If you have would like a copy of this version please contact info@davaraudiobibles.org

Limbu Old Testament

अब्राम्‍मिल्‍ले़ कुमेत् साराइलाम् कुस्‍सा मे़म्‍बोङ्‌ङे वये़॥ कर हागार मिङ् के़वाःप्‍मा मिस्रि कुसे़वारोमा थिक् वये़॥ साराइल्‍ले़ अब्राम्‍मिन् मे़त्तु, “ओमे़त्ते़ॽओ, यहवे दाङ्‌बाल्‍ले़ आङ्‌गाॽ सामे़ङ्‌गप्नामा चोगाङ्‌ङाङ् वाॽ॥ खे़ल्‍ले़चोगुल्‍ले़ आसेवारोमे़न्‍नु खे़ने़ॽ इप्‍से़ॽ, हाग कात्‍तै खे़ल्‍लोलाम् आङ्‌गाॽ आलागि अङे़ःक्‌वा वाॽमा सुक्‍पि॥”
साराइल्‍ले़ कुबाःन्‍निन् अब्राम्‍मिल्‍ले़ खे़प्‍सु॥ अब्राम्‍मिन् कनान लाजेॽओ युङे़बा थिबोङ् तङ्‌बे के़रे़आङ् एगाङ् कुमेत् साराइल्‍ले़ कुये़म्‍बा अब्राम्‍मिन् मिस्रबा कुसेवारामा हागारे़न् कुमेत् पोङ्‌से़ पिरु॥ हे़क्‍क्‍याङ् अब्राम्‍मे़न् हागारे़न्‍नु इप्‍से़आङ् खे़न् मे़न्‍छुक्‍मा पोःक्‍खे़॥
आल्‍ल खे़ल्‍ले़ मे़न्‍छुक्‍मा पोःक्‍खे़बा निङ्‌वाॽ खोसु, खे़ब्‍याङ् खे़ल्‍ले़ कुन्‍दाङ्‌मे़न् कुनामे़न्‍छाॽ मे़प्‍मा हेःक्‍तु॥
साराइल्‍ले़ अब्राम्‍मिन् मे़त्तु, “आङ्‌गाॽ तुमुङ्‌बा कुनामे़न्‍छाॽ पाःन्‍निन् खे़ने़ॽ के़जोगुल्‍ले़ पोःक्‍खे़बारो॥ आङ्‌गाॽ आसे़वारोमान् खे़ने़ॽ के़भक्‍थुङ्‌ङो पिने़, हे़क्‍क्‍याङ् खे़ङ् मे़न्‍छुक्‍मा पोःक्‍खे़नु मेःन्‍ने आङ्‌गाॽ चिःप्‍मा हेःक्‍ताङ्॥ यहवे दाङ्‌बाल्‍ले़ खे़ने़ॽ नु आङ्‌गाॽ खासे़न् आजोःक्‍सि आबिसिर॥”
कर अब्राम्‍मिल्‍ले़ साराइन् मे़त्तु, “ओमे़त्ते़ॽ, खे़ने़ॽ के़से़वारोमान् खे़ने़ॽ के़हुक्‍कोए वाॽ॥ खे़ने़ॽ खे़न् थे मे़प्‍मा निङ्‌वाॽ के़जोगु हे़क्‍केए चोगे़ॽ॥” खे़ब्‍याङ् साराइल्‍ले़ खे़न् ताप्‍फे़ःल्‍लिक् मे़प्‍मा हेःक्‍तु, हे़क्‍क्‍याङ् खे़न् खुने़ॽओलाम् खे़त्‍छिङ्‌ङाङ् पे॥
यहवे दाङ्‌बाल्‍ले़ कुमाङ्‌लाइङ्‌बाल्‍ले़ मुरे़क् खारे़क् थेआङ् के़होप्‍पादे़न्‍नो सुर ले़प्‍माङ् के़बेःक्‍पा लाम्‍मोबा वबुन्‍दाक्‍किल्‍ले़ कुबेसाङ् खे़न् तुमु॥ हे़क्‍क्‍याङ् खे़ल्‍ले़ सेःन्‍दोसु, “साराइल्‍ले़ कुसे़वारोमा हागारे, आत्तान्‍लाम् के़द्‌ये़ हे़क्‍क्‍याङ् आत्तान् के़बेःक्‍पाबे?”
