Genesis 3
3
Nubiṉi-yung ambini-waṉbina aladi.
1Anubani ana-marryn wu-gaḻij-mamaaḻang-bindiyung, ana-mulung-arrgi-wala wu-mun-bulal-wulal-inyung na-Yawei na-God ni-warra-maṉdhangi-yinyung. Anaani ana-marryn ngarra-maṉinyung nginggu-magayn, “Yuga na-God niini-magayn, ‘yagi niini-ngi anu-ngugulmung anaarrawindi-lhangu anu-bal’?” wu-yamayn.
2Ngigaayung ngarra-maṉinyung ngi-yambalmayn, “Naani-nguyii anaarrawindi-lhangu anu-bal. 3Yagu bandharra bagu wu-burraa, ni-yamayn ‘Bandharra bagu wu-burraa, yagi niini-ngi anu-ngugulmung anu-bal-inyung. Yagu naani-ngang-maynji yagu naani-wiḻdhang-maynji, naani-ngawang.’ ” Dani-yung ngi-yamayn ngarra-maṉinyung.
4Wugurraayung ana-marryn wu-yamayn, “Waari aniijgubulu-magaa, yagi niini-ngawi. 5Na-God ni-yamayn anubani, ni-marrbuy yamba nimbini-nguyii-maynji, nimbini-yamana nigawi-yii na-God-jii. Nuguṉi nimbini-marrbuy anaambaḻaman marri anaaladi, nguynju nigawi-yii na-God-yii, niga yamba ni-marrbuy.” Dani-yung wu-yamayn ana-marryn.
6Ngarraagi ngarra-maṉinyung ngi-warranggayn, nga ngi-nayn ambaḻaman wu-mamaarriynjini anu-ngugulmung, marri ngiwu-ngaynbandangi angi-yina-mamaaḻang yungguyung. Marri ngi-miyn anu-ngugulmung marri ngi-ngang. Marri ngijang ngunu-yayn ngigawi naaṉngina-yung marri nigaayung ni-ngang. 7Anubani-yung wini-nguni-wala, wini-warranggaa, wini-marrbuy wini-mamar. Naawiṉi-yung winiimbuliyn. Yagu winima-mangi magujiyarr ama-nunganyang. Bama-yung-mirri wini-ngarrayini.
8Anubagu ngi-waḻirr-wiḻibiḻingiyn ngi-yabini-wuy, naawiṉi-yung wunu-yaynjangang na-Yawei na-God, ni-yanggi wu-wanuynjungini-waj. Nga wini-julubiyn wubani a-rangag-gaj.
9Nga na-Yawei na-God naa-gaḏangi na-waḻyinyung, “Ajiga-rruj?”
10Nigaayung nu-yambalmayn, “Ngunu-yaynjangani wu-wanuynjungina-wala, nga ngaya nga-ḏirrngawiiyn nga ngaambuliyn nga nga-julubiyn nugawi-wala, yagu yamba ngaya nga-mamar.” Dani-yung ni-yamayn.
11Nigaayung na-God nu-yamijgayn, “Yangi-nyung nagang nimbi-magaa nu-mamar? Yagu anubani nu-nguni anubani anu-ngugulmung, anubani ngunu-magaa mirraadhu ‘yagi nu-ngi’?” Dani-yung ni-yamayn.
12Nigaayung na-waḻyinyung nu-yambalmayn, “Maṉinyung yamba, nu-ngu-burriyn-jinyung ngayawi-rruj. Ngangi-yayn marri nga-nguni anu-ngugulmung,” ni-yamayn.
13Nigaayung na-Yawei na-God ngu-yandhawiwayn ngarra-maṉinyung, “Yuga nagang nuynjaminggarriyn?”
Ngigaayung ngunu-yambalmayn, “Marryn yamba, nganggu-dhaayurrijgaa ngaya marri nga-nguni,” ngi-yamayn.
14Nigaayung naagi-yung na-Yawei nu-magayn ana-marryn, “Nagang yamba nunggaṉbini,
nu-ngu-guldhiyn, numbiri-wiri-lhangu anaarrawindi-lhangu wu-mun-bulal-wulal-inyung.
