Palaung, Rumai: Palaung, Rumai (New Testament)

Palaung, Rumai

ဘိူဝ်ဟည်မိုႈစာ်မ်း ယေဆုကာည်းတပဲအန်းကဲတာ် ပါ့်ရီမ်းလှံင်းယေရုဆလိင်၊ ကဲဟည်ဒေဲႈစာ်မ်း ပါ့်ရီမ်းကဇိုင်းဘတ်ဖာဂေ ကာည်း ကဇိုင်းဘေတနိ အီးဂေါ်ည်း ပါ့်ဇာ်န်းနောဆာန်လူန်။ ဘိူန်ဇေဲန်း ယေဆုစီဆူည်ႇတပဲအန်းအယ်ချှေႈဟာဝ်း လအာည်ႇ၊ စီဒါ်ႈ “ဟာဝ်းပါ့်ကဇိုင်း အီးဂေါ်ည်းညျှာအာည်ႇပါည်း။ စံန်ပါည်းဟာဝ်းလေဲပ်စာ်မ်း၊ ပါည်းနံင်ယေဲဝ်းအူန်း ကော်န်းလီပံင်ဘက်အူန်းအီးအူတို အီးမိုႈပံင်ညျံမ်ဘံက်အီးခံဝ်ဘော်က်၊ ပါည်းစီကာ်ႈဖာ်ႈႎည်းအန်း ဒည်းဒေဲႈပေါႇနာ်ႏ။ ဆာ်မေဲႈအီးမှောႇတာ့်ပါည်း ဒါ်ႈ ‘ဆီမ်ဘာည်းပါည်း ဆံမ်ဒေဲႈရေဲန်းလာ်ဘာည်းဇေဲန်း’၊ ပါည်းစီႎီးဒါ်ႈ ‘စံဝ်ကညျား မေဲႈပံင်နံင်ဒါး၊ လဒီးအူတည် အန်းစံဝ် နံင်ႎီးဒေဲႈတိုန်းဘိုး ကဆီုဝ်နီး’။”
ဂေါႇမိုႈဘာည်းဇေဲန်း တပဲစံဝ်ကာည်းဒီးမာ် စီလည်လေႈဟာဝ်းပေါႇ၊ စီဟာဝ်းယေဲဝ်းလာ် ကော်န်းလီအူတို ပါ့်ပါင်းအီုန်ဒါ်န်း ပံင်ဘက်လာမ်အူန်း ရီမ်းကိူန်ခလေဲပ်အူဒီ၊ ကာည်းဒီးမာ် စီကာ်ႈလာ် ႎည်းပံင်ဘက်လာမ်အူန်း ကော်န်းလီဒီး။ ဘိူန်ဇေဲန်း တူအီး အီးဇံင်းဂေါ်ည်းပါ့်အီုန်ဒါ်န်း ကဲကလံက် စီမှောႇတာ့်ကာည်းဒါ်ႈ “ဆီမ်ဘာည်း ပါည်းဆံမ်ကာ်ႈလာ်ႎည်း ကော်န်းလီဒီး။”
ကာည်း စီႎီးကလာင်းတာ့်ကဲ ဘည်ဘာည်းဒါ်ႈအူန်းစံဝ်ယေဆု တာ့်ကာည်း၊ တူအီးကဲဒီးမာ် စီဒဲႈလာ်ကာည်းကာ်ႈ ဒည်းဟာဝ်းလီဒီး။ ကာည်းစီ ဒည်းဒေဲႈလာ် ကော်န်းလီဒီး ပါ့်စံဝ်ယေဆု၊ စီတေဲႈဒါးလာ် တဆီးဟေဲပ်ကဲ တာႇတေဲင်းကော်န်းလီဒီး၊ အန်းစံဝ် စီဟိုက်ဘံက်ပေါႇ ကော်န်းလီဒီး။ ႎါည်းဒီး စာနံင်ဇိုက်ဖိုက် တေဲႈကနေဲႈတာ့်အန်းစံဝ် တူအီးဂီုန်းကဲမာ် တေဲႈဒါးလာ် တဆီးဟေဲပ်ကဲ တာႇတေဲင်းအီုန်ဒါ်န်းဒေဲႈအန်းစံဝ်၊ မာင်ကလံက် ဆံမ်တာႇလာ် လှားဟာ်ည်း ကဘ္လူည်းဟာ်ည်း ပံင်ငိုႈဒေဲႈကဲ ပါ့်ရီမ်းဘျည်းကဲဒီး။ တူအီးကဲအီးတောႇဒေဲႈ လအာည်ႇအန်းစံဝ် ကာည်း ကဲအီးတောႇဒေဲႈလဘာ်န်းအန်းစံဝ်ကဲမာ် စီဂီအောင်းပါဝ်း ခိုည်းဒါ်ႈလာ် “ဟော်ဆာန်နာ။” “ချှေႈအီးဒေဲႈဒါး ဇီုဝ်စံဝ်ကညျား အန်းမေဲႈမင်ကလာချှီႇခည်း။” “ကီုင်းအီးနံင်ပေန်ဒေဲႈနီး အန်းစီနံင်ဘာည်းကီုင်း ခည်မိုႈတာ် ပါန် ကူန်းတားအဲတားကညျားဒါင်း ဒါႎေက် တိူဝ်ႈမေန်းဒေဲႈ၊ အန်းမေဲႈမင်ကလာချှီႇခည်း။” “ဟော်ဆာန်နာ ဇိုက်ဖိုက်စံဝ်ဖြား။”
ဘိူန်ဇေဲန်း စံဝ်ယေဆု စီဟာဝ်းစာ်မ်း ပါ့်လှံင်းယေရုဆလိင်၊ အန်းစံဝ် စီလေဲပ်ဟာဝ်းလာ် ခေဲင်းစော်င်းစံဝ်ဖြား စီလှယ်လာ်လေဲပ်တိူဝ်ႈ တော်န်းမျိုးတော်န်းလှေ ခေဲင်းစော်င်းစံဝ်ဖြား။ ႎါည်းဒီး ဂေါႇမိုႈဘျည်းဟည်အာ်ႇဒေဲႈ၊ အန်းစံဝ် ကာည်းတပဲအန်း အူကိူဝ်းလေႈအယ်ချှေႈ ကဲစီလည်လေႈဟာဝ်းလာ် ပါ့်ကဇိုင်းဘေတနိ။


