These Scriptures are a new translation into the Naskapi language spoken at Kawawachikamach, Quebec. We the Naskapi people have been eager to have our own translation of the Bible. For many decades we have had to make do with Scriptures that were translated for indigenous languages that are different from our own: most notably Bishop Horden's Moose Cree New Testament and prayer book, and Rev. W. G. Walton's prayer book. The Naskapi Development Corporation has been engaged with this work since the 1990s, facilitated by Wycliffe Bible Translators and the Canadian Bible Society. The Naskapi community grateful acknowledges the help of all who participated with us in producing these Scriptures. Our prayer is that these Words of God will be cherished by our people for generations to come.

ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ The Naskapi text is copyright © Naskapi Development Corporation Naskapi Development Corporation Kawawachikamach, Québec G0G 2Z0 Canada New Testament published by the Canadian Bible Society (CBS) © 2007 Canadian Bible Society 10 Carnforth Road, Toronto Ontario M4A 2S4 Canada

ᒋᓴᒪᓂᑐᐤ ᐅᑦ ᐃᔨᒧᐅᓐ - ᒋᒋᒥᓯᓇᐃᑭᓐ God's Word in Naskapi

ᒋᓴᔅ ᒋ ᐎᑎᒧᐛᐤ ᐅᒋᔅᒋᓄᐊᒧᐛᑭᓇ ᐅᔭ ᒋᔅᑯᑎᒪᒐᐤ ᑎᐸᒋᒧᐅᓂᔪᐤ ᒐᒋ ᐅᒋ ᒋᔅᒐᔨᑎᒥᔨᒋ ᒧᔅ ᒐᒋ ᐊᔭᒥᐊᔨᒋ, ᑭᔭ ᒐ ᐊᑲ ᒋ ᑕᔅᑎᑲᒋᔨᒋ᙮ ᒋ ᐃᑕᐤ, “ᒋ ᑕᐤ ᑎᐸᔅᑯᓂᒐᓱᐤ ᐅᑕᓇᒡ ᐊᑲ ᐅᒋ ᓇᓂᒋᔅᑐᐛᑦ ᒋᓴᒪᓂᑐᐛ ᑭᔭ ᐊᑲ ᐅᒋ ᐊᐱᑕᔨᒪᑦ ᐃᔪᐛ᙮ ᐊᓐᑕ ᒪᒃ ᐊᓐ ᐅᑕᓇᐤ ᒋ ᑕᐤ ᐊ ᐸᐃᑯᓯᑦ ᐃᔎᐤ᙮ ᒧᔅ ᒪᒃ ᒋ ᓂᑐᐛᐱᒪᐤ ᐊᓂᔭ ᑎᐸᔅᑯᓂᒐᓱᐛ ᐊ ᐃᑕᑦ, ‘ᒋ ᓂᑐᑎᒪᑎᓐ ᒐᒋ ᐎᒋᐃᔨᓐ ᑯᐃᔅᒄ ᒐᒋ ᐃᓯ ᑎᐸᔅᑯᓇᑭᓄᐅᑦ ᐊᓐ ᑲ ᐸᒋ ᐅᓂᑐᑕᐅᑦ᙮’ ”
“ᓇᐅᔅ ᒪᒃ ᐊᓐ ᑎᐸᔅᑯᓂᒐᓱᐤ ᓇᒪ ᐅᒋ ᐎ ᐎᒐᐊᐤ ᐊᓂᔭ ᐃᔎᐛ᙮ ᐊᑯ ᒐᒃ ᑲ ᐃᓯ ᒪᒥᑐᓇᔨᑕᐧᒃ, ‘ᓇᒪ ᓇᓂᒋᔅᑐᐛᐤ ᒋᓴᒪᓂᑐᐤ ᑭᔭ ᓇᒪ ᓂᑦ ᐊᐱᑕᔨᒪᐅᒡ ᐃᔪᒡ᙮ ᐅ ᒪᒃ ᑲ ᐸᐃᑯᓯᑦ ᐃᔎᐤ ᓴᔅ ᓂ ᐱᔅᑲᒋᐃᒄ ᑲ ᐃᔅᐱᔅ ᒧᔅ ᐸᒋ ᒥᑯᔅᑲᒋᐃᑦ, ᐊ ᓂᑐᐛᔨᑕᐧᒃ ᒐᒋ ᐎᒋᐃᒃ᙮ ᐎᐱᒡ ᑭᑈ ᒂᔄᓐ ᓂᑭ ᐎᒋᐊᐤ, ᐊᑲ ᐊᑐᐎᔅ ᒐᒋ ᐱᔅᑲᒋᐃᑦ᙮’ ”
ᐊᑯ ᐅᑎᐸᔨᒋᒐᐤ ᐅᔭᔪᐤ ᒥᓐ ᒂ ᐃᔅᒋᔄᑦ, “ᑭᓄᐛᐸᑎᒥᒄ ᒪ᙮ ᒐᒃ ᒋ ᐎᒋᐊᐤ ᐊᓐ ᒥᒋ ᑎᐸᔅᑯᓂᒐᓱᐤ ᐊᓂᔭ ᑲ ᐸᐃᑯᓯᔨᒋ ᐃᔎᐛ, ᐛᔅ ᓇᒪ ᐅᒋ ᐳᓂᐃᑯᐤ ᐊ ᓂᑐᑎᒪᑯᑦ ᒐᒋ ᐎᒋᐊᑦ᙮ ᓇᒪᐎᔾ ᐊ ᒪᒃ ᐊᑐᐎᔅ ᒋᓴᒪᓂᑐᐤ ᐎᐱᒡ ᒋᑭ ᐎᒋᐊᐤ ᐊᓂᔭ ᐅᑦ ᐃᔨᒪ ᒧᓯᓇᐤ ᑲ ᐊᔭᒥᐊᔨᒋ ᐊ ᒋᓯᑲᔨᒡ ᑭᔭ ᐊ ᑎᐱᔅᑲᔨᒡ ᐊ ᓂᑐᑎᒪᑯᑦ ᒐᒋ ᒋᔅᐸᐛᑕᑦ ? ᑕᐸ ᒋᑭ ᐅᒋ ᑕᔅᑎᑲᒋᐤ ᒐᒋ ᒋᔅᐸᐛᑕᑦ᙮ ᒋ ᐎᑎᒪᑎᓇᐛᐤ, ᒐᔅᑎᓇᑕᔨᑕᑯᓂᔪᐤ ᐎᐱᒡ ᒐ ᒋᔅᐸᐛᑕᑦ᙮ ᐊᑯ ᒪᒃ, ᐃᔪᐤ ᐅᑯᓯᓴᓐ ᒋᑭ ᒥᔅᑯᐛᐤ ᑲᑭᔭ ᐊᐛᔪᐛ ᐊ ᑕᑈᔭᔨᒥᑯᑦ ᐃᔅᐱ ᒥᓐ ᑎᑯᓯᓂᒐ ᐅᑕ ᐊᔅᒋᒡ ?”


