If you have would like a copy of this version please contact info@davarpartners.org

Text: Rana Tharu New Testament, CC-BY-SA-4.0, The Love Fellowship. -- Audio: Rana Tharu New Testament Audio Bible, CC-BY-SA-4.0, Davar Partners International, The Love Fellowship, 2023

Rana Tharu New Testament

Rana Tharu Bible (राना थारु) by The Love Fellowship is licensed under Creative Commons Attribution-ShareAlike 4.0 License.

अखमिरी रोटीको तेवहार जौनके यहूदीनको निस्तार तेवहार कहात रहएं, बो ढिँगै आइगओ रहए। मुखिया यहूदी पुजारी और मोशाको नियम कानुन सिखान बारे, येशूके कैसे मारएं करके मौका ढुणत रहएं, पर आदमीनसे बे डरात रहएं।

और बहे बेरा बाह्र चेला मैसे यहूदा इस्करियोत कहान बारोके भितर शैतान घुसिगओ। बिनके हातमे येशूके कैसे पकणामओं करके मुखिया यहूदी पुजारी और कप्तानके ठिन जाएके बो सल्लाह करीं, बे खुसी भए, और बोके रुपैया देन कबुल करीं। बो सहमत हुइगओ, और भिड नाए भओ बेरामे येशूके पकणन मौका ढुँणन लागो।


अखमिरी रोटीको तेवहारको दिन आओ, जौन दिन यहूदीनको निस्तार तेवहारको भोजमे जानबरको बलिदान मारके चढान पणत रहए। येशू पत्रुस और यूहन्नाके अइसो कहिके पठाइ, “जाएके हमर ताहीं यहूदीनको निस्तार तेवहारको भोज तयार करओ।”
बे येशूसे कहीं, “हम जा भोज कहाँ तयार करएं?”
येशू उनसे कही, “तुम सहरमे घुसैगे तओ घल्लामे पानी बोकन बारो एक जनै आदमी तुमके मिलैगो। बो जौन घरमे घुसैगो हुवाँतक बोको पिच्छु-पिच्छु जैयओ, और तुम बो घरको आदमीसे कहियओ, ‘महान गुरु तुमसे पुँछत हए, कि मए अपन चेला सँग यहूदीनको निस्तार तेवहारको भोज खान बारो पहुना-कोनो कहाँ हए?’ बो तुमके पाँण उपर सजो सजाओ भओ बडो कोनो दिखाबैगो, और हुवँए तुम तयार करियओ।” चेला गइभए और जैसे येशू कही रहए उइसी हुवाँ पाइं, और बे यहूदीनको निस्तार तेवहारको भोज तयार करीं।


और जब बेरा भओ, तओ येशू अपने चुनेभए चेलनके सँग खानके बैठो। येशू बिनसे कही, “मए दु:ख भोगनसे और मरनसे अग्गु जा यहूदीनको निस्तार तेवहारको भोज तुमर सँग खानके बडो इच्छा करो रहओं, काहेकी मए तुमसे कहात हओं, परमेश्वरको राज्यमे जा उदेश्य पुरो नाए होनतक, मए जा भोज दुस्रो चोटी कभु नाए खामंगो।”
तओ येशू अंगुरको रसा कटोरामे लैके परमेश्वरके धन्यबाद चढाएके कही, “जाके लेओ, और तुम आपसमे बाँट लेओ। काहेकी मए तुमसे कहात हओं, परमेश्वरको राज्य नाए आनतक अब मए अंगुरको रसा नाए पिइमंगो।”
और येशू रोटी लइ और परमेश्वरके धन्यबाद चढाएके रोटीके तोणी और बिनसे अइसे कहात दइ, “तुमर ताहीं दओगओ जा मिर शरीर हए। मिर सम्झनामे जा करीयओ।” अइसियए खाएके येशू कटोरा लइ और कही, “जा कटोरा तुमर ताहीं बहाओ गओ मिर बलिदानको खुनमे स्थापित करोभओ नयाँ करार हए। पर देखओ, मोके पकणन बारोको हात मेरी सँग टेबुलमे हए। काहेकी मए आदमीको लौंणाके ता, पबित्र-बचनमे कहाओगओ अनुसार जानए पणैगो। पर बो आदमीके डर लागन बारो सजाय होबैगो, जौन मोके पकणबाए देहए।” तओ बे आपसमे पुँछन लागे, कि हम मैसे अइसो काम करन बारो कौन हुइहए जो अइसो काम करहए।

