New Testament in Triqui, Copala (MX:trc:Triqui, Copala)

Triqui, Copala

Dan me se cavii Jesús caꞌanj soꞌ, ga̱a ne̱ queneꞌen soꞌ ꞌo̱ síí tuchri̱i a. Dan me se síí tuchri̱i yoꞌ me se tuchri̱i soꞌ asi̱j caꞌngaa soꞌ a. Ga̱a ne̱ xnáꞌanj nij síí tucuꞌyón snana̱ Jesús man Jesús, cataj nij soꞌ a:
―Me cheꞌé tuchri̱i síí nihánj, ga̱a maestro̱ꞌ. Maꞌa̱n soꞌ quiꞌyaj cacunꞌ naꞌ. Ase rej soꞌ quiꞌyaj cacunꞌ xa̱ꞌ ―taj nij soꞌ, xnáꞌanj nij soꞌ man Jesús a.
Ga̱a ne̱ cataj Jesús a:
―Né maꞌa̱n soꞌ do̱ꞌ, né re̱j soꞌ ga̱ nii soꞌ do̱ꞌ, me síí tumé cacunꞌ maꞌ. Ma̱an se Yaꞌanj me rá queneꞌe̱n níꞌ da̱j quiꞌya̱j Yaꞌanj cheꞌé soꞌ ado̱nj. ꞌO̱ se vaa cheꞌé qui̱ꞌyáá ꞌu̱nj se‑su̱u̱n síí caꞌnéé manj rihaan chumii̱ nihánj ado̱nj. Ase vaa rej ranga̱ꞌ vaa ya̱j, ne̱ caꞌve̱e quiꞌya̱j suun níꞌ ya̱j ado̱nj. Tza̱j ne̱ quisi̱j güii caꞌne̱ꞌ rá níꞌ, ne̱ ase vaa rej nii̱ roꞌ, ga̱a̱ güii yoꞌ, ne̱ se̱ caꞌvee quiꞌya̱j suun níꞌ doj a̱ maꞌ. Tza̱j ne̱ cuano̱ nihánj me se va̱j ꞌu̱nj rihaan chumii̱ nihánj, ne̱ ase vaa yaꞌan chuguu̱n roꞌ, da̱nj vaa ꞌu̱nj rihaan chumii̱ nihánj ado̱nj ―taj Jesús rihaan nij síí tucuꞌyón snana̱ soꞌ a.
Quisíj caꞌmii soꞌ da̱nj, ga̱a ne̱ quirii talúj soꞌ rihaan yoꞌóó, ga̱a ne̱ quiꞌyaj soꞌ do̱j siguiꞌ man yoꞌóó yoꞌ, ne̱ caxríj soꞌ siguiꞌ yoꞌ rihaan síí tuchri̱i yoꞌ a. Ga̱a ne̱ cataj soꞌ rihaan síí tuchri̱i yoꞌ a:
―Caꞌa̱nj so̱ꞌ naꞌnu̱ꞌ so̱ꞌ rihaan so̱ꞌ rá na Siloé á ―taj Jesús rihaan soꞌ a.
Dan me se nana̱ Siloé me raj cata̱a rasu̱u̱n caꞌnéé nii man a.
Veé dan me se caꞌanj síí tuchri̱i yoꞌ, ne̱ naꞌnuꞌ soꞌ rihaan soꞌ rá na yoꞌ, ga̱a ne̱ canica̱j soꞌ caꞌnaꞌ uún soꞌ, ne̱ curuviꞌ rihaan soꞌ a.
Dan me se nij síí ya̱nj nichru̱nꞌ rej ya̱nj soꞌ do̱ꞌ, nij síí a̱j neꞌen man soꞌ ga̱a tuchri̱i soꞌ do̱ꞌ, cataj nij soꞌ a:
―Síí nihánj me síí cayáán cachíín caridad ga̱a rque̱, rá soj naꞌ ―taj nij soꞌ niꞌya̱j nij soꞌ man síí naxraꞌ rihaan yoꞌ a.
―Da̱nj asânj. Veé ya̱ soꞌ chugua̱nj ―taj taꞌa̱j nij soꞌ a.
