Luka 4
4
Ceyɗan Foondi Yeesu
(Maatiyu 4.1‑11; Markus 1.12,13)
1Yeesu ƴiwoyi daga Caangol Urdun e heewi Ruuhu Allah. Sey Ruuhu Allah yaarimo nder ladde. 2Ton o waɗi balɗe 40 Ceyɗan e foondamo, o nyaamaayi goɗɗum nder balɗe ɗen. Nden gaɗa maaje, weelo nangimo.
3Ceyɗan wi'imo, “To an woni Ɓiɗɗo Allah, wi'u nde'e hayre warta buroodi.”
4Yeesu nootii wi'imo, “Aayaare wi'ii, ‘Naa' e nyamndu tan neɗɗo marortoo.’ ”#TA 8.3.
5Sey Ceyɗan yaarimo wonde wigeere townde, bo maƴƴuki hollimo leyɗe duuniyaaru fuu. 6Nden Ceyɗan wi'imo, “Mi hokkete laamu e mangu dow leyɗe ɗe'e fuu, ngam ɗum hokkiiyamɗe. Mi waaway hokkukiɗe koo moye mo ngiɗumi. 7Ngam non, taa mawniniiyam, ɗu'um fuu ɗum wartay ɗum maaɗa.”
8Yeesu wi'imo, “Aayaare wi'ii,
‘Mawnin Allah Joomiraawo maaɗa, kanko tan mawnintaa.’ ”#TA 6.13.
9Sey Ceyɗan yaarimo Urucaliima, darnimo ton dow hoore Wuro Ceniingo, wi'imo, “To an woni Ɓiɗɗo Allah, diwu daga ɗo'o, 10ngam aayaare wi'ii, ‘Allah wi'ay malaa'ika'en muuɗum mballumaa boɗɗum. 11Ɓe taɓɓete nder juuɗe maɓɓe, ngam to' nawnaa koyɗe maaɗa dow hayre.’ ”#Jab 91.11,12.
12Yeesu wi'imo, “Aayaare wi'i, ‘Taa' foondu Allah Joomiraawo maaɗa.’ ”#TA 6.16.
13Nde Ceyɗan heenyi foonduki Yeesu fuu, sey o alimo yaaki wongel carel.
Yeesu Fuɗɗi Kuugal Muuɗum Nder Galiili
(Maatiyu 4.12‑17; Markus 1.14,15)
14Sey Yeesu so''ii leydi Galiili nder bawɗe Ruuhu Allah. Habaru maako sankitii nder leydi ndin. 15O fuɗɗi ekkitinki nder cuuɗi do'aare maɓɓe, koo moye mantimo.
Ɗum Wanyii Yeesu Nder Najarat
(Maatiyu 13.53‑58; Markus 6.1‑6)
16Yeesu yahi Najarat, gariiri to mawni. Nyalnde Siwtaare, o natti suudu do'aare no o woowi waɗuki. Sey o ummii o darii ngam o janga Deftere Ceniinde. 17Ɗum hokkimo deftere Annabi Icaaya, o maɓɓitinde, o jangi aayaaje bi'uɗe,
18“Ruuhu Joomiraawo e dow am,
ngam o suɓiiyam mi hokka ɓe ngalanaa Habaru Belɗum.
O liliiyam mi wadda habaru yoofuki maccuɓe,
mi wumtina wumɓe,
mi waɗa ɗum ala torreteeɓe ndilla,
19Mi wa'ajinana duuniyaaru wiiki hitaande nde Joomiraawo hisnata yimɓe muuɗum waroyi.”#Ica 61.1,2.
20Sey o maɓɓi deftere nden, o hokkitinde ballitoowo o jooɗii. Koo moye gonɗo nder suudu do'aare ndun sutiimo. 21Sey Yeesu wi'iɓe, “Ɗe'e aayaaje ɗe nanɗon, hande ɗe keewii.”
22Koo moye e wi'a boɗɗum dow maako. Boliiɗe boɗɗe burtiiɗe nder honduko maako hayɗiniiɓe. Ɓe mbi'i, “Naa' o'o woni ɓiɗɗo Yusufu?”
