Matiu 3
3
Joni Papitisitara Najahajina
(Maka 1:1-8)
1Ijí vea kajino Joni Papitisita Jutia puni nechi'i riri ea Godoni vu'a najaha roana. 2Hu ijá 'waramana Ta'aroha joni sisea amairie arira renama. Godoni arijihuni 'unama niroe tu'u renukúnina 'iamana. 3Poropeti Aisea 'wavujara Hu rone ika'ina 'waramana
Hu nechi'i riri namine ijá 'umenu Natohwi jihuni 'unama amairie Huni 'unamijija arira re'avara 'umenu 'wamana.
4'Enakaivo Joni oni atehijija kameru huni sapasi vejara'omo hu ijí same 'ee huni 'aha mu'oi charia apúsame 'ee huni 'irumijaho pújúha 'ee aneura rihiji'i inuna. 5'E'eme ijihuni vea kajino ea ka'ene Jerusaremi ora 'ee Jutia ora 'ee eaka mapoka ka'ene Jotani rori hiju kajija ni'aha kwino huni roara. 6'Enareja pu puni sisea vwihane nahama Godi 'wara'i kaivo aremamaa arevajihuna'e hu pu Jotani 'unirame toi samana. 7'E'eme Hu kivume Parasia 'ee Sajusia hura toi sama'amarono rouma kimarena hu pu ijá 'iama Ja tapara ka'ene sisesa jihipuni harihija joni eha sisea ni'ima'ura ka'ene túna'i roujaho irara ja 'waravukame ja juhame iki roajivare? 8'Ina rukina re'avara. Joni 'unama sahasijaho ta'arohareje niare'i kaivo ea maiu'ina re'avara. 9Ja vwiha ika'ina pavwiha'avara. Nú Eparahami oni harihija'omo nú areri rena hiju paro'avara kaivo Godira areri veje ike muna ikihipo Eparahami oni harihija rehuna. Ijihuna'e nú areri rena hiju paro'avara. 10Iviamai taupa icha aneji namuna'omo icha kajija 'ina maa pare'avajaho 'umareje 'uhue veni ato'aruhuna. 11Na ja toa vaji samaume 'urijajihuni maijaho ja joni sisea vwihane temukavume nahama Godi 'wara'ika'i aremama arevaji najaharejo ijihuna'e toa vaji samauta kaivo Ea ka'ene nuni túna'i roujara Godoni 'Avena 'ee haruriji'i samahuna. Na Hu Hu'úmo areria pana 'ee nara Huni mumora hwana jahenahuna areria pana. 12'Enakaivo icha ka'ene 'witia aruma sirikuvujaho Huni ija tahi namuna'omo Hura 'witia mutuuri ruhijijino mutuareje maijaho niana'ika'i siseijijahija vena ka'ene pautaruti sa'ika'i namujiano ato'aruhuna.
Jesu Toi Vaji Apúsamajina
(Maka 1:9-11; Ruku 3:21-22)
13Jesuho Karari rene roe Jotani Jonira apene toi apúsama'amarono roana. 14'Enakaivo Joni rarene ijá 'wama Ara na toi apúsami'amajaho areri re'ena. 'Ú nara A toa vaji apúsama'urono roane? 'wamana. 15'Ejume Jesura eha vene ijá 'wama Nú iviamaa ijá vehunijihuni maijaho ijá vejakame 'unama arimai rene mamai re'amarono ava'eja 'wamana. 'Ejume Joniho Huni ira hene avamana. 16'E'eme Jesuho toi apúsavume 'uriji'i kavume kahi akúpi 'ahi vwicha re'eme Godoni 'Avena maraho'ora puna'i jaima 'ariha roe Huni haha 'ahi ajimana. 17'E'eme ira kahi akúpa 'ahi rena roe ijá 'iama Ikaho Nuni Hariha ka'ene Na oja mahujina. Na Hunijihuna'e niho'o teamanimu 'iamana.
S'ha seleccionat:
Matiu 3: mcq
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© 1999, Wycliffe Bible Translators, Inc. All rights reserved.