Luke 20
20
20:1-8 Iesu Nu Mave Da Javoda, Saramana Edo Ghusira, Aindae Ategi Useri.
(Matthew 21:23-27; Mark 11:27-33)
1Sifo eni, Iesu God da Kamboda+ dengoro induduse, God da Bino Eveva ava vironu siri, fristi+ da kokotofu, Moses da Geka ijuga kakato+, a evetu genembo da babojegari fera buvudo, 2numokena siseri, “Se ningore! Mave setiri ni saramana emo eresi? Ni mave da javoda, geka emo vironu resesi?” setero, 3Iesu mino nemokena sisira, “Nambarago nemokena geka dabako ategi arena. Einda mino sareva amo, na mave da javoda ojena amo, isagha saono ningareva. Sevu ningone! 4John Bafataito Ari Kato, mave da javoda evetu genembo bafataito edo ghusi, evetu genembo da javoda, ai, God da javoda?”
5Aminge setiri, ne tuturo edo tofo tofo beisiga use, se nininguseri, “Namonde kau nange nange sareri? Namonde ‘God da javoda bafataito edo ghusira,’ sarera amo, nu sarira, ‘Ne redae John jo tumondae usevu?’ sarira. 6O kotugo namonde ‘Evetu genembo da javoda bafataito edo ghusira,’ sarera amo, natofo eminda totorugetera eimi, namonde ghamanai darera. Ainda tuka mo: evetu genembo digari koteraera amo, John nu God da feroveta eniri,” aminge sedo 7bunise, Iesu kena siseri, “Namane erebunera,” 8Setero, Iesu nemokena sisira, “Avori, nambarago mave da javoda saramana eraena, nemokena jo saono ningae areva.”
20:9-18 Vare Kaifa Kakato Da Kasiari.
(Matthew 21:33-46; Mark 12:1-12)
9Aminge sedo, Iesu nu natofokena jovereghedo, kasia evia sisira, Genembo eni aira vare simbugedo vaini da asi ava govetira. Govedo, furu dighi birurughetira. Ainda amboda, nu asi vuji da muka ava simbari vosari bari dae sedo, bako ghambira. “Kasia eni ningovo dae resena. Genembo eni aira, vare simbugedo vaini (wine) da asi ava govedo, vare amo evetu genembo mendeni saramana use, moni futururoro bari dae sedo, mutira. Evetu genembo aimi vare ava kaifa ero, nu dodo aira, reighi eninda ghousago irei. 10Avori, asi vuji bambari da sifo buviri gido, vare numamoá nunda boanda bari dae sedo, nunda saramana kato eni dirigetiri, vare kaifa kakatokena aira. Aira buviri, vare kaifa kakato saramana kato aikena roera eni jo mutae, nu sandi dedo ondero jovereghe aira. 11Amingetero gido, vare numamo sekago nunda saramana kato eni dirigetiri aira buviri, vare kaifa kakato numokena roera eni jo mutaeri. Ne eredo, nu dere jise avoda de ondero, jovereghe aira. 12Amingetero gido, vare numamoá sekago nunda saramana kato eni dirigetiri aira buviri, vare kaifa kakato numbarago de babasegedo ondero sumbira. 13A gido, vare numamo tofo mandi kotetira, ‘Na emingarena. Nanda mandi dubo bu gogoghomberaena ava, dirigaono yarira. Nu kakara arera tanojo,’ aminge kotise, nunda mandi ava dirigetiri aira. 14Avata vare kaifa kakato ne numoá gosuse, tofo tofo se ningeri, ‘Mandi omo, vare einda numamo da mandiri. Amboda vare emo, nune barira. Ava sedo fuvu, namonde nu daoro ambari, vare emo namondeda tofodae baore!’ aminge sedo, 15ne eredo mandiá, vare jokáda sandi jumbudo aera, isaghada buvudo detero ambira.