ᒋᓴᔅ ᒥᓐ ᒂ ᐃᓯ ᐎᑎᒧᐛᑦ ᐅᔭ ᒋᔅᑯᑎᒪᒐᐤ ᑎᐸᒋᒧᐅᓂᔪᐤ ᐊᓂᔭᔪᐛ ᑲ ᒪᒥᓯᑐᑕᓱᔨᒋ ᓂᑯᐃᔅᑯᑕᑎᓯᓇᓐ ᐊ ᐃᑕᔨᒥᓱᔨᒋ ᒥᒄ ᒪᒃ ᑲ ᒥᒐᔨᒪᔨᒋ ᑯᑎᑲ ᐊᐛᔪᐛ᙮ ᐊᔪᐅᒄ ᐅᔭ ᒋᓴᔅ ᑲ ᐃᑕᑦ, “ᐸᐃᒂᐤ ᓂᓱ ᓇᐸᐅᒡ ᒋ ᐱᒐᐅᒡ ᒋᓴᐊᔭᒥᐊᐅᒋᐛᐱᒡ ᒐᒋ ᐊᔭᒥᐊᒡ᙮ ᐸᕆᓯ ᐊᓐ ᐸᐃᒄ᙮ ᐊᑯ ᐊᓐ ᑯᑎᒃ ᑲ ᒪᒧᓴᒋᓇᐧᒃ ᒋᓴᐅᒋᒪᐤ ᓱᓇᔭᔪᐤ ᒋ ᐃᑕᐱᑎᓯᐤ᙮ ᐅᒡ ᐅᔭ ᑲ ᐃᑕᐱᑎᓯᒡ ᐊᐅᑯᓐᒡ ᒪᐅᒡ ᑲ ᒥᒐᑎᓯᒡ ᒋ ᐃᑕᔨᒥᑯᐅᒡ ᐊᐛᔪᐛ᙮ ᐊᑯ ᐊᓐ ᐸᕆᓯ ᒋ ᐸᐃᑯᑲᐳᐤ ᐊ ᐃᓯ ᐊᔭᒥᐊᑦ, ‘ᒋᓴᒪᓂᑐᐤ, ᒋ ᓂᓇᔅᑯᒥᑎᓐ ᐊᑲ ᐃᓯᓇᑯᓯᔭᓐ ᑯᑎᑭᒡ ᐊ ᐃᓯᓇᑯᓯᒡ ᐊᐛᓐᒋ ᑭᔭ ᐊᑲ ᒥᔅᑎᒪᐅᒋᑎᒪᓱᔭᓐ ᓱᓇᔭᐤ ᑭᔭ ᐊᑲ ᓂᑎᒥᒄ ᐃᑐᑐᐅᒂᐤ ᐊᐛᓐᒋ ᑭᔭ ᐊᑲ ᐱᓯᒂᑎᓯᔭᓐ᙮ ᒋ ᓂᓇᔅᑯᒥᑎᓐ ᐊᑲ ᐃᓯᓇᑯᓯᔭᓐ ᑕᓐ ᐊ ᐃᓯᓇᑯᓯᑦ ᐊᓇ ᑲ ᒪᒧᓴᒋᓇᐧᒃ ᒋᓴᐅᒋᒪᐤ ᓱᓇᔭᔪᐤ ᑲ ᐃᑕᐱᑎᓯᑦ᙮ ᓂᔾ ᒪᒃ ᐊᓯᑯᒻ ᒥᓇᔅᑕᑭᓇ, ᓂᓱ ᒋᓯᑲᐛ ᓇᒪ ᓂ ᒥᒋᓱᓐ ᑭᔭ ᓂ ᐱᔅᑎᓂᒐᓐ ᐸᐃᒂᐱᔅᒡ ᐊᓯᑯᒻ ᐸᐃᑯᔪᐛᐱᔅᒡ ᐊ ᐊᔭᔭᓐ᙮’ ᐊᔪᐅᒄ ᐅᔭ ᑲ ᐃᓯ ᐊᔭᒥᐊᑦ ᐎᔾ ᐊᓐ ᐸᕆᓯ᙮”
