Lucas 24
24
Sa Pagkabanhaw Hi Jesus
(Lucas 24:1-12; Mateo 28:1-10; Marcos 16:1-8; Juan 20:1-10)
1Su kaaldawen en hu Duminggu sa mga bahi ha tag-uwit hu pig-andam dan ha mga pahumut duminuun ku piglebengan ki Jesus. 2Su makauma sidan duun ku lebeng naahà dan ha naawà en su batu ha in-ipel duun. 3Ba su sumeled sidan hurà dan kaahà sa lawa hi Jesus 4aman miglibeg sidan ku inu sa nahitabù. Dayun tigkan nakahiwal diyà ta kandan sa daruwa ha maama ha tagpinaksuy hu tagpangaluanlag. 5Saena ha mga bahi luminuhud ha nakadunghuy ta nangahaldek, ba inikagiyan sidan ku mga maama, “Imbà nuy duun taini ha lebeng agpan-ahaa sa bubuhay ha etaw? 6Saena hurà en dini ta nabanhaw en. Henhenaa nuy haena sa inikagi din inyu su diyà kaw pa ta Galilea 7ha kinahanglan ha sa Suled hu Kaet-etawan itugyan duun hu mga makasasalà ha etaw daw ilansang duun hu krus ba duun hu ikatulu ha aldaw mabanhaw dà.” 8Dayun nahenhenaan dan haena sa mga lalang hi Jesus.
9Su lumikù sidan tinultulan dan su sampulù daw sabuwa ha apustulis daw sa duma pa ha mga etaw.
10Saini ha mga bahi ha nanunultul duun hu mga apustulis iyan si Maria Magdalena si Juana, si Maria ha inay hi Santiago daw amin pa duma ha mga bahi. 11Ba hurà tuu su mga apustulis ta bà su kenà laus ha tultul. 12Ba si Pedro minulalaguy dayun payanaen duun ku lebeng. Sinil-ip din su lebeng ba iyan din dà naahà su maputì ha manggad ha nakaugsak. Dayun minulì ha nabeleng gayed taena ha nahitabù.
Sa Pagpaahà Hi Jesus Duun Hu Daruwa Ha Etaw
(Lucas 24:13-35; Marcos 16:12-13)
13Duun taena ha aldaw amin daruwa ha sumusunud hi Jesus ha napuun ta Jerusalem daw tagdiyà ta banuwa ta Emaus, sampulù daw tatulu ha kilumitru sa pig-elangan taini. 14Su taghipanaw sidan tagsubayen dan su nahitabù. 15Tigkan nakaduma kandan si Jesus 16ba hurà magpakilala kandan.
17Ininsaan sidan hi Jesus, “Inu sa tagsubayen nuy?”
Tuminaleen sidan sa tagmaleleng. 18Sa sabuwa kandan ha si Cleopas tuminubag, “Sabubuwa ka dà gid ha nakadini ta Jerusalem ha hurà makatuen hu naul-ulahan iman dini.”
19Nanginginsà si Jesus, “Inu man diay sa nahitabù?”
Saena inikagiyan dan, “Mahitenged ki Jesus ha taga-Nazareth sa sabuwa ha prupita daw tinuuwan hu mga etaw tumenged hu belenganen ha binuhat din daw hu mga pagtudlù din ha amin duun gahem. 20Ba intugyan hu mga labaw ha sinaligan hu paghalad daw hu duma ha mga agalen taw ta daw mahukuman hu kamatayen dayun inlansang duun hu krus. 21Taghinam kay en ngaay ha iyan en haena maglibri hu mga kaliwatan hi Israel ba iman ikatulu en ha aldaw hu kahitabù taena. 22Nangabeleng kay daan ta amin day mga duma ha bahi ha duminuun ku lebeng din ganin ha kaaldawen 23ba hurà dan kaahà sa lawa din. Aman luminikù sidan dini ta kanay daw tultuli kay kandan ha amin mga balinsuguen hu Dios ha nakahiwal diyà ta kandan daw mig-ikagi ha nabanhaw en si Jesus. 24Amin day pa gayed mga duma ha duminuun ku lebeng daw naahà dan ha laus gayed sa inikagi ku mga bahi ta hurà dan kaahà sa lawa hi Jesus.”
25Dayun inikagiyan sidan hi Jesus, “Mga buang-buang kaw ha mga etaw, imbà kaw harì agtuu taena ha inikagi su anay hu mga prupita? 26Kenà ba kinahanglan ha su Misiyas makaagi hu mga alantusen daw human magharì?” 27Dayun insaysay hi Jesus diyà ta kandan sa mahitenged hu kaugalingen din ha nakasulat duun hu lalang hu Dios pinaagi ki Moises daw hu alan ha mga prupita.
