If you have would like a copy of this version please contact info@davaraudiobibles.org

The Dawro Bible, CC-BY-SA-4.0, The Word for the World International and The Word for the World Ethiopia (Text). Dawro Audio Bible, CC-BY-SA-4.0, Davar Partners International, 2018. (Audio).

ጌሻ ማጻፋ

ቶፍሎሳ፥ የሱስ ሳሉዋ ቤዳ ጋላሳይ ጋካናዉ፥ ኦናዉነ ታማርሳናዉ ዶሜዳዋ ኡባባ ታን ታ ኮይሮ ማጻፋን ጻፋድ። ሳሉዋ ባናፐ ካሰ እ ባረ ዶሪደ ኪቴዳዋንታ ጌሻ አያናን አዛዜዳ። እ ባረ ኪቴዳዋንቶ ኦይታሙ ጋላሳ ቤቲድነ ቃይ ጾሳ ካዉተባ ኡንቱንቶ ኦዲደ፥ ባረ ዋይያፐ ጉይያን፥ ሀይቁዋፐ ደንዴዳዋ ስ ባይናን ሎይ አማንደ፥ ባረና ኡንቱንታ በሴዳ። ኡንቱንቱና እትፐ ደኢደ፥ ኡንቱንታ ሀዋዳን ያጊደ አዛዜዳ፤ “የሩሳላመፐ ከሶፕተ፤ ሽን ህንተንቱ ታፐ ስሴዳ ታ አቡ ህንተንቶ እማና ጊደ ህዶቴዳዋ ናግተ። አያዉ ጎፐ፥ ዮሃንስ ሃን ጻማቄዳ፤ ሽን ጉ ዎድያፐ ጉይያን፥ ጌሻ አያናን ህንተንቱ ጻማቀታንታ” ያጌዳ።


የሱስ ኪቴዳዋንቱ የሱሳና ጋከቴዳ ዎደ አ፥ “ጎዳዉ፥ ሀ ዎድያን እስራኤላቶ ካዉተ ዛራኒ?” ያጊደ ኦቼድኖ።
የሱስ ኡንቱንታ፥ “ታ አቡ ባረ ጎዳተን ኬሬዳ አገናነ ዎድያ ህንተንቱ ኤራናሳ ግደና። ሽን ጌሻ አያናይ ህንተንቱ ቦላ ዎያ ዎደ፥ ዎልቃ ህንተንቱ አካንታ፤ ያቲደ የሩሳላመንነ ይሁዳ ጋድያ ኡባን፥ ሳማርያንነ ጋድያ ጋጻ ኡባ ጋካናዉ ታዉ ማርካትያዋንታ ግዳንታ” ያጌዳ።
ሄዋ ጌዳዋፐ ጉይያን፥ ኡንቱንቱ ጼልሽን፥ ቁ ቁ ጊደ፥ ሳሉዋ ቢና፥ ኡንቱንቱ አይፍያፐ ሻሪ አ ገንዳ።
የሱስ ቦላዉ ደንድያ ዎደ፥ ኡንቱንቱ ሳሉዋ ጫድ ጼልሽን፥ ቦ ማዩዋ ማዬዳ ላኡ አሳቱ ኤለካ ኡንቱንቱ ማታን ኤቂደ፥ “ጋሊላ አሳቶ፥ ሳሉዋ ጼሊደ፥ ህንተንቱ አያዉ ኤቄድቴ? ሀ ህንተንቱፐ ሳሉዋ ቤዳ የሱስ ሳሉዋ ብያዋ ህንተንቱ በኤዳዋዳንካ፥ ስሚደ ያናዋ” ያጌድኖ።