ဘိူဝ်စာ်မ်းဒေဲႈအီုင်ညျှေး၊ စံဝ်ယေဆုကာည်းတပဲအန်းကဲ စီလည်လေႈဒေဲႈလာ် ဒကဇိုင်းဘေတနိဒီး၊ ယာမ်းဇေဲန်း အန်းစံဝ်မာ် ဟည်ကဘျန်းလာ်ပံင်ဟိုမ်း။ ဘိူန်ဇေဲန်း အန်းစံဝ်စီယေဲဝ်းလာ် တင်းကဒိုည်ႇအူကတင်း အီးလှားကဘ္လူည်းချှီႇ ပါ့်ဒီဒိုင်း။ အန်းစံဝ်စီ ဟာဝ်းဇူးဖာ်ႈ စီတိူဝ်ႈ ထင်နံင်မေဲႈ ပ္လါ်ည်းအန်း။ ဘည်ဘာည်းမာ် အန်းစံဝ်စီယေဲဝ်းလိူည် လှားအန်းကဲ။ ဆီမ်ဘာည်းဆံမ်ဒါ်ႈလာ်ဘာည်းဇေဲန်း အန်းညျံမ်မိုႈမ အချိုင်ဆီန်းပ္လါ်ည်းအန်း။ ဘိူန်ဇေဲန်း စံဝ်ယေဆုစီဒါ်ႈ တာ့်တင်းကဒိုည်ႇဒီး “ဇူႈပေါႇစံင်နည်နီး ခူဒဲႈဆိ ဘိူန်းဟိုမ်းပ္လါ်ည်း ကတင်းမည်း။”
တပဲအန်းကဲဒီးမာ် ယေဲဝ်းဒို့ ပံင်ဒါ်ႈအန်းစံဝ်ဒီး။


