Zãa 16
16
1Ma yãpiɔ òɛ́ kɛ́ ásu fuo yãiɛ. 2Wa luasisikpɛ zɔ̃ɛ́. A gɔɔ lɛ́ mɔ́ se kɛ́ gbɛ̃́ pɔ lɛ́ á dɛ a e álɛ zĩkɛ Luaɛɛ. 3Aa yãpiɔ kɛɛ́ kɛ́ aa ma Mae ń mapio dɔ̃o yãi. 4Ma yãpiɔ òɛ́, kɛ́ tó a gɔɔ kà, íɔ dɔ̃ má òɛ́ kɔɛ.
Lua Nisĩna zĩ
Mi yãpiɔ oɛ́ za káauo, kɛ́ má kuanɔ yãi. 5Malɛ tá gbɛ̃́ pɔ ma zĩ kĩi sa. Á gbɛ̃e i ma la gu pɔ malɛ táuo. 6Á pɔ siakũ̀ sa, kɛ́ ma yãpiɔ òɛ́ yãi. 7Sĩana malɛ oɛ́, ma taa a aikɛɛ́, asa tó mi tao, Zɛnnɔdepi a mɔwáo. Tó ma ta, má aà zĩwá.#Zĩn 2.1-4 8Tó à mɔ̀, a dũnia ɛɛ kaɛ̀ a ɔzĩ duuna ń maakɛao ń yãkpalɛkɛao yãmusu, 9duuna yãmusu, kɛ́ aai ma naaikɛo yãi, 10maakɛa yãmusu, kɛ́ malɛ tá ma Mae kĩi mɛ́ á ma e lɔo yãi, 11yãkpalɛkɛa yãmusu, kɛ́ wà yãkpalɛkɛ̀ ń dũniaɛ bee kiao yãi.
12Má yã vĩ dasi mà oɛ́ lɔ, ãma á yãpiɔ fɔ̃ gĩ́ao. 13Tó Nisĩn sĩande mɔ̀, a dɔaaɛ́ sĩana pii guu. A yã'o ń azĩaoo, yã pɔ a mà ɔ̃ ali o, i yã pɔ lɛ́ mɔ́ɔ baokpaɛ́. 14A ma tɔbɔ, asa ɔ̃mɛ a ma yãɔ sɛlɛ siuɛ́. 15Pɔ pɔ ma Mae vĩ piiá ma pɔɛ. A yãi ma mɛ̀ a ma yãɔ sɛlɛ siuɛ́.
16À gɔ̃̀ yɔɔ á ma e lɔo, à gɔ̃̀ yɔɔ lɔ í ma e.
Pɔsia lilɛa pɔna ũ
17Ɔ̃ aà iwaeɔ òkɔ̃ɛ: Bɔ́ yã àlɛ owɛ̃ɛ wei? À mɛ̀, à gɔ̃̀ yɔɔ wá a e lɔo, mɛ́ à gɔ̃̀ yɔɔ lɔ wí a e. À mɛ̀ lɔ álɛ tá a Mae kĩiɛ. 18Ɔ̃ aa mɛ̀: À gɔ̃̀ yɔɔ pɔ a òpi dɛ kpelewa ni? Wi yã pɔ àlɛ opi mao. 19Yesu dɔ̃̀ kɛ́ aa ye wà a la, ɔ̃ a ònɛ́: Kɛ́ ma mɛ̀, à gɔ̃̀ yɔɔ á ma e lɔo, mɛ́ à gɔ̃̀ yɔɔ lɔ í ma e, bee álɛ kɔ̃lalaia? 20Sĩana malɛ oɛ́, á ɔɔlɔ á wɛ̃nakɛ, ãma dũnia a pɔnakɛ. Áɔ ku pɔsia guu, ãma á pɔsiapi a lilɛ pɔna ũ. 21Tó nɔɛ ye nɛ'ii, aà pɔ ì siakũ kɛ́ aà wãwãkɛgɔɔ kà yãi. Tó à nɛ'ì sɔ̃, wãwã pɔ a kɛ̀pi lí dɔaagu lɔo. Aà pɔ ì kɛ naɛ, kɛ́ à nɛ dafu kà dũniawa yãi. 22Màa apiɔ, á pɔ sia gĩ́a. Má ɛa mà á e lɔ, á pɔ i kɛ na, mɛ́ gbɛ̃e a á pɔnapi siwáo. 23Gɔɔ bee á yãe laa lɔo. Sĩana malɛ oɛ́, ma Mae a pɔ pɔ a a wabikɛ̀wa ń ma tɔ́o kpawá. 24E tia i pɔe wabikɛ ń ma tɔ́oo. Àli wabikɛ, íli e, kɛ́ á pɔna pɛɛwá yãi.
25Ma yãpiɔ lɛ̀ɛũɛ́ɛ. A gɔɔ lɛ́ mɔ́ má yã'oɛ́ ń yãlɛɛũao lɔo, mí a Mae yã'oɛ́ wasawasa. 26Gɔɔ bee á wabikɛ ń ma tɔ́o. Mi oɛ́ mamɛ má wabikɛɛ́ ma Maewao, 27asa ma Mae yeázi kɛ́ á yemazi yãi, mɛ́ a ma bɔa aà kĩi sì. 28Ma bɔ ma Mae kĩi ma mɔ dũniau. Tiasa malɛ dũniato malɛ tá aà kĩi. 29Ɔ̃ aà iwaɔ òɛ̀: Too, nlɛ yã'o ń yãlɛɛũao lɔo, nlɛ o wasawasa sa. 30Wá dɔ̃ sa kɛ́ ń yãpii dɔ̃, baa tó gbɛ̃́ i a laasoo onɛo. Bee yãi wa n bɔa Lua kĩi sì.
31Ɔ̃ Yesu ònɛ́: Àlɛ ma naaikɛ saa? 32A gɔɔ lɛ́ mɔ́, à kà kɔ̀, kɛ́ á fãaa, á baade i ta a bɛ i ma to mado. Ń beeo má ku madoo, asa ma Mae kumanɔɛ. 33Ma yãpiɔ òɛ́, kɛ́ naaa guu á nɔ̀sɛ àɔ daa doũ. Á wɛtɛ̃a'e dũniau, ãma à sɔ̃dilɛ, ma zĩblè dũniawa.
S'ha seleccionat:
Zãa 16: Boo2024
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
Boko Bible © SIM International, 2024.