Matiyu 15
15
Gotena Loo Tupamane Yumbanena Mana Tupa Sia Minalane Leane Oko
Maki 7:1-13
1-2Okone angi, loo tupana mana andene akali tupapi, Patasai tupapi, utupanena minditupa Jutusaleme tepa alu, Jisasa ateanga epeai. Utupane-mane bala lamawuato, Gotena wenonga nanimana yumbane tupana kii kalato atene guu naleakale nembo toto, utupane-mane kini wasa-wasa ini peyoto, tomo nalaini mana mindi yata yaini-ko. Anu peakale nimbana disaipolo tupamane mana okone wato mina napene kondeyaipe leai. 3Wuane leai-kola, Jisasato utupanena pii okone yano peyoto, anu peakale yakamato yumbane tupana mana mindi wato minuyale, Gotena loo mindi kalo piyainipe lea.
4Wamba Goteto loo okone yata wato, nimbana angini, ayiane-la, okone-lapona pangosa atoto, nimbato okone-lapona pii ale amawua atape leaipia. Dee, wandakali mindimane balana angini yandopi, ayiane yandopi, okone-lapona mindi ando pii koo mindi leando, yakamato bala peyo ome lalapape leaipia. #Ek 20:12; 21:17; Lo 5:16 5-6Goteto wuane leane tekeko, yakamato wuane na-piyaini. Jia. Yakamato loto, wandakali mindimane balana angini yandopi, ayiane yandopi, okone-lapona mindi moyo minditaka maipe-pene guleya-kola teke, okonelapo lamawuato, nambato liyamba moyo minditaka gipe-pene tupa Gote mauyale mandeke pua yata ewa lalu, balato okonelapo moya napene konda yando, okone katu lalaini. Yakamato wuane lalaini okonemane yumbane tupana mana tupa wato minuyale, Gotena pii layene oko mo mee gulaya alaini.
7Yakamato wuane piyaini mana okonemane yakamana yangone tupa minakasa alaini wandakali gulo atalaini. Wamba potopesa akali Aisayato yakamana mana okone wayumane nembo toto, wua leaipia: 8Wandakali utupane yakamana ambulini-mane nambana gene oko laiyu lalaini tekeko, yakamana nembo-tene, yamapane-la, okonelapo nambanga yaa napene, amonga waka gulo atalaini. 9Wamba yakamana yumbane-mane mana minditupa yata yai-kola, yakamato mana utupane wandakali tupa lamawuato, Gotena loo tupa mana langeyama lalaini. Wuaneko, utupane-mane namba lo lotu lalaini mana okonemane dini angini mindi liya napiyane. Wamba potopesa akali Aisayato wuane leane lo Jisasato pii okone lea.#Ais 29:13
Gotena Wenonga Minditaka-mane Wandakali Mo Kalato Ataya Alane Oko
Maki 7:14-23
10Wandakali kambua amunguli peai-kola, Jisasato utupane mandaka ipulupa lea. Epeai-kola, balato utupane lamawuato, yakamato nambana pii ale wato, wayumane nembo talapape lea. 11Wandakali-mane minditaka mindi nee asianga mo aindaka loto, nalaini okomane wandakali okone Gotena wenonga mo kalato ataya na-alane. Jia. Minditaka mindi wandakalina nee asianga ato kamaka epalane tupamane Gotena wenonga bala mo kalato ataya alane lea. #Mt 12:34-35 12Jisasato wuane lea-kola, balana disaipolo tupa epoto, Patasai tupamane nimbana pii okone ale wato, nimba towa yamapane koo paleyai oko nimbato andelepe leai.
13Wuane leai-kola, balato utupanena pii okone yano peyoto, nambana ayiane oko bala ati kenga atoto, balana ee oko ando atalane lea. Balato minditaka yanda napeya-kola, mee ika leando, balato utupane pitaka pini towa lopalane. 14Patasai tupa lee koo gulo atoto teke, asia epene tupa wandakali waka tupa andawa lamakale nembo talaini tekeko, wandakali lee koo mindimane lee koo yangone mindi asia andawa loyale, atu peapindo, wandakali okonelapo lapotaka kundu mindina aiya peyolo-peyapiko. Patasai utupane-mane namba towa yamapane koo paleakale lo yakamato ando kondalapa. Jisasato wuane lea. #Lk 6:39-40; Lom 2:19-20 15Wuane lea-kola, Pitato bala lamawuato, nimbato pii kokoli wamba lale okonena tene oko nanima langi lea.
16Wuane lea-kola, Jisasato balana disaipolo tupa tipa puato, yakamapi wai naene atoto, pii kokoli okonena tene oko nembo nateyaipe lea. 17Minditaka wandakalina nee asia okona aindaka leyai tupa pitaka ini anda-pango okona poto paleya-kola, ii too apialaini oko yakamato nembo nateyaipe.
18-20Wandakali mindimane kii wasa-wasa napelene, tomo nalu, matili balato tomo okone ii too apialane. Tene okonena, kii wasa-wasa peya napene tomo nalane mana okonemane Gotena wenonga bala mo kalato ataya na-alane. Wuane tekeko, minditaka wandakalina ambulininga ato kamaka epalane tupamane Gotena wenonga wandakali tupa mo kalato ataya alane. Anu peakale nambato wuane leyope. Wandakali-mane nembo koo toto, wandakali mindi peyo ome lokale, yangone mindi ando owato pii lokale, yangone mindi layangokale, minditaka pake nokale, pamuku pukale nembo talaini. Nembo-tene koo utupane pitaka wandakalina yamapanenga paleya-kola, balato nembo-tene koo utupane wato minukale nembo talaini mana okomane Gotena wenonga bala mo kalato ataya alane. Jisasato wuane lea.
