Budu: Neta 2021 WBT (NT) Non Drama

Budu: Koya 2021 WBT (NT) Drama

Budu: Koya 2021 WBT (NT) Non Drama

Yeso ambunzo ɓata isisinio yɛmɔ kusigo ɓɔ: « Ɓʉngama ngiɓa ɓa ekoo ʉ ɓisi ɓaɓio sina ngbanga kʉndʉ ɓasaɓakyɛ kumi ɓaunaɓi ɓɔngɔ, iɓa ɓa꞉chɨka ɓatala ngiɓʉndaɓʉ ɓambʉsa kʉjananɨa gue ngia wʉ chɨkana. Tiga nanɨ ati ʉndaɓʉ, ɓɔkɔ ɓi꞉nye mɨdada yɛngɔ, ɓɔkɔ ngiɓɔmɔ ɓi꞉nye ɓombi ɓʉ mbɨmbanaka. Iɓa ɓi꞉nye mɨdada yɛngɔ, ɓa꞉chɨka ɓatala ngiɓʉndaɓʉ, chʉkɔmʉ ɓambuɓotono nʉ mwanʉ umbundo nga wɔmɔ. Ɨkyɛmɨngana, ɓɔkɔ ngiɓa ɓʉ mbɨmbanaka, ɓa꞉chɨka ɓatala, ɨzɔ nʉ umbundo nga wɔmɔ amati ʉ machupa. Ʉna tɔ, gue ʉ chɨkana a꞉kakɔmʉ ngba. Kija ɓa꞉faniso jɨnga tɔɔ, gʉ ɛɓɔ ɓasaɓakyɛ ngiɓʉnanɨ ku ɓuɓomu akʉ tɔɔ ɓʉ kpɛ. Tiga nʉ gʉndʉ, mombi mʉngana ambʉtʉɓɨa ɓɔ: ‹ Inu ngiɓa, gue ʉ chɨkana ʉ꞉ka kanɨ! Seni nayɔ kʉjananɨa! › Kija ɓasaɓakyɛ ɓaunabi ngiɓʉnanɨ ɓa꞉jʉkana, ɓambufaniso tambanaka ɓatala ngiɓʉndaɓʉ. Gʉ ɓasaɓakyɛ mɨdada yɛngɔ nʉ ɓiga ngiɓa ɓʉ mbɨmbanaka ɓɔ: ‹ Ɓatala nga ɓʉndɛsʉ ɓakimunio. Tinzeni ɓaka isu mwanʉ umbundo kʉ nzoo. › Ɨkyɛmɨngana, ɛɓɔ ɓambuɓutisio ɓɔ: ‹ Chʉkɔɔ! Ndʉ kaninzo umbundo ngua kanawɔ akɛ, wambʉkʉtɨndana ɓata isu kʉ ɓuɓomu! Seni kʉkʉa wʉndɛnʉ kʉ akʉ izi yɨ magabʉ. › Ati ngia mɨdada ngiinanɨ yi꞉nye tiga‑ɔɔ kʉsa kʉkʉa umbundo, gʉe ʉ chɨkana ambʉɓwanɨa. Ɓasaɓakyɛ ɓɔkɔ ngiɓa ɓi꞉nye ɓʉndanɛ ɓambukumunio nʉ ɔɔ gue amati ʉ ɨkáa yɨ ʉmbɔ wʉ chɨkana. Ɓambʉdɨkpa umongu. Mbise ɔngɔ tiga, ɛɓɔ ɓasaɓakyɛ ɓaunabi ngiɓa ɓɔmɔ ɓambʉka. Gʉ ɛɓɔ ɓɔ: ‹ Huu Makʉʉɓɨɨ, Makʉʉɓɨɨ! Tɨganɨa ɓaka umongu! › Ɨkyɛmɨngana, gue ngiinanɨ ambuɓutisio ɓɔ: ‹ Maninu kusigio tʉkʉ kingono ɓɔ, mambukɔmʉ ninu kʉmbɨa! › » Yeso ambuɓusigio tiga ɓɔ: « Inu, pɨmɨeni pɨmɨaa! Jʉ nambʉkɔmʉ kʉmbɨa ɓisi gʉ wati wʉ moni ngikʉnanɨ. »