“ᐊᑯ ᒪᒃ ᐊᓐ ᓇᐸᐤ ᑲ ᒪᒧᓴᒋᓇᐧᒃ ᒋᓴᐅᒋᒪᐤ ᓱᓇᔭᔪᐤ ᑲ ᐃᑕᐱᑎᓯᑦ, ᐃᔅᐱ ᐊ ᐊᔭᒥᐊᑦ ᐛᔪᐎᔅ ᐊᓐᑕ ᒋ ᐅᒋᑲᐳᐤ ᐊᓐᑕ ᑲ ᓂᐳᔨᒋ ᐊᓂᔭ ᐸᕆᓯᐊ ᓇᒪ ᑭᔭ ᐛᐛᒡ ᐅᒋ ᑎᔅᑎᓴᐳᐤ ᒋᒋᒋᓯᑯᒡ ᐛᔅ ᒋ ᑯᓯᑯᑕᐊᐤ᙮ ᒋ ᐃᔅᒋᔄᐤ, ‘ᒋᓴᒪᓂᑐᐤ ᐸᒋ ᒋᔅᑎᒪᒐᔨᒥ ᐊ ᒥᒋᑐᑎᒪᓐ᙮’ ” ᐊᑯ ᒋᓴᔅ ᒥᓐ ᒂ ᐊᑎ ᐃᔅᒋᔄᑦ ᐃᔅᐱ ᑲᒋ ᐃᓯ ᑎᐸᒋᒧᑦ᙮
“ᒋ ᐎᑎᒪᑎᓇᐛᐤ ᒪᒃ, ᐅ ᓇᐸᐤ ᒋ ᒋᐛᐤ ᑕᑈ ᐊ ᑯᐃᔅᑯᓇᑯᓯᑦ ᒋᓴᒪᓂᑐᐛ ᐊ ᑭᓄᐛᐱᒥᑯᑦ᙮ ᓇᒪᐎᔾ ᐊᓐ ᐸᕆᓯ᙮ ᐊᓐ ᐊᐛᓐ ᒥᔅᑎ ᑲ ᐃᑕᔨᒥᓱᑦ ᒋᑭ ᑎᐱᑕᔨᑕᑯᐃᑯᐤ ᒋᓴᒪᓂᑐᐛ ᐊᑯ ᐊᓐ ᑲ ᑎᐱᑕᔨᒥᑎᓱᑦ ᐊᐛᓐ ᐊᐅᒄ ᒐ ᒋᔅᑕᔨᑕᑯᐊᑭᓄᐅᑦ᙮”


ᒋ ᐸᑐᑐᐛᐅᒡ ᒪᒃ ᐊᐛᓐᒋ ᒋᓴᓴ ᑲ ᐊᐱᓯᓯᔨᒋ ᐅᑦ ᐊᐛᓯᒧᐛᐛ, ᐊᒋ ᓂᑐᐛᔨᒪᔨᒡ ᒐᒋ ᑕᒋᓇᔨᒋ᙮ ᐊᑯ ᐊᓐᒡ ᒋᔅᒋᓄᐊᒧᐛᑭᓐᒡ ᐃᔅᐱ ᐎᔭᐱᒪᒡ ᐅᔭ ᐊ ᐃᑎᔨᒋ ᒋ ᒋᑕᐊᒧᐛᐅᒡ᙮ ᒋᓴᔅ ᒋ ᐎᓴᒪᐤ ᐊᐛᓴ ᐊ ᐃᔅᒋᔄᑦ, “ᐱᔅᑎᓇᐧᑯᒡ ᐊᐛᓯᒡ ᒐᒋ ᐸᒋ ᓇᓯᒡ, ᐊᑲᐎᔾ ᐅᒋ ᒋᑕᐊᒧᐛᐧᑯᒡ, ᐛᔅ ᐅᔭ ᑲ ᐃᑕᔨᑕᑯᓯᒡ ᐊᐛᓐᒋ ᒋᓴᒪᓂᑐᐛ ᐅᒋᓴᐅᒋᒪᐅᓂᒡ ᐃᓯ ᑎᐸᔨᑕᑯᓱᐅᒡ᙮ ᑕᑈ ᒋ ᐎᑎᒪᑎᓇᐛᐤ, ᒧᔭᒻ ᐊ ᐃᓯ ᑕᑈᑕᐧᒃ ᐊᐛᔅ ᑕᓐ ᐊ ᐃᓯ ᐎᑎᒧᐛᑭᓄᐅᑦ ᐊᐅᑯᓐ ᑭᔭ ᒋᔨᐛᐤ ᒋᐸ ᐃᓯ ᑕᑈᑕᓇᐛᐤ ᑕᓐ ᐊ ᐃᓯ ᐎᑎᒪᑯᔭᒄ ᒋᓴᒪᓂᑐᐤ ᐅᒋᓴᐅᒋᒪᐅᓐ ᑭᔭ ᒐᒋ ᐱᒐᔭᒄ ᐊᓐᑕ᙮”


ᐊᑯ ᐸᐃᒂᐤ ᒍᐤ ᐃᔪᒡ ᐅᒋᒪᒧᐛᐛ ᒋ ᐃᓯ ᑯᒂᒋᒪᐤ ᐊᓂᔭ ᒋᓴᓴ, “ᒋᔅᑯᑎᒪᒐᓱᐤ, ᑲ ᒥᔪᑥᔨᓐ ᑕᓐ ᒐ ᐃᑎᔭᓐ ᒐᒋ ᐅᒋ ᐊᔭᔭᓐ ᑲᒋᒡ ᐱᒪᑎᓯᐅᓐ ?”
ᒋᓴᔅ ᒪᒃ ᒋ ᐃᑕᐤ, “ᒐᒂᓐ ᐛᒋ ᐃᓯᓂᐧᑲᓯᔨᓐ ᑲ ᒥᔪᑥᑦ ? ᓇᒪ ᐊᐛᓐ ᑕᐤ ᓇᔅᒡ ᒐᒋ ᒥᔪᑥᑦ, ᒥᒄ ᒋᓴᒪᓂᑐᐤ᙮ ᒋ ᒋᔅᒐᔨᑕᓐ ᐅᔭ ᐎᓱᐛᐅᓇ,
‘ᐊᑲᐎᔾ ᓂᐸᐃ ᐊᐛᓐ, ᐊᑲᐎᔾ ᐱᓯᒂᑎᓯ, ᐊᑲᐎᔾ ᒋᒧᑎ, ᐊᑲᐎᔾ ᒋᑭ ᓂᑎᔭᒋᒪᐤ ᐊᐛᓐ, ᒋᔅᑕᔨᒻ ᒍᑕᐎᔾ ᑭᔭ ᒋᑲᐎᔾ᙮’ ”
ᐊᑯ ᐊᓐ ᓇᐸᐤ ᒂ ᐃᔅᒋᔄᑦ, “ᑲ ᐸᒋ ᐊᐛᓯᐅᔭᓐ ᓴᔅ ᓂᒋ ᓂᓇᐃᑕᓐ ᐅᔭ ᐎᓱᐛᐅᓇ᙮”
ᐃᔅᐱ ᒪᒃ ᒋᓴᔅ ᐱᔭᑐᐛᑦ ᐅᔭ ᐊ ᐃᔅᒋᔄᔨᒋ ᒋ ᐃᑕᐤ, “ᐊᔅᒄ ᒪᒃ ᐸᐃᒄ ᒐᒂᓐ ᒥᓐ ᓂᑐᐛᔨᑕᑯᓐ ᒐᒋ ᐃᑐᑎᒥᓐ᙮ ᐊᑕᐛ ᒥᓯᐛ ᑕᓐ ᐊ ᐃᓯ ᐊᔭᔨᓐ, ᐊᑯ ᐊᓐ ᓱᓇᔭᐤ ᑲ ᒋᔅᑎᒪᑎᓯᒡ ᒐ ᒥᔨᑥᐤ᙮ ᐊᑯ ᒪᒃ ᒐ ᐊᔭᔨᓐ ᐛᔪᑎᓯᐅᓐ ᒋᒋᒋᓯᑯᒡ ᐊ ᑎᒂᒡ᙮ ᒋ ᐃᑐᑎᒥᓇ ᒪᒃ ᐅ ᐊᑯ ᒐ ᐸᒋ ᓇᓴᐎᔨᓐ᙮”
