Luk 23
23
Pilati yãkpalɛkɛa ń Yesuo
(Mat 27.11-31; Maa 15.1-20; Zãa 18.28–19.16)
1Ɔ̃ aa fɛ̀lɛ mpii, aa gɛ̀aanɔ Pilati aɛ. 2Aalɛ mɔ́ ń aà yão aa mɛ̀: Wa gbɛ̃́ɛ bee è, àlɛ gudɛkɛ wá busuuɛ, àlɛ ginɛ́ wà falubɔ Sezaaɛ, mɛ́ à azĩa dìlɛ Mɛsi ũ, kia ũ. 3Ɔ̃ Pilati aà là à mɛ̀: Yudaɔ kian n ũa? A wèwà à mɛ̀: Ɔ̃mɛ dɔ n lɛ́u we. 4Ɔ̃ Pilati ò sa'onkiaɔ ń dasi pɔ ku weɔnɛ: Mi taae'e gbɛ̃́piwao. 5Ɔ̃ aa giiyèwà aa mɛ̀: Ìɔ tɛkpa gbɛ̃́ɔgu a yãdaanɛ́ guu Yude busuu piiɛ. A dàalɛ Galileɛ, ɔ̃ à gɛ̀ kàiò la.
6Kɛ́ Pilati mà màa, ɔ̃ à gbɛ̃́ɔ là tó Galile gbɛ̃́n aà ũ. 7Kɛ́ a dɔ̃̀ à bɔ̀ Helodi busuuɛ, mɛ́ Helodipi ku Yelusalɛũ zĩbeezĩ, ɔ̃ à aà gbàɛwà. 8Kɛ́ Helodi Yesu è, ɔ̃ aà pɔ kɛ̀ na maamaa, asa à aà baomàɛ, mɛ́ a ye wɛsiaalɛi à gɛ̃̀gɛ̃. Aà wɛ́ dɔ Yesu dabudabukɛa eai. 9À yãɔ làlawà dasi, ɔ̃ Yesu i a kee wewào. 10Sa'onkiaɔ ń Mɔizi ikoyãdanɛdeɔ zɛa we, aalɛ mɔ́ ń aà yão pãsĩpãsĩ. 11Helodi ń a sosaɔ sakà Yesugu, aa aà laanikɛ̀, aa ula tɔde dàɛ̀, ɔ̃ à ɛ̀a à aà gbàɛ Pilatiwa. 12Zĩ́ bee Helodi ń Pilatio gɔ̃̀ kɔ̃gbɛ̃ ũ, asa aa ĩi yãaɛ.
13Pilati sa'onkiaɔ ń gbãadeɔ ń gbɛ̃kĩniɔ kã̀aa pii, 14a ònɛ́: A mɔmɛɛ ń gbɛ̃́ɛ beeo a mɛ̀ gudɛnaɛ. Ma aà làla á wáa yã pɔ á dɔ̀dɔwàɔ musu, mi e à taaee kɛ̀o. 15Màa Helodi i eo sɔ̃, asa à ɛ̀a à aà gbàɛwáɛ. À gwa, i yãe kɛ à kà mà aà dɛo. 16-17Má tó wà aà swãgaga, mí aà gbaɛ. 18Ɔ̃ aa wiilɛ̀ mpii sãnu aa mɛ̀: Gbɛ̃́pi dɛ! Balaba kɛ̃wɛ̃ɛ! 19Wà Balabapi dà kpɛ́u bɔa gbãadeɔ kpɛ ń gbɛ̃́dɛao yãiɛ. 20Pilati ye Yesu gbaɛ, ɔ̃ à gbɛ̃́ɔ laai sìsi a kĩi. 21Ɔ̃ aa ɛ̀a wiilɛ̀ aa mɛ̀: Ǹ aà pá líwa! Ǹ aà pá líwa! 22A gɛ̃n aaɔ̃de Pilati ònɛ́: Bɔ́ dàa a kɛ̀i? Mi tàae pɔ kà wà aà dɛ ewào. Má tó wà aà swãgagaɛ, mí aà gbaɛ. 23Ɔ̃ aa dìdiwà, aalɛ òɛ̀ ń wii gbãao aà aà pá líwa. Ɔ̃ an zɔa tò an yã blè. 24Ɔ̃ Pilati dìlɛ wà kɛ lá aa gbɛ̀awawa. 25Gbɛ̃́ pɔ wa dà kpɛ́u bɔa gbãadeɔ kpɛ ń gbɛ̃́dɛao yãi pɔ wa gbɛ̀api ɔ̃ a kɛ̃̀nɛ́, ɔ̃ à Yesu kpà gai lá aa yeiwa.
Yesu gaa
(Mat 27.32-56; Maa 15.21-41; Zãa 19.17-30)
26Kɛ́ wàlɛ gɛ́aanɔ, wà dà Silɛni gbɛ̃́ Simɔlɛ, àlɛ su ń buao, ɔ̃ wà aà kũ̀ wà lipãakɔ̃a dìɛ̀ aàɔ tɛò Yesuzi. 27Bila bɔ̀ tɛaazi ń nɔɛ pɔ aalɛ ɔɔlɔ aalɛ ńzĩa gbɛ̃gbɛ̃ɔ. 28Yesu lìli aɛdɔ̀má à mɛ̀: Yelusalɛũ nɔɛɔ, ásu ɔɔlɔ ma yãio. À ɔɔlɔ ázĩa ń á nɛɔ yãi. 29Asa a gɔɔ lɛ́ mɔ́ kɛ́ wa o: Baaadeɔn fĩi pɔ aai nɛ'io mɛ́ nɛ i yɔ̃mimáoɔ ũ. 30Gɔɔ bee
wa o gbɛsiɔnɛ aa lɛlɛ simá,
wa o sĩ̀sĩɔnɛ aa kuńla.#Oze 10.8
31Asa lá wàlɛ yãɛ taa kɛ ń libusuo, lí gii pɔ aɔ dɛai?
32Wàlɛ gɛ́ ń daakɛn plaeɔ lɔ, kɛ́ wà ń dɛdɛ ń Yesuo sãnu. 33Kɛ́ aa kà gu pɔ wì mɛ Mitɔɔnai, ɔ̃ aa aà pà líwa we ń daakɛnapiɔ, a do aà ɔplaai, a do ɔzɛɛi. 34Ɔ̃ Yesu mɛ̀: Baa, suuukɛńnɔ, asa aa dɔ̃ lá wàlɛ kɛo. Ɔ̃ wà tɛlɛpà wà aà pɔkasaɔ kpaalɛ̀òkɔ̃ɛ.#Soũ 22.19 35Wa zɛa we, wàlɛ gugwa, mɛ́ Yuda gbãadeɔ lɛ́ lɛsuikɛkɛwà#Soũ 22.8 aa mɛ̀: À dãɔ suabà. Tó Mɛsi pɔ Lua dìlɛn aà ũ, aà azĩa suabae! 36Sosaɔ lɛ́ aà kɛ pɔɔpɔɔ lɔ. Ɔ̃ aa sɔ̃̀aazi aa vɛ̃ɛ kũma dɔ̀ɛ̀#Soũ 69.22 37aa mɛ̀: Tó Yudaɔ kian n ũ, ǹ nzĩa suaba. 38Seelae naa aà mia à mɛ̀:
Yudaɔ kian kɛ!
39Daakɛna pɔ looa líwapiɔ do dɔɛnnɔyã òɛ̀ à mɛ̀: Mɛsin n ũo lò? Ǹ nzĩa suaba ń wapiɔ sãnu. 40Ɔ̃ aà gbɛ̃do gìɛ̀ à mɛ̀: Nlɛ vĩakɛ Luaɛ seoa? Go doũ mɛ́ lɛ́ wá gbɛ̃. 41Wapiɔ, à kɔ̃sìwanɔ màaɛ, asa pɔ pɔ wá tɔ̃̀ mɛ́ bɔ̀lɛwɛ̃ɛ, ãma dee i yãe kɛo. 42Ɔ̃ à mɛ̀: Yesu, tó n mɔ kpalablei, to ma yã àɔ dɔngu. 43Ɔ̃ a wèwà à mɛ̀: Sĩana malɛ onɛ, za gbã ńyɔ̃ɔ kumanɔ aizãna guu.
44Kɛ́ ĩatɛ̃ kà minanguo, a biia zɛ̀, ɔ̃ gusiakũ̀ busupiu pii e aua gɛ̀ pìlaò. 45Zwãa pɔ daa luakpɛu#Bɔa 26.31-33 kɛ̃̀ a guo. 46Yesu wiilɛ̀ gbãugbãu à mɛ̀: Baa, malɛ ma nisĩna nanɛ n ɔzĩɛ.#Soũ 31.6 Kɛ́ a ò màa, ɔ̃ à kɛ̀sai. 47Kɛ́ sosaɔ gbɛ̃zɔ̃ɔ yã pɔ kɛ̀pi è, à Lua saaukpà à mɛ̀: Gbɛ̃́piá gbɛ̃maaɛ sĩana. 48Bila pɔ kã̀aa we yãpi gwaa yãiɔ, kɛ́ aa yã pɔ kɛ̀ɔ è, aa ɛ̀a tà, aalɛ ńzĩa gbɛ̃gbɛ̃. 49Yesu gbɛ̃́ dɔ̃aɔ ń nɔɛ pɔ tɛaazi za Galileɔ pii zɛ kãaa, aalɛ yãpiɔ gwa.#Luk 8.1-3
Yesu vĩa
(Mat 27.57-61; Maa 15.42-47; Zãa 19.38-42)
50Gɔ̃ɛe ku aà tɔ́n Yosɛfu. Yuda gbãadeɔ doɛ. Gbɛ̃maaɛ, mɛ́ luayãmanaɛ. 51Aà lɛ́ ku yã pɔ a gbɛ̃́ɔ zɛ̀ ń a kɛao guuo. Yudaɔ wɛ̃lɛ Alimate gbɛ̃́ɛ, aà wɛ́ dɔ kia pɔ Lua kpàzi. 52À gɛ̀ Pilati kĩi à Yesu gɛ gbɛ̀awà. 53Ɔ̃ a bùa à baabaa fĩ̀fĩwà, à aà dà gbɛ'ɛ pɔ wa sɔ̀ mia ũ guu. Wi gbɛ̃e dau we yãao. 54Gɔɔpiá ãsɔ̃adazĩɛ, kãmabogɔɔ lɛ́ ká. 55Nɔɛ pɔ aa tɛ Yesuzi za Galileɔ tɛ Yosɛfupi kpɛ, aa mia'ɛpi è ń lá à Yesu gɛ dìlɛuo. 56Ɔ̃ aa tà, aa gɛ̀ nisi gĩnana ń tulaletiɔ sɔukɛi. Kãmabogɔɔ aa kãmabò lá Lua dìlɛwa.#Bɔa 20.10
S'ha seleccionat:
Luk 23: Boo2024
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
Boko Bible © SIM International, 2024.