ta̱ngatꞌanii̱ jéjnú nga ko̱yàjnú, ngatꞌa̱ tsi sꞌijinjínjnú nga an xi an, jéjnú ko̱yàjo̱jnú.
Sꞌe̱ bi̱ kiꞌmií Kjisoo̱:
–ꞌYání jí.
Sꞌe̱ Kjisoo̱, bi̱ katsó:
–Ja̱ kuí xí ngaskande koó nga tjón kixiyajnúꞌun. Achichí ni xi tikónna xi xiyàjnúꞌun, ko̱jo nga xiyà an tsi nda ko̱jo tsi ndajín ndyi̱niꞌánjnú, ta̱nga kui xi katsangiyana, kuí boá xi ja̱koxi̱i̱, kó án ni xi je tsintꞌie an, kuí ni xi xiáa̱n xotaa̱ kui nga̱sondiee̱.
Ta̱nga kui xotaa̱ kamákjínjiín nga Néná xí Na̱ꞌmii̱ xi tsíchji̱a̱jo. Kó kuíni nga Kjisoo̱, bi̱ katsoó:
–Kjiꞌa ngije chjanínkꞌájnú ndií nda̱ xi̱ꞌii̱n, kjiꞌa xcha̱jnú nga an, kó nga ni xi akóyána Na̱ꞌmina xí chjiá an, jmí tsi ni xi an so̱bo̱a̱ mejénna tsꞌen an. Ngatꞌa̱ xi katsangiyana, tikónjo̱na, kji̱e̱ ngo ndi̱yà ꞌbijñá soboána Na̱ꞌmina, ngatꞌa̱ ngatsjéni̱xtjin nga ni xi tsja maa̱ kuí boá xí tsꞌen an.
Nga tsíchji̱a̱ Kjisoo̱ kui nii̱, achichí xota̱ katsꞌénsꞌijin.

Sꞌe̱ Kjisoo̱, bi̱ katsoó xota̱ jundíoo̱ xi je kisꞌijii̱n kui:
–Tsi si̱ꞌankjatjosónjnú ngayeje énna, ja̱koxi̱ nga xota̱na ka̱majnú jún, kó xcha̱jnú ni xi ja̱koxi̱i̱, kó ni xi ja̱koxi̱i̱ xí sa̱ꞌíndéjnú.
Sꞌe̱ bi̱ katsó kui jaá:
–Xota̱ tji̱e̱e̱ Abraa̱n boá ji̱n, kó kji̱e̱ ngo ndi̱yà nga moso̱ xi kastiñaá ngo xota̱ majne̱. Kótsꞌèn bo̱a̱ se ji nga xota̱ ndé ka̱majne̱. Sꞌe̱ Kjisoo̱, bi̱ katsó:
–Ja̱koxi̱, ja̱koxi̱ ni xi xiánjnúꞌun, nga ngayeje xota̱ xi tsꞌénjé, moso̱ xi kastiñaá jeé boá. Ta̱nga ngo moso̱ jmí tsi ngatsjéni̱xtjin ꞌbíjñá ndiꞌaa̱, ta̱nga ndií ngatsjéni̱xtjin nga ꞌbíjñá ndiꞌaa̱. Kó kuíni nga, tsi Ndií ku̱i̱ꞌíjñandéjnú, ja̱koxi̱ nga ku̱i̱ndyiondéjnú. Jè be an nga xota̱ tji̱e̱e̱ Abraa̱n jún, ta̱nga mejénjnú si̱ꞌankꞌiénjnúꞌun ngatꞌa̱ sꞌi̱jñajinjínjnú énna. Kuí ni xi chjiá an kjo̱a̱a̱ ni xi kamábe an tiñaa̱ Néná xí Na̱ꞌmii̱, ta̱nga jún niꞌánjnú ni xi je kandaꞌyá tiñajnúu̱ na̱ꞌmijnú.
Sꞌe̱ bi̱ katsó kui jaá:
–Na̱ꞌmijne̱ Abraa̱n boá.
Kó Kjisoo̱, bi̱ katsó:
–Tsi ndií Abraa̱n jún, ti̱ kuira̱ ni xi katsꞌén Abraa̱n xi ndyi̱niꞌánjnú. Ta̱nga jún mejénjnú si̱ꞌankꞌiénjnúꞌun, an jè kixiyajnúꞌun ni ja̱koxi̱ xi katsóyàna Néná, ta̱nga Abraa̱n jmíni̱xtjin katsꞌén kui nii̱. Ni xi ndyi̱niꞌánjnú xikónií ni xi katsꞌén na̱ꞌmijnú.
Sꞌe̱ bi̱ katsó kui jaá:
–Ta̱nga ji̱n jmí tsi ndí masienjne̱, tikónjne̱ ngo na̱ꞌmi, kó Néná boá.
Sꞌe̱ Kjisoo̱, bi̱ katsó:
–Tsi ja̱koxi̱ nga Néná xí na̱ꞌmijnú, tjóra̱ si̱ꞌánjnúꞌun, ngatꞌa̱ Néná boá xi na̱ꞌmina, kó jéꞌe̱ an kꞌi̱e̱e̱, ngatꞌa̱ jéꞌe̱so̱bo̱a̱jín an, na̱ꞌmina boá xi katsangiyana. Míkjo̱a̱a̱ nga makjínjínjnú ni xi tsꞌénchji̱a̱ an. Ngatꞌa̱ májín ndaꞌyájnú énna. Na̱ꞌmijnú xindajín ndiabloo̱ boá, kó ni xi mejeén xindajín kuí ni xi mejénjnú si̱ꞌánjnú. Ngaskande koó nga ítjatsꞌennii̱ nga̱sondiee̱ nga xindajín ini̱ma̱ tsꞌenkꞌién, ko̱jo ndiso, ngatꞌa̱ jmí ja̱koxi̱jiín. Kjiꞌanga chji̱a̱ éndísó, nii̱rí xí chji̱a̱, ngatꞌa̱ ndiso kuí, kó kuí boá xi na̱ꞌmii̱ kjo̱a̱ndisoo̱. Kó án, ngatꞌa̱ ja̱koxi̱ boá ni xi chjiá an, sꞌijinjín májnú án. ꞌYá jún xi ka̱maa̱ ko̱kó nga ngo jé tjítsꞌen an. Kó tsi ja̱koxi̱ ni xi tꞌíxián an, míkjo̱a̱a̱ nga sꞌijinjínjnú. Xota̱ xi Néná chji̱a̱ni, ntꞌieé ngayeje eén Néná, ta̱nga jún ndaꞌyájínjnúu̱ ni xi tsó Néná, ngatꞌa̱ Nénájín ndokjo̱a̱nijnú.

