Joni 2
2
Kenai Napara 'Aja'aravajina
1Na'ia no'opisu pa'are'eme Kena Karari vaji napasi nejume Jesuni oha 'u'o ijí hinana. 2Jesuho Huni tisaiporu pu'úmo ea ka'ene napasi neja kajipo 'waravume roara'omo ijí hijara. 3'Ejume pu 'wainia isi parajara. 'Ejume Jesuni ohi Jesu ijá 'wama Puni 'wainia nipa'arenana 'wamana. 4'Ejume Jesura ijá 'wama Napare Na ona iraka vena'ejo? Nuni vea mai'o paroi'ina 'wamana. 5Jesuni ohi pwea kajija ijá 'iama Hura raka 'waramujaho veha 'iamana. 6Toata ka'ene muni vejajija iropu kwino Juapo puni sosia tamana vene ija sovujija ijá navara. Ijí toata kajija areri rita mapoka (100). 7'Ejume Jesu pu ijá 'iama Toata kajino toa eje itu'usa'avara 'iavume pu toa 'ejuma itu'usahara. 8'Enarena Hu pu ijá 'iama Ja iviamaa 'ene apena va'e ea ka'ene ahaja anesuriji ma'avara 'iavume pu ijá vejara. 9'E'ejume pu toa ka'ene 'wainia rena kajaho 'eka va'ume ahaja anesurijara usea ina henana. 'Enarena ijí 'wainiakaho ichihi rena roajaho hu pahenana kaivo pwea ka'ene toa kaji 'ejajipo hejara. Ijihuna'e ahaja iji'ina 'ajohi'inijara napasi neji'ina 'umejuma rouma ijá 'wama 10Ea 'aho'a puni 'wainia mamai marako'a inare'e iji'a sisea ijura kaivo a marako'a sisei inare'e iviamaa maa inu 'wamana. 11Kwaa iha Kena Karari vaji Jesu aneja vene emaa areri pavehuni aacha 'ee harura najahana. 'Ejume Huni tisaiporua pu kame Hu nimaa vetiara. 12'E'eme Hu ijihuni túna'i Jesuho oaha 'ee 'u'uhwaha 'ee Huni tisaiporu pu'úmo Kapeniami va'e na'ia tu'u hijara.
Jesura Temiporui Vaji Va'ajina
(Matiu 21:12-13; Maka 11:15-17; Ruku 19:45-46)
13Jua puni Pasova aneja re'i ve'eme Jesu Jerusaremi va'ana. 14Hu va'e Temiporu vai'i kimajaho pu ea hine uka 'imene purumakau 'imene sipia 'imene monia senisu veji'i hijara. 15'Ejumakivi'i Hura va'e ijí arumajino hisi vene hijihaume purumakaua 'ee sipia 'useme ma'ahi va'ara. 'Ene puni monia 'unirame 'usekunihe 'ee puni 'aijua 'unamapi 'aronamana. 16'Ene Hu ea ka'ene uka 'imejajija ijá 'iama Uneunecha kija 'eka va'ajiha! Nuni Omijihuni seijaho paveje 'imejuri ara renama 'iamana. 17Jesu hina ija'ina venaji Huni tisaiporua iraka ka'ene nitama Godoni ira vaji vejajaho vwihajara.
Na Oni vu'a 'wavuri sei ura renia paranu jihuna'e oja Nuna 'urina paranu 'iamaji pu vwihajara.
Noin 18'Ejume Juapo Jesu ijá 'wava A ija'ina venajihuna'e aacha pina najuha kava 'wavara. 19'Ejume Jesura pu eha ijá 'iama Temiporua veje tira'usunaha kamareje na'ia no'opisu Na kú'o veje 'urina namihuna 'iamana. 20'Ejume Juapo ijá 'wava Nú ijí Temiporu kajaho juara mapoka (46) pa'are'eme ve parajara kaivo 'ú A na'ia no'opisu pa'are'eje ve parahuna 'úmo? 'wavara. 21'Enakaivo Hu Temiporua ka'ene Huni hahiji rona 'waramana. 22'Ena'omo vea ka'ene Hu kwama 'urinajino Huni tisaiporuepo vwihanareja Godoni ira nimaa rone 'ee Jesura ira raka ka'ene 'waravume pu hejajaho nimaa rojara.
Jesuho Emapuni Karaijaho Nihena Kima Paraji'ina
23Hu Jerusaremi Pasova vea rejume hiji'i Jesura aacha ka'ene venaji pu ea mapoka kamareja Huni iha nimaa rojara. 24'Enakaivo Jesu pu panimaa vetiana. Ijihuni maijaho Hu ea mapoka nihena kimuna. 25Ijihuni maijaho Hu emaapuni vaja nihena kimujihuna'e ei pini emaa ichá'iniji rone Hua 'warahuna areri pana.
S'ha seleccionat:
Joni 2: mcq
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© 1999, Wycliffe Bible Translators, Inc. All rights reserved.