ᐃᔅᐱ ᒪᒃ ᐱᔭᑕᐧᒃ ᐊᓐ ᓇᐸᐤ ᐅᔭᔪᐤ, ᓇᔅᒡ ᑕᑈ ᒋ ᒥᒐᔨᑎᒻ ᐛᔅ ᓇᔅᒡ ᑕᑈ ᒋ ᐛᔪᑎᓯᐤ᙮
ᐃᔅᐱ ᒪᒃ ᒋᓴᔅ ᐎᔭᐸᑎᒧᐛᑦ ᑕᓐ ᐊᔅᐱᔅ ᒥᒐᔨᑎᒧᓇᑯᓯᔨᒋ ᒋ ᐃᑕᐤ, “ᐊᔪᐛᒡ ᐊᔨᒥᓐ ᐊᐛᓐ ᐊ ᐛᔪᑎᓯᑦ ᒐᒋ ᐱᒐᑦ ᒋᓴᒪᓂᑐᐛ ᐅᒋᓴᐅᒋᒪᐅᓂᒡ᙮ ᐊᑐᐎᔅ ᐊᔨᒥᓂᔪᐤ ᐊᐛᓐ ᑲ ᐛᔪᑎᓯᑦ ᒐᒋ ᐱᒐᑦ ᒋᓴᒪᓂᑐᐛ ᐅᒋᓴᐅᒋᒪᐅᓂᒡ ᐃᔅᐱᔅ ᐊᓐ ᐊᐛᓯᔅ ᑲ ᒥᔅᑎ ᐱᔎᐅᑯᓇᑦ ᒐᒋ ᓴᐳᔅᑲᐧᒃ ᐅᔅᑲᒋᐧᑯᔪᐤ ᐊᓐᑕ ᐸᑯᓇᔭᐱᔅᑲᔨᒡ᙮”
ᐊᓐᒡ ᒪᒃ ᐃᔪᒡ ᑲ ᐸᑐᐛᒡ ᒋᓴᓴ, ᒋ ᑯᒂᒋᒪᐅᒡ, “ᐊᐛᓐ ᒪᒃ ᐊᑯ ᒐᒋ ᐱᒪᒋᐅᑦ ?”
ᒋᓴᔅ ᒪᒃ ᒋ ᐃᑕᐤ, “ᑕᓐ ᐊᓂᔭᔪᐛ ᐊᑲ ᑲᒋ ᐃᑐᑕᐧᒃ ᐃᔪᐤ ᒋᑭ ᒋ ᐃᑐᑎᒻ ᐎᔾ ᒋᓴᒪᓂᑐᐤ᙮”
ᐊᑯ ᐱᑕᕐ ᒂ ᐃᔅᒋᔄᑦ, “ᑭᓄᐛᐸᑕ ᒪ᙮ ᓴᔅ ᒥᓯᐛ ᓂᒋ ᓂᑭᑕᓇᓐ ᓂᒋᓇᓇ ᒐᒋ ᓇᓴᐅᑕᒡ᙮”