23O wi'iɓe, “Walaa seko on mbi'ayyam haala ka'a, ‘Nyawndoowo#4.23: Waato likitaajo., yamɗin hoore maaɗa! Ko min nani a waɗii nder Kafarnahum, waɗu ɗum ɗo'o nder gariiri maaɗa.’ ” 24Kadimaa o wi'iɓe, “Goonga, e mi wi'a'on, walaa annabiijo jaɓeteeɗo to gariiri muuɗum.#Yah 4.44. 25E mi wi'a'on goonga, e carel Annabi Iliya e woodi rewɓe ɗuɗɓe nder leydi Israa'iila ɓe worɓe mu''en maayi. E carel ngel, ɗum waɗi duuɓi tati e lebbi joweego'o ndiyam toɓaayi, nden ɗum waɗi weelo kallungo nder leydi ndin fuu.#1Laam 17.1. 26Ammaa Annabi Iliya liloyaaka to koo moye maɓɓe, sey to goɗɗo debbo naa' Yahuudankeejo mo gorko muuɗum maayi, gonɗo gariiri Jarifat nder leydi Sidon.#1Laam 17.8‑16. 27Kadimaa e woodi gooduɓe nyawu nyaamoojum laral ɗuɗɓe nder Israa'iila e carel Annabi Iliica, ammaa walaa jamɗinaaɗo nder maɓɓe sey Na'aman neɗɗo leydi Siiriya, naa' o Yahuudankeejo.”#2Laam 5.1‑14.
28Nde yimɓe wonɓe nder suudu do'aare ndun nani non, ɓe fuu ɓerɗe maɓɓe metti. 29Ɓe ummii, ɓe ndiiwimo daga nder gariiri, nden ɓe njaarimo dow ƴolde to gariiri maɓɓe woni, ngam ɓe tuuroyoomo ley, 30ammaa o tokki hakkunde maɓɓe, o dilli.
Yeesu Wurtini Ginnol
(Markus 1.21‑28)
31Sey Yeesu yahi gariiri Kafarnahum nder leydi Galiili, e mo ekkitinaɓe nder suudu do'aare Nyalnde Siwtaare. 32Ɓe kayɗini e ekkitinol maako, ngam boliiɗe maako e woodi bawɗe.#Maat 7.28,29.
33E woodi gooduɗo ginnol nder suudu do'aare ndun, o wulli sembee, o wi'i, 34“Wayyoo! Ko wannumaa e amin, Yeesu Najarankeejo? A waroyi ngam kalkaamin? E mi andi an a moye. An woni Ceniiɗo Allah!”
35Yeesu haɓaningol wi'i, “De''utu! Wurta nder maako!” Sey ginnol ngol do''i neɗɗo on yeeso maɓɓe, ngol wurtii ngol nawnaayimo.
36Ɓe fuu ɓe kayɗini, ɓe ngaɗi ka metuki hakkunde maɓɓe, e ɓe mbi'a, “Iri ɗeye boliiɗe ngoni ɗo'o? Ngam e mo metana ginni nder laamu e bawɗe, e ɗi mburtoo.” 37Nden habaru Yeesu sankitii nder leydi ndin.
Yeesu Yamɗitini Yimɓe Ɗuɗɓe
(Maatiyu 8.14‑17; Markus 1.29‑34)
38Gaɗa Yeesu alii suudu do'aare, dillii wuro Siiman. Esiraawo Biiturus debbo jonte kalluɗe e torramo, ɓe torii Yeesu yamɗitinamo. 39O wari to nyawɗo on, o haɓani jonte ɗen, sey ɗe njoofimo. Ɗon e ɗon nyawɗo on ummii, fuɗɗi waddankiɓe nyamndu.
40Nde naange hiiri, yimɓe ngaddani Yeesu gooduɓe nyawuuji feere‑feere, o yowi juuɗe maako dow koo moye nyawɗo, o yamɗitiniɓe. 41Ginni maa mburtii nder yimɓe ɗuɗɓe, e ɗi ngulla, e ɗi mbi'a, “An, a Ɓiɗɗo Allah!”
Ammaa o haɓaniɗi, o haɗiɗi metuki, ngam e ɗi andi kanko woni Almasiihu.
Yeesu Wa'ajini Nder Suudu Do'aare
(Markus 1.35‑39)
42Nde weeti, Yeesu wurtii gariiri ndin yahi wonde wigeere nder ladde. Yimɓe ngaɗi ka ɗaɓɓutukimo. Nde ɓe tawimo, ɓe ngiɗaa o dilla o alaɓe. 43Ammaa o wi'iɓe, “Doole mi wa'ajina Habaru Belɗum dow Laamu Allah e goɗɗe gariije, ngam maajum ɗum liloyiyam.”
44Nden o waɗi ka wa'ajinki nder cuuɗi do'aare leydi Yahuudiya.
S'ha seleccionat:
Luka 4: fuv
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© 2010, Bible League. All rights reserved.