If you have would like a copy of this version please contact info@davaraudiobibles.org

Text: Deukhuri New Testament, CC-BY-SA-4.0, The Love Fellowship. -- Audio: Deukhuri New Testament Audio Bible, CC-BY-SA-4.0, Davar Partners International, The Love Fellowship, 2023

Deukhuri New Testament

Deukhuri (देउखरिया थारु) Bible by The Love Fellowship is licensed under Creative Commons Attribution-ShareAlike 4.0 License.

येशू ख्रीष्ट दाऊद रज्वक सन्तान रहिँत। और दाऊद रज्वा अब्राहामके सन्तान रहे। येशू ख्रीष्टके पुर्खनके सूचि यी हो: अब्राहामके छावा इसहाक रहे। इसहाकके छावा याकूब रहे। याकूबके छावनके यहूदा और ओकर दादू-भैयन रहिँत। यहूदक छावनके फारेस और जाहेर रहिँत, यनके दाई तामार रहिन। फारेसके छावा हेस्रोन, हेस्रोनके छावा आराम रहे। आरामके छावा अम्मीनादाब रहे। अम्मीनादाबके छावा नहशोन रहे, और नहशोनके छावा सल्मोन रहे। सल्मोनके छावा बोअज रहे, और बोअजके दाई राहाब रहे। बोअजके छावा ओबेद और ओबेदके दाई रुथ रहिस। राहाब और रुथ यहूदी नै रहिँत। ओबेदके छावा यिशै, यिशैक छावा दाऊद रज्वा रहे। दाऊदके छावा सुलेमान रहे। सुलेमानके दाई दाऊदसे भोज करनासे आघे उरियाहक जन्नी रहे। सुलेमानके छावा रहबाम रहे। रहबामके छावा अबिया रहे, और अबियक छावा आसा रहे। आसक छावा यहोशापात रहे, और यहोशापातके छावा यहोराम रहे। यहोरामके छावा उज्जियाह रहे। उज्जियाहक छावा योताम रहे, और योतामके छावा आहाज रहे। आहाजके छावा हिजकियाह रहे। हिजकियाहक छावा मनश्शे रहे, और मनश्शेक छावा अमोन रहे। अमोनके छावा योशियाह रहे। यकोनियास और यकर भैयन योशियाहक नतियन रहिँत। यने बेबिलोनमे इजरायलीनहे बन्दी बनाके लैजिनासे आघे जल्मल रहिँत। बेबिलोनमे बन्दी बनाके लैगिलक समयसे लेके येशूक जल्मल समयसमके येशूक पुर्खनके सूचि यी हो: यकोनियासके छावा शालतिएल रहे, शालतिएलके छावा यरुबाबेल रहे। यरुबाबेलके छावा अबिउद रहे, अबिउदके छावा एल्याकीम रहे, और एल्याकीमके छावा आजोर रहे। आजोरके छावा सादोक रहे, सादोकके छावा आखिम रहे, और आखिमके छावा एलिउद रहे। एलिउदके छावा एलाजार रहे, एलाजारके छावा मत्तान रहे, और मत्तानके छावा याकूब रहे। याकूबके छावा योसेफ रहे, और योसेफके जन्नी मरियम रहे। यहे मरियम येशूक दाई रहिन, जोन येशूहे ख्रीष्ट कहिजाजाइत। असिके अब्राहामसे दाऊदसम चौध पुस्ता, दाऊद रज्वक समयसे बेबिलोनमे बन्दी बनाके पुगाइल सम् चौध पुस्ता, और बेबिलोनमे बन्दी बनाके पुगाइल समयसे लेके ख्रीष्टके जल्मलक समयसम चौध पुस्ता हुइलाँ।


येशू ख्रीष्टके जलमसे आघे असिके हुइल: मरियमके ठकौनी योसेफके संग हुइल रहिस, पर ओइन्के भोज हुइनासे आघे कुँवारीएमे मरियम पवित्र आत्मक शक्तिसे पैनाहाँ हुइलक पता चलल। (कुँवारीएमे पैनाहाँ हुइना मोशक नियम कानुनके विरोधमे रहे।) पर ओकर हुइना वाला थरवा योसेफ मजा मनैया हुइलक ओहोँरसे, उहिहे लाजमे नै परना इच्छा करके उहिसे चुप्पेसे ठकौनी टुरना विचार करल। ऊ असिके यहे कारणसे सोँचल, काकरेकी यदि कौनो लौँदी भोज हुइनासे आघे पैनाहाँ होजाइत कलेसे असिके हुइना कलक मोशक नियम कानुनके उलंघन करना हो। पर जब ऊ यी बात विचार करतेहे, तब ओकर सपनामे परमेश्वरके स्वर्गदूत देखा पर्लिस, और उहिहे असिक कलिस, “योसेफ, दाऊदके सन्तान, मरियमहे अपन जन्नीक रुपमे स्वीकार करक लग जिन डराऊ। काकरेकी जे ओकर पेटमे बताँ। ऊ पवित्र आत्मक शक्तिसे हुइताँ। ऊ एकथो छावा लरका पाई, और तुँ हुँकार नाउँ येशू धरहो। काकरेकी ऊ अपन मनैनहे ओइन्के पापमेसे बँचैहीँ।” यी सक्कु यकर लग हुइल ताकि उ पूरा होए, जोन परमेश्वर अपन अगमवक्ता यशैयक माध्यमसे येशूक जलमके बारेमे कहल रहिँत। यशैया असिके लिखल रहे:
“हेरो, एकथो कन्या पैनाहाँ हुई,
और ऊ एकथो लरका पाई,
और हुँकार नाउँ इम्मानुएल धारजाजाई,
जेकर मतलब हो, ‘परमेश्वर हमार संग।’”
योसेफ निंदेमेसे जागगिल और ओस्तेहेँके करल जसिके परमप्रभुक स्वर्गदूत उहिहे अह्राइल रहिस; ऊ मरियमसे भोज करलेहल और उहिहे अपन घरे लयानल। मरियम लरका नै पाइतसम योसेफ ओकर संग शारीरिक सम्बन्ध नै धारल। और योसेफ उ लरकक नाउँ येशू धारल।

Escolta मत्ती 1