Macoo 4
4
Shitaanni ya Yesu taanna wii
(Marika 1:12-13; Luka 4:1-13)
1Lee kadugo na a Fɛfɛɛrɛ Munaa di Yesu ɲaha co na kari siwaga ni, kɔnhɔ Shitaanni di shɛ wu taanna wii. 2A wʼi suun le na ta cabyaa kɛlɛɛ shishɛɛrɛ (40) ni nibiiye kɛlɛɛ shishɛɛrɛ. Lee kadugo na, a xuugo di wu ta. 3A Shitaanni di fulo wu na, na wu pye: «Ma bi ɲɛ Kilɛ wo Ja we, ye faakageeye ye pye na yi ɲɛri buuri.» 4A Yesu di wu ɲɔ shɔ na: «Lʼa ka Kilɛ Kafila wu ni na:
‹Ɲɔ yalige yɛ wa sipya ɲɔ shaa wɛ,
ga fo jomɔ pemu bɛɛri Kilɛ ya yu ge.›#4:4 Dutɛrɛnɔmɛ 8:3 »
5Lee kadugo na a Shitaanni di gari ni wu ni Fɛfɛɛrɛ Kulo li ni, na shɛ wu yaha Kilɛ-pɛɛŋɛ pugbɔhɔ ki ɲidii li ni, 6na wu pye: «Ma bi ɲɛ Kilɛ wo Ja we, kɔn to ɲiŋɛ na. Bani lʼa ka Kilɛ Kafila wu ni na:
‹Kilɛ na ma kaa jo wu mɛlɛkɛɛ pu mu,
pee na ma co pu keye ni,
kɔnhɔ ma tɔɔgɔ ganha bu guu
kagereŋɛ yafiin na wɛ.›#4:6 Zaburuu 91:11-12 »
7A Yesu di wu pye: «Lʼa ka bɛ sanha Kilɛ Kafila wu ni na:
‹Ma ganha ma Kafɔɔ Kilɛ taanna wii wɛ.›#4:7 Dutɛrɛnɔmɛ 6:16 »
8Lee kadugo na a Shitaanni di wu lɔ sanha na shɛ yaha faabobotɔɔngɔ ka fugba ni, na shɛ koŋɔ saanra ti bɛɛri, ni ti nɔɔrɔ wu bɛɛri shɛ wu na, 9na wu pye: «Ma bu nuguro sin nɛ fɛɛ ni, na nɛ pɛlɛ, nɛ na ye bɛɛri kan ma mu.» 10Wee tuun wu ni a Yesu di wu pye: «Shɛ wà dɛ, Shitaanni! Bani lʼa ka Kilɛ Kafila wu ni na:
‹Mʼa ma Kafɔɔ Kilɛ yɛ pɛlɛ, ma da labye pyi wee yɛ nigin mu.›#4:10 Dutɛrɛnɔmɛ 6:13 »
11Ayiwa, a Shitaanni di laha wu tàan, na gari, a mɛlɛkɛɛ pii di fulo wu na, na wu keree yàa.
Yesu ya wu labye wu ɲɔ kɔn Galile fiige ki ni
(Marika 1:14-15; Luka 3:14-15)
12Ba Yesu ya pa yi logo na Yohana ya le kaso ni wɛ, a wʼi yìri wee xuu wu ni, na gari Galile fiige ki ni. 13Ga wu ya ta tiin Nazarɛti kulo li ni wɛ, a wu shɛ diin Kapɛrinɔmɔ kulo li ni. Lee bye Galile Gba wu ɲɔ ki na, Zabulɔn wo koomɔ pe ni Nɛfitali wo koomɔ pu ni. 14Lee ya pye mu, kɔnhɔ Kilɛ tudunmɔɔ Ezayi bi yemu jo ge, yee ɲɔ di fa na:
15«Zabulɔn wo koomɔ pe
ni Nɛfitali wo koomɔ pu ni,
pee pemu pu ɲɛ Galile Gba wu ɲɔ koomɔ pe,
Zhurudɛn Gba wu kadugo yíri ge,
shi watii shɛɛn ya ɲɛhɛ Galile
wemu wo koomɔ pu ni ge.
16Sipyii piimu pu bi tiin nibiige ki ni ge,
pee ya kpɛɛngɛ nigbɔhɔ ɲa.
Piimu pu bi bye xu wo nibiige fiige ki ni ge,
kpɛɛngɛ ya foro pee mu.»#4:15-16 Ezayi 8:23; 9:1-2
17Wee tuun we ni Yesu ya Kilɛ Jozaama pu yɛrɛ li ɲɔ kɔn na byi. Wu bi yu na: «Yi daajeŋɛ jo yi jurumu wu na, bani fugba saanra tʼa tɛɛŋɛ.»
Yesu ya fyashaa shishɛɛrɛ yiri
(Marika 1:16-20; Luka 5:1-11)
18Caŋa ka, na Yesu yaha wu na ɲaari Galile Gba wu ɲɔ ki na, a wu fyashaa shuun ɲa, pʼi ɲɛ cebooloo: Simɔ, wee wemu pʼa byi na Pyɛɛri ge, ni wu ceborona Andire. Jɔ̀ pu bi waa gba lɔhɔ ki ni. 19A Yesu di pu pye: «Yi taha na fɛni, di yi pye sipyii shavɛɛ.» 20Taapile ni a pʼi jɔlɔɔ pu yaha wà, na daha wu fɛni. 21A wu shɛ ɲaha na, na ceboronamaa shuun wa bɛ ɲa. Pee bye Zebede wo jalaa shuun: Yakuba ni Yohana. Pu wo jɔlɔɔ pee di bi jooli pu kɔrɔgɔ funŋɔ ni, ni pu to Zebede wu ni. A Yesu di pee bɛ yiri. 22Taapile ni a pee bɛ di pu wo kɔrɔgɔ ki yaha wà ni pu to wu ni, na daha wu fɛni.
Yesu ya sipyii kalaa, na yama fɛɛ cuuŋɔ
(Luka 6:17-19)
23Yesu bi Galile fiige ki bɛɛri ɲaari, na kalaa kaan sipyii pu mu pu Kilɛ-pɛɛŋɛ piyɛyɛ yi ni. Wu bi fugba saanra ti wo Jozaama pu yu, na yama tuuyo yi bɛɛri xuu, na sipyii shuu pu fanhaxhɔɔrɔ tuugo bɛɛri na. 24A Yesu mɛgɛ di Siiri fiige ki bɛɛri círi. A sipyii pʼi ganha na yama fɛɛ pu bɛɛri tugoo na ma wu mu. Gban tuuyo bɛɛri yi bye pee yama fɛɛ pii ni: Jinaa bye pii ni, pii di ɲɛ kirikirizaannaa fɛɛ, kabanuxuyo fɛɛ ɲɛ pu ni. A Yesu di pu bɛɛri cuuŋɔ. 25A sipyiɲɛhɛmɛɛ di daha wu fɛni. Pee bi yìri Galile fiige ki ni, ni Dekapoli fiige ke, ni Zheruzalɛmu kulo le, ni Zhude fiige ke, ni Zhurudɛn Gba wu kadugo yíri.
S'ha seleccionat:
Macoo 4: mykNTpo
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© 2019, Wycliffe Bible Translators, Inc. All rights reserved.