Athpariya 2023 WBT (NT) Non-Dramatized

Athpariya 2023 WBT (NT) Dramatized

साङ् लेम्‍बा ओएङ्‌स्‍वालेङ् येसुङा पाटरुस, याकुब हिट्‌नुङ् उन्‍झा युहान्‍ना ठिक् केना झोन्‍झोबालेङ् आरुलाम्‍मा आलाक्‍का खाट्‌टुचे॥ हिट्‌नुङ् हिट्‌नि हिट्‌नागाँ उपुयुगेट्‌टुलोक् येसुङाना उरुप् फेराँ लिसे॥ उन्‍ङाना ओनाभाक् नाम् गाड्‌डे डोक् ओम्‍से, हिट्‌नुङ् ओलोट्‌लिङ् फुटुम्‍बुरि फुट्‌ना लिसाउङ् व्‍हाङ् गाड्‌डे ओम्‍से॥ हिट्‌नुङ् हिट्‌ना बेला डोक् मोसा हिट्‌नुङ् एलिया ठेट्‌टाचे, हिट्‌नुङ् येसुलोक् मुन्‍डुप्‍मा ठालाँ ओचोगुए॥ पाटरुसङा येसु लोडुए, “आटाङ्‌बा, आनि नाहि लिमा ओचेट्‌नु लियुक्॥ खान्‍ङा निङ्‌ग्‍वा आचोगुटु भोने, आङा नाहि सुम्‍बोक् युङ्‌माना याक्‍सा चोगुङ्‌टुङ्, ठिक् खान् लोङ्‌सा, ठिक् मोसा लोङ्‌सा हिट्‌नुङ् ठिक् एलिया लोङ्‌सा॥”
पाटरुस हिड्‌डे पिक्‍सा चेक्‍टेट्‌टाना बेला ओम्‍साना खिमेमा उङ्‌साउङ् हिट्‌नागा टेप्‍टुचे, हिट्‌नुङ् हिट्‌ना खिमेमा भिट्‌रालाम्‍मा ठिक् नाड्‌डेना रिङ् मुक्‍टे, “ना आङाना आमायालु छा, उन्‌लोक् आङा आड्‌डिक् हारका लिसाङे, उन्‍ङा मालोडिगा रिङ् खेम्‍सानुम्॥” नाड्‌डेना रिङ् चेलाचिङा ओखेम्‍सुङ् हिट्‌नागा आड्‌डिक् उकिट्‌टाउङ् हाम्‍बोम्‍फोप् ओचोगे॥ टरो येसु आबाउङ् हिट्‌नागा खोट्‌टुचिउङ् लोडुचे, “कोबानि, किट्‌नेनिन्॥” हिट्‌नुङ् हिट्‌नागाँ उपुयुनाँ हिट्‌नि येसु एरोक् उनिसुए, आरु साक्‍चा उनिस्‍वाट्‌टुन्‌चिन्॥
हिट्‌नुङ् हिट्‌नागा झोन्‍झोबालाम्‍मा युमा उङ्‌सागेट्‌टाना बेला येसुङा हिट्‌नागा लोडुचे, “याप्‌मि छा सियुङ् उहिङ्‌ग्‍वाट् लियुङ् मिकोब्‍मे सोम्‍मा खानिङा ना आनिसुम्‍ना रिङ् साक्‍चा लोनेनुम्‌चिम्॥”
हिट्‌नुङ् चेलाचिङा उन् नाड्‌डे पिक्‍सा उसिलाप्‍टुए, “धारमाबिधि काहिसिक्‍बाचिङा पोङ् खिरिस्‍ट टामा पाइले एलिया पाइला टामा कोन्‌युक् पिक्‍सा उमाट्‌टुटुगा?”
येसुङा हिट्‌नागा लोडुचे, “छेम्‍बा डोक्, एलिया टायुक्, हिट्‌नुङ् उन्‍ङा सोब्‍बे रिङ् टोङ्‌सुटु॥ टरो आङा खानि लोनाँनि, एलियाम्‍टे पाइले डोक् टामैडे, हिट्‌नुङ् याप्‌मिचिङा उन् मिसेन् उनिस्‍वाट्‌टुन्, टरो हिट्‌नागाँ उन्‌चि निङ्‌ग्‍वाङि जे उमिट्‌टुए हिट्‌नाडेडोक् ओमेट्‌टुए॥ हिट्‌नाड्‌डे डोक् याप्‌मि छाङा चा हिट्‌नागाँगा मुक्‌लाम्‍मा याङ्‌छामा आङ्‌डुटु॥” टब येसुङा बाप्‌टिस्‍मा कापि युहान्‍नाङाना उरिङ् माट्‌टुना नुङ् ओचेलाचिङा बुजा ओचोगुए॥