Ne̱ ꞌó taꞌa̱j nij soꞌ cataj a:
―Taj maꞌ. Ma̱an se ase niꞌya̱j gue̱e̱ síí cachíín caridad roꞌ, da̱nj niꞌya̱j gue̱e̱ síí nihánj, tza̱j ne̱ né soꞌ me maꞌ ―taj ꞌó taꞌa̱j nij soꞌ a.
Tza̱j ne̱ maꞌa̱n síí naxraꞌ rihaan yoꞌ cataj a:
―ꞌU̱nj me síí yoꞌ síí cachíín caridad ado̱nj ―taj soꞌ a.
Cheꞌé dan xnáꞌanj nij yuvii̱ man soꞌ, cataj nij yuvii̱ a:
―Da̱j quiꞌyáá so̱ꞌ, ne̱ caꞌvee naxraꞌ rihaan so̱ꞌ ga̱ ―taj nij yuvii̱, xnáꞌanj nij soꞌ man síí naxraꞌ rihaan yoꞌ a.
Ga̱a ne̱ cataj soꞌ a:
―Síí cuꞌna̱j Jesús roꞌ, quiꞌyaj siguiꞌ, ne̱ caxríj soꞌ siguiꞌ rihanj, ga̱a ne̱ cataj xnaꞌanj soꞌ rihanj se vaa caꞌa̱nj ꞌu̱nj naꞌnu̱ꞌ ꞌu̱nj rihanj rá na Siloé a. Ga̱a ne̱ ga̱a quisíj caꞌanj naꞌnu̱ꞌ ꞌu̱nj rihanj rá na yoꞌ, ne̱ naruviꞌ rihanj na̱nj á ―taj síí naxraꞌ rihaan yoꞌ rihaan nij yuvii̱ a.
Ga̱a ne̱ xnáꞌanj nij yuvii̱ man soꞌ, cataj nij yuvii̱ a:
―Me rej vaj soꞌ cuano̱ ga̱ ―taj nij yuvii̱, xnáꞌanj nij yuvii̱ man síí naxraꞌ rihaan yoꞌ a.
―Ne neꞌenj me rej vaj soꞌ cuano̱ a̱ maꞌ ―taj síí naxraꞌ rihaan yoꞌ rihaan nij yuvii̱ a.

Dan me se caꞌanj nica̱j nii man síí naxraꞌ rihaan yoꞌ rihaan nij síí fariseo a. Dan me se güii naránj rá nij yuvii̱ israelitá me güii quiꞌyaj Jesús siguiꞌ ne̱ naxraꞌ rihaan síí tuchri̱i yoꞌ quiꞌyaj Jesús a. Cheꞌé dan xnáꞌanj uún nij síí fariseo man síí naxraꞌ rihaan yoꞌ da̱j quiꞌyaj soꞌ ne̱ naxraꞌ rihaan soꞌ a. Ga̱a ne̱ cataj síí naxraꞌ rihaan yoꞌ a:
―Caxríj soꞌ siguiꞌ rihanj, ga̱a ne̱ naꞌnuj rihanj, ne̱ cuano̱ nihánj ruviꞌ rihanj na̱nj á ―taj soꞌ rihaan nij síí fariseo a.
Cheꞌé dan cataj taꞌa̱j nij síí fariseo a:
―Né si̱j caꞌnéé Yaꞌanj rihaan níꞌ me síí quiꞌyaj naxraꞌ rihaan síí nihánj a̱ maꞌ. ꞌO̱ se ꞌyaj suun soꞌ güii no̱ xcúún níꞌ nara̱a̱n rá níꞌ ado̱nj ―taj taꞌa̱j nij síí fariseo yoꞌ a.
Tza̱j ne̱ ꞌó taꞌa̱j nij soꞌ cataj a:
―Tza̱j ne̱ né si̱j tumé cacunꞌ me soꞌ a̱ maꞌ. ꞌO̱ se ꞌo̱ síí tumé cacunꞌ me se daj chiha̱a̱ míj se̱ guun nucua̱j soꞌ quiꞌya̱j soꞌ suun sa̱ꞌ noco̱o nda̱a vaa quiꞌyaj síí nihánj a̱ maan ado̱nj ―taj ꞌó taꞌa̱j nij síí fariseo yoꞌ a.