Kenane Yame Wanda Mindimane Jisasa Lo Bilipi Leane Oko
Maki 7:24-30
21Jisasa bala yuu okone tepa alu, Taya, Saitone-la, tano okonelapo mandaka yuu mindina pea. 22Yuu okonena pitiyane Kenane tane wanda mindi Jisasa ateanga epoto, pii taimane loto, sipitisa koo mindimane nambana wanane oko wete minu koyalane-ko. Kiŋi Dapiti yame Akali Andane, nimbato namba ondo wato, moyape lea. 23Wanda okonemane wuane laka pima epea-kola teke, Jisasato balana pii okone yano peyo, pii mindikipi mindi lamai napene konda ya. Konda ya-kola, Jisasana disaipolo tupamane Jisasa lamawuato, wanda okomane nanima watama epoto, pii taimane laka peya-ko. Bala nanima tepa alu peakale. Nimbato bala lamai leai.
24Wuane leai-kola, Jisasato wanda okonena pii okone yano peyoto, Goteto namba languato, yia sipisipi alu pene gulo Isatale tane wandakali ateyai tupa angu moyolo puu leane lea. #Mt 10:5-6 25Jisasato wuane leane tekeko, wanda okone bala Jisasa ateane ongane epoto, aikini leka wato, Akali Andane, nimbato namba moya lea. 26Namba moya lea-kola, Jisasato lapeke loto, nambato andopane tupana tomo tupa moto, peango tupamane neakale lo peya-amo lewando, kuai nalolo-peya lea.
27Wuane lea-kola, wanda okonemane lapeke loto, Akali Andane, nimbato enene lele tekeko, akali andane mindimane tepolo tokonga tomo no peteya-kola, balana peango tupa toko pangosa atoto, tomo pulu-lene tepa eya tupa nalaini lea. 28Wuane lea-kola, Jisasato bala lamawuato, wanda nimbato namba lo bilipi leyo nayu lele-ko. Nambato nimba moyo pingipia lakae lo nembo tele pua pingeyo lea. Wuane lea-kola, okone angi teke wanda okonena wanane okone atu ya.
Jisasato Wandakali Siki Pelene Kambua Mo Atu Yane Oko
29Jisasa bala yuu okone tepa alu, Galili ipa angini okona mandaka ongane poto, yuu wangiane mindina puu iyu lalu, petea. 30Petea-kola, wandakali siki pelene tupa atu aiyu epoto, wandakali kambua longo bala peteanga epo amunguli peai. Utupane-mane wandakali kee koopi, kulini wuanga-penepi, lee koopi, pii na-lalainipi, dee wandakali siki waka-waka pelene kambua atu aiyu epoto, Jisasana kee yane ongane yata aka peai-kola, balato utupane pitaka mo atu yaka pea. 31Mo atu yaka pea-kola, pii na-lalaini wandakali tupamane pii lalu, kulini wuanga-pene tupa mo tika piyu, kee koo tupa asia pulu, lee koo tupa lee talu, peai-kola, wandakali kambua ateaini tupamane andeai. Andoto, utupane moko wete loto, Isatale tane tupana Gote okona gene oko laiyu leai. #Mk 7:37
Jisasato Akali Tausene Tukumindi Tupa Tomo Mayane Oko
Maki 8:1-10
32Okone angi Jisasato balana disaipolo tupa ipulupa loto, pii mindi utupane lamawuato, wandakali utupa namba towa ole tepoai atalai-kola, utupane ulia nolane naeya lea. Nambato utupane ulia naa napene, mee andaka peakale lewando, utupane asininga ulia nono wato, lemowa malawai lo lomba-pene yolaini lo ondo piyua-ko. Nambato utupane ulia nanene mee peakale na-lokale lea. #Mt 14:14 33Wuane lea-kola, balana disaipolo tupamane bala tipa puato, wandakali napalene yuu okona ateyama-ko. Nanimato betesa kambua wete ani tawe moto, wandakali kambua wetete utupa neakale malu-peyamape leai.
34Wuane leai-kola, balato utupane tipa puato, yakamanga betesa aki-tupi eyape lea. Wuane lea-kola, utupane-mane betesa yanasa tupa towa pisa aŋalapo nanimanga eya leai. 35Wuane leai-kola, balato wandakali tupa lamawuato, yakama yuunga pitiyapa lea. 36Peteai-kola, balato betesa yanasa tupapi, pisa tupapi, utupane moto, Gote wayu lalu, utupane konde lea. Konde loto, balana disaipolo tupa maya-kola, utupane-mane tomo utupane tale puato, wandakali tupa neakale mayai.
37-38Mayai-kola, wanda andopane ima dii nalene, akali angu tausene tukumindi-mane tomo neai. Wandakali utupane pitaka-mane no embo yai-kola, Jisasana disaipolo tupamane tomo akenane yane tupa mo yomo wato, basaketa nuu andane yanasa tumbi laya wato yata yai. 39Yata yai-kola, Jisasato wandakali utupane pitaka pulupa lalu, bala sipi mindina peakaiyu lo pitiyu, Makatana yuu okona pea.
S'ha seleccionat:
Matiyu 15: ipi
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© 2008, Wycliffe Bible Translators, Inc. All rights reserved.