Yemba - 2017 CABTAL (NT) Non Drama

Yemba - 2017 CABTAL (NT) Drama

Amɔ̄ʼ azō a le pú nzɛ́t té gɔ́ éwú, ŋiŋ yīi, mɛ́ tɔɔ́ŋ á yí lɛ Ashuŋne, á gɔ́ áa éwú.
Ŋiŋ mɛ́t yīi, a á Ashuŋne lā, pɔ́ Ndém mé nnɔ.
Ashuŋne mɛ́t á gɔ́ á Ndém.
Ŋiŋ mɛ́t yīi a á Ashuŋne lā, pɔ́ Ndém mé nnɔ, tɛ efhó á nzií etsō tsem.
Ndém a le lɔ̄k á yí, tɛ́ ŋghʉ̄ etsō tsem.
Ndém a lɛ te ghʉ̄ amɔ̄ʼ azō, té lɔk áa yí tɛ́ ŋghʉ̄ ɛ́.
Yí mé ghʉʉ̄, mɛ́ gɔ́ éwú.
Leghʉ, epuɔ menɔŋ é gɔ́ éwú, á gɔ́ ŋkaʼ á mbū pɔ́p.
Ŋkaʼ é le nɔ̄ŋ ŋkɛʼɛ epuɔ, á ntē nzém,
epuɔ menɔŋ á ntē nzém mɛ́t,
é té véŋ ŋ́gɛ, e ekɛ̄ʼɛ á wɔ́p ɔ́.
Ndém a le tó á taʼ ŋiŋ á ŋgɔŋ, lezēŋ tsí é gɔ́ lɛ Jáaŋ.
A le shʉʼē, ŋ́gɔ́ á njhʉɛ‑njʉ́ɔ, ŋ́gɔ̄ á eshúŋ ajū mīi, a á si nzhɛ́ɛ ánɛ ŋkaʼ mɛ́t, tɛ́ epuɔ metsem e ezápa ánɛ ashuŋne zí, éfɛ́ nnɛ̄t ŋgyá á mbū ŋkaʼ mɛ́t.
Jáaŋ mé lɛ te ŋkaʼ á, táʼ, a lɛɛ́ ŋgɔ̄ á eshúŋ ajū mīi, a á si nzhɛ́ɛ ánɛ ŋkaʼ.
Ŋiŋ yīi a á Ashuŋne lā, mé lɛ á kwaʼ ŋkaʼ. Éshʉ̄ʼ á ndo ŋgia, á ŋkɛʼɛ̄ ŋiŋ ntsem.
Ŋiŋ mɛ́t yīi a á Ashuŋne, a le shʉ̄ʼ á ŋgɔŋ.
Epuɔ menɔŋ é piŋ te yí véŋ,
mbɔ Ndém a le ké ndɔk á yí, tɛ́ ŋghʉ̄ ŋgɔŋ.
A le shʉ̄ʼ á alāʼ pɔ́p,
epuɔ alāʼ pɔ́p,
é piŋ te yí kókne.
Epuɔ pīi é le kokné á yí, épuɔ pīi é le fɛ́ nnɛ̄t ŋgyá mé yí, a le yá á wɔ́p mete á lelɔk ncʉ́ʼ epɔ̄ Ndém. Mɛ́ té ndʉ́ɛ́ á lecʉ̄ʼ epɔ̄ Ndém, ánɛ ntií zīi, epuɔ menɔŋ é lɔkɔ nzhíɛ ewɔŋkhʉ̄ lā á. Pɔ́ té cʉ́ʼ epɔ̄ Ndém ánɛ lekɔŋ ŋiŋnɔŋ ɔ́. Ŋiŋnɔŋ mé té kɔ̄ŋ ŋ́gɛ, pɔ́ ecʉ́ʼ epɔ̄ Ndém ɛ́. Ndém mé kɔɔ̄ŋ, ńdɔ̄k á wɔ́p ŋghʉ̄ epɔ̄ pí. Ashuŋne jɔ̄, a le sɛ̄t ncʉ́ʼ á kwaʼ ŋiŋnɔŋ,
tɛ nnáŋ á tsetsɛlɛ pek,
ŋ́gɔ́ á ŋgaŋ
apɔŋɔ́ ntē te ndhʉ,
ŋ́gɔ́ á ŋgaŋ anuúnē tɛ nzōko.
Pek jʉ́ɔ á shʉ́shɔ́k yi,
shʉ́shɔ́k wuɔ mɛ́t,
Mɔʼɔ́ yímpɛ Ndém mé le yá á mbū tséŋ Méŋ yi mɛ́t.