येसु सुम्‍बाङ् ओचेलाचिलोक् याप्‌मिचिगा खिमेयाङ्‌मे उलिसागा डेन्‌ङि ओहोन्‍डा ओटायानाँ हिट्‌नि ठिबाङ् याप्‌मि उन् सोरि आबाउङ् उटुम्‍बुट् येप्‍टुङ् लोडुए, “आडाङ्‌बा, ना आइछा लुक्‍मा याङ्‌टुक्‍टाबिडा लो, पोङ्‌भोने ना ठाप्‌चिलिङ्‌ङा लाबुङ् आड्‌डिक् याङ्‌छामा आङ्‌डुएट्‌टु॥ हिट्‌ना काइले मिङि ठाना, काइले चुवाङि लिग्‍ना॥ आङा काचेलाचि सोरि ना आप्‍टुङे, टरो हिट्‌नागाँ नुमानिङ् चोक्‍मा उहिडुवाट्‌टुन्॥”
येसुङा हिट्‌नागा लोडुचे, “हाउ बिस्‍वास मालेगा हिट्‌नुङ् ओभेन्‍गा याप्‌मिचि, आङा खानिलोक् खोना बेला सोम्‍मा युङ्‌ङाना? खोना बेला सोम्‍मा खानि आङा आङ्‌नानिगा? खोलो हिट्‌ना पिच्‍छा नाहि आङा सोरि आप्‍टानुम्॥” येसुङा हिट्‌ना टोम्‍गाचिगा खेमा लाप्‍टुए हिट्‌नुङ् हिट्‌ना होन्‍डाउङ् खाडे॥ हिट्‌नुङ् हिट्‌ना पिच्‍छा हिट्‌ना बेला डोक् नुमानिङ् लिसे॥
हिट्‌नुङ् चेलाचि येसु सोरि सोगोप् ओआबाउङ् नाड्‌डे पिक्‍सा उसिलाप्‍टुए, “आन्‍याँम्‍बाक् हिट्‌ना ओचाफेन्‍ना रिमेट् पोङ् होट्‌मा हिनेट्‌निम्‍माना?”
उन्‍ङा हिट्‌नागा लोडुचे, “खानिगा बिस्‍वास खाट्‌टिप्‍मा लिसानाँ, हिट्‌ना होप्‍मा आहिनेट्‌निम्॥ छेम्‍बा, आङा खानि लोनाँनि, खानिलोक् पाट्‌छेयो सागाङाना ठिक् ओगेडा टेप्‍मा बिस्‍वास युङ्‌ग्‍वा भोने ना झोन्‍झोबो ‘नाहिलाम्‍मा मासाडा’ आलोडुम्‍नाँ मायुएट्‌युक्॥ हिट्‌नुङ् खानिङा जे चा चोक्‍मा आहिडुम्‍टुम्॥ टरो ना पाराना टोन्‍डेबाउम् बिन्‌टि चोगुमुङ् हिट्‌नुङ् उपासा युङिउङ् एडोक् रिक्‍मा हिडुम्‍टुम्॥”


येसु ओचेलाचिलोक् गालिल छेट्‌राङि ओवासाना बेला उन्‍ङा हिट्‌नागा लोडुचे, “याप्‌मि छा धोका उपिडुङ् याप्‌मिचि मुक्‌ङि उपिडुटु॥ हिट्‌नुङ् हिट्‌नागाँ ओसेडुटु, टरो उन् सुम्‍बोक् लेम्‍बा फेरि उहिङ्‌ग्‍वाट् लियुङ् कोब्‌युक्॥” ना रिङ् ओखेम्‍सुङ् हिट्‌नागाँगा आड्‌डिक् उन्‌चि निङ्‌ग्‍वा टुगे॥

जब येसु लोक् ओचेलाचि काफारनाहुमङि ओहोन्‍डा ओटाए, हिट्‌नि माङ्‌ठानाङिगा तिरो काफोक्‍बाचिङा पाटरुस सोरि ओआबाउङ् उसिलाप्‍टुए, “पाक् खानि काहिसिक्‍बाङा तिरो हुङुन् गै?”
पाटरुसङा लोडुचे, “पोङ् हुङुन्‍ना? हुङुटु॥” पाटरुस पाङ् भिट्‌रा लिगाउङ् येसुङा डोक् रिङ् होट्‌टुङ् पाटरुस लोडुए, “हाउ सिमोन, कानिङ्‌ग्‍वाङि पाक् आमिट्‌युक्‍ना? नाराङिगा हाङ्‌बाचिङा साक्‌लाम्‍मा तिरो ओफोगुटुगा? आप्‍पे उन्‌चि छाचिलाम्‍मा इ आरुलाम्‍मा इ?”
पाटरुसङा लोडुए, “आरुलाम्‍मा ओफोगुटु॥”
येसुङा हिट्‌ना लोडुए, “हिट्‌नाडे भोने आप्‍पे उन्‌चि छाचिङाम्‍बाक् तिरो हुङ्‌मा कोन्‌निन्‍ना रैछो॥ टरो हिट्‌नागा आनिलोक् उन्‌चि रेक् ओकाट्‌नियाक् नुङ् गालिल तालङि खाडाउङ् बाल्‌छि लेप्‍टु, हिट्‌नुङ् पाइले ठायाना ङासा टाडु॥ हिट्‌ना ङासाङाना ओयासि ओङ्‌सुङ् पुयु हिट्‌नि खान्‍ङा ठिक् रुपाङाना राङ् आटुबुटु॥ हिट्‌ना डोक् खाट्‌टुङ् माङ्‌ठानाङिगा तिरो काफोग्‍बाचिङि खाट्‌टुङ् खान् हिट्‌नुङ् आङाना लाउङ्‌सा तिरो हुङु॥”

Escolta मात्‌ति 17