Sꞌe̱ bi̱ katsó já jundíoo̱:
–A mí tsi jè bo̱a̱ kiꞌmíjne̱ ji̱n nga nangi Samaria̱ ndókjo̱e̱ ji, kó nga ngo xindajín tjíjii̱n yojòo̱.
Sꞌe̱ bi̱ katsó Kjisoo̱:
–Nde ngo xindajín tjíjinjínna. Na̱ꞌmina xí bendikón an, ta̱nga jún yandikónjínjnúꞌun. Ta̱nga jmí tsi kjo̱a̱je tsa̱ꞌa̱n xi mongase an. Tikón ki ngo xi mongase kui nii̱, kó kuí boá xi ka̱tso̱yà tsi nda ko̱jo tsi ndajín ndyi̱tsꞌèn xotaa̱. Ja̱koxi̱, ja̱koxi̱ ni xi xiánjnúꞌun, nga xi sa̱ꞌínkjatjosón énna, jmíni̱xtjin sku̱i̱e̱ kjo̱a̱bo̱yaa̱.
Sꞌe̱ bi̱ katsó já jundíoo̱:
–Ngotꞌe̱ ꞌne̱ nga je yàjne̱ nga xindajín tjíjii̱n yojòo̱, ngatꞌa̱ Abraa̱n ko̱jo já chji̱ni̱e̱ꞌe̱én Néná jesón, kó jí bi̱ se ji: “Xi sa̱ꞌínkjatjosón énna, jmíni̱xtjin sku̱i̱e̱ kjo̱a̱bo̱yaa̱.” A nkꞌa ngase xáa̱ ta̱bo̱a̱jiín xota̱ tji̱e̱ xcháná Abraa̱n, xi je kꞌiee̱n. Kó já chji̱ni̱e̱ꞌe̱én Néná je jesón. Kó ꞌyá ta̱ jii bo̱a̱.
Sꞌe̱ Kjisoo̱, bi̱ katsó:
–Tsi ti̱ an tsjàa̱ kjo̱a̱je yojona, jmí ni chjíjiín ni xi tsꞌen an, ta̱nga Na̱ꞌmina boá xi tsjána kjo̱a̱je, kó kuí boá kui xi jún Nejne̱ ndyi̱ꞌmìjnúu̱, kó nga ja̱koxi̱ yàjínjnú kuí, ta̱nga an be án kuí. Kó tsi bejín an kui xian án, tsꞌénꞌbindiso án xikoó jún, ta̱nga be án kuí, kó tsꞌenkjatjosón án eén. Abraa̱n, xota̱ tji̱e̱ xchájnú achichí tsjá kamaá nga katsꞌénkjó nga sku̱i̱e̱ ni̱xtjin nga kjoéꞌe̱ an kui nga̱sondiee̱, kamábe, kó tsja kamaá.
Kósꞌe̱ bi̱ katsó já jundíoo̱:
–Ta̱nga nde kji̱e̱ májín ichítié nóo̱, kó kótsꞌèn nga je kamáyè ji Abraa̱n se.
Sꞌe̱ bi̱ ka̱tso̱ Kjisoo̱:
–Ja̱koxi̱, ja̱koxi̱ ni xi xiánjnúꞌun, ngindiee̱ nga stse̱n Abraa̱n, ja̱bo̱a̱ jè tikòn an.
Sꞌe̱ kui jaá iskjíbé ndi̱jo̱ tsi̱ꞌe̱ nga kꞌo̱ya Kjisoo̱, ta̱nga Kjisoo̱ kisꞌijña ꞌma, kó jataxie ndi̱tsen na̱ngo̱xi̱i̱, jaꞌajii̱n kui jaá, sꞌe̱ kijí.

Escolta Juaa̱ 8