ሄዋፐ ጉይያን፥ የሱስ ኪቴዳዋንቱ ደብረ ዛይተ ጌተትያ ዎጋራ ም ደርያፐ የሩሳላመ ስሜድኖ። ዎጋራ ም ደሪ የሩሳላመፐ እት ኪሎ ምትርያ ኬና። የሱስ ኪቴዳዋንቱ የሩሳላመ ገሊደ፥ ባረንቱ ደእያ ሳኣ ቃ ፑደ ከሴድኖ፤ ያ ከሴዳዋንቱ ሱንይ ጰጽሮሳ፥ ዮሃንሳ፥ ያቆባ፥ እንድራሳ፥ ፕልጶሳ፥ ቶማሳ፥ ባርታላሞሳ፥ ማቶሳ፥ እልፕዮሳ ናኣ ያቆባ፥ ባረ ጋድያዉ ሴለትያ ስሞናነ ያቆባ ናኣ ይሁዳ። ሀዋንቱ ኡባቱ ማጫዋንቱና፥ የሱሳ ዳይ ማይራምናነ የሱሳ እሻቱዋና ኡባይ እት ዎዛና ግዲደ፥ ኡባ ዎደ እትፐተን ዎሳዉ ሺቂኖ።
ሄ ዎደ፥ ጰጽሮስ ጼታነ ላታማ ግድያ አማንያ አሳ ሺቁዋን እትፐ ደእያ ባረ እሻቱዋ ግዶን ደንድ ኤቂደ፥ ሀዋዳን ያጌዳ፤ “ታናዳን አማንያዋንቶ፥ የሱሳ ኦይቄዳዋንታ ካለዳ ይሁዳባ ጌሻ አያናይ ካሰ ዳዊተ ዶናን ኦዴዳ ጾሳ ማጻፋ ቃላይ ፖለታናዉ በሴ። አያዉ ጎፐ፥ ይሁዳ አስቆሮቱ ኑናና ደኤ፤ ቃይ ኑናና እቱዋ ግድ ፓይደቲደ ኦሱዋ ባጋይ ደአና ማላ ዶረቴዳ” ያጌዳ።
ይሁዳ አስቆሮቱ ባረ ኢታ ኦሱዋን ደሜዳ ሚሻን ጋድያ ሻሜዳ፤ ስንዉ ጉፋኒደ ኩንድና፥ አ ኡሉ ግዱዋፐ ዳከቴዳ፤ አ ማራጪ ኡባይካ ካረዉ ጱልጸት ከስ አጌዳ። ይሁዳ ቦላ ሀኔዳዋ የሩሳላመን ደእያ አሳይ ኡባይ ስሴዳ፤ ሄዋ ድራዉ፥ ሄ ጋድያ ባረንቱ ቃላን አከልዳማ ጊደ ሱንድኖ፤ ሄዋ ብለይ ሱ ጋድያ ግያዋ።
ጰጽሮስ ኦዲደ፥ አያዉ ጎፐ፥ ማዝሙርያ ማጻፋን፥
አ ጎሊ መላ አቶ፤
ኦንነ ሄዋን ደኦፖ
ቃይ
አ ሱንተካ ሀራይ አኮ
ጌተቲደ ጻፈቴዳ። ሄዋ ድራዉ፥ እት አሳይ ጎዳ የሱሳ ደንዱዋ ማርካታናዉ፥ ኑናና ጋከታናዉ በሴ፤ ዮሃንስ ጻማቄዳ ዎድያፐ ዶሚደ፥ የሱስ ኑፐ ሳሉዋ ቤዳ ዎዲ ጋካናዉ፥ ጎዳ የሱስ ኑናና ሀመቴዳ ዎድያ ኡባን እ ኑናና ደእያዋንቱፐ እቱዋ ግድ ሱንታናዉ በሴ።
ሄዋፐ ጉየ አማንያ አሳይ ዶሮ ዮስጾሳ ግያ ባርሳባ ጌተትያ ዮሴፎነ ማትያሳ ላኡዋ ኤሴድኖ። ሄዋፐ ጉይያን፥ ጾሳ ዎሲደ፥ “ኡባ ዎዛና ኤርያ ጎዳዉ፥ ይሁዳ አስቆሮቱ ባረሳ ባናዉ የጊደ ቤዳ ኦሱዋነ የሱስ ኪቴዳ ኦሱዋ ሀዳራ አካናዳን፥ ሀ ላኡ አሳቱዋፐ እቱዋ ኔን ዶሬዳዋ ኑና በሳ” ያጌድኖ። ኡንቱንቱን ሳማ የጌድኖ፤ ሳማይ ማትያሳ ቦላን ዎና፥ ማትያስ የሱስ ኪቴዳ ታማነ እት ኪተታዋንቱና ፓይደቴዳ።

Escolta ኪታ 1