28Su makauma sidan duun ku banuwa ha agpayanan-an dan agdayun ngaay si Jesus, 29ba hinawidan dan haena, “Dini ka dà magtimà ta kanay ta agkadaleman en.” Aman diyà dà si Jesus huminulabung ta kandan.
30Su agkaen en sidan tinimù din su supas daw ampui dayun pinangebing din haena daw ipan-ila kandan. 31Dayun human dan nakilala si Jesus ba tigkan dà nahanaw. 32Migpainsaay sidan, “Iyan gid diay gan tungkay ta igkabayà-bayà su tagtudluan ki kandin hu insulat ha lalang hu Dios su diyà kuy pa ta dalan.”
33Sagunà sidan luminikù diyà ta Jerusalem daw elegi su tag-amul-amulan ku mga apustulis daw hu mga duma dan. 34Saena ha mig-amul-amul naman-ikagi, “Laus gayed ha nabanhaw sa Ginuu ta migpaahà haena diyà ki Simon.” 35Dayun su daruwa ha etaw nanunultul daan hu nahitabù diyà ta dalan daw hu pagkakilala dan ki Jesus su pangebingen din en su supas.
Sa Pagpaahà Hi Jesus Duun Hu Mga Apustulis
(Lucas 24:36-49; Mateo 28:16-20; Marcos 16:14-18; Juan 20:19-23; Mga Buhat 1:6-8)
36Su kamulu pa tag-ikagi sa mga apustulis migpaahà si Jesus diyà ta taliwarà dan daw ikagi, “Magmalinawen kaw.”
37Nakignat sidan daw nangahaldek ta henà dan ha kalag haena. 38Ba inikagiyan sidan hi Jesus, “Imbà kaw agkasamuk daw imbà kaw tagduwa-duwa mahitenged kanak? 39Iyan ad en haini. Ahaa sa alima ku daw sa paa ku. Ibiti a inyu ta sa kalag hurà din lawa ha iling iman kanak.”
40Su maikagi din haena impaahà din kandan sa alima din daw sa paa din. 41Nangabayà-bayà sidan daw nangabeleng ba tagduwa-duwa pa sidan ku iyan en ba gayed haena, aman nanginginsà si Jesus, “Amin nuy ba agkakaen dini?” 42Inilahan dan haena hu inanag ha sedà 43dayun kinaen din duun hu atubangan dan.
44Inikagiyan din sidan, “Iyan en haini inikagi ku inyu su anay ha tagduma-dumahà kuy ha kinahanglan matuman gayed sa alan ha nakasulat mahitenged kanak duun hu Kasuguan hi Moises daw hu mga insulat hu prupita daw duun hu mga Salmo.”
45Dayun impasabut din kandan sa alan ha insulat ha lalang hu Dios. 46Minikagi haena, “Sa insulat ha lalang hu Dios tagyanaen, ‘Su Misiyas kinahanglan ha makaagi hu mga alantusen daw matay gayed ba duun hu ikatulu ha aldaw mabanhaw dà.’ 47Aman agsuguen ku inyu ha isangyaw nuy duun hu kaet-etawan sugud ta Jerusalem payanaen hu alan ha mga nasud ha ku maghinulsul sidan mapasaylu gayed sa mga salà dan. 48Iyan kaw iman mga tistigus taena ha katumanan hu mga tagnà. 49Ba magtimà kaw pa enà dini ta Jerusalem daw angati nuy sa Balaan ha Ispiritu ha insaad hu Dios ta agsuguen ku haena diyan ta inyu daw gaheman kaw kandin.”
Sa Pagligtu Hi Jesus Diyà Ta Langit
(Lucas 24:50-53; Marcos 16:19-20; Mga Buhat 1:9-11)
50Su mauma en hi Jesus su mga apustulis din diyà ta Betania imbayaw din sa mga alima din daw panalangini sidan. 51Su kamulu din pa sidan tagpanalangini nabatun haena payanaen diyà ta langit. 52Dayun suminimba kandin su mga apustulis daw likù diyà ta Jerusalem ha malipayen gayed. 53Aldaw-aldaw agdiyà sidan ta Timplu hu pagdayè hu Dios.
S'ha seleccionat:
Lucas 24: bkd
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© 2015, Wycliffe Bible Translators, Inc. All rights reserved.