“ᓂᐦᐃ, ᑕᑈ,” ᒋ ᐃᑕᐤ ᒋᓴᔅ, “ᒥᓯᐛ ᐊᐛᓐ ᑲ ᓂᑭᑕᐧᒃ ᐎᒡ ᑭᔭ ᑲ ᓂᑭᑕᑦ ᐎᐛ ᑭᔭ ᐎᐧᑲᓂᓴ ᑭᔭ ᐅᓂᒋᐃᒂ ᑭᔭ ᐅᑦ ᐊᐛᓯᒪ, ᒋᓴᒪᓂᑐᐛ ᐅᒋᓴᐅᒋᒪᐅᓂᔪᐤ ᐅᒋ ᒋᑭ ᒐᔅᑎᓇᑕᔨᑕᓇᐛᐤ, ᐊᑐᐎᔅ ᒐ ᒥᔭᑭᓄᐅᑦ ᐃᔅᐱᔅ ᐊᓂᔭ ᑲ ᐃᓯ ᓂᑭᑕᐧᒃ ᐊᓄᒡ ᒪᒂᒡ ᐊ ᐱᒪᑎᓯᑦ, ᑭᔭ ᑲᒋᒡ ᐱᒪᑎᓯᐅᓂᔪᐤ ᒐ ᐊᔭᑦ ᐊᓐᑕ ᐊᔅᒄ ᓂᑲᓄᒡ᙮”


ᐊᑯ ᒋᓴᔅ ᒂ ᔅᑐᑕᐊᑦ ᐊᓂᔭ ᑲ ᓂᓱᓴᐳᔨᒋ ᐅᒋᔅᒋᓄᐊᒧᐛᑭᓇ ᐊᓐᑕ ᑎᐸᓐ ᒐᒋ ᐃᑕᒡ, ᐊᑯ ᒂ ᐃᑕᑦ, “ᒋᕈᓯᓕᒥᒡ ᒋᑭ ᐃᑐᑕᓇᓄᐤ᙮ ᐊᑯᑕ ᐊᓐᑕ ᒥᓯᐛ ᒐ ᑎᐱᐱᔨᒡ ᐊᓂᔭ ᑲ ᐃᑕᔨᒪᑭᓄᐅᑦ ᒐ ᐃᔅᐱᔨᑦ ᐃᔪᐤ ᐅᑯᓯᓴᓐ ᐊᓂᔭ ᑕᓐ ᑲ ᐃᓯ ᒥᓯᓇᐊᒧᐛᒂ ᐊᓂᔭᐧᑲ ᐅᒋᔅᒋᐛᐃᒐᓱᒡ᙮ ᒋᑭ ᐱᔅᑎᓂᒧᐛᑭᓄᐎᒡ ᐊᓐᒡ ᐃᔪᒡ ᐊᑲ ᒍᐤ ᐃᑎᔅᑲᓇᓯᒡ, ᒐᒋ ᒪᔭᔨᒪᒡ ᑭᔭ ᒐᒋ ᔭᐃᑲᐊᒡ ᓂᑎᒥᒄ ᐊ ᐃᔅᒋᔄᑕᒡ ᑭᔭ ᒐᒋ ᓯᔅᑎᒂᑕᒡ᙮ ᑭᔭ ᒐᒋ ᐱᓯᔅᑕᐛᒡ, ᑭᔭ ᒐ ᓂᐸᐊᒡ᙮ ᒥᒄ ᒪᒃ ᒋ ᓂᔅᑐᒋᓯᑲᔨᒐ ᒥᓐ ᑲᐤ ᒋᑭ ᐅᓂᐤ᙮”
ᒋᔅᒋᓄᐊᒧᐛᑭᓐᒡ ᒪᒃ ᓇᒪ ᐛᒡ ᐸᐃᒄ ᐅᒋ ᓂᔅᑐᑎᒧᒡ ᐊᓂᔭ ᑕᓐ ᑲ ᐃᓯ ᐊᔨᒧᑎᒥᔨᒋ᙮