“Avori, kote givu! Vare numamoá eredo foama, vare kaifa kakato aikena nange ari? Saono ningove! 16Nu foama vare kaifa kakato amo dari amboro, vare budo evetu genembo mendeni kena mutari nene kaifa arera,” Iesu aminge setiri dadabetiri, natofo siseri, “Agá! Amo erama siroreure!” siseri. 17Setero, evetu genembo mendeni, nu nange imboe edo ighagha arera, ava kasama aoro dae sedo, Iesu dombu gongosedo natofokena sisira, “Aminge sareva amo, kote givu! God da Geka evia resira, einda tuka mo rejori?
‘Ghamana eni, kambo itari kakatoi imboe edo fugutusera ava, Bajari nune budo
tutumbidae sedo fiti simbugedo, aminda tuturo edo, nunda kambo itari dae erira.’
God da Geka aminge resira. 18Avori, na eminge resena: mave ghamana etoda durarira amo, nu de gite ambarira. O ghamana aimi maveda etoda du fatarira amo, nunda tamo fati tafere ari ambarira,” aminge sisira.
20:19-26 Iesu Ava Dederuse, Ne Takesi Ombari Da Susu Aindae Ategi Useri.
(Matthew 22:15-22; Mark 12:13-17)
19Iesu aminge setiri, Moses da Geka ijuga kakato+ a fristi+ da kokotofu, ne Iesu sandi bundari dae kotiseri. Ainda beká mo: ne kasama useri, Iesu nendae sedo vare da kasia amo sisira. Avata ne natofo da kotari aindae oju edo, Iesu dotero isira. 20Ava sedo, Iesu nange geka sembae eni sari, nu sandi budo gavana da kotofukena mutoro gavana da javoda koto aetera ava kotise, ne evetu genembo mendeni dirigetero aera, geka beká sariguse ategi mendeni mendeni useri. 21Ava kotedo, ne derari kakato gategetero era, Iesu kena buvudo siseri, “Ijuga Kato, namane kasama erera: ni sifo ghousa evia, geka bekáda sise ijugeraesa. Ni evetu genembo da kotari amo jo oju ae use, God da uju avanembo ijugeraesa. 22Ava sedo, se ningore! Namondeda Agho Dari nange resi? Namondeda gitofu Rome embo da kotofukena takesi ombarera, ai tefo? Ava se ningore!” aminge setero, 23ne numo derari#20:23 Afige, geka Matthew 22:18 ainda duruda tege garesa. dae kotido fusera ava, Iesu kasama usira. Kasama edo, Iesu nemokena sisira, 24“Moni eni ijugevu gaone! Moni tamonda, dangio a javo emo, mavedari?” setiri, ne siseri, “Rome embo da kotofu, namonde Caesar seraera, nundari.” 25Setero, Iesu nemokena sisira, “Avori, Caesar da tofo amo, Caesar dae mutuvu bare! A God da tofo amo, God dae mutuvu bare!” aminge setiri, 26ne ningido buniseri. Natofo da dombuda Iesu dederusera avata, nu geka eko eni jo sae usira. Nu geka eveva sisira, aindae ne dudukughedo beka dadabuseri.
20:27-40 Ambarida Ghe Jebuge Erari Mo, Kau Mavegori?
(Matthew 22:23-33; Mark 12:18-27)
27Jusi embo da mendeni aindae Sadusi embo+ seraera. Sadusi embo+ resena emo, ne eminge kotise seraera: ambari embo jo sekago jebugedo erae arera. Avori, Sadusi embo+ ainda mendeniimi fera, Iesu kena ategi useri, 28“Ijuga Kato, God setiri, Moses nu namondedae Agho Dari evia gefusira:
‘Genembo mave evetu fitido, mandi sasingu jo sirorae iroro ambarira amo, nunda ambo bego eniimi roriá, ambari embo ainda veka sirorare dae sedo, fitarira.’
29“Avori, kiki eni sari dae erera. Ningi! Genembo dabako ainda vide jamena 7 ava siroredo iriari. Bego mo, nu evetu fitira ava, sasingu jo sirorae irero nu ambira. 30Ambiri, roriá nunda diroruimi fitira. Fitira ábarago, sasingu eni jo sirorae etero nu ambira. 31Aminguse, fifitero refara, ambo nemboi bu fitido irara, nu barago ambira. 32Ainda amboda beká, roriá barago ambira. 33Avori, se ningore! Amboda evetu genembo isambu jebuge erariá seraesa. Gegenembo isambu 7 evetu dabako ava fifituseri. Ava sedo, iria edo erari da sifoda, evetu amo maveda evetu ari? Bego aindari, o ambo aindari, ai maveda evetu ari? Ava se ningore!”