Jáaŋ a le shúŋ ajū mīi, a á si nzhɛ́ɛ ánɛ ŋiŋ mɛ́t, ésáʼ mé ŋghi teté ŋ́gɛ:
«Ŋiŋ wuɔ a á si ŋgɔ́ á ŋiŋ yīi, meŋ ke lé ánɛ yí ŋ́gɛ,
ŋiŋ a á nzem meŋ eshʉ̄ʼɛ, ńtsyā á gá, melaʼ mīi,
mɛ́ le gē ezhí á gá,
á gɔ́ áa éwú. »
Páʼ a á ŋgaŋ apɔŋɔ́ ntē te ndhʉ lā, a le kēm ephʉ yímpɛ metsem. Ŋ́kem ntswīʼne ŋkēm.
Ndém a le zapá ánɛ Mɔɔ́sɛ, tɛ́ ŋgyá mbé á mbū pímpɛ. Ḿbiŋ nzápa ánɛ Yɛɛ́so Klísto, tɛ́ ntswī á apɔŋɔ́ ntē te ndhʉ zí, ńzápa ánɛ yí, tɛ́ ŋghʉ̄ mɛ́ zhɛ́ anuúnē.
Ŋiŋ a la pú ntshí lezēk ánɛ Ndém ɛ́. Tséŋ Méŋ Ndém, ńzéŋ ŋgɔ́ azí á Ndém, pɔ́ Ndém Mɔʼɔ́, é ziŋ á taʼ akhu, yí mé le ghʉ̄ʉ̄, mɛ́ zhɛ́ páʼ Ndém a á épúp.


Á lɛ amɔ̄ʼ aleʼé, mekém epuɔ Yúda é lɛ fhó á Yelósalɛm, ńtó wɔ nɔŋ‑epɔʼ mbɔɔ emɔ̄ʼ epuɔ ánɛ nzwɛt Levi, ŋ́gɛ pɔ́ egʉɔ nzɛ́tte á Jáaŋ ŋ́gɛ, a á páʼā ŋgɔ́ á awɔ́ lɛ́. Anu zīi Jáaŋ a le léē, a ajʉɔ. A le tsɔ́ʼ á mbū pɔ́p ésia sia, té miʼte, ńdé ŋ́gɛ: «Meŋ mé té á Nzaʼ‑Ŋkhʉ á ntɔ̄ŋ apuʼ yīi, Ndém a le laʼnē ɛ́. » Pɔ́ zéŋ nzɛ́tte á yí ŋ́gɛ: «Tɛ o gɔ́ áa awɔ́? O ó Eli lɛ́?» Á pwɛt ŋ́gɛ: «Meŋ te á yí í. » Pɔ́ zéŋ nzɛ́tte á yí ŋ́gɛ: «O ó ntswi‑ŋke Ndém yīi, mɛ́ zwíʼtɛ lā lɛ́?» Á gɛ: «Ŋgáŋ. » Pɔ́ zéŋ nzɛ́tte á yí ŋ́gɛ: «Tɛ o gɔ́ áa awɔ́? Á mbɔŋ ŋ́gɛ, pek etsɔ́ʼ apiŋ á mbū epuɔ pīi, pɔ́ ntó á wék. Wu méŋwɛ̄t é si ndʉ́ɛ́ ŋ́gɛ, o ó awɔ́?» Jáaŋ á lɔk anu zīi Izayi ntswi‑ŋke Ndém a le léē, ḿbwɛ̄t ŋ́gɛ: «Meŋ á si ŋgɔ́ ŋghi ŋiŋ yīi, a á késáatswɛt, ńdʉ́ɛ́ mé ŋghi teté ŋ́gɛ: “Pɛ esāŋte á mɛnzhɛ Atsyapuɔ, a enɔ̄ŋ ndeŋ ndeŋ.” » Epuɔ pīi, mɛ́ le tó á wɔ́p á mbū Jáaŋ lā, é lɛ epuɔ Falísia. Pɔ́ zɛ́t ntswīʼnɛ ŋŋāka á Jáaŋ ŋake, ńzɛ́tte á yí ŋ́gɛ: «A gɔ́ éyi, o te á Nzaʼ‑Ŋkhʉ ɛ́, ŋ́gɔ́ te Eli í, ŋ́gɔ́ te á ntswi‑ŋke Ndém yīi, mɛ́ é si nzwíʼtɛ ɛ́, mbɔ melaʼ akɔ̄, o piŋɛ nnōʼo epuɔ á ntshi ī?» Jáaŋ á pwɛt á mbū pɔ́p ŋ́gɛ: «Meŋ á si nnōʼo epuɔ á ntshi ndaʼ. Mmɔʼ ŋiŋ a piīŋ ŋgɔ́ á nnɔ pɛ, pɛ enɔ̄ɔŋ te zhɛ́ɛ á ŋiŋ yīi, a á ewiɛ́ ɛ́. Azá anu a tɔ́ke, azí mé eshʉ̄ʼ. Meŋ zi mbú te kūʼ yīi, meŋ gɔ ekɛ́ʼɛ ŋkhʉ meláŋ mí í. » Emuɔ menu é lɛɛ́ ntɔ́kɔ páʼa, á akap alāʼ Betani, á nzéŋ ntshi Juldɛŋ, mé eshhʉ̄ mbuʼ esaáʼ‑nu, á ajʉʼ zīi, Jáaŋ a le nɔ̄ŋ nnoʼo epuɔ á ntshi éwú.