तओ उनमे जा बातचित फिरसे होन लागो, कि हम मैसे कौनके बडो मानो जएहए? येशू बिनसे कही, “गैर-यहूदीनके राजा बिनके उपर सासन करत हएं, और बिनके उपर अधिकार चलान बारेनसे ‘उपकारी’ कहोजात हए। पर तुम अइसो मतहोबओ। तुम मैसे जौन बडो हए, बो छोटो बनए, और अगुवा होन बारो सेवक होबए। काहेकी बडो कौन हए? खानु खानके बैठन बारो कि ठाणके सेवा करन बारो? का खानु खानके बैठन बारो बडो नाए हए? पर मए तुमर बीचमे एक सेवा करन बारो कता हओं।
तुमभर मिर परीक्षामे मोके साथ देन बारे हओ। जैसी मिर दौवा मोके एक राज्य दइ हए, मए फिर तुमके देहओं, ताकी मिर राज्यमे तुम मिर टेबुलमे खाबैगे और पिबैगे, और इस्राएल देशके बाह्रऔ कुलके न्याय करके सिंहासनमे बैठैगे।”


येशू कही, “सिमोन, ए सिमोन, देख, जैसे एक किसान गेहुँ मैसे भुसाके अलग करत हए। उइसी परमेश्वरसे, शैतान तुम सबके जाँचनके ताहीं अच्छे आदमीनके खराब आदमीन मैसे अलग करनके ताहीं अनुमति लैलै हए। पर मए तिर ताहीं परमेश्वरसे प्राथना करत हओं, कि मोएमे तिर बिश्वास नाए हटए। और जब तए पाप करन छोडके परमेश्वर घेन घुमैगो, तओ अपने बिश्वासी ददाभइयनके मोएमे स्थिर करबा।” तओ पत्रुस येशूसे कही, “हे प्रभु, मए तुम सँग जेलमे जान और मरन ताहीं फिर तयार हओं।”
तओ येशू कही, “पत्रुस, मए तोसे कहात हओं, ‘मए तुमके चिनतए नाए हओं’ काहेकी तीन चोटी तए इन्कार नाएकरनतक मुर्गा नाए बासैगो।”
येशू बिनसे कही, “जब मए तुमके अच्छो समाचार परचार करन पठाओ रहओं, तओ तुमके रुपैया, झोरी और जुता बिना पठाओ रहओं, तओ का तुमके कोइ चीजको कमी भओ रहए?” बे कहीं, “कोइ चीजको कमी नाए भओ रहए।”
येशू बिनसे कही, “पर अब आदमी हमर बिरुद्धमे होमंगे, जौनके ठिन रुपैया हए बो रुपैया लैलेबए, और झोरी फिर लैलेबए, और जौनके ठिन तरबार नाए होबए बो अपनो चदरा बेँचके एक तरबार किनके लैलेबए। काहेकी मए तुमसे कहात हओं, पबित्र-शास्त्रमे लिखो भओ ‘बाके अपराधीनके सँग गिनोगओ’ बात मोएमे पुरा होन पणैगो। काहेकी मिर बारेमे जो बचन लिखो हए, बो नेहात्तओ पुरा होनडटो हए।”
तओ चेला कहीं, “हे प्रभु, देखओ, हियाँ दुई तरबार हएं।” येशू कही, “इतका होएसे पुग जाबैगो।”


येशू बाहिर निकरके सदामान हानी जैतून डँगामे गओ, और बाके चेला फिर पिच्छुपिच्छु गए। बो ठाउँमे पुगके येशू उनसे कही, “तुम सतावटमे नाए पणओ कहिके परमेश्वरसे प्राथना करतए रहाओ।” येशू बिनसे लगभग: तीस मिटर दुर जाएके घुँटो टेकके परमेश्वरसे अइसे प्राथना करी, “हे दौवा, तुमर इच्छा हए, तओ जा कटोरा मिर ठिनसे हटाए देओ। पर मेरी इच्छा नाए, तुमरी इच्छा पुरी होबए।” तओ स्वर्गसे एक स्वर्गदूत येशूके तागत देनके ताहीं बाके ठिन दिखाइ पणो। और एकदमए संकटके समयमे बा औ जद्धा प्राथना करन लागो, और बाको पसिना खुनको बडो-बडो बुन्दा हानी जमिनमे गिरत रहएं।
परमेश्वरसे प्राथना करके, उठके चेला ठिन आओ तओ येशू उनके शोकके मारे उँघानडटे पाइ। बा बिनसे कही, “तुम काहे उँघाए रहेहओ? उठओ और सतावटमे नाए पणन ताहीं परमेश्वरसे प्राथना करओ।”


