Versets bíblics populars de Matɨyu 5

Comparteix

A'amu sikiloho mongkujontɨfeso ahwonte'mo kipitofahinyo'maho. O'o, hofɨko ijempohopo ho'nahinyofoho. Oso a'amu ango somo humafijo somo pomponaho ulohofono. Olo hiloso sekwo hmmo'nɨmno. Sekwoe pomponahoso a'amufe tɨmopo wolasyono. A'amu hofɨko sekwoe honɨngkano wopɨngomo uhwonɨfijoso hofɨko Mpohwo Anɨtu ahwomomo humaso sohwoe yofe woho'nomantɨfeho.

Sekwo hwahoponjo pomponaho pa'nyo kuyoho. Antɨme engo hwofɨki'nyo soponjo molinyoso oso hiyae'm'maho. O'o, utɨhwa'nyoponoho.

A'amu sɨfe aho tɨmo sɨmeho haloho anga'nohino'njoso hofɨko sɨmeho wopɨngo umo'nono. Oso a'amu hiso Anɨtumo uhwonantɨfeho.

A'amu wopayo mijoho pe'nyoso wopayo'no hi umo'nyo hopaso a'amu Anɨtuye honɨngkano wopɨngomne'no hi umo'noso'manji oso hisomo Anɨtu kakoe hungkuno hisofe sɨmehomo wopayo sɨmeho hopaso uhnnɨmontonoho. Oseso hofɨkoe sɨmeho wopɨngo umo'nono.

I oso hiso'no nje hungkuno waselɨmonne'no yohono. Sekwoe mango hwamo sɨmeho umo'nyo'ne ufijoso a'amu wonyo selohofɨwo'nɨngkohofo somne'no Mpohumo jomo ulɨmno.

A'amu fiso Anɨtune'no huno engo muyo'njoso hofɨko Anɨtumne'no huno wopɨngo wotɨpemano lɨfijo'manji hofɨko sɨmeho wopɨngo umo'nono. Anɨtu hofɨkimo umokosyohumayo hweho.

A'amu sɨmano hintotohino'njo somo nɨhoholofɨwo'nɨngkohofoso sɨmeho pompenjiyo umo'none'entɨfi iwo'nɨngkohofoso sɨmeho wopɨngo umo'nono. Anɨtu ulɨmontonoho, Nje mehomi kuyoho.

A'amu sɨmeho tango'njo humalofoso sɨmeho wopɨngo umo'nono Anɨtu kako oso a'amu somo sɨmeho wopɨngo umokumontonoho.

A'amu Anɨtuye hungkunomo inɨngkayo'no syoho wopɨngo yontanɨngki a'amu nom'neso oso a'amu somo sɨtofo ujo so'nji wonyo ulohofo so'no kako sɨmeho wopɨngo umo'nono. Anɨtu umokosyohumamontonoho.

A'amu fiso nom'ne a'amu hofɨkimo wonyo ulohofɨwo'nɨngkohofo somne'no hitoho ulofahonɨngki wopɨngo'nohini ulohofɨwo'nɨngkohofoso sɨmeho wopɨngo umo'nono. Oso'no Anɨtu hofɨkimo wopɨngo uloho'montonoho.

Sekwo a'amu soku ngkimo tɨfi nnɨngkawowo'nɨngkohofo so'no a'amu nom'neso sekumo wonyo hungkuno'nji hwasyo hungkuno'nji sejo so'nji sefotofo selohofɨkujo'no sekwo sɨmeho wopɨngo wasemo'nono. Sekwo sɨmeho wopɨngo semo'nɨngkuhwoso'no sɨmonyo fiyɨmno. Sekwoe yahino wopɨngo olo hwaho lopo iwo'nɨngkohofo lo'nji ngkimo tɨfi nnɨngkape lo'nji mpe iyo pa'nyoso ho'yango ahwomomo weho. Oso sefotofɨwo'nɨngkohofo hopaso hofɨko hohonta a'amumo Anɨtu hungkuno uyahonɨngki ulɨmotofo somo ufoto'motofofoho. Oso a'amu hiso hofɨkoe yahino wopɨngo so'no mpe iyo hopaso ahwomomo ma'mentohofo hopaso sekwo womantɨfeho.

A'amu fiso hofɨkoe yofemo monje yahinontɨfi Anɨtuye yofe ho'nomalokwofoso sɨmeho wopɨngo umo'nono. Yo'mayo wopɨngo Anɨtu wosejapmmo ulɨmentisoso hofɨko'nefoho.

Sekwo olo hwaho loponjo sa pa'nyo kuyoho. I oso'no sa fosyo mijo'nohino imo'nɨngkuhwosi kakoe yokumpohn'nyo nonto wonyo imo'nososo apa'no sa hiso wopɨngo imo'nyoso pipi uyantanto. Awonoho. Nɨhu'nahone wonyo umo'nɨmotonoho. A'amu sa hiso mopijoso me-e miyonehoho.

I oso'no sekwoe Mpohwo Anɨtu ahwomomo humaso sohwo pa'nyo hmmo'nɨmno. Sekwo a'amu wopɨngo'nji wonyo'njo somo wopɨngo ulohofɨkujo'no Anɨtu kako humaso hopa fehumamno.

Oso'no sekwo hungkuno ne'njo'nohino ulɨmno. Eno, eso'nji Awonoho, eso'nji oso'nohinoho. Hungkuno nom'neso hwe wonyo Seten mta'ango linyofoho.

Hungkuno nom'ne nto upa'nɨwo'nɨngkohofoso ole, Hwe fihwo jɨje tɨmomo wonyo kumokososo kɨko kakoe tɨmo wonyo umojo. Hwe fihwo jɨje mango fonjokujakumofososo kɨko kakoe mangomo fonjokulɨpijaofo. I oso hiso'no nje hungkuno waselɨmonne'no yohono. Hwe fihwo kikimo wonyo kilohofososo kɨko kakimo ilojɨmofe'eno. O'o, awonoho. Hwe fihwo kako jɨje manjijohopo kuposososo manjijoho fehohnjo utɨhwaho. Osopo wakuposono.

Tɨmo aho angahohnta'angoso honɨngkano wonyo kumokososo yo'mayo somo tɨmo uhwonɨngkohoji huno wonyo syafɨhujo'manji oso hiso nɨhu'no yohotoho. Kɨko wonyo iso'no'manji tɨmo anga'no fitɨhwotofaofo. Tɨmo wopɨngo hufa'u'njo sohwosi tɨkanomo uhnnoho. O'o tɨmo anga'nohino'nji honɨngkano wopɨngomo fiso. Jɨje aho angahohnta'ni honɨngkano wonyo kumokososo aho hiso hntofamo lohofohoji foho'naofo. Aho wopɨngo hufa'u hi'njo hwosi tɨkanomo uhnnoho. O'o, aho anga'nohino'nji honɨngkano wopɨngomo fiso.