ᐃᔅᐱ ᒪᒃ ᐊ ᐊᑎ ᐸᓱᐛᐸᑕᒡ ᐊᓂᔭ ᐅᑕᓇᔪᐤ ᒐᕆᑯᐤ ᑲ ᐃᓯᓂᐧᑲᑕᔨᒡ ᓇᐸᐤ ᐊᑲ ᐛᐸᑕᐧᒃ ᐊᓐᑕ ᐅᐱᒪᔅᑭᓄᐤ ᒋ ᐊᐳᐤ ᐊ ᓂᑐᑎᒪᑦ ᓱᓇᔭᔪᐤ᙮ ᐃᔅᐱ ᒪᒃ ᐱᔭᑐᐛᑦ ᒥᒐᑦ ᐊᐛᔪᐛ ᐊ ᐛᐎᒪᔅᑲᑯᑦ ᒋ ᑯᒂᒋᒪᐤ ᑕᓐ ᐊ ᐃᑎᓇᓄᐎᒡ᙮ “ᒋᓴᔅ, ᓇᓴᕆᑎᒡ ᑲ ᐅᒋᑦ ᒪᒂᒡ ᐱᒧᑕᐤ,” ᒋ ᐃᑕᑭᓄᐤ᙮
ᐊᑯ ᑲ ᑕᑈᑦ ᐊ ᐃᔅᒋᔄᑦ, “ᒋᓴᔅ, ᑎᐱᑦ ᑲ ᐅᑯᓯᑐᑕᔅᒃ, ᐸᒋ ᒋᔅᑎᒪᒐᔨᒥ᙮”
ᐊᓐᒡ ᒪᒃ ᐃᔪᒡ ᑲ ᓂᑲᓄᑕᒡ ᒋ ᒋᑕᐊᒧᐛᐅᒡ ᐊ ᐃᑕᒡ, “ᐊᑲ ᒪ ᒋᔅᑐ᙮” ᓇᔅᒡ ᒪᒃ ᐊᑐᐎᔅ ᓱᒃ ᒋ ᑕᑈᐤ ᐊ ᐃᔅᒋᔄᑦ, “ᑎᐱᑦ ᐛᑯᓯᓯᒥᑐᑕᔅᒃ, ᐸᒋ ᒋᔅᑎᒪᒐᔨᒥ᙮”
ᒋᓴᔅ ᒋ ᒋᐱᒋᑲᐳᐤ ᒂ ᐃᑎᓱᐛᑦ ᒐᒋ ᐸᑐᑐᐛᑭᓄᐅᑦ ᐊᓂᔭ ᐊᑲ ᐛᐸᑎᒥᔨᒋ ᓇᐸᐛ᙮ ᐃᔅᐱ ᒪᒃ ᐊᓐ ᓇᐸᐤ ᐊᑲ ᐛᐸᑕᐧᒃ ᐊ ᐊᑎ ᐸᓱᐛᐱᒪᑦ ᒋᓴᓴ, ᒋ ᑯᒂᒋᒥᑯᐤ, “ᑕᓐ ᐊ ᐃᓯ ᓂᑐᐛᔨᑎᒥᓐ ᒐᒋ ᐃᑐᑎᒪᑕᓐ ?”
ᐊᓐ ᓇᐸᐤ ᒋ ᐃᑕᐤ, “ᐅᑎᐸᔨᒋᒐᐤ, ᐃᑐᑐᐎ ᒐᒋ ᐛᐸᑎᒪᓐ᙮”
ᒋᓴᔅ ᒪᒃ ᒋ ᐃᑕᐤ, “ᐛᐸᑕ, ᒋᑕᑈᑎᒧᐅᓐ ᒋ ᒥᓏᒋᐃᑯᓐ᙮” ᑎᐛᒡ ᒪᒃ ᓇᔅᒡ ᒋ ᐛᐸᑎᒻ, ᒂ ᐊᑎ ᓇᓴᐛᑦ ᒋᓴᔅ ᐊ ᒪᒥᒋᒪᑦ ᒋᓴᒪᓂᑐᐛ᙮ ᐃᔅᐱ ᒪᒃ ᒥᓯᐛ ᐊᐛᓐ ᐎᔭᐸᑕᐧᒃ ᐅᔭ ᐊ ᐃᔅᐱᔨᒡ, ᑭᔭ ᐎᔨᐛᐤ ᒋ ᒪᒥᒋᒪᐅᒡ ᒋᓴᒪᓂᑐᐛ᙮

Escolta ᓗᒃ 18