Dan me se cuxraꞌ taꞌa̱j nij síí fariseo man nij soꞌ, ne̱ ino̱ guun rá nij soꞌ ga̱ tuviꞌ nij soꞌ niꞌya̱j nij soꞌ man Jesús a. Cheꞌé dan cataj uún nij soꞌ rihaan síí naxraꞌ rihaan yoꞌ a:
―Da̱j uun rá ma̱ꞌán so̱ꞌ cheꞌé síí quiꞌyaj naxraꞌ rihaan so̱ꞌ ga̱ ―taj nij síí fariseo, xnáꞌanj nij soꞌ man síí naxraꞌ rihaan yoꞌ a.
Ne̱ cataj soꞌ a:
―Si̱j nataꞌ snana̱ Yaꞌanj me soꞌ, rá yá ꞌu̱nj ado̱nj ―taj síí naxraꞌ rihaan yoꞌ cheꞌé Jesús a.
Tza̱j ne̱ ne cuchuma̱n rá nij síí uun chij rihaan nij yuvii̱ israelitá se vaa ya̱ ya̱ síí tuchri̱i me soꞌ ga̱a rque̱ ne̱ naxraꞌ rihaan soꞌ a. Cheꞌé dan caꞌnéé nij soꞌ nana̱ se vaa caꞌna̱ꞌ rej soꞌ do̱ꞌ, nii soꞌ do̱ꞌ, rihaan nij soꞌ a. Veé dan cuchiꞌ ro̱j soꞌ, ga̱a ne̱ xnáꞌanj nij síí uun chij rihaan nij yuvii̱ israelitá man ro̱j soꞌ, cataj nij soꞌ a:
―Ya̱ ya̱ taꞌníí ro̱j so̱j me síí nihánj naꞌ. Ya̱ ya̱ tuchrii me soꞌ ga̱a caꞌngaa soꞌ naꞌ. Asa̱ꞌ caꞌvee naxraꞌ rihaan soꞌ cuano̱, rá ro̱j so̱j ga̱ ―taj nij soꞌ, xnáꞌanj nij soꞌ man ro̱j ni̱ca̱ soꞌ a.
Ga̱a ne̱ cataj ro̱j soꞌ a:
―Taꞌni̱j ya̱ rój me síí nihánj, ne̱ tuchrii ya̱ me soꞌ asi̱j caꞌngaa soꞌ, tza̱j ne̱ ne neꞌen uxrá rój asa̱ꞌ caꞌvee naxraꞌ rihaan soꞌ cuano̱ a̱ maꞌ. Ne̱ ne neꞌen uxrá rój me síí quiꞌyaj naxraꞌ rihaan soꞌ a̱ maꞌ. Xna̱ꞌanj soj man soꞌ á. ꞌO̱ se síí a̱j noco̱o me soꞌ a. Caꞌmi̱i̱ soꞌ cheꞌé maꞌa̱n soꞌ na̱nj á ―taj ro̱j soꞌ a.
Da̱nj caꞌmii ro̱j ni̱ca̱ rej síí naxraꞌ rihaan yoꞌ cheꞌé se cuchuꞌviꞌ ro̱j soꞌ niꞌya̱j ro̱j soꞌ man nij síí uun chij rihaan nij yuvii̱ israelitá a. Dan me se a̱j guun ya̱ caꞌmii nij síí uun chij yoꞌ se vaa sese cata̱j ꞌo̱ soꞌ se vaa Si̱j Caꞌnéé Yaꞌanj Ti̱nanii man Yuvii̱ rihaan Sayuun me Jesús, ne̱ quiri̱i̱ nij soꞌ xeꞌ man síí aꞌmii da̱nj rá veꞌ tucuꞌyón nij síí israelitá stucua̱nj Moisés a. Cheꞌé dan cataj ro̱j ni̱ca̱ rej síí naxraꞌ rihaan se vaa síí a̱j noco̱o me soꞌ, ne̱ xna̱ꞌanj nij soꞌ man maꞌa̱n soꞌ a.