येशू मसकतए रहए तओ एक भिड हुवाँ आएगै। बाह्र चेला मैसे एक जनै यहूदा इस्करियोत कहान बारो अग्गुअग्गु आओ। येशूके चुम्मन करन ताहीं बो बाके ढिँगै आओ। पर येशू बोसे कही, “यहूदा इस्करियोत, का तए आदमीको लौंणाके, चुम्मनसे बिश्वासघात करन चाँहत हए?”
तओ बाके चेलनके का होबैगो करके देखके बासे कहीं, “प्रभु का हम तरबार चलामएं?” बिन मैसे एक आदमी प्रधान यहूदी पुजारीको नोकरके मारीं, और बोको दहिना कान चट्टसे काटदइ।
पर येशू कही, “हुइगओ, अब अइसो मत् करओ।” तओ बो आदमीको कान छुइके येशू बोके पहिलीयए कता अच्छो करदइ।
और येशूके बिरुद्धमे आएभए मुखिया यहूदी पुजारी, यरूशलेमको मन्दिरके कप्तान, और यहूदी अगुवनको समुहसे येशू कही, “का तुम डाँकुके बिरुद्धमे आए हानी तरबार और लट्ठी लैके आए हओ? मए रोजदिन यरूशलेमको मन्दिरमे तुमर सँग रहओं तुम मिर बिरुद्धमे हात नाए उठाए। पर अब तुमर समय जहेहए, और अन्धकारको शक्ति जहेहए।”


बे येशूके पकणके लैगए, और बाके प्रधान यहूदी पुजारीके घरमे लैके आए। पर पत्रुस दुरसे बाके पिच्छुपिच्छु लागो। हुवाँ आँगनके बीचमे आगी पजारके आदमी जम्मा हुइके बैठे रहएं। पत्रुस फिर बिनके सँग बैठो। एक नोकरनी आगीको उजियारोमे बोको ढिँगै आएके ध्यानसे देखी और कही, “जहु आदमी फिर बाके सँग रहए।”
पर पत्रुस अइसे कहिके इन्कार करी, “ए नारी, मए बाके नाए चिनत हओं।” थोरी देर पिच्छु दुस्रो बोके देखके कही, “तए फिर बिन मैसे हए।” तओ पत्रुस फिर जबाफ दइ, “ए आदमी, मए बो नाए हओं।” लगभग एक घण्टा पिच्छु एक औ आदमी जोड दइके कहान लागो, “नेहात्तओ जा फिर बहेक सँग रहए, काहेकी बा फिर गालील परदेशको हए।”
पर पत्रुस कही, “ए आदमी, तुम का कहात हओ, मए नाए जानत हओं।” बो मसकतए मसकत तुरन्त मुर्गा बासदइ। और प्रभु घुमके पत्रुसके देखी। “आज मुर्गा बासनसे अग्गु तए मोके तीन चोटी इन्कार करैगो” करके प्रभुको बचन पत्रुसके याद आइगओ। और बो बाहिर निकरके धरधरहुँस रोन लागो।


तओ येशूके पकणके आदमी बाके गिल्ला करीं, और पिटीं, और बाकी आँखी तोपके बासे पुछीं, “तोके मारन बारो कौन हए? ले, अगमबाणी बोल।” बे बाके बिरुद्धमे बदनामकी बहुत बात कहीं।


उजियारो होतएखिना, इकट्ठा भए जनताके यहूदी अगुवनको समुह, मुखिया यहूदी पुजारी और मोशाको नियम कानुन सिखान बारे येशूके अपन यहूदी सभाघरमे लैगए, और कहीं, “तए ख्रीष्ट हए कहेसे हमसे कहो।” बा बिनसे कही, “मए कएहओं तहुँफिर तुम नाए पतियए हओ। और अगर मए पुँछंगो तहुँफिर तुम जबाफ नाए देहओ। पर अब मए आदमीको लौंणा परमेश्वरको महान शक्तिको दहिना घेन बैठंगो।”
तओ बे सब कहीं, “उइसो हए कहेसे, का तए परमेश्वरको लौंणा हए?” बा बिनके उत्तर दइ, “तुमहीं कहात हओ, मए बहे हओं।”
बे कहीं, “हमके अब औ साक्षी नाए चाहैगो, काहेकी बा परमेश्वरको बदनाम करत हम बाको मुँहुँसे सुनडारे हएं।”

Escolta लूका 22