Yeso ambusigo ɓata ɓɔ: « Ɓʉngama ngiɓa ɓa ekoo ʉ ɓisi, ɓaɓio ɓisi ongo ngbanga ndʉ mombi mʉngana iya i꞉nye kʉsa kɨnda. Pɛɛ ɔɔ ʉngwɨɛ kɨnda, ambusoko ɓombi ɓʉ kuu ngiɓangɔ, kija a꞉ɓunzikio kumbo ngiangɔ. A꞉nzikio mombi kʉ nangana nangana kumbo, kʉkpatanakɨa tʉkʉ nʉ angu ɔɔ hatanakɛ ngiangɔ. A꞉nzo iya wʉ pɛɛ, falanga ɓɔkɔ ngia ɓi꞉nye soko ɓɔ talata. A꞉nzo iya wʉ ɓepini, talata ɓepini. Ambunzo tiga iya wɔmɔ, ʉtalata mungono. Mbise ɔngɔ, ambʉsa kɨnda yɛɛ danga ɓʉ ngo. Mombi ʉ kuu ngia ɓa꞉munzo talata ɓɔkɔ ambʉsa nayɔ kʉgabanaka, kija a꞉nyɨa ɓata nʉ talata wɔmɔ kʉ ɓɔkɔ. Gwa ngia ɓa꞉munzo talata ɓepini, ambʉsa kʉ ɓwanɨ, kija a꞉nyɨa ɓata kʉ nʉ talata nga wɔmɔ kʉ ɓepini. Ɨkyɛmɨngana, iya ɓa꞉munzo ʉtalata mungono, a꞉sa yangɔ kʉmba tʉkʉ ɨtaka, kija a꞉naya ʉtalata nguʉnanɨ wʉ makʉangɔ tʉkʉ ɛsɨ ʉ ɨtaka. Mbise ʉ makwaa maja, ɛyɔ makʉʉ ʉ ɓombi ɓʉ kuu ambʉtʉa akʉ i꞉nye ʉseni‑ɛɛ. Kija a꞉soko ɓombi ɓʉ kuu aka ekoo ngia ɓɔ ɓupimiso moni kʉ talata ngiangɔ. Mombi ʉ kuu ngia ɓa꞉munzo talata ɓɔkɔ ambʉka. Kija a꞉mʉpana talata nga wɔmɔ ɓata kʉ ɓɔkɔ. Gʉ ɛyɔ ɓɔ: ‹ Makʉasɛmɛ! Wa꞉nanzo pongo talata ɓɔkɔ. Ʉna ɓɔkɔ nga wɔmɔ ma꞉nyɨa bɛ ɓata nayɔ iiyakɛ! › Gʉ makʉangɔ nayɔ ɓɔ: ‹ Ya iɗo, wa mombi ʉ kuu ɔɔ kyananakɨa mapanʉ muɗo nʉ ɔɔ bayanɨɛ! Jʉ wi꞉nye pongo ngbingbii akʉ kumbo ɔɔ ɗɛkɛkɛ! Kʉ ɓwanɨ, ma꞊nʉnapɨa tiga kʉkanga kumbo 'ʉja nadɨndɨ. Ɨka kʉkwa ɨgyagya izɔ nɛmɛ! › Mombi ʉ kuu ngia ɓa꞉munzo talata ɓepini ambʉka tiga kʉ ananɨ. Gʉ ɛyɔ ɓɔ: ‹ Makʉasɛmɛ! Wa꞉nanzo pongo talata ɓepini. Ʉna ɓepini nga kɔmɔ ma꞉nyɨa bɛ ɓata nayɔ kʉ iyakɛ! › Gʉ makʉangɔ nayɔ ɓɔ: ‹ Ya iɗo, wa mombi ʉ kuu ɔɔ kyananakɨɛ mapanʉ, nʉ ɔɔ bayanɨɛ! Wʉ꞉kyɨa iɗo nadɨndɨ akʉ mwanʉ ɨkyɛmɛ ɔɔ ɗɛkɛkɛ! Kʉ ɓwanɨ, ma꞊nʉnapɨa tiga kʉkanga moni maja nadɨndɨ. Ɨka kʉkwa ɨgyagya ɨzɔ nɛmɛ! › Yambʉsa kʉka tiga gwa ngia ɓa꞉munzo ʉtalata mungono. Iya a꞉ɓʉya ɓʉ buu, gʉ ɛyɔ ɓɔ: ‹ Makʉasɛmɛ! Ma꞉mbɨa pongo tʉkʉ pɛɛ ɓɔ wa mombi ɔɔ ɓʉkaɨ nadɨndɨ. Waabʉa masɔɔ akʉ izi ngia wa꞉hʉnakɔmʉ‑ɔɔ ɨkyɛmɛ. Nʉ waasʉsa idyo akʉ izi ngia wa꞉kinyisokɔmʉ‑ɔɔ pumo. Iiya ɓɔ ɛmɛ ma꞉kwa bɛ nayɔ ʉɓa, mambʉsa kʉnaya ʉtalata nguʉsɔɔ ɛsɨ ʉ ɨtaka. Ɛwɔ tiga kʉ ʉwa! Ʉchɨka chɨkanɨ. ›