Cheꞌé dan nacúún uún nij soꞌ man síí naxraꞌ rihaan yoꞌ, ne̱ cataj nij soꞌ rihaan soꞌ a:
―Veꞌé cata̱j yá so̱ꞌ rihaan Yaꞌanj da̱j quiránꞌ so̱ꞌ á. ꞌO̱ se a̱j neꞌen núj se vaa xa̱ꞌ snóꞌo caꞌmii ga̱ so̱ꞌ, tza̱j ne̱ si̱j tumé cacunꞌ me soꞌ ado̱nj ―taj nij soꞌ rihaan síí naxraꞌ rihaan yoꞌ a.
Cheꞌé dan cataj síí naxraꞌ rihaan yoꞌ a:
―Ne neꞌen uxraj sese si̱j tumé cacunꞌ me soꞌ maꞌ. Ma̱an se o̱rúnꞌ rasu̱u̱n neꞌén ꞌu̱nj se vaa ga̱a rque̱, ne̱ síí tuchri̱i mej, tza̱j ne̱ cuano̱ nihánj me se ruviꞌ rihanj ado̱nj ―taj síí naxraꞌ rihaan yoꞌ a.
Cheꞌé dan xnáꞌanj nij soꞌ man soꞌ, cataj nij soꞌ a:
―Ne̱ síí caꞌmii ga̱ so̱ꞌ me se da̱j quiꞌyaj soꞌ, ga̱a ne̱ naxraꞌ rihaan so̱ꞌ quiꞌyaj soꞌ ga̱ ―taj nij soꞌ, xnáꞌanj nij soꞌ man soꞌ a.
Ga̱a ne̱ cataj síí naxraꞌ rihaan yoꞌ rihaan nij soꞌ a:
―A̱j cataj xnaꞌanj ꞌu̱nj rihaan soj, tza̱j ne̱ ne cuno̱ soj a̱ maꞌ. Me cheꞌé me rá soj cata̱j xnaꞌanj uún ꞌu̱nj rihaan soj ga̱. Gu̱un maꞌa̱n soj síí tucuꞌyón snana̱ soꞌ, rá soj naꞌ ―taj síí naxraꞌ rihaan yoꞌ rihaan nij soꞌ a.
Ga̱a ne̱ nij caꞌmii nij soꞌ ga̱ síí naxraꞌ rihaan yoꞌ, ne̱ cataj nij soꞌ a:
―Ma̱ꞌán so̱ꞌ me síí tucuꞌyón snana̱ soꞌ, ne̱ xa̱ꞌ núj, tza̱j ne̱ si̱j tucuꞌyón snana̱ Moisés me núj na̱nj á. Neꞌen núj se vaa caꞌmii maꞌa̱n Yaꞌanj ga̱ síí cuꞌna̱j Moisés, tza̱j ne̱ ne neꞌen núj me rej cavii síí caꞌmii ga̱ so̱ꞌ a̱ maꞌ ―taj nij soꞌ rihaan síí naxraꞌ rihaan yoꞌ a.
Ga̱a ne̱ cataj soꞌ rihaan nij soꞌ a:
―Niha̱ꞌ uxrá vaa snana̱ soj xa̱ꞌ. Ne neꞌen soj me rej cavii soꞌ, tza̱j ne̱ síí naxraꞌ rihanj me soꞌ na̱nj ado̱nj. ꞌO̱ se neꞌen níꞌ se vaa ne uno Yaꞌanj rihaan nij síí tumé cacunꞌ a̱ maꞌ. Tza̱j ne̱ sese aráj cochro̱j níꞌ rihaan Yaꞌanj, ne̱ sese ꞌyaj níꞌ se vaa me rá Yaꞌanj, ne̱ quiꞌya̱j Yaꞌanj se vaa achíín niꞌya̱j níꞌ rihaan Yaꞌanj na̱nj á. Dan me se síí tuchri̱i mej ga̱a caꞌngaj, ne̱ nu̱ꞌ caꞌnaꞌ me se ne caꞌna̱ꞌ nana̱ rihaan níꞌ se vaa nacuchraꞌ ꞌo̱ soꞌ rihaan síí vaa da̱nj a̱ maꞌ. Dan me se sese né si̱j caꞌnéé Yaꞌanj rihaan níꞌ me soꞌ, ne̱ daj chiha̱a̱ míj se̱ guun nucua̱j soꞌ quiꞌya̱j soꞌ da̱nj maꞌ ―taj síí naxraꞌ rihaan yoꞌ rihaan nij soꞌ a.