Njhʉ̄ é lá, Jáaŋ á jʉ́ɔ á Yɛɛ́so, á nɔŋ eshʉ̄ʼɛ mé lezēŋ tsí, á lé ŋ́gɛ: «Mɔ́ njʉnjhʉ Ndém yīi, a lɔkɔ esōko mefa epuɔ menɔŋ, a ewuɔ. A á yí tɛ́ meŋ kɛɛ́ eshúŋɔ anu ánɛ yí, páʼ meŋ ke lé ŋ́gɛ: “Ŋiŋ a á nzem meŋ eshʉ̄ʼɛ, ńtsyā á gá, melaʼ mīi, mɛ́ le gē ezhí á gá, á gɔ́ áa éwú.” Meŋ méŋwɛ̄t é le zī nnɔŋ te nzhɛ́ á yí í. Táʼ, meŋ ke shʉ̄ʼ azá á nnoōʼ epuɔ á ntshi páʼā, ŋ́gɛ epuɔ Islaɛl e elɔk nzhɛ́ á ŋiŋ yīi, a á ewiɛ́. »
Jáaŋ á zéŋ eshúŋ ajū mīi, a á si nzhɛ́ɛ ánɛ Yɛɛ́so, ńdé ŋ́gɛ: «Meŋ ke jʉ́ɔ̄, Azwakne Ndém, á fhó á lephū esóʼo páʼ akepēŋ lā, ḿbú ntā ánɛ yí. Meŋ nde nɔ̄ŋ te nzhɛ́ á yí í. Táʼ, ŋiŋ yīi a le tó á gá ŋ́gɛ, meŋ egʉɔ nnōʼ epuɔ á ntshi, yí mé le lé me meŋ ŋ́gɛ: “Ŋiŋ yīi o o shʉʼ ejʉ́ɔ, Azwakne Ndém a esóʼo mbú ńtā ánɛ yí, yí mé shʉʼ enéŋ Azwakne Ndém ánɛ epuɔ.” Meŋ méŋwɛ̄t é njʉ́ɔ, ńchʉ́ nnɛ̄t mvéŋ á légɛ, ŋiŋ mɛ́t mé si ŋgɔ́ á Méŋ Ndém. »

Mmɔʼ njhʉ̄ é zéŋ ndá, Jáaŋ pɔ́ emɔ̄ʼ megaŋ nnɔ pí mémpīa, é zéŋ ŋgɔ́ á ajʉʼ zīi, a ke zī ŋgɔ́ éwú lā. Á jʉ́ɔ á Yɛɛ́so, á nɔŋ ntɔ́kɔ, á pʉ́ʼɛ menēk ntshí ánɛ yí, ńdé ŋ́gɛ: «Mɔ́ njʉnjhʉ Ndém a ewuɔ. » Megaŋ nnɔ pí pwɔ̄ é júʼ á yí á lelē épúp, ńtsé á nzem Yɛɛ́so. Yɛɛ́so á pekne nnɛ̄t, ńjʉ́ɔ páʼ pɔ́ é si nzhɛ̄nɛ á yí, ńdé á mbū pɔ́p ŋ́gɛ: «Pɛ faʼa akɔ̄?» Pɔ́ pwɛt ŋ́gɛ: «Lábi, ńdɔkɔ ŋ́gɛ: ńziʼnɛ. O naáŋ egɔ́?» Yɛɛ́so á pwɛt á mbū pɔ́p ŋ́gɛ: «Pɛ eshʉʼ ŋkó ńjʉ́ɔ. » Á gē egɔ́ épúp, mbɔ ajūɔ menu lekua mbwɛɛ́t‑njhʉ̄ á kuʼ. Pɔ́ a pɔ́p é lɛ ŋgʉ̄ɔ, pɔ́ kó njʉ́ɔ á ajʉʼ zīi, Yɛɛ́so a naáŋ éwú. Ḿbú ntā á lezēŋ yí, tɛ aziɛ́ aleʼé á mi.