खे़ल्‍ले़ मे़त्तु, “आन्‍दाङ्‌मा साराइलाम् खे़त्‍छिङ्‌ङार पत्ताबारो॥”
यहवे दाङ्‌बाल्‍ले़ कुमाङ्‌लाइङ्‌बाल्‍ले़ खे़न् मे़त्तु, “के़न्‍दाङ्‌माल्‍लो नुःक्‍खे़आङ् पेगे़ॽ, हे़क्‍क्‍याङ् खुने़ॽ कुयुक्‍कोए वये़ॽ॥” यहवे दाङ्‌बाल्‍ले़ कुमाङ्‌लाइङ्‌बाल्‍ले़ खे़न् याम्‍मो मे़त्तु, “आङ्‌गाॽ खे़ने़ॽ के़मुइदाङ्‌साहाॽ निःप्‍माए सुक्‍मे़न्‍दे़त्ते थारिक् यरिक् फोसुङ्‌सिङ्॥” यहवे दाङ्‌बाल्‍ले़ कुमाङ्‌लाइङ्‌बाल्‍ले़ खे़न् मे़त्तु,
“खे़ने़ॽ मे़न्‍छुक्‍मा के़बोक्‍खे़आङ् के़वाॽरो,
हे़क्‍क्‍याङ् खे़ने़ॽ ये़म्‍बित्‍छा साधिक् के़गत्तुरो॥
खे़ने़ॽ खे़ल्‍ले़ कुमिङ् इस्‍माएल वाःत्ते़ॽओ,
थेआङ्‌भे़ल्‍ले़ यहवे दाङ्‌बे़ल्‍ले़ के़दुक्‍खेन् खे़प्‍सुआङ् वाॽरो॥
मे़न्‍छाम् याप्‍मिहाॽओ खे़न् ताम्‍भुङ् अदङ् हे़क्‍तङ्‌बा पोङ्‌लो,
खे़ल्‍ले़ कुहुक्‍किन् के़रे़क्‍ले़ खुन्‍छिॽ तक्‍ले़ङ्‌वाओ पोःक्‍लो
हे़क्‍क्‍याङ् के़रे़क्‍ले़ खुन्‍छिॽ हुक्‍किन् खुने़ॽ कुदक्‍ले़ङ्‌वाओ मे़भोःक्‍खुरो॥
खे़न् के़रे़क् कुगाॽइहाॽओ मे़न्‍दङ्‌मनाबा पोङ्‌ङाङ् वाॽगन्‍लो॥”
हागारे़ल्‍ले़ खुने़ॽनु ताॽके़जे़ङ्‌बा यहवे दाङ्‌बान् अक्‍तङ्‌बा मिङ् पिरु, “खे़ने़ॽए आङ्‌गाॽ याप्‍मि के़निबा निङ्‌वाॽफुमाङ्‌ने़रो॥” थेआङ्‌भे़ल्‍ले़ खे़ल्‍ले़ पाःत्तु, “आङ्‌गाॽ याप्‍मि ओगे़मे़प्‍पा निङ्‌वाॽफुमाङ्‌ङिन् से़क्‍खाए निसुङ्‌लो॥” खे़ल्‍ले़चोगुल्‍ले़ खे़न् वबाक्‍किल्‍ले़ कुमिङ् बेअर लहाइ रोइ मे़युक्‍खु॥ खे़न् आल्‍लोसाङ् केदेस नु बेरेदरे़ कुलुम्‍मो ने़रो॥
हे़क्‍क्‍याङ् हागारे़ल्‍ले़ अब्राम्‍मिन् ये़म्‍बित्‍छा साधिक् कत्तु पिरु॥ हे़क्‍क्‍याङ् खे़ल्‍ले़ कत्तुबा अङे़ःक्‌वान् अब्राम्‍मिल्‍ले़ इस्‍माएल मिङ् वाःत्तु॥ हागारे़ल्‍ले़ इस्‍माएले़न् कत्तुल्‍ले़ अब्राम्‍मिन् ये़प्‍पोङ्‌ङाङ् तुक्‍सि तङ्‌बे के़रे़आङ् वये़॥

Escolta तोलिङ्‌सोमु 16