Ga̱a ne̱ cataj nij soꞌ rihaan soꞌ a:
―Na̱nj síí tumé cacunꞌ mé so̱ꞌ asi̱j caꞌngaa so̱ꞌ chugua̱nj. Ne nó xcúún so̱ꞌ tu̱cuꞌyón so̱ꞌ a̱ ꞌó nana̱ rihaan núj a̱ maꞌ ―taj nij soꞌ rihaan soꞌ a.
Ga̱a ne̱ quirii nij soꞌ man soꞌ xeꞌ a. Dan me se cuchiꞌ nana̱ rihaan Jesús se vaa quirii nij soꞌ man síí naxraꞌ rihaan yoꞌ xeꞌ a. Cheꞌé dan nanoꞌ Jesús man soꞌ, ga̱a ne̱ cataj Jesús rihaan soꞌ a:
―So̱ꞌ me síí amán rá niꞌya̱j man Síí Caꞌnéé Yaꞌanj Ni̱caj Yuꞌunj man Yuvii̱ naꞌ ―taj Jesús rihaan síí naxraꞌ rihaan yoꞌ a.
Ga̱a ne̱ cataj soꞌ a:
―Ne̱ me síí me Síí Caꞌnéé Yaꞌanj Ni̱caj Yuꞌunj man Yuvii̱, ga̱a seño̱rꞌ. Cata̱j xnaꞌanj so̱ꞌ rihanj, ga̱a ne̱ cuchuma̱n raj ni̱ꞌyaj man soꞌ na̱nj á ―taj síí naxraꞌ rihaan yoꞌ rihaan Jesús a.
Ga̱a ne̱ cataj Jesús rihaan soꞌ a:
―A̱j queneꞌén so̱ꞌ man soꞌ, ne̱ ꞌu̱nj si̱j aꞌmii ga̱ so̱ꞌ cuano̱ me soꞌ ado̱nj ―taj Jesús rihaan soꞌ a.
Ga̱a ne̱ cataj soꞌ a:
―Cuano̱ nihánj me se amán raj niꞌya̱j mán so̱ꞌ, Señor ―taj soꞌ a.
Ga̱a ne̱ caráj gue̱e̱ soꞌ rihaan Jesús a. Ga̱a ne̱ cataj Jesús a:
―Caꞌnáꞌ ꞌu̱nj rihaan chumii̱ nihánj cheꞌé se no̱ xcúún ꞌu̱nj caꞌne̱ꞌ ꞌu̱nj cacunꞌ cheꞌé yuvii̱ ado̱nj. Dan me se xa̱ꞌ nij síí ne neꞌen, tza̱j ne̱ queneꞌe̱n nij soꞌ, qui̱ꞌyáj a. Ne̱ xa̱ꞌ nij síí guun rá se vaa a̱j quisíj xcaj nij soꞌ cuentá, tza̱j ne̱ ase vaa síí aráán rihaan roꞌ, da̱nj ga̱a̱ nij soꞌ, ne̱ se̱ caꞌvee xca̱j nij soꞌ cuentá maꞌ ―taj Jesús a.
Dan me se cachéé taꞌa̱j nij síí fariseo ga̱ Jesús, ne̱ cuno nij soꞌ nana̱ caꞌmii Jesús a. Cheꞌé dan xnáꞌanj nij soꞌ man Jesús, cataj nij soꞌ a:
―Ne̱ ase vaa síí aráán rihaan vaa núj, rá so̱ꞌ naꞌ ―taj nij soꞌ, xnáꞌanj nij soꞌ man Jesús a.
Ga̱a ne̱ cataj Jesús rihaan nij soꞌ a:
―Sese si̱j ne neꞌen me soj, ne̱ taj va̱j cacunꞌ tumé soj maꞌ. Tza̱j ne̱ cuano̱ nihánj me se taj soj se vaa a̱j neꞌen soj a. Cheꞌé dan ꞌo̱ tumé soj cacunꞌ ado̱nj ―taj Jesús rihaan nij síí fariseo yoꞌ a.

Escolta San Juan 9