Gʉ makʉangɔ nayɔ ɓɔ: ‹ Wa mombi ʉ kuu ɔɔ ɓɨɓɨ, nʉ tʉkʉ adʉɓa ɔngɔ! Ʉna‑zʉ ndʉ wa꞉mbɨa pongo ɓɔ maabʉa masɔɔ akʉ izi ngia ma꞉kʉhʉnakɔmʉ‑ɔɔ, nʉ maasʉsa idyo akʉ izi ngia ma꞉kinyisokɔmʉ‑ɔɔ masɔɔ, tiga akʉ moni kʉ ɨmanɨ wa꞉sakɔmʉ pongo kʉnapɨa ʉtalata nguʉsɛmɛ akʉ bakɨ ikanzi ngia ɓɔ mʉtʉeni, mambʉsa nawɔ kuiso, ɨzɔ tiga kʉ nʉ dada ɔngɔ. Mʉhɨnɨeni 'ukpekpe wʉ ʉtalata nguʉnanɨ, kija na꞊nzo mombi ngia a nayɔ kumi. › Jʉ akʉ mombi ngia anʉ ɨkyɛmɛ, ɓa꞊mʉmatɨa ɓisi ongo yɛmɔ kʉ ekoo ɔngɔ ambʉka ʉnzɨanɨɛ tiga 'ʉja. Ɨkyɛmɨngana, mombi ngia ambʉkɔmʉ nʉ ɨkyɛmɛ, ɓa꞊mʉhɨnɨa sina kʉ nʉ iya yɛɛ ɗɛkɛkɛ ngia aɓio nayɔ. Kʉ ɓwanɨ, giseni ɨkyɛmɛ yɨ mombi ʉ kuu wʉ ɨsʉkʉɓwanɨ ngia aɓei, amati ʉ umomo. Nani, tʉkʉ ndɨa nʉ dyana menu yaɓio tiga‑ɛɛ. »

« Ati ngia Mwana ngia ʉ Mombi a꞊ka sina‑ɔɔ amati ʉ ɨbɨba ngiangɔ ɨzɔ nʉ ɓamalaika kʉ ɓuɓomu, a꞊wulo sina akʉ izi yɨ ɓuwei yɨ ɓʉngama ngiangɔ yɨ ɨbɨba. Mababa kʉ ɓombi kʉ muɓomu ka꞊mʉmanakɨa sina nanɨ apɛɛ angɔ. Kija a꞊ɓɨpaka akʉ limbi dyepini, ngbanga kʉndʉ iya mʉpɨmakɨa aaɨpaka‑ɔɔ ɓamɛmɛ nʉ ɓakɔndɔlɔ. A꞊napɨa sina ɓakɔndɔlɔ akʉ ɨkɔndɔ yɨ guɔngɔ ngiangɔ, ambʉnapɨa ɓamɛmɛ akʉ ɨkɔndɔ yɨ moiɔngɔ ngiangɔ. Kija ngama a꞊sigio sina tiga iɓa ɓaɓio akʉ ɨkɔndɔ yɨ guɔngɔ ngiangɔ ɓɔ: ‹ Ikeni, inu ngiɓa Tidoo a꞉nimbuiso! Ikeni kʉdya Ɓʉngama ngiɓa ɓa꞉nɨtambanakɨa kʉʉngwa tʉkʉ aka ɓa꞉kyɨa‑ɔɔ ɨtaka. Jʉ ɛmɛ mi꞉nye nʉ taa, nambunanzo idyo. Mi꞉nye nʉ taa yɨ mepo, nambunanzo mepo kɔɔ mʉmwɛ. Mi꞉nye mɛɛka ati ʉndɛnʉ, nambʉnajananɨa. Nʉ ati ngia ma꞉kwa‑ɔɔ unduu, nambunanzo lɨpʉkʉ. Ati ngia