ႎါည်းဒီး ဘိူဝ်ဒေဲႈစာ်မ်းကဲတာ် ပါ့်လှံင်းယေရုဆလိင်၊ စံဝ်ယေဆု စီလေဲပ် ခေဲင်းႎါင်းစော်င်းစံဝ်ဖြား၊ အန်းစံဝ် စီချူႈႎီုန်ဒို့ပေါႇ တူအီးကဇိူဝ်ႈကယံင်းကဲ။ အန်းစံဝ် စူန်းကပ္လႎီုန်ဒို့ဘိုး ပဒေဲန်း ဒီကရောႈကဲတာ့်ရိူန်း ကာည်း တနာ်င်ဒီအံက် ဒီယံင်းကဲတာ့်အပ္လိုည်း။ ဘိူန်ဒဇေဲန်း အန်းစံဝ် ဘူဒဲႈမ အီးဘိူန်း တာင်ခလောႈဂျိုး တီင်ႎါင်းစော်င်းစံဝ်ဖြား။ ဘိူန်ဇေဲန်း အန်းစံဝ်စီပနံဝ်းနှဲ တာ့်ကဲ ဒါ်ႈ “အာဝ်မိုႈဟီုဝ်၊ စံဝ်ဖြားဒါ်ႈအူန်း တံင်ခေဲင်းဘေဲႇကျာမ်း ဘာည်းညျေဲန်း ‘အီးမိုႈစော်င်းစံဝ်ဖြားအံဝ်းနီး အီးနံင်တေဲႇဒါ်ႈ ဒီဒေဲႈမှာန်းဆူး ဂါဆီင်မိုႈတူအီးတော်န်းခြိူဝ်း၊’ ဘည်ဘာည်းမာ် အီးမိုႈပဲ ဟည်ရေဲန်းပေန်ဒို့ ဘာည်းပေါႇ ဒီဂေါ်ည်းတူအီးစိုန်ကဲ။”
ဘိူဝ်ယေဲဝ်းတညာဝ်း တားစော်င်းဒါင်းကဲ ကာည်းဆြာကံတ်ကျာမ်းကဲတာ် ဘည်ဘာည်းတာ့်ဇေဲန်း၊ ကဲစီဟြာ်ည်ႇလာ်အီုန်ဒါ်န်း စာနံင်ပယာ်မ်းႎီုန် အန်းစံဝ် ဂေါႇမိုႈ ကဲယံဝ်းဒို့ အန်းစံဝ်၊ ဆီမ်ဘာည်းဆံမ်းဒါ်ႈလာ်ဘာည်းဇေဲန်း ဂေါႇမိုႈတူအီးဂီုန်းကဲ ဟည်အာမ်းဒို့ ပံင်ပနံဝ်းဒါ်ႈအန်းစံဝ်။
ဘိူဝ်ဘျည်းဟည်အာ်ႇဒေဲႈ စံဝ်ယေဆုကာည်း တပဲအန်းကဲ စီလည်လေႈဟာဝ်း ခရာ်ည်ႇဒလှံင်းဒီး။


ဘိူဝ်စာ်မ်းဒေဲႈတာ် ခည်ညျှေးဇေဝ်းဇေဝ်း၊ ဇိုဂီဟာဝ်း စံဝ်ယေဆုကာည်းတပဲအန်းကဲ တောႇအီုန်ဒါ်န်း၊ စီဒေဲႈယေဲဝ်းလာ် တင်းကဒိုည်ႇအီုမ်မှေဲဝ်းဒိူဝ်း။ ဇူႈတူပါ့်ရိူဝ်ႈအန်း ခေါႈယာ်မ်းဒို့ ပါ်ကတင်း။ ဘိူန်ဇေဲန်း ပေတရု ဟည်နလှူႈလာ် ပံင်ဒါ်ႈအူန်းစံဝ်ယေဆု၊ အန်းစီဒါ်ႈ တာ့်အန်းစံဝ် “အိူဝ် ဆြာ တိူဝ်ႈဟံင်း၊ တင်းကဒိုည်ႇ ပံင်တိူင်ႏအူန်းမည်းစံဝ် ဟည်ယာ်မ်းခေါႈဒို့။”
စံဝ်ယေဆုစီဒါ်ႈ “ပဲလိုမေဲႈနောႈညျှေဲမ် တာ့်စံဝ်ဖြားနာ်ႏ။ အံဝ်းနံင်ဒါ်ႈ အီးမိုႈအီးမှာန်အန်း၊ ချှေႈမှေဲ့ဘူဒါ်ႈ ဆာ်အန်းဆူည်ႇ နောနီး ဒါ်ႈ ‘ယာည်ႇကထော်က်ဖာ်ႈ ဇောႈလေဲပ်ခေဲင်းအေဲမ်းပါင်လာည်၊’ ဆာ်အန်းအာဝ်အူန်းမေဲႈ နောႈဂါင်းဟား ခေဲင်းနောႈအန်း၊ ဆာ်မေဲႈနောႈညျှေဲမ်အူန်းတာ် ဘာည်းဒါ်ႈအန်း နံင်ပေန်ဒေဲႈ၊ ပံင်ဒါ်ႈအန်းဒီးမာ် စီနံင်ပေန်ဒေဲႈပေါႇအခည်း။ ဂေါႇမိုႈဘာည်းဇေဲန်း အံဝ်းနံင်ကလာင်းတာ့်ပဲ၊ ဂါဆီင်မိုႈ ပံင်မှာန်းပဲတာ့်စံဝ်ဖြား ဆာ်မေဲႈနောႈညျှေဲမ် နံင်ဘိူန်းအခည်း၊ ပံင်မှာန်းပဲဒီးမာ် စီနံင်ဘိူန်းပေါႇအခည်း။ ဒဇေဲန်းအာဝ်ႎါ်န်း ပဲမှာန်းဆူးယာမ်းမှေဲ့မာ် ဆာ်ပဲမေဲႈနောႈဆဲဝ်း နောႈႎံင်းတေဲင်းအီး စီပ္လိုတ်ဒဲႈပံင်ကလူည်ႇကဲ။ ဆာ်ဘာည်းဇေဲန်း ကူန်းစံဝ်ပဲ အီးဂေါ်ည်းပါ့်ပ္လါ်န်းမာ် နံင်ပ္လိုတ်ဒဲႈပံင်ကလူည်ႇပဲဟာ့်။ [ဆာ်ပဲ အာဝ်ပ္လိုတ်ဒဲႈပံင်ကလူည်ႇအီး ကူန်းစံဝ်ပဲအီးဂေါ်ည်းပါ့်ပ္လါ်န်းမာ် နံင်အာဝ်ပ္လိုတ်ဒဲႈမ ပံင်ကလူည်ႇပဲနာ်ႏ။]”