Mmɔʼ ŋiŋ ánɛ epuɔ mémpīa pīi, é le júʼ ŋke Jáaŋ, ńtsé á nzem Yɛɛ́so lā, a lɛ lɛ Aŋdlɛya, ŋ́gɔ́ á ŋgik Simɔŋ Piɛ. Aŋdlɛya wuɔ mɛ́t, á zi mvhɔ, ŋ́gʉɔ njʉ́ɔ á ntsiʼnzem yi Simɔŋ, ńdé á mbū yí ŋ́gɛ: «Pek é njʉ́ɔ á Nzaʼ‑Ŋkhʉ. » Ńdɔkɔ ndʉ́ɛ́ á Klísto. Ńdé épúp, ńdɔk á yí ŋgʉ̄ɔ mé lezēŋ Yɛɛ́so. Yɛɛ́so á kó ndɛ̄ ŋgē ejʉ́ɔ á yí, ńcʉ̄ á yí lɛ kɔ́ɔ́ɔ́, ńdé á mbū yí ŋ́gɛ: «O ó lɛ Simɔŋ, ŋ́gɔ́ á méŋ Jáaŋ. Mɛ́ e fú ecʉ́ʼɛ etɔ́ŋɔ á wú lɛ, Sefas. » A lɛɛ́ ntɔ́ŋɔ yí lɛ Sefas páʼa, ńdɔkɔ ŋ́gɛ tɔ́.
Njhʉ̄ é lá, á pʉ́ʼɛ á athū Yɛɛ́so, á legʉɔ mé apak ŋgɔŋ Ŋgaliléa. Á kó á mɛnzhɛ, ḿbōte á Fílíio, ńdé á mbū yí ŋ́gɛ: «Tsé á nzem meŋ. » Fílíio wuɔ mɛ́t, a lɛ á mɔ́ Betsayída, á tésɔŋ wɔ Aŋdlɛya pɔ́ Piɛ. Fílíio á gʉɔ njʉ́ɔ á Natanayɛl, ńdé á mbū yí ŋ́gɛ: «Pek é njʉ́ɔ á ŋiŋ yīi, mɛ́ le tí menu ánɛ yí, á ntē aŋwaʼne lepé Mɔɔ́sɛ, mbɔɔ á ntē aŋwaʼne metswi‑ŋke Ndém lā. Ŋiŋ mɛ́t a á Yɛɛ́so ŋiŋ Naázalɛt, ŋ́gɔ́ á méŋ Yosɛ́p. » Natanayɛl á zɛ́tte á yí ŋ́gɛ, á ŋiŋ Naázalɛt e? Akɔ̄ mbɔŋ á gɔ etó á Naázalɛt e?» Fílíio á pwɛt á mbū yí ŋ́gɛ: «Shʉʼɛ ŋkó ńjʉ́ɔ. »
Natanayɛl á gʉɔ tɛ ndɛ̄ ŋgē epáte á Yɛɛ́so, Yɛɛ́so á lé ánɛ yí ŋ́gɛ: «Kwaʼ ŋiŋ Islaɛl a a wuɔ páʼa, a puú ŋgɔ́ á ŋgaŋ anuúnē. » Natanayɛl á júʼ, ńzɛ́tte á yí ŋ́gɛ: «O ó si nzhɛ́ɛ á gá égɔ́?» Yɛɛ́so á pwɛt ŋ́gɛ: «Meŋ á nzi nté njhʉ̄ njʉ́ɔ á wú, o gɔ́ á letseŋ athʉ́ fiŋge, tɛ́ Fílíio á tɔ́ŋ á wú. » Natanayɛl á zéŋ ŋ́gɛ: «Ńziʼnɛ, o ó si ŋgɔ́ á Méŋ Ndém. O ó si ŋgɔ́ á efɔ epuɔ Islaɛl. » Yɛɛ́so á tsɔ́ʼ á mbū yí ŋ́gɛ: «O ó fɛ́ nnɛ̄t ŋgyá mé meŋ tsetsɔŋɔ, melaʼ mīi, meŋ á lé á mbū wu ŋ́gɛ, meŋ á njʉ́ɔ á wú á letseŋ athʉ́ fiŋge. O o shʉʼ ezéŋ ejʉ́ɔ emɔ̄ʼ menu, e efáŋ ntɔ́k emuɔ mɛ́t. » Ńzéŋ ntswiʼne ndé ŋ́gɛ: «Kwaʼ anuúnē anuúnē meŋ shúŋɔ á wɛ́ ŋ́gɛ, pɛ e shʉʼ ejʉ́ɔ, lephū e etsɔ́ʼɔ ntshí, mecɔʼ Ndém é enɔŋ mbʉ̄ɛ̄, ńzéŋɛ esóʼo, á lezēŋ Méŋ‑Ŋiŋnɔŋ wuɔ. »

Escolta Jáaŋ 1