Juan 4
4
Sa Bahi Ha Taga-Samaria
1-3Napaliman hu mga Parisiyu ha madakel sa sumusunud hi Jesus daw sa nabautismuwan din dì ki Juan, ba kenà iyan si Jesus migpamautismu ta iyan dà sa mga tinun-an din. Su matun-an hi Jesus ha napaliman haena hu mga Parisiyu sagunà uminawà ta Judea daw likù diyà ta prubinsya ta Galilea.
4Ba diyà si Jesus pakaagi ta prubinsya ta Samaria. 5Aman nakauma hu banuwa ha sakup ta Samaria ha tagngaranan ta Sicar ha ubay duun hu bugtà ha imbilin hi Jacob duun hu batà din ha si Jose. 6Duun taena sa atabay ha binangbang hi Jacob, aman mighimlay si Jesus ta agkapedaan en daw agkaugtu en daan. 7-8Sa mga tinun-an din duminiyà ta banuwa ta agpamalit hu agkan-en dan.
Amin bahi ha taga-Samaria ha duminiyà ta agsag-eb aman inikagiyan hi Jesus, “Ipainum a.”
9Tuminubag su bahi, “Judio ka man na taga-Samaria a daan. Imbà ka agpanayù hu wahig dini ta kanak?” Naikagi din haena ta sa mga Judio hurà dan maayad ha pakigdapità hu mga taga-Samaria.
10Ba tuminubag si Jesus, “Ku natun-an nu pa ngaay sa pakaila hu Dios daw ku sin-u a sa tagpanayù diyan ta ikaw hu wahig, iyan ka pa ngaay manayù dini ta kanak daw ilahan ku pa ikaw hu wahig ha makaila hu kinabuhì.”
11Minikagi haena sa bahi, “Hurà nu igsaluk daw madalem haini sa atabay. Hindu ka man makatimù hu wahig ha pakaila hu kinabuhì? 12Labaw ka pa ba diay dì ki Jacob sa gin-apuan taw ha migbangbang taini ha atabay daw iyan haini inumà din daw inumà daan hu mga batà din daw hu mga mananap din?”
13Ba si Jesus tuminubag, “Bisan sin-u sa ag-inum taini ha wahig agkalauwan dà, 14ba saena ha uminum hu wahig ha ig-ila ku harì en gayed malauwan. Ta sa wahig ha ig-ila ku iyan mahimu ha tuburan ha makaila kandin hu kinabuhì ha hurà din katapusan.”
15Minikagi haena sa bahi, “Ipainum a hu wahig ha tagsubayen nu ta daw harì ad en malauwan daw harì ad en makagsag-ebà dini.”
16Aman inikagiyan haena hi Jesus, “Elegi sa igmaama nu daw likù kaw dini.”
17Ba tuminubag su bahi, “Hurà ku man asawa.”
Minikagi si Jesus, “Laus hayana sa inikagi nu ha hurà nu igmaama 18ta lalima en sa nakaasawa ikaw daw sa maama ha amulà nu iman kenà nu man igmaama.”
19Nakaikagi su bahi, “Iyan kad en gayed su prupita. 20Sa mga gin-apuan day duun sidan tagsimba taini ha bubungan, ba sinyu sa mga Judio tigtudlù nuy ha kinahanglan ha diyà kaw dà gayed magsimba ta Jerusalem.”
21Ba tuminubag si Jesus, “Tuuwi a ha makauma sa panahun ha kenà kuy duun dà taini ha bubungan daw diyà dà ta Jerusalem magsimba hu Dios. 22Hurà nuy katun-i ku sin-u sa tagsimbahen nuy, ba sikay sa mga Judio natun-an day ta dini ta kanay agkapuun sa makaluwas hu kaet-etawan. 23Iyan en iman haini panahun ha sa mga etaw magsimba hu Dios pinaagi hu Balaan ha Ispiritu sumalà hu kamatuuran, ta iyan haini laus ha pagsimba ha agkabayaan hu Dios. 24Sa Dios na Ispiritu aman sa agsimba kandin kinahanglan ha sumimba gayed pinaagi hu Balaan ha Ispiritu sumalà hu kamatuuran.”
25Tuminubag su bahi, “Natun-an ku ha makauma ku malugay sa Misiyas ha tagngaranan daan ki Cristo. Ku makauma en haena isaysay din kanuy sa alan.”
26Dayun minikagi si Jesus, “Siak sa pakiglalang ikaw iyan ad en.”
Sa Paglikù Hu Mga Tinun-an Diyà Ki Jesus
27Duun daan taena nakauma sa mga tinun-an hi Jesus daw nangabeleng gayed sidan ku imbà pakiglalang si Jesus taena ha bahi. Ba hurà kandan nanginginsà taena ha bahi ku inu sa agkabayaan din daw hurà dan en daan insai si Jesus ku imbà pakiglalang kandin.