ႎါည်းဒီး စံဝ်ယေဆုကာည်းတပဲအန်းကဲ စီႎီးဒေဲႈစာ်မ်းဘိုး ပါ့်လှံင်းယေရုဆလိင်။ ဇိုလေဲပ်ဟာဝ်းစံဝ်ယေဆု ခေဲင်းႎါင်းစော်င်းစံဝ်ဖြား၊ တားစော်င်းဒါင်းကဲ၊ ဆြာကံတ်ကျာမ်းကဲ ကာည်း တူအီးဒါင်းကဲ၊ စီဒေဲႈဇူး ပါ့်အန်း။ ကဲစီမှောႇဒါ်ႈ “မည်းရေဲန်းကဲကဲနီး ကနေဲႈဆီမည်းဒါး။ နှာင်းကံပ်ဆမားရေဲန်းဘာည်းညျေဲန်း ချှေႈမှေဲ အာပ်ဒဲႈကနေဲႈနီး တာ့်မည်း။”
ဘိူန်ဇေဲန်း စံဝ်ယေဆု စီႎီးဒါ်ႈလာ်ဘိုး တာ့်ကဲ “အံဝ်းနံင်မှောႇဆဲပဲ အူမျိုး။ ဆာ်ပဲကာ်ႈ ကျောႈမှောႇအံဝ်း၊ အံဝ်းမာ် စီနံင်ကလာင်းနှဲပဲနာ်ႇ အံဝ်းဒါးကနေဲႈဆီ ရေဲန်းကဲကဲနီး။ ပဲစီကလာင်းနှဲဟံင်း အံဝ်းနာ်ႇ၊ ခည်ဒဲႈယောဟာန်တာ် ဘပ်တိစမ်ဒိူဝ်း မိုႈအန်းဒါး ကနေဲႈအီးဒေဲႈ ပါ့်စံဝ်ဖြားဟီုဝ်၊ မိုႈအန်းဒါး ကနေဲႈအီးဒေဲႈ ပါ့်တူအီးဟီုဝ်။”
ဘိူန်ဇေဲန်း ကဲဒီးမာ် စီလည်ကအုပ်ကမိုန်ဒါ်ႈ “ဆာ်အဲဒါ်ႈ ‘မိုႈကနေဲႈ အီးဒေဲႈပါ့်စံဝ်ဖြား၊’ အန်းစီနံင်မှောႇဒါ်ႈ တာ့်အဲ ‘ဆီမ်ဘာည်း ပဲစီအာဝ်ညျှေဲမ်လာ် ပံင်ဟောယောဟာန်ဒီး။’ ဘည်ဘာည်းမာ် အဲအာဝ်ဘိူန်းမ ကလာင်းဒါ်ႈ ‘မိုႈကနေဲႈ အီးဒေဲႈပါ့်တူအီး’။” [ကဲမာ် ယံဝ်းတူအီးဂီုန်းကဲ၊ ဂေါႇမိုႈတူအီးဂီုန်းကဲ ညျှေဲမ်အူန်းဒို့ ယောဟာန်ဒီး မိုႈတာ် ပရောဖဲတ်အူချှေႈဟာ့်။] ဂေါႇဘာည်းဇေဲန်း ကဲစီႎီးဒါ်ႈ တာ့်စံဝ်ယေဆု “ယေး အာဝ်နာ်ႇမ။”
ဘိူန်ဇေဲန်း စံဝ်ယေဆုမာ် စီႎီးဒါ်ႈတာ့်ကဲ “တံန်နှေးတာ့်ဘာည်းဇေဲန်း၊ အံဝ်းမာ် အာဝ်ကာ်ႈကလာင်းမ ပဲနာ်ႇ အံဝ်းဒါး ကနေဲႈဆီ ရေဲန်းကဲကဲနီး။”

Escolta မာကု 11