Anaanila-wala aḏaba nagang ba-yalgarrwina
nugawi-mirri ba-gulmung-baḻawaḻajaa.
Nga nagang bawu-nguyii lhagabuṉulg
ngarraaḻirr-lhangu ba-burraa-maynji
anggu-jarrmayarrmaj nugawi ana-wiri.
15Ngaya nganaagajij-maṉdhii nagang marri ngarra-maṉinyung nimbiniirriyn-marrdiynjina.
Marri ngigawi-nyinyung warra-mijburrayung
marri nugawi-nyinyung warra-mijburrayung amburru-wiynjina.
Ngigawi-nyinyung warra-mijburrayung ambiimbaḻ-wadjii,
marri wugurraayung ambii-lhungujun-bangana.”
Dani-yung ni-yamayn na-Yawei.
16Anubanila, naagi-yung ngu-magayn ngarra-maṉinyung, ni-yamayn,
“Ngaya wiiyn baarragayii-yinyung bamba-yabang-maynji warra-gujuju.
Yagu banu-ngaynbandii-wugij nugawi naaṉnginaaj, marri ani-buunggawa-mana nagang.”
Dani-yung ni-yamayn.
17Anubanila, naagi-yung nu-magayn na-waḻyinyung, “Nagang nungu-yandhurrbang nga-rangarrinaaj, marri nu-nguni anu-ngugulmung, anubani-yung-jinyung ngaya ngana-magaa ‘Nagang yagi nu-ngi’.
Wudani-yung-gala, anaaban nganggaaladi-wang.
marri ba-mijgalmina angudu nguynju yadhu ba-nguyii ana-marrya,
ba-burraa-maynji nugawi-nyinyung ana-wiri.
18Anaaban arra-waṉagana miḏaaburruburru marri rawurrumugurrumu.
Marri aynba-gaynbaj-jinyung baarra-nguyii anu-bal.
19Marri ba-mijgalmina angaḏajung, marri ba-wurrij-burii,
ba-mani-yinyung ana-marrya.
Murrubu nagang baagiyn aaban-guy,
wubanila-wala yamba nagang nu-maṉdhini.
Aaban-gala nagang,
Marri aaban-guy baagiyn.”
Dani-yung ni-yamayn na-Yawei.
20Naagi na-waḻyinyung, Adam na-nimuwaj-jung. Naagi-yung ngu-mijgayn nigawi nga-rangarrina-yung, Eve ngarra-ngarrimuwaj-jung. Ngiga yamba warraarrawindi-lhangu nga-rriibi-yung, warraarrawindi-lhangu warru-mandag.
21Anubanila-wala, na-Yawei na-God wani-majgaa yaaḻi wubarriguḻag wu-mun-bulal-wulal-inyung. Yagu na-Adam marri nga-rangarrina-yung wani-yabijgaa wubarriguḻag-mirri.
22Anubanila-wala, naagi-yung na-Yawei na-God ni-yamayn, “Aḏaba na-waḻyinyung ni-yamana ngagurri-yii, ni-marrbuy wu-waṉbina-yinyung ambaḻaman marri aladi. Niga yagi ni-marang-dhaayi marri ni-mi anu-ngugulmung anubanila-wala anu-bal ana-wiri-yinyung, yagi ni-ngi, ani-burrang anggu-wuguuguni.” Dani-yung ni-yamayn.
23Anubanila naagi-yung na-Yawei wani-lharrgang wuguṉi anubanila-wala ana-Eden-gala, nguynju na-waḻyinyung ani-mijgalmini anaaban, niga yamba ni-maṉdhini wubanila-wala aaban-gala.
24Anubanila-wala, ana-ramalila wu-wanuynjungina-wala, niga ni-burri wu-wiri-yinyung ana-angel, narrangi, waṉagaa jarrmayarrmaj galiwanga warra-lhalmbaarrangi, warawararbini. Yaani yungguyung waari amburru-yanggi ana-warubaj ambirri-jiibugaa anu-bal ana-wiri-yinyung.
S'ha seleccionat:
Genesis 3: nuyNTPO
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© 2007, Wycliffe Bible Translators, Inc. All rights reserved.