28Inawaan ku bahi su bangà din daw likù diyà ta banuwa daw ikagiyi sa mga etaw diyà, 29“Naahà kud labi su etaw ha natun-an din sa alan ha mga binuhat ku, aman diyà kuy en ta daw maahà nuy. Iyan en gid haena su Misiyas?” 30Aman sagunà sidan namandiyà ki Jesus.
31Duun ku atabay inikagiyan si Jesus hu mga tinun-an din, “Manunudlù, kaen kad en.”
32Ba tuminubag si Jesus, “Amin ku kalan-enen ha hurà nuy katun-i.”
33Aman migpainsaay sa mga tinun-an din, “Amin gid mig-ila kandin hu kalan-enen.”
34Ba inikagiyan sidan hi Jesus, “Sa pagkaen ku iyan sa pagtuman hu agkabayaan taena ha migsugù kanak daw sa pagpenga hu alan ha igpabuhat din. 35Natun-an nuy en sa lalang ha tagyanaen, ‘Haepat pa ha bulan iman daw human sa tilegtay.’ Ba ikagiyen ku inyu ha tilegtay en iman ta ahaa nuy hayà sa mga etaw ha tagdini ta kanuy. Iling sidan hu impamegas ha tumanan en aglegtayen. 36Saena ha aglegtay agsuhulan hu Dios daw saena ha mga etaw ha malegtay dan ilahan hu kinabuhì ha hurà din katapusan, aman malipayen gayed haena sa tagpamegas daw sa agpamanlegtay. 37Laus gayed sa lalang ha tagyanaen, ‘Agpamegas sa sabuwa na sa sabuwa iyan aglegtay.’ 38Sinugù ku inyu ha lumegtay kaw duun hu bugtà ha kenà kaw iyan namegas duun. Lain en sa namegas ba iyan kaw gayed matigayun.”
Sa Pagpakatuu Hu Mga Taga-Samaria
39Madakel ha mga taga-Samaria duun taena ha banuwa sa nakatuu ki Jesus pinaagi hu inikagi ku bahi, “Natun-an hi Jesus sa alan ha mga binuhat ku.” 40Hinangyù dan si Jesus ha humapit diyà ta kandan aman migtimà si Jesus diyà hu daruwa ha aldaw. 41Amin pa madakel ha nakatuu kandin tumenged hu intudlù din kandan.
42Inikagiyan dan haena sa bahi, “Sa igpakatuu day kenà iyan dà sa intultul nu kanay ba napaliman day gayed sa lalang din daw natun-an day ha iyan en gayed Manluluwas hu kaet-etawan.”
Sa Batà Hu Upisyal Ha Apit En Agpatay
43Su maiwas en sa daruwa ha aldaw duminayun si Jesus diyà ta prubinsya ta Galilea. 44Naikagi en hi Jesus ha sa prupita harì matahuran hu mga etaw duun hu kandin dà ha banuwa. 45Su makauma si Jesus diyà ta Galilea nalipay gayed sa mga etaw hu pagdawat kandin ta nakatampu sidan hu pagsaulug diyà ta Jerusalem daw naahà dan sa alan ha binuhat din diyà.
46Luminikù dà si Jesus diyà ta Cana ha sakup ta Galilea ha duun migbuhat hu binu. Diyà ta Capernaum amin upisyal ha sa batà din ha maama agkatungkayan hu dalu. 47Su mapaliman ku upisyal ha nakauma si Jesus diyà ta Galilea sa napuun ta Judea inelegan din si Jesus daw hangyua ha dumiyà ta Capernaum ta daw mabulungan din su batà ha apit en agpatay.
48Ba inikagiyan haena hi Jesus, “Imbà kaw daw dà agtuu kanak ku makaahà kaw dà hu mga belenganen?”
49Su upisyal minagayuk gayed, “Dumuma ka kanak ta daw harì matay su batà ku.”
50Ba bà dà inikagiyi hi Jesus, “Umulì kad ta naulian en su batà nu.”
Tuminuu haena hu inikagi hi Jesus aman sagunà minipanaw. 51Su diyà pa ta dalan tinalagbù en hu mga suluguen din ha migtultul kandin ha naulian en su batà din. 52Su iinsà din ku kan-u naulii su batà tuminubag sidan, “Daw gabì ha agkapulid sa aldaw.”
53Dayun nahenà-henà ku amay ha iyan haena uras ha minikagi si Jesus diyà ta kandin, “Naulian en su batà nu.” Aman nakatuu haena sa upisyal daw sa pamilya din.
54Ikaduwa haena ha belenganen ha nabuhat hi Jesus sugud hu paglikù din diyà ta Galilea ha napuun ta Judea.
S'ha seleccionat:
Juan 4: bkd
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© 2015, Wycliffe Bible Translators, Inc. All rights reserved.