mi꞉nye‑ɔɔ nʉ kweso, nambʉka nɛmɛ kʉsalɨa. Nʉ ati ngia mi꞉nye‑ɔɔ akʉ boloko, nambʉka nɛmɛ kʉkanga. › Kija ɓombi ɓɔɔ ngbingbii ɓa꞊mutisio sina ɓɔ: ‹ Huu, Makʉʉɓɨɨ! Ati tɨmanɨ iya ka꞉nana‑ɔɔ nʉ taa kija ka꞉nanzo idyo? Gʉ ɓɔ wi꞉nye nʉ taa yɨ mepo, kambunanzo mepo? Nʉ ati tɨmanɨ wi꞉nye‑ɔɔ mɛɛka kija ka꞉najananɨa? Gʉ ɓɔ, wa꞉kwa unduu, kambunanzo lɨpʉkʉ? Nʉ ati tɨmanɨ iya ka꞉nana‑ɔɔ nʉ kweso, gʉ yɛmɔ ɓɔ akʉ boloko, kija ka꞉ka nɔwɛ kʉkanga? › Ɛyɔ ngama a꞊ɓutisio tiga ɓɔ: ‹ Maninu kusigio tʉkʉ kingono ɓɔ, wati kʉ uɓomu ngua na꞉salɨa‑ɔɔ mʉngana wʉ ɓayoo ɓʉsɛmɛ ngiɓa, abana tʉkʉ iya ɔɔ ɗɛkɛkɛ ɔngɔ, na꞉nasalɨa tʉkʉ ɛmɛ. › Mbise ɔngɔ, ɛyɔ ngama a꞊sigio tiga ɓombi ngiɓa ɓaɓio sina nʉ wagba wʉ ɨkɔndɔ yɨ moiɔngɔ ngiangɔ ɓɔ: ‹ Ʉngweni tinene nɛmɛ, inu ngiɓa na꞉ɗaa mʉgwɛ! Seni amati ʉ dyaa ngia yɨ mɨtʉ yɨ ɨpá nʉ mɨtʉ yɨ ɨpá. Dyaa ngiinanɨ, ɓa꞉ɨtambanakɨa Abɨa nʉ ɓamalaika ngiɓangɔ! Jʉ ɛmɛ mi꞉nye nʉ taa, chʉkɔmʉ nambunanzo idyo, mi꞉nye nʉ taa yɨ mepo, chʉkɔmʉ nambunanzo mepo. Mi꞉nye mɛɛka, chʉkɔmʉ nambʉnajananɨa. Ati ngia ma꞉kwa‑ɔɔ 'unduu, chʉkɔmʉ nambunanzo lɨpʉkʉ. Ati ngia ma꞉kwiso‑ɔɔ, gʉ yɛmɔ mi꞉nye‑ɔɔ akʉ boloko, chʉkɔmʉ nambʉka nɛmɛ kʉkanga. › Kija ɛɓɔ, ɓa꞊muɓukuo sina tiga ɓɔ: ‹ Huu Makʉʉɓɨɨ! Ati tɨmanɨ iya wi꞉nye‑ɔɔ nʉ taa, gʉ yɛmɔ nʉ taa yɨ mepo, gʉ yɛmɔ mɛɛka ati ʉndɛsʉ, gʉ yɛmɔ wa꞉kwa‑ɔɔ 'unduu wʉ lɨpʉkʉ, gʉ yɛmɔ wa꞉kwiso‑ɔɔ, gʉ yɛmɔ ɓa꞉nafa‑ɔɔ akʉ boloko, chʉkɔmʉ kambʉnasalɨa? › Kija a꞊ɓutisio ɓɔ: ‹ Maninu kusigio tʉkʉ kingono ɓɔ, wati kʉ uɓomu ngua na꞉salɨakɔmʉ‑ɔɔ mʉngana wʉ ɓanduku ɓʉsɛmɛ ngiɓa ɓɔɔ ɗɛ ɗɛ ɗɛ nadɨndɨ aɓɛ, na꞉nasalɨakɔmʉ ɛmɛ kʉ ɓwanɨ. › Ɓiga ngiɓʉnanɨ ɓabi sina tiga kʉdya ɓʉka‑ɓʉkaɨ ngiɓa ɓʉ mɨtʉ yɨ ɨpá nʉ mɨtʉ yɨ ɨpá. Ɨkyɛmɨngana, ɓombi ɓɔɔ ngbingbii, ɓa꞊bi yɨndaɓʉ tiga kʉ amati ʉ ʉɓɨɨ ngua wʉ mɨtʉ yɨ ɨpá nʉ mɨtʉ yɨ ɨpá. »

Escolta Matayɔ 25