34Setero, Iesu mino nemokena sisira, “Oroko emo, evevetu vai eraera, a gegenembo evetu fitiraera. 35Avata God sari sifo amboda evetu genembo eveva, ambarida ghe jebuge erarera ainda sifo aminda, genembo evetu jo fitae arira, a evetu genembokena jo vai ae arira. 36Ne aneya da kau avavaga irarera, jo ambae arera. 37Kotugo, evetu genembo ambarida ghe jebugedo erarera ava, Moses numbarago tofo mandi ijugusira. Avaraka ika veveyako ainda jokáda gambudo bubura iri gosusira ainda sifoda, Moses da nombuamane anakora sirivo usera aindae, God nu geka evia setiri Moses gefusira:
‘God, nembuamane Abraham, Isaac, a Jacob anakora endada irise, tumonduse iriara,
ã kotugo oroko tumonduse irera amo, namori.’
38God aminge sisira aindae, namonde kasama erera: ambari embo jo amboro dadabaeri. Ava sedo evetu genembo isambu, ambari embo a jebuga embo isasambu God da dombuda jebuga irera,” aminge setiri, 39Moses da Geka ijuga kakato+ mendeni aminda fetirise, Iesu da geka ava ningido siseri, “Ijuga Kato, setesa amo, eveva bekári.” 40Aminge sedo, Iesu da geka eveva ava ningido, ne sekago ategi ari buniseri.
20:41-44 Keriso Mo, Nu Maveda Mandiri?
(Matthew 22:41-46; Mark 12:35-37)
41Iesu tuturo edo, nemokena ategi usira, “Mendeni seraera: God evetu genembo sonembuse, Genembo eni mutari dae sisira amo, David da mandiri. Amo nange reseri? Kote givu! 42David nu tofo mandi God Da Yaru Divari Buku aminda, Keriso dae eminge gefusira:
‘Bajari nu nanda Bajarikena sisira,
“Fu, nanda ungo gimandukena anumbiraso, 43ninda gitofu ninda fakina ava gosururoro,
ne de bundedo bu foama, ninda ata duruda fitono fafasaore,” Bajari aminge sisira,’
ava David gefusira. 44Avori, genembo mo, nunda sasingu da bajariri. Mandi eni jo viti numamo da bajari ae aeti. Ava sedo David, Genembo amboda furarira ava kotise, ‘nu nanda Bajari’ sisira amo, nu jo tofo nunda mandi ava kotise saeri. Nu Genembo aindae igheghi use, nunda Bajari arira ava sise sisira. Ava sedo, geka seraera amo, jo inono iraeri,” aminge sisira.
20:45-47 Moses Da Geka Ijuga Kakato+ Dara Emingedo Ghuseri.
(Matthew 23:1-36; Mark 12:38-40)
45Evetu genembo isambu Iesu da geka niningero, nu nunda ambo jimbikena sisira, 46“Moses da Geka ijuga kakatodae+ eminge resena: nenda irari ava ijuje gi gogoghombevu! Ne emingeraera. Natofoi nendae sakai saoro dae sedo a nemo kakara aoro dae sise, nenda tamo asugari koburu edo deingheraera. Deinghudo ya ombari vasada buvuruturoro gido, evetu genembo tumo bainghedo, nemo tumondedo kakara use ategi e gogoghombaoro dae sise, uju eraera. A nenda uju mo: ne kirumo a banungari dae use, totofo nenda fisi da uju ava kotise, anumbari vasa eveva vanembo gategeraera. 47Ne roriri da kambo a gugua ava nenda tofodae ruruse, ya God da Kamboda+ tere fetedo, natofoi nemo gido, sakai saore dae sise, ghousa futo banungeraera. Avata God nu aindae sedo, sifo amboda nemokena mino eko beká ava mutarira,” aminge sisira.
S'ha seleccionat:
Luke 20: kprNT
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© 2003, Wycliffe Bible